賣斷

金融海嘯先打中股市，第二浪就輪到打樓市!

一連串對樓市不利嘅消息，匯豐加息半厘，長實仲一次過賣斷仲起緊嘅兩個豪宅項目，套現為上!

先講匯豐加息，佢七月時明加暗降利率，令按揭市場佔有率升第一位，不過今次真係有意唔做，大幅調高新造樓宇按揭利率半厘，令樓市又多一個阻力。

滙豐話，加按揭利息，係因為拆息高企。

事實上，東亞銀行雖然力保不失，不過就令市場資金非常緊絀，三個月拆息近日持續上升，已經升到3厘樓上，比正常水平高超過半厘。

至於更令人吃驚的是，長實將兩個發展中地盤、包括廣播道81號，即係亞視舊址，市場指，長實以大約20億賣斷比美國一個退休基金，呎價萬二蚊。

另一個係干德道16至18號，作價6億3000萬，每呎要萬五蚊。

亞視舊址零五年以6億買入，干德道買入價係1億9，所以今次交易26億，長實獲利可觀，暫時成為今年以嚟、最大宗單一物業交易。

今次亦係長實近年嚟、首次將發展中嘅地盤賣斷。

誠哥早前話過，樓市對本港非常重要，但已經再無半年前咁樂觀。

其實長實之前透露目標可以賣到萬八蚊一方呎，而家未到價就肯將地盤賣斷、係反映對後市轉為審慎。