2010年6月29日星期二

錯晒

以為2500點係「銅牆鐵壁」,點都穿唔破,點知一個「黑色星期二」,又將內地股民所有希望打散!

最慘係之前上證幾次都守著呢個位,唔少股民都放心「撈底」,點知原來係「深不見底」先真!

有內地分析員更大吹淡風,話今次要跌兩成至兩成半先「夠數」!

最令人意外係今次跌市借口,居然係搵美國經濟諮商會出手,借向下修訂中國領先經濟指標、成為推低大市元兇。

美國經濟諮商會,大家最熟悉會係他們每個月公布的美國領先經濟指標,今次就向下修訂四月中國領先經濟指標,

由六月十五號公布既上升1.7%、突然喺星期一大幅向下修訂為、只係上升0.3%,
誤差達到1.4個百分點。

商會話,今次大幅向下修訂數據,係由於第一次公布既時候,涉及「計算錯誤」,
因此需要「更正」。

所以計算誤差,正是近日陷入水深火熱的樓市,佢地將全國房屋建築新開工既面積,錯誤計算為有一點三個百分點既貢獻,但實際上應係負零點一個百分點。

唔止內地股民,就連中環人都問、呢個所謂中國領先經濟指標到底係咩數據?過去好似未見過!

其實未見過一啲都唔出奇!因為呢個數據只係第二個月面世,點之已經因為「計錯數」,搞左個「大頭佛」出嚟!

另一個震散市場既炸彈,係人行突然改變左過去七個星期、連續向市場注資既做法,今日向市場發行左總值550億元人民幣既央票,比起之前突然大升十倍,即時引嚟市場疑雲、驚人行又抽緊銀根!

好在到收市後謎底終於解開,原來又係錯配:呢五百五十億票據,有九成都係被工行接貨,用嚟對沖佢地有近四千億人民幣專項票據到期。

有銀行話,扣除呢五百億,實際上人行發行票據只係五十億,同過去幾個星期基本一樣!

呢個舉動真係嚇親市場,因為面對農行招股,過去幾個星期拆息持續上升,人行不斷注資,投入資金達到七千一百億,足足抵銷晒加三次存款準備金既影響!

不過就算無呢啲因素,內地股市上半年表現都係好差,累積跌左26%,雖然排名追唔上「神話破滅」既希臘(趺34%),只係好過西班牙少少(跌21%),但作為全球經濟增長得最快既經濟體,居然要同「歐豬五國」睇齊,未免有啲令人啼笑皆非!

如果睇PE,A股的確由年初33倍,已經回落至而家18倍。

但估值抵還抵,低面對阿爺收緊政策同歐債危機,下半年股市都係要吹逆風,A股只會窄幅上落,要上車,自己要先衡量下頂唔頂得著!

2010年6月28日星期一

豬二十之世盃外交

知唔知G20領導人喺多倫多,最搵得多人幫忙係咩事?

多倫多旅遊局,連日嚟就收到多國代表團查詢,到底邊度係睇波最好地方!

原來係世界盃!加拿大自從四分一世紀前打入過總決賽後,一直同世界盃無緣,當地人都唔多興睇波,不過包括美國總統奧巴馬、英國卡梅倫、德國既默克爾、以至嚟自亞洲既菅直人同李明博,都係標準球迷,所以世界盃就成為唔少領袖會談前既開場白。

講「迷」,奧巴馬可以話係表表者。佢同卡梅倫雙邊會談之際,財長蓋特納就出出入入,原來係通風報信話比佢聽美國對加納戰果。

之後奧巴馬更入左間房睇加時賽,白宮幕僚長「伊曼紐爾」催促佢南韓總理李明博、正等佢雙邊會談。奧巴馬就話要比多五分鐘,因為戰情實在太緊張!

講戲劇性就一定係英德大戰!英國首相卡梅倫、同德國總理默克爾,仲約埋睇電視直播。

結果一球世紀問題球、令英格蘭輸一比四,默克爾仲要安慰卡梅倫,為球證對英格蘭嘅誤判,向佢表示歉意。

見到啲領袖睇波睇得咁入神,我開始了解,點解今次外界批評今次G20峰會無料到!

唔怪得有人話今次係「豬二十峰會」,即係講多過做!

看完八頁的聯合聲明,相信大家都同意是整個會議最具體的結果,結果是最後關頭、包括德國等國家都支持控制財赤,爭取喺二零一三年將赤字預算減少一半。到二零一六年,令負債率趨於穩定。

不過美國總統奧巴馬就大力主張刺激經濟,以確保經濟增長。

雖然美國都有嚴重赤字,舊年就有一萬四千幾億美元赤字,但就堅持走刺激經濟路線,認為政府減少開支,好可能會重蹈一九三零年代大蕭條嘅覆轍。

最終峰會採取折衷方案、既實現減少財赤目標,亦允許各國自行決定,刺激經濟計劃實行到幾時。

華爾街日報專登搵左前IMF首席經濟師、即係上星期我地拆局好書「13 Bankers」位作者Simon Johnson,逐頁逐行去解讀呢分G20聲明。

對於會前各國不斷放風、話會喺會上提出收緊銀行資本同建議開徵銀行稅,Johnson批評完全係一場「政治Show」,特別係對於聲明提到銀行大幅提升資本,
Johnson話所謂「大幅」,就係大到足以比傳媒留意、但又唔會對銀行有實質影響!

對於大會唯一成果,就係聲明中寫明爭取要喺二零一三年、各國將赤字預算減半,曾經喺IMF做過既Johnson,呢個肯定係IMF滅赤「鷹派」既功勞,但就似乎係過度反應!

Johnson話,G20既領袖其實只係依靠一個「救星」,就係國家主席胡錦濤,但佢理解北京其實正係為Overinvestment同Overcapacity而苦腦,佢唔知胡主席係咪過於禮貌、而唔將呢個問題帶到大會上?

2010年6月26日星期六

13 Bankers

今個星期五介紹既「財經拆局」好書,同今日美國國會啱啱通過既金融改革法案,可以話首尾呼應!

套用作者Simon Johnson既理論,今日政府對銀行作出讓步,可以話完全係喺佢預料之內!

倒序時間到09年3月27日,啱啱上任總統兩個月既奧巴馬,喺華盛頓召見左十三個銀行家。

當時金融海嘯正係喺水深火熱之中,當時環球股市暴跌左四成,道指收喺7800點樓下,當時奧巴馬講左兩句:"We are all this together.","Help me help you."

套用當時有分出席既花旗潘迪特講法,大家同坐一條船。

呢個會議,亦成為左"13 Bankers"呢本書中,作者最有興趣提出既問題:銀行家當時好明顯需要政府拯救,但點解奧巴馬會話:help me?

曾經出任IMF 首席經濟師,作者Johnson認為奧巴馬其實無得揀。

因為經過過去30年發展,銀行、已經成為全美國最累積財富既工業,美國既經濟前景,全數賭喺呢13 個bankers身上!

佢喺書中提出一套理論,就係銀行業成為左美國既「寡頭壟斷」Oligarchy,亦即係社會最上層既特權階級,佢地靠既唔係賄賂、或者收賣,而係因為不斷增加既經濟實力、而累積自己既政治資本,簡單講,就係以盈利同Bonus進一步鞏固、華爾街既聲望同影響力。

作者提出,銀行家想取得特權既陰謀,早喺兩個世紀之前已經出現,不過當時被美國第三任總統杰克遜Thomas Jefferson打破嚟來銀行既威脅,但事隔二百年,呢啲銀行家又再捲土重來!

其實書入面提出,奧巴馬唔應該以開「空頭支票」既方式,去救銀行,相反,應該用接管既方式、令銀行既管理層、股東以至債權人承擔自己既責任,而唔係用納稅人既金錢去補貼呢啲特權階級。

書入面提出,應該要限制單一銀行既資產、唔可以超過GDP總值既百分之四,以免出現「Too Big to Fail」既銀行。

如果奧巴馬舊年用呢個方法,至少就有六間銀行要倒閉。

不過由今日通過既金融改革方案讓步既程度嚟睇,似乎呢13 個Bankers,又再次贏得一次勝利!

2010年6月25日星期五

厚達二千頁既金融改革法案,連續傾左超過二十個鐘頭,喺最關鍵強制銀行分拆、衍生工具同掉期交易部門上,民主黨參議院農業委員會主席Blanche Lincoln林肯願意讓步。

林肯同意銀行可以保留有關利率、外匯掉期等部門作對沖風險,但如果涉及違約交易掉期、商品期貨(包括石油)同無投資級別既債券,就仍然需要通過附屬機構進行。

相信最初沒有太多人會想到、整個金融法案最大Player竟會是農業委員會的林肯,她可以說是演繹了最專業的政客演員,堪稱是最大嬴家。

而喺禁止銀行經營或者參與對沖基金既規則上、由於財長蓋特納堅持,委員會亦作出讓步,容許銀行可以投資唔超過百分之三既資本、投資喺私募基金或者係對沖基金上。

至於喺禁止銀行參與「坐盤交易」既法例上,委員會就會將禁止銀行參與坐盤交易、直接立法,而唔係之前交由監管機構研究相關既立法工作。

當然大家最關心是到底今次法案銀行是贏多輸多? 大報似乎各有演繹,WSJ較傾向認為政府贏出一仗,FT就認為是國會讓步。

最真實的、當然是銀行股價反應,由星期五情況來看,銀行家就是一面倒贏了。

有華爾街高層亦已表明,今次係屬於銀行界一次勝利,雖然部分坐盤要分拆開來,但單係放寬銀行可以投資對沖基金,就對銀行非常有利。

佢地統計百分之三資本呢個準則,花旗就可以投資三十五億美元,佢地只係需要減持近十五億美元既對沖基金投資,至於高盛同大摩由於資產負債表較細,獲得既豁免就相對較少。

之前高盛CFO曾經說過坐盤交易佔了他們收入一成,如今限制只佔資本3%,咁又有幾多貨要掉番出來?

但一得就有一失,令銀行意外既係、為左應付新既監管需要,佢地合共需要繳付一百九十億美元既銀行稅。

其實比稅就真是小兒科,只要有機會繼續搵錢,銀行家又豈會錯過機會?

2010年6月24日星期四

十一基石

中東主權基金、澳洲傳媒大亨、同埋Holland Bank有咩關係?

表面睇大纜都扯唔埋,但實質「情繫一線」,呢條紅娘線咪就係農行!

一波三折、農行終於喺H股啟動前集齊11基石股東,當中有中東政府背景、又有外資銀行、連澳洲傳媒「柒集團」,都要分一杯羹!

表面睇,有錢大家搵,農行又可以湊夠數,好似特首話齋,雙贏!

但華爾街日報唔係咁睇,形容呢啲基石投資者動機「不純」。

先睇最無厘頭既中東主權基金,同農行就肯定無咩生意來往,但出手就最闊綽,夾埋用左36億美元,佔左呢舊「基石」六成六「重量」,原因原來又係「西向東移」!

金融海嘯期間,中東錢買左唔少美資銀行,但好似中東股神咁、投資喺花旗銀行既錢就好似掉落咸水海,為左彌補呢段失去既美好時光,36億美金,唔貴唔貴!

至於同農行建立左戰略合作渣打同荷合,用區區五億同二億五美金,就能夠打開呢個中方大門,特別係渣打,終於可以追上匯豐,抵!

反而呢個「柒集團」,大家可能唔多熟悉,但佢正係來自今日「逼宮」成功既袋鼠國,係當地數一數二既傳媒集團,不過今次入股唔係想參與三網融合,而係希望可以將佢地代理既重型機械,透過農行網絡打入全國!

至於美資農業集團ADM,動機就簡單明確。

農行既客戶群達到三億五千萬,仲多過成個美國人口總和,如果ADM可以賣到佢啲大豆同農產品到內地,肯定唔使憂! (不過點解內地農民要買美國大豆? 怪哉!)

難怪農行有咁大吸引力,今日推介會吸引到六百幾個芬佬到場,大會仲要臨時打多一百張櫈先夠坐。

雖然無咩大孖沙撐場,但就見到前總理朱鎔基個仔、中金既朱雲來有到場。

事實係中金撐場一啲都唔令人意外,佢地同中信證券以及大摩,出既保薦人報告都係為左農行「保駕護航」,可以話盡心盡力,提出既P Book都話應該有兩倍樓上,可惜最後市況唔就,但亦非戰之罪!

而家農行帳面值1.55到1.79倍,低於市場預期。

以定價下限既帳面值,比中行嘅1.6倍略低,亦遠低過其他大型銀行,好似建行、工行嘅1.9倍。

但話兩分兩頭,雖然而家市帳率可以話平絕四行,但農行既ROE同壞帳率,都遠差過其他三大行,特別係不良貸款比率高出其他銀行幾近一倍,你估話跌就趺!

所以話,呢「十一基石」雖然佔左發行量四成,但位位都有自己既「不良」動機,而我地作為普通投資者,應唔應該坐埋呢條船,值得諗諗!

Soccernomics

法國隊輸波,股神笑呵呵。

巴菲特早喺3月時,已經睇淡法國隊。

事關股神隻投資旗艦巴郡、旗下嘅保險公司,做左單DEAL,如果法國隊贏,就要賠三千萬美元俾個客。

表面上睇嚟,就係個客想買保險。不過,有學者從做統計學角度去睇,呢個DEAL值博率好細。

所以佢話,巴菲特願意受保,純粹係賭法國隊奪標無望,今次真係股神變賭神,果然係我偶像!

同樣睇得準嘅、仲有法國隊同鄉家樂福,事關佢地5月頭同國家隊續約,繼續做贊助商。

之前出左個優惠,如果法國隊贏波嘅話,喺5月買左電視嘅朋友,可以claim返錢;入到決賽,都claim一半。

而家慳返啦,所以亦有人懷疑向股神買足球保險既、正係家樂福。

正正係同一個鄉下,熟悉晒啲球員脾性。

輸波都算,仲要鬧教練、唔肯練波,更要勞煩總統薩爾科齊開聲,但最終都係無補於事。

連法國人都話,波踢得差已經唔能夠承受,仲要將啲咁愚蠢嘅行為,俾全世界見到,更加唔可以容忍。

無錯,所以好多法國隊贊助商都表示不滿。法國農業銀行取消左、幾個球星嘅宣傳;漢堡飽連鎖店QUICK、都好快抽起前鋒安歷卡嘅廣告。

其他贊助商都紛紛話,要重新檢討贊助條款,同法國足總傾過。

最慘嘅可能係NIKE,因為佢地用左4千萬歐元、喺Adidas搶左個贊助權返嚟,管理層應該後悔緊做錯決定!

不過,喺一片愁雲慘霧之中,有一個另類贊助商就好高興!

愛爾蘭一間薄餅店,老闆話,法國隊每輸一球,就會免費請大家食350個PIZZA。點解佢慷慨呢?因為喺外圍賽附加賽,法國隊使出上帝之手,令到愛爾蘭以一比二輸俾法國,無緣晉身決賽周。

輸波、輸球品,最後輸埋民心,何苦呢?

2010年6月23日星期三

鵪鶉

果然不幸言中,政府九招十二式又「鵪鶉」收場…..唉!

財爺四月在立法會先高調介入,指明發展商新盤首張價單須包括更多單位,指明大型發展項目則須最少提供50個單位、或可供出售的單位的百分之五十,兩者以較高者為準。

話明首批單位數量以較高為準,但措施執行後首個樓花盤、信和嘅帝峯皇殿首批只係推75伙,佔全個樓盤近一千個單位既百分之八。

明顯這同市場理解、大型項目要提供至少一半,即係四百幾個單位有好大差距。

但政府話,咁做無違規。

之可以咁,係因為運輸及房屋局之後出嘅文本,修訂左財政司原來既講法,加入左『每一批』同「該批」呢兩個字眼。

新措施變成新盤大型項目「每一批」價單,只要做到提供至少五十個伙、或者「該批」單位既一半,就符合指引。

至於「首批」係點定義?由邊個負責界定?房屋局話,發展商有空間自己定。

又話,市場有誤解、只係大家睇得唔夠深入。

唉,真係又當我唔識嘢,但至少除了下亞厘畢道同地產商會個幾百個會員,我估最少有七百萬人同我一樣唔識嘢!

政府又話,而大型項目首批至少要賣50個單位、已經多過舊例要求嘅二十個,做到增加發售單位既原意。

不過睇番幾個新例執行前開嘅新盤,首批單位都已經超過20個,甚至提供全盤既一半,反映新例無助增加樓花盤嘅首批供應。

規管現樓又讓步、開售單位又暗啞底收皮,說來說去,最做到嘢只得個規管示範單位…..唉!

唔通政改過左,真係咩都可以算數?

2010年6月21日星期一

假身

人行一句「增加匯率彈性」,引嚟無限憧憬。

人民幣中間價平開,一個鐘之後,突然急升至6.811兌一美元,下晝再出現一次異動,仲一舉升穿埋6.8,係05年7月匯改以嚟最高,以升幅計係百分之零點四二,亦迫近每日波幅上限。

為左應對金融海嘯,人民幣改同美元掛鈎,近兩年嚟一直保持平穩。直到二十國峰會前夕,至放風會將人民幣鬆綁。

揀呢個時機,表面上係中國向西方示好,願意就匯率問題讓步,但實情係,匯率改革仍然按國情推進。

因為除左內地出口穩定,導致人行要出手嘅主因,仲係資本外流。

內地5月新增外匯金額,就大減54%,得千三億人民幣。反映熱錢流入明顯減少。(這亦解釋了為何早前會出現黑市人民幣匯價仲低過官價。)

看來喺歐洲債務危機同美元發揮避險功能之下,中國甚至有資本外流現象。

配合國情之外,人行亦做到出其不意。

當市場仲討論緊,退市無望,大型對沖基金早喺5月份,就算蝕錢,都要平倉,唔再揸人民幣好倉。

喺反映人民幣匯率預期嘅、遠期不交收合約市場,人民幣更加全部被清盤。

加上中國官員一連串假動作,更加令市場相信人民幣升值無望。人行喺呢個時候出手,可以話係一石二鳥,連投機者從中獲利嘅機會都握殺埋。

所以華爾街日報形容今次人行重新啟動匯改、就好似做左個好靚既假動作,仲話如果國家隊既隊員,有人行官員一半咁叻,中國早就打入左世界盃!

當然,人行亦唔可以無視國際壓力,好似喺中國加入WTO近十年前夕,中國三十人既代表團、竟然要面對各國近一千五百題既提問,就係反映全球對中國匯率同貿易政策既關注。

金融時報Lex都有相同想法,雖然內地唔情願,但胡主席要前往加拿大出席G20峰會,中國點都要想辨法盡番世界公民既責任!
呢招高明之處,仲係主席將呢個金融危機既「波」,由中國踢返到歐美國家既場上。

彭博更形容、奧巴馬同蓋特納唔應該咁快開香檳慶祝,因為導致全球經濟失衡呢個重擔、又再次落喺歐美呢啲高負債既經濟體系。

當然,呢步棋仲有一個高明之處,就係呢個時間將人民幣升值,確實係有利中國減低資產泡沬同通脹風險,而各大行亦第一時間撲出嚟、叫大家快啲「Buy China」!

不過陰謀論家就提到,呢啲都唔係升值理由,你唔見有隻新股國際配售,即刻足額認購咩?

2010年6月20日星期日

打籠通

二十國集團峰會下星期召開,中國表示會推進人民幣匯率改革,增強人民幣匯率彈性。

(話說回來,阿爺真係好鬼鐘意趁著周末出席,真係想靜雞雞、無人覺?)

人民銀行指,匯率形成機制改革會堅持以市場供求做基礎,參考一籃子貨幣進行調節,按匯率浮動區間管理。人行又表示,全球經濟逐步復甦,中國亦趨於平穩,有必要進一步推進改革。

有印象大家會記得,人民幣第一次匯改在05年7.21,由當時到08年中,人仔有效匯率實質升值了21%,不過在08年中面對金融海嘯來臨,中央當然不敢怠慢,即時改變一籃子貨幣掛勾的政策,而過去兩年將人民幣緊釘美元表現,雖然相關政策並無明顯說明,但大家人知肚明,知道人仔變成花旗國「傀儡」貨幣。

就好像蓋特納曾經說過,中國又豈會將本身貨幣政策主導權交比番子佬? 問題淨下就是時間。

說到時間,最明顯不過當然是二十國集團峰會、下星期六就在加拿大召開,國家主席胡錦濤已經答允出席。而美國總統奧巴馬致函各國,指匯率彈性對支撐全球的經濟平衡好重要,亦是間接向中國施壓。

內部方面,人民幣升值可以抵銷入口價格升幅,對於中國依賴龐大進口加工的經濟體系,有助減低入口通脹壓力。不要忘記,五月內地CPI已經超左中央定下全年3%的警戒線。

不過要留意,今次人行並無說明升值的時間、亦未有像一些人預期會一次過升值,反映在歐債危機的沖擊下,內地亦不得不有所保留。事實上,由於美元在今次債務中成為資金避風港,亦令人民幣兌歐元升值了15%,加上內地工潮擴散,工資上升以及人民幣升值,均對出口企業做成了不少打擊,內地不可不防。

說到底,今次最大贏家肯定是蓋特納,四月先將操控國名單決定時間押後,到上星期更一改被動立場,成為了強硬派,之後人行就有所動作,這個「打籠通」也做得太過明顯了吧?

2010年6月18日星期五

Wrong Number


Nokia會否成為下一間摩托羅拉? 相信今個星期成為了不少人心中的疑問。

就在蘋果表示iPhone首日訂單達到60萬部的同時,被iPhone及Android威脅的諾基亞,卻要發盈利警告,指第二季嘅手機銷售同盈利,都會差過預期。

唔知諾基亞CEO「卡拉沃」睇到人地賣過滿堂紅既時候,心中會有咩感想?

當然,市場不會理會你點諗,只會以實際行動對諾基亞作出懲罰。Nokia股價當日急挫近一成,跌至15個月低位。

「卡拉沃」06年接任諾基亞總裁,一年之後喬布斯既iPhone亦開始面世,不過當初「卡拉沃」根本睇唔起呢部手機,認為小眾玩意,點知之後每一代反應都比之前更加熱賣,最新iPhone4喺星期二嘅首日預訂,接到嘅訂單超過60萬部,AT&T更要暫停接受預訂,蘋果官方網站既交貨日期,更要兩度押後。

到今年初諾基亞先至如夢初醒,覺得自己要打入智能手機既市場,計劃每三季推出佢地既秘密武器「N8」。

睇規格呢部N8一啲都唔弱,有齊Multi-touch螢幕、諾基亞最新既Symbian 3手機平台,可以輸出HDMI質素畫面,一千二百萬像素既攝影鏡頭,定價亦都吸引,只係五百美元。

但呢啲功能,早喺一年前既Smartphone已經有齊,而家最多係同對手睇齊喎!

所以有分析員話,N8一面世都已經變成一款「舊機」,因為對手已經係進入左下一個階段,而諾基亞喺呢場智能手機既革命中,根本就局外人。

實際上以平取勝既年代已經結束,網絡商要的、是要好像iPhone或 Android般,可以結合上網使用的手機,因為唯有如此才可以谷高數據使用量。

講番諾基亞既Symbian平台,旗艦S60由 01年開始使用,經歷五代變化,雖然號稱是智能手機平台,但要到今年二月先變成Open Source,到秋天先推出Symbian 3手機,可以話「Behind the Curve」!

喺iPhone同Adnroid開發Twister Apps既工程師話,諾基亞既平台跟本唔能同其他智能手機相比,介面過分舊式,最重要係對使用者完全做唔到「User friendly」,佢地唔會浪費資源同時間去開發軟件。

好似今期經濟學人咁講,而家手機已經演變成一場「Platform War」,鬥既唔再係手機功能,而係到底可以有Apps應用。

以蘋果同Google Androids雖然市佔率都係落後於諾基亞,不過前者有二十二萬個Apps,而Android亦有超過六萬個,基本上每一年手機增長都係去晒呢兩部手機身上,諾基亞既市場佔有率,只有不斷下跌。

經濟學人已經預言,未來所有既商品,都會有apps出現。

諾基亞一度佔芬蘭市值三分之一,佢地既出口就佔左整體出口既四分一,而家變成沒落企業,股價由高位回落超過五成,相反蘋果就喺星期四創出新高,可說是此消彼長。

企業滅亡既五部曲之中,諾基亞已經步入「否認錯誤」呢個第三階段,相信好快就會進入第四階段既尋求救星,包括最近更換左智能手機既主管,分析員都相信、唔使好耐亦會係「卡拉沃」人頭落地之時!

華爾街日報形容,諾基亞係「打錯電話」,股東亦都對管理層失去耐性,此情此境都咪話唔令人唏噓。

2010年6月17日星期四

有錢唔賺

舊年十月話賣咗廿四個單位,事隔八個月,二十個撻咗訂,事件好像告一個段落。

但留下的疑問,肯定比答案多。

包括以天價七萬一千蚊呎賣嘅單位,點解咁多撻訂?

點解恒基唔追收重售差價? 點解只殺訂5%咁少?

究竟買家同恒基有咩關係?

我地問過法律界人士話,由於天匯呢類豪宅成交價往往過億,買賣條款會有較大彈性,當日價單都寫明只會最多殺訂百分之五。

但不追收差價就令人相當費解,有證券行就計過,天匯二十個撻訂單位,當日平均賣四萬一千幾蚊呎,而家重售跌價三成六,如果恒基肯學其他發展商追收差價,可以收番12億元、唔係而家只係殺訂一億三千萬。

十億元理論上可以全數撥入盈利,有錢唔賺、點都要股東解釋啩?

由大跳層,到驚天大撻訂,李兆基雖然話好少事,但證券界另有諗法。

瑞信撻訂唔收差價,已經對股東唔公平。

由於撻訂令恒地有虧損七億幾,幾間大行話,影響唔大。

但錢銀事少,信心事大。

佢地提到恒地新盤被買家撻訂不止一次,天匯之外,亦有沙田名家匯,質疑恒地執行賣樓部署能力,恒地管理層似乎要留意呢個問題。

政府亦開始高調回應,話同公眾一樣關注、天匯最終只係有四個單位完成交易,政府絕唔容許任何製造虛假交易、發放混亂銷情資訊嘅行為。

仲話政府相關監管及執法部門,現正研究同跟進有關個案。

死啦,唔通四叔要坐? 陰功!

2010年6月15日星期二

華爾街速遞


終於有網上版,各位可以重溫這個繼Moneycafe後、最成功的改革節目。

一切由這裹開始

題外話:Sorry,今集CAFE四位主持似乎都無咩童心玩玩具,全集「語無論次」,作為30年的高達迷,我建議各位看吳偉明教授的「知日部屋」,可以更了解哈日族及日本動畫玩具的真正營銷策略。
//////////////////////////
「撻訂咪殺訂囉! 規規矩矩無犯法嘛,而家再賣都未必無著數,唔會減價!」

「咁簡單的事,你地(指記者)做咩追得咁緊要,搞到大家都唔開心!」

話過616天匯交易就會清清楚楚,結果喺限期前一日,廿四個延遲成交單位、有二十個撻訂收場,仲有人要發老脾。

呢二十個撻訂單位,包括當日恒基高調宣佈,以天價七萬一千蚊呎賣嘅68樓A、同隔離嘅6萬4千蚊呎嘅68樓B,恒基總共沒收咗買家訂金1.33億。

可以成交到嘅,得番四個喺30同31樓嘅單位,恒基向買家罰咗千幾萬息。

李兆基過去曾經多次話延遲交易、係應買家要求,絕對冇造市,仲開出一萬賠一百萬嘅盤口,而家就賴帳,收人家幾萬元盤口,只係寄回原銀比人家,再不提一萬賠一百萬。

老實說,對四叔呢類超級大富豪,錢銀事少,聲譽同信用才比身家重要,今次認真傷!

這個天匯真的可說是「是非之地」,最高超過七萬蚊呎開盤,令樓市火上加油。

呎價破全球記錄之餘,天匯跳層,更引起各界關注。

期後成交記錄發現,大部分單位係以公司名義同一買家買落,政府六度去信下令恒地交代。

李兆基多次話有信心完成交易,但成交期愈近,佢改口話,有得傾。

現在回看,天匯是否造假只有當事人知,但可以肯定是天匯成了樓市的一個轉捩點,樓價在當日愈炒愈之餘,政府亦順應民意,高調介入。

先打擊跳層、再打擊造假、順手規範埋示範單位,之後更傾生九招十二式以及改變過去八年來的勾地制度、首次由政府主動推出賣地。

一切都是由天匯開始…….

至於當日因為天匯高追嘅同類豪宅嘅買家,就應要多謝四叔帶契,因為以同區既樓價計,依家比番十月,樓價仲要高出三成。

他們可能是成件事中,唯一的贏家。

2010年6月14日星期一

魚與金改

美國既政客同學者,近日分成左兩個派別,其中代表人身有長蓋特納、伯南克、白宮經濟顧問薩默斯、學者有諾貝爾獎得主克魯明,呢個陣容點睇?

當中粒粒皆星,有晒當權同當時得令兩個因素,簡直可以呼風喚雨!

至於另一邊就只有前聯儲局主席格林斯潘同另一經濟學獎得主Joseph Stiglitz,牌面照計相距甚遠。

但結果因為只有一個人已經足以將呢啲所以當權派打倒!

佢就係前聯儲局主席、白宮經濟復蘇顧問委員會主席沃爾克。

就係因為佢,華爾街大行遊說國會、避免分拆坐盤交易,最終都失敗收場,有關既方案會喺下星期正式簽署成為法例。

沃爾克話,為左要保衛佢既「Volcker's Rule」,佢寧願放棄自己一個心愛嗜好,都要確保法案可以通過。

原來每年暑假,八十二歲既Paul Volcker都會去加拿大釣三文魚。(不錯,此君相當投入釣魚,甚至會代釣魚協會向政府提交意見如何保護魚業!)

不過佢今年取消左行程。

沃爾克話,自己只會喺銀行體系健全、又唔會有欺騙既情況,先有閒情逸緻去釣魚。(原來魚與金改,一樣不可兩者兼得!)

金融時報話,多間華爾街大行一直盡最後努力,向國會遊說、希望可以豁免將「坐盤交易」同衍生工具部門,要喺銀行入面分拆出嚟。

作為監管衍生工具既參議院農業委員會主席林肯(Blanche Linclon),一直反對沃爾克方案,連聯儲局同聯邦存款保險機構亦唔贊成方案,認為會令銀行將業務遷移至監管更寬鬆既地區。

不過最終既立法版本將唔會獲得豁免,金融時報話,將會大大影響到華爾街大行既盈利。

沃爾克反而到呢個時間,竟然對金改放軟態度,指外界一直混淆佢提出方案既原意、並非係反對銀行因為對沖風險、而要進行衍生工具買賣。

又提到銀行可以考慮成立控股公司,咁就可以同時擁有銀行同對沖部門。

到底金改後大行前景係點,且看華爾街「領先指標」GS股價表現,在跌足七日後股價先回穩一天,怕且大家心中有數!

女州長


加州即將「變天」!

喺上周的「超級星期二」,贏出共和黨喺加州州長同參議員、參選資格既黨代表、前eBay行政總裁惠特曼Meg Whitman、同前惠普總裁菲奧里納。

今次可以話打破晒加州既紀錄,同時有兩個女姓成為黨代表,其中又以Whitman最受注目,除左因為佢有望成為加州首位女州長外,更緊要係、佢有錢!

作為個人財富擁有十四億美元既女富豪,惠特曼喺初選使既競選經費,就已經多過06年阿諾舒華辛力加、同對手夾埋使既全部費用!

雖然係咪能夠成為女州長仲係未知數,但初選花費已經達八千一百萬美元,佢仲計劃全部既競選經費會使一億五千萬美元,成為歷史上最昂貴既競選活動!

惠特曼喺98至08年在任eBay行政總裁十年期間,將公司由三十人發展成一萬五千人既大企業,營業額由四百萬美元增加至八十億美元,可以話係最成功既女性CEO,佢相信憑著自己既戰績,可以成為拯救加州既救星。

當惠特曼知道自己獲得黨代表資格後,已出言挑釁民主黨人,叫呢啲華盛頓職業政客小心,話佢地噩夢即將來臨,因為來自真實世界佢,將懂得點樣創造就業,平衡預算同事情做好!

呢番說話都似乎係針對現任州長,大隻佬阿諾舒華辛力加。目前加州失業率高達12.6%,係三十年嚟最高,而且財赤仲超過一百五十億美元,IOU更加成為左加州既標誌。

惠特曼當然有豐富既經商經驗,不過要成首個女州長都有好大困難,好似佢要面對曾經、兩次出任州長既民主黨對手布朗,目前民意調查指佢仲係落後六個百分點,而最近佢更被揭發過去二十五年幾乎無投票紀錄,民主黨更指摘佢喺零二年前、曾經出任高盛董事會成員,認為佢同華爾街大行有分同流合污!

經濟學人就話,錢雖然喺競選活動中好有用、但唔係萬能,特別係有一個問題、所有候選人應該提出,但實際無人敢出聲既問題,就係點樣解決加州既財赤問題。

似乎大家都明白,就算再「叻」既人,要解決財赤不外係加稅減公務員人工,試問呢啲「競選票房毒藥」,邊個會提?

2010年6月12日星期六

天機

以往經驗,內地公布經濟數據,大家都嚴陣以待,但今日,通脹超標、PPI急升,金融市場都無晒反應。

可以有咩反應? 皆因路透社兩日前已經「洩露」左啲數據,同今日統計局公布嘅完全一樣。有反應,但已是兩日前嘅事。

內地傳媒形容,是"有如神助"般的"預測",因為出來的數據完全一致,精確度是到了十位數。

今次事先張揚事件,的確引起關注。

北京青年報發表評論文章,指責係有人受唔住「誘惑」,出賣左經濟情報,咁做已是違反國家法規。

洩密嘅後果可大可小。

大家仲記唔記得「席揚事件」? 93年,本港記者席揚,因為報道人民銀行將會參與國際黃金買賣,被控盜取及洩露國家機密罪,判監12年,回歸前方獲釋。

如果真係有人洩密嘅話,後果可以好嚴重。

但經濟數據、仲要係大國崛起嘅經濟數據,理論上屬於高度機密,係咪咁易洩露出去呢?

在領導人向外要求、美國要承認中國的「市場經濟」條件下,如果還存在這種精準無論的「小道消息」,那麼人家又如何可以承認你的市場經濟地位?

大家可以想像,美國會像內地般、預先放風公布”Non Farm Payroll”?

事態嚴重,國家統計局話,留意到有媒體早幾日已經預先披露數據,會徹查事件。

究竟係賊喊捉賊? 定係老虎頭上找蝨子?

更叫人氣忿的是,在路透公布數據當日,內地股市下午突然大幅上揚,內地形容為「驚天大逆轉」,完全就是歸功於路透泄露的"天機"。

惹說有人是「春江鴨」先知,我絕不懷疑。這樣子水準的國家,憑什麼可以追上規範化的香港市場? 憑什麼說是大國堀起?

真的令人可悲。

2010年6月10日星期四

QQ

港股交投淡靜,高低波幅得個二百幾點,但金魚缸內實質就一啲唔平靜!

700號騰訊被基金洗倉,令到一眾散戶真係望到「眼QQ」!

收市急跌十蚊,跌幅百分之七,失守二百五十天線,成交仲連續兩日喺榜首。

騰訊股價已經係連跌五日,原因都不外乎係關注騰訊增長放緩、估值高、又話係三網融合輸家,但似乎都係無一個實質因素。

不過話說回來,過去呢啲高增長股好似388港交所、又或者思捷,一旦出現洗倉股價都好難再有突破。

事實今日被洗倉既股分、唔止騰訊,多隻所謂「High Beta」既高增長股,好似係吉利、聯想,股價都要洗白白。

咁全球經濟係咪真係咁差?

呢個又係好吊詭,因為答案係唔係,今日無論中國公布既出口數據,日本、以至澳洲既經濟就業數字都係好過預期,消息推動歐元單日升近百分之一,道指期貨升幅超過一百點,金價就有回套。

所以彭博話,中國出口數據反映,亞洲係投資者抵卸歐洲債務危機最好既避風港。

咁仲唔止,多個中央銀行亦都因為經濟改善而調高利率,好似新西蘭決定3年嚟首次加息,加幅四分一厘。

新興市場巴西,更大加四分三厘,息率去到十厘二五,原因係要防範通脹。

內地出口數據理想、加上日本向上修訂第一季經濟增長到百分之五,帶動區內「風險胃納」改善,資金重新流入高風險資產,亞太股市上升百分之一,日本股市就係一個星期最大升幅。

不過隱憂唔係無,聯儲局主席伯南克話,美國既經濟並非好似係佢估計反彈咁強勁,而歐洲債務危機構成既風險,亦可能需要聯儲局進一步行動。

話說回來,無論騰訊,無論比亞迪,無論東風,全部中伏。

究其原因,正係市場睇唔通,資金推動嘅大升市後,下一個遊戲係點玩!!

從近日情況睇,股票已經由近一年Re rating情況,調轉為De rating。

即係向下修訂預測期,原因係市場醒覺,開始重視番估值!

進入後市斷估時期,有基金經理就話,經審慎思考,結論係一注獨買港股。

原因之一,係農行上市在即,錢有跡象番嚟,今日歐洲市,美電顯著回落,正係歐美資回流跡象。

歐洲問題令市場變得膽心,但商品大王羅傑斯就話,係時侯買歐元,原因唔係睇好歐洲,而係個個都驚,即係入市時機。

銀行界亦話,近期資金唔正常咁湧入美國,情況可能扭轉。

撇開估值因素,如果買增長概念,內地,澳洲,以至其他區內市場,多個數據都引證,買經濟起飛,到亞洲呢。

又講番估值,SP 500帳面值,近兩倍,遠比區內高。講抵買,又係亞洲!

喺香港住左三年,作為亞洲大好友羅奇,臨別在即,亦發表佢感受。

佢話,多年觀察,亞洲夢,已經變為只係嘅中國夢。

可以打賭,三年後今日中國會比依家更好,但唯一奇論內地唔係再依靠出口,要盡快擴內需,咁先會成為真正強者。

2010年6月9日星期三

乾溏

要再花點時間再討論昨日賣地結果。

各位記唔記得點解政府要主動安排賣地?

當時特首面對龐大輿論壓力,要求政府壓抑過高樓價,結果一方面由房屋局做打手,炮製出九招十二式對付地產商。

那邊發展局亦不甘示弱,為左優化土地供應,因此主動安排了六幅市區地皮拍賣,目的是要透過增加豪宅供應,避免樓價高升的趨勢,由豪宅蔓延至中小型住宅市場。

結果就有了昨日的前山谷道邨地皮拍賣109億結果,那麼政府目標是否達到?

其實結果只有一個,就是誕生了九龍新地王! 而附帶就是一連串自以為受惠、什麼都反價封盤一番的業主及發展商。

當然,政府的高地價政策亦要對昨日拍賣負上責任,當山谷道邨地皮底價要74億、即每呎要8500幾蚊呎,「羊毛出在羊身上」,試問發展商又點平價賣比你?

政府原意是要壓抑樓價,「理性」的發展商面對一些豪宅及中小型地皮,自自然將資源放到毛利可以「最大化」的項目,結果是豪宅樓價愈搶愈高,反而中小型地皮就乏人問津。

吊詭的是,豪宅地皮供應得愈多,因為物以罕為貴、地價樓價愈搶愈高; 中小型地皮由於乏缺需求,發展商無意投地,變成供應又同步減少,樓價亦難以回落。

如果各位相信市場是具有效率,理論上中小型項目價格搶高到一定水平,因為毛利吸引,將可以吸引發展商重新發展呢類中低價樓。

但現實告訴我們,市場正是一個Imperfect Market,「不完美」先可以造就有人賺大錢、而低下階層則永遠也無上車。

而另一個昨日賣地的啟示,就是宣告勾地表制度「已死」!

近八年嚟首次主動賣地、連勾過二十一次既前山谷道邨地皮就晉身九龍地王,徹底反映勾地表制度失效。

說到底,政府還是乖乖賣地好了,直至一日發展商「乾溏」,樓價方有機會回落。

問題是,以而家發展商間間咁財雄勢大,政府手上,真有這麼多市區靚地?

2010年6月8日星期二

影子

今日政府主動拍賣何文田地皮,四個字 :估佢唔到。

首先,估唔到嘅係地價,一路搶高到109億先至停手,超出晒預期上限一成。

每呎樓面地價12539元,登上九龍區最貴地王嘅寶座。

另一個估唔到,係場內好多「影子人」舉手,八個發展商舉牌,有五個都係不知名。

最後亦係由突然加入嘅陌生人一擊即中,原來,佢係代表新地。

翻查紀錄,我們同事居然發現手持33號牌的女士,原來三年前已代表新地投得地皮,三年後又再次重出江湖。

影子人的好處,是可以擾亂對手,在不知道自己對地皮有多大興趣,以免被人托價; 同時亦可以兵分多路,互相配合下令對手知難而退,今次新地就可說是運用了類似策略。

不過當全場發展商都以影子人出手,這種優勢當然就會消失,亦減少了市場的資訊,最終未必一定有好處。

今次拍賣另一焦點是政府正式承認勾地制度失敗,換成由政府主動拍賣取代。

勾地制度的弱點,我們過去都多次提及,而今次焦點是政府如何開價?

有別於過往多年,今次拍賣官開出第一口價68億,原來唔係底價,一旦唔啱心水,政府可以收回地皮。

投唔到地既新世界發展董事、兼身為地產建設商會代表既梁志堅,就批評呢個做法無透明度!

今次係政府七年幾嚟、首次主動賣地,有別於過往多年,今次拍賣官開出第一口價68億,原來唔係底價,一旦唔啱心水,政府可以收回地皮。

過往政府未靠勾地制度賣地前,每次主動賣地,開出嘅第一口價都係等同地皮底價,好似00年拍賣西九龍地皮、同02年拍賣九龍城地皮,發展商都係以當時第一口價、即係底價投得地皮。

就算喺私人市場拍賣地皮,市場人士話,都無試過開價唔當係底價,只有拍賣銀主盤時,因為條件比較寬鬆,先會出現承價都照收回嘅情況。

但調轉講,拍賣官一開始就已經提醒,話開價唔等同底價,係堅叔無聽清楚,定係投唔到地「發爛渣」?

Cannot Open Page


幾乎肯定Steve Jobs 出席完今天的 WDCC後,會炒掉一批蘋果員工。

今天在WDCC上,喬布斯在示範iPhone4時,上網時居然出現"Cannot Open Page",現場已見佢面色一沉,見全無反應後要死死地氣換一部後備手機做示範,對喬布斯來說肯定是不能容忍的錯失。

傳聞喬布斯對於出席發布會異常認真,單是自己每次就要演集十個小時,蘋果內部甚至有一個團隊,就是負責造種「推廣」工作。

說「推廣」對喬布斯來說可能有些失敬,因為每次有喬布斯出場的地方,基本上每一句說話都是向著蘋果迷進行「洗腦」。

其實不難想像,尼爾森最新調查都發現,iPhone用戶可以說是異常忠心,有八成用戶就表明再換機也是iPhone。

看過新一代iPhone 4,大家都知賣點係「更薄」、「更快」同更「襟玩」。

iPhone 4厚度只有9點3毫米,比3GS薄咗大約四分一。

針對上一代無視象會議功能,蘋果喺iPhone 4嘅機面上加設一個鏡頭,可以視象會議,不過暫時只可以通過Wifi進行,喬布斯自己亦承認,要與網絡商更努力一些。

華爾街日報以"long on new features but short on surprise", 可以說是iPhone 4的最好寫照。

分析員話,iPhone 4雖然功能強勁,但受到之前有網站預早洩漏影響,可以話全無新鮮感,加上對手競爭激烈,可能會影響銷情。

事實上,今次率先披露(盜用?)既科技網站 Gizmodo,被蘋果拒諸門外,被拒參與WDCC年會。

網站自己都明白,凡事總有代價,雖然今次少左瀏覽人次,不過之前已經因為取得「測試手機」,令佢地聲明大嘈,可以一得遠大於一失!

唔好睇少今次預先揭發事件,有電訊分析員話,蘋果過去依靠既Magic,就係靠著管理預期而令一眾粉絲「死心塌地」,今次事件可以話打破左佢地本身既神話,甚至可能影響未來盈利!

所以蘋果今次洩密事件後,已經大規模取消左測試員既制度,以免再出亂子。

睇番價錢,美國嘅入門版iPhone 4賣199美金,但呢個係上台價,要同AT&T簽上台合約,舊款既3GS就會減價到99美元。

首批出售既國家未有包括香港,不過舊款既3GS香港已經即時減價,最高型號既32激版本,由六千二百幾蚊,減至4988蚊,減幅超過兩成,大家留意啦!

2010年6月7日星期一

政治把戲

匈牙利新政府上星期「自我引爆」、話面臨希臘式嘅主權債務危機,結果觸發歐元急跌,

知道後果嚴重,新政府償試降溫。

匈牙利國務卿「瓦爾加」形容有關官員對財赤嘅言論係跨大咗,事件實屬不幸。

經濟部長亦重申,有信心可以喺今年內、將財赤降至本地生產總值百分之三點八,政府正考慮明年開始,開徵百分之十五至二十既「家庭稅」。

這個「不幸」,後果相當災難性,環球資產又蒸發左一萬億美元。

不少分析都認為,匈牙利新政府上台一個星期,今次刻意跨大財赤既言論,目標只係要國民、為嚟緊嘅削減財政開支作好心理準備。

跟據歐盟預測,匈牙利今年既財赤,佔GDP比重只有百分之四點一,唔單止遠低於希臘既百分之九點三,比起歐盟平均百分之七點二,亦低好多。

就算計公共開支,亦只佔80%以下,比起希臘1.4倍,情況好得多!

穆迪已表明,唔相信匈牙利係下一個希臘,匈牙利前任財長亦已經否認新政府既「造數」既指控,話只係現任政府無法履行競選時既承諾、而作出既「政治把戲」。

紐約大學教授魯賓尼話,政府公開談論債務違約,係無建設性,今次問題只係新政府將財政問題歸咎舊政府。

令人矛盾的是、金融時報提出,匈牙利的經濟貨幣政策、可能正是歐豬五國的出路。

08年當時的政府面對經濟困境以及財赤惡化,當時已經向IMF承諾可以控制財赤,靠的除了是當時社會主義政府強烈的政治決心外,兩年間將貨幣Forint眨值六成七,雖然令外債增加,低同時就是加強競爭力的最好方法。

如果真係要有樣學樣,歐元前景.........

2010年6月4日星期五

非典

「鳩山副手、現任副總理「菅直人」,各位不要少看此君,他更被認為係有力統領政府,去打呢場「抗通縮戰」。」

舊年十二月,當時我地已經提過,大家要留意「菅直人」,叫大家唔好睇少佢,因為佢係被認為係有力統領政府。

事隔半年唔夠,菅直人唔止接替以健康理由辭職嘅籐井裕久、出任財務大臣,喺日本民主黨內,亦出任新黨代表,接替辭職嘅「鳩山由紀夫」,成為零六年以嚟、第六位首相。

現年六十三歲、菅直人「八零年」開始擔任眾議員。佢作風敢言,九六年、喺「橋本龍太郎」執政內閣、擔任「厚生大臣」期間,提出政府應該、為七十年代千幾個血友病患者、被輸帶愛滋病毒血液事件負責,贏得公眾支持。

菅直人同鳩山由紀夫合力成立民主黨,不過兩個人既性格可以「南轅北轍」。鳩山一切以和為貴,性格傾向妥協、正所謂「議而不決、決而不行」。

相反菅直人一直作風強硬、認為更務實同果斷,喺日本政圈早有「急燥Kan」既稱號,金融時報就以「非典型」領袖稱呼呢位新任首相。

小泉純一郎之後既五個首相、都係過去政治領袖人物既仔或者孫,但係菅直人唔係行呢條路,從政三十年來、大部分時間都係喺民間從事政治活動,唔鍾意參與主流既政治黨派,因此佢亦都一直痛狠日本「腐敗」既官僚體制。

佢喺財務省上任無幾耐,已經叫啲官員提早下班,而要佢地更加接近社會同群眾。

菅直人一直被批評欠缺管理宏觀經濟既經驗。自言只係睇過十頁Paul Samuelson既經典教科書「The Introduction to Economics」,喺二月聯儲局調高貼現率既時候,曾經回應話對日本經濟係好事,因為加貼現率會令日圓疲弱,事後被大

雖然係咁,不過財務省內既官員,對於呢位財相當時係非常讚賞,最重要係佢學習能力非常高,而且係非常虛心聆聽下屬既匯報,贏取左信任。

事實亦都證明佢好快掌握到日本經濟問題既徵結,特別係睇到歐洲債務危機,令佢覺得更迫切去解決日本長期高企既債務問題,建議要提高消費稅。

佢呢個動議喺國內引起左好大爭議,鳩山當時甚至指菅直人發表既只係個人意見,事件第一次突發左兩個人之間既不和。

作為財務相,菅直人亦一直鼓吹弱日圓同擴大央行既量化寬鬆規模以對抗通縮,因此同現任央行行長「白川芳明」,構成多次衝突,甚至惹嚟政府干預央行獨立性既批評。

菅直人一直醜聞唔多,曾經被傳媒、揭發婚外情,公開道歉,04年被指冇繳納養老保險金、辭去黨代表,仲要做「苦行憎」以思己過。

呢啲行為喺日本政界可以話係「小兒科」,但對菅直人嚟講,就構成過沉重打擊。

當然菅直人前途一片光明,但有不少挑戰仍然不易應付。

雖然有美國傳媒指,菅直人政治立場比鳩山更「左傾」,亦批評過小泉純一郎過於崇美,但喺沖繩軍事基地既立場上,佢係更傾向實是求是,認為應該尊重前朝政府所定下既決策。

經濟學人話,菅直人另一個困難,係要擺脫黨內最大派系領袖、幹事長小澤一郎既影響力。

菅直人已經表明,唔會將小澤一郎放喺內閣重要位置,認為佢暫時退下,對佢自己、黨、政府同國家都係有好處。

2010年6月3日星期四

捍衛者

"The Big Short"中有一幕提到,主角之一的Eisman(不錯,正是Meredith Whitney的師傳)作為一個看淡樓市的分析員,很想證實自己判斷樓市爆煲的看法,於是他找來給予這些次按CDO予AAA評級的評級機構討論一番。

Eisman原以為作為評級機構的分析員,既可判斷公司生死、自然個個武功高強。怎料原來出任分析員的、只是黃毛小子,不少更是投考大行分析員失敗、只能到評級機構領取微薄薪酬的畢業生。

作為金融海嘯嘅主要成因之一,評級機構嘅公信力受到質疑,美國國會想要限制評級機構嘅能力,包括要由政府委任機構、去揀選評級機構。

理由係、佢地長時間給予次按產品好高評級,當危機爆破喇、就過快調低呢啲資產嘅評級,連累相關投資幾乎報廢,間接加劇海嘯嘅破壞力。

股神巴菲特話,評級機構係有犯錯,但唔應該負全責。

錯係錯在、市場對樓市過分樂觀,包括佢自己都睇錯市!

有巴菲特出席既國會金融危機調查委員會,被外國傳媒形容氣氛係咁多次以嚟最好。

有議員甚至對股神說:「我媽媽很鍾意看你!」

巴菲特:「HI! Mum」

議員都佩服巴菲特投資眼光,但唔明,巴郡點解要從事衍生工具買賣。

「當然係因為有錢賺!」

調查委員會主題係評級機構喺金融海嘯中有無責任,作為穆迪大股東巴菲特話,有! 但唔應該負全責。

入股穆迪多年,佢補充話其實自己唔知穆迪總部喺邊,當然,亦從來未上過去。

佢之後接受CNN訪問時話,作為投資者,評級機構意見可以聽,但唔可以以信曬!

佢話泡沬形成,源於唔識控制期望,舉例說,見到隔離屋炒樓賺錢,結果自己忍唔著跟風,結果泡沬就愈滾愈大。

巴菲佢原本持有兩成穆迪股份,近一年、已經大幅減持到得番一成三。

減持、係巴菲特認為經過金融海嘯之後、認定穆迪既Business Model,唔再係「防彈衣」,因此如果有早知,佢一早會在60美元水平、盡沽穆迪。

話說回來,巴菲特雖然在高盛及穆迪兩仗之中,充當金融機構的「捍衛者」,但他亦承認,自己可以在危機爆發前、表達更多看法。

2010年6月1日星期二

地產治港

有無見過發展商有樓唔賣? 以後應大把機會!

政府規管賣樓嘅「九招十二式」、終於正式生效,地產建設商會亦如期發出銷售樓花指引比會員。

但係,由於現樓銷售、涉及唔少技術同法律問題,最終竟然未有包括在內。

想當日政府「聲大夾惡」,說不會妥協,又聲言發展商不就範就會立法云云!

還是地產商會呢個「神秘組織」看得通透,根本懶理出什麼招數,就來一招不變應萬變,政府又變成「河蟹」!

商會表面解釋是,需要多啲時間,處理新措施喺現樓銷售、涉及嘅技術同法律問題,原則上同意政府方向,正盡全力商討謀求解決方法,期望盡快同政府作務實磋商。

恒地主席李兆基一言中的,佢話唔一定等商會發指引、都配合到政府要求,原因很簡單,就是大發展商得個幾個,我地自己傾掂就得!

有學者就擔心,新盤等到現樓至賣,又無正式指引、等同無措施監管。

雖然「貨如輪轉」對發展商很重要,但如果現樓免受新措施規管,咁會唔會令發展商傾向延遲開盤,寧願賣現樓、避開監管?!

事實上有財力的發展商,大石延遲推出樓花,到現樓先賣,那時那管你有幾多招幾多式,我只要一招就足以拆解!

如果真係變成如斯局面,那就會抵銷政府,一心想增加供應嘅原意。

都話香港地產治港,今次又一證明!

嫌錢腥?

保誠連日嚟盡最後努力,幾乎斷定最終會空手而回。

AIG表明,經審慎考慮後,決定維持出售友邦條款,作價355億美金,一個仙都唔減。

保誠原定星期五股東會表決交易,保誠曾還價,希望減價至303億美金。

最少持股兩成嘅保誠股東話過,維持原價,一定否決交易。

美國傳媒報道,AIG同大股東聯儲局堅持,最少要320億先肯賣,既然相差廿億美金,距離太大。

AIG決定唔等,提早宣布談判破裂。

一手部署交易嘅保誠行政總裁譚天中,被英美傳媒形容,將事業生涯全部賭喺呢宗交易上。

佢對傳媒承認,355億美元收購價係貴,當日其實唔想急於出價,但由於當時友邦正進行上市程序,保誠別無選擇,要盡快出價。

保誠買唔成友邦,消息指AIG會重新啟動本港上市計劃,最快十月落實。

今次AIG是否「玩大左」?

不錯,譚天中當日可能是過分信心爆崩、認為股東肯定會撐自己。

但其實股東對交易策略普遍無咩意見,只是認為作價偏高。

可以想像跟據原有方案,AIG賣斷友邦,不單足以向伯南克還清274億美元債,仲可以套現多80億美元作日後翻身。

雖然保誠大口還價令AIG幾乎變成無肉食,不過重新將友邦上市又是否出路?

面對歐洲債務危機,股市早已出現疲態,連農行都要考慮減價上市,友邦要籌集150億美元,現況下絕非易事。

以調低售價後,AIA內涵值仍有1.3倍,不能說是過分低估,只是回復合理水平。

況且友邦面對如斯大不明朗,內部早有離異之心,連行政總裁都要脅離職,軍心持續不穩,對一個以人為本的保險行業,品牌可以毀於一旦,後果是相當災難性。

對AIG來說,第一季業績雖然有近倍增長,但AIG當時仍表示,可能需要政府額外注資。又話,曾經評估過係咪有足夠能力繼續營運。

要鬥氣抑或嫌錢腥? 金融時報Lex提出,其實AIG無咩選擇餘地。