2012年7月31日星期二

明燈補習社-- 好「息」的煩惱




佛老冥壽

七月三十一日,係經濟大師佛利民一百歲冥壽。臨終前,佛老鴻文大罵曾蔭權不是。六年過後,香港仍然無法令佢死後安慰。

同樣令老人家耿耿於懷,係在世期間芝加哥經濟學派,尊重市場,抗拒干預既精神推向頂峰。但不足十年,後繼無人,市場淪為無能,干預變得應份。

芝加哥學派紅極一時,佛老主張貨幣政策調節經濟,一時無兩。稍為安慰係,全球時至今日,貨幣政策以外,別無他想,可惜,佛老離世六年,貨幣政策幾乎步向盡頭,一手消滅貨幣政策,更落在麻省理工之手,佛老大概死不冥目。

伯南克,德拉吉,兩個主導全球市場上落,經濟命脈既央行巨臣,國藉有別,外貌不同,但兩人同屬麻省理工經濟學博士,份屬師兄弟級數。

往日,一度有評論讚伯,德二人武功高強,現在怕且罵佢地學壞師居多。

伯南克,德拉吉價值何在?有,有佢地一日存在,市場繼續有憧憬。有佢地一日在位,市場繼續有能力綁架央行,加以施壓,指指點點。

無錯,佛老走得兩袖清風,而伯,德二人,就算今日死於非命,兩人幾年間,製造最少四,五萬億美元遺留人間,呢的,難道係貢獻嗎?

可能,兩人深知貢獻有限,要盡地一鋪,名留青史。錢,印得太多。大行紛紛轉軚,認為還會再印。但伯,德二人,一個旗下聯儲局手持金融機構一萬五千億美元過剩資金,一個旗下歐央行八千億歐元銀行隔夜投放資金,合共加埋近二萬五千億美元。

呢筆錢,佢地毋須再印,已經足以再撐一會。

的確,美歐央行買債與否有待揭曉。但伯,德二人,只要來一次負利率比併,歐美央行即時恢復調節息口功能,以後銀行有膽再泊錢央行,變相會被罰錢,歐美收到既過路錢或保護費,大可補貼福利,政府開支,甚至支持歐豬各國。

聽落完美,伯德二人組,絕對有力問鼎諾貝爾。

市場依家擺明,歐美央行本周再袖手旁觀,死緊!!!有政策呢?再要睇下係咩先。你要咩,俾咩你呢?又有藉口進一步提升期望。

總之,今日因憧憬市況可以如痴如醉,明日亦隨時搵到理據,沽個半死。

英倫銀行行長默文金講過,央行特色在於神秘同夠悶。

可想而知,央行現在毫無性格可言。央行巨臣可以透過寫手,用自己把口,令市場日日精彩。

從市場對央行有政策期望既一日起,貨幣政策無疑壽終正寢。
家有一老,如有一寶。華爾街日報形容,佛利民昔日拯救全球資本主義於既倒。今日既香港,今日既全球亂局,今日既美國赤字懸崖,的確令人對佛老多一份懷念,沒有他,僅餘投石問路既機會都無埋!!!

罪與罰


業績遜預期。

訴訟不明朗。

增長放緩。

回報未達標。

一埋負面因素,個個分析員都話股價無得救!

結果呢? 原來市場收貨,Main Street 更無改外界對歐智華正面評分。

市場估匯控涉嫌洗黑錢會被美國罰10億美元,金融時報讚歐智華聰明。

一開始撇足七億,預先鎖定罰款開支,更重要係管理到整個市場的預期。

華爾街日報將匯控同巴克萊比較,話兩間銀行分別,係匯控管理層有遠見。

令匯豐錯誤已成過去,呢份美國大報認為,歐智華努力糾正匯豐弱點,唔係「空口講白話」,令匯豐值得比同業有溢價。

亦多得歐智華過去兩年,致力改善結構繁複嘅弱點,既出售資產、又精簡員工人數,而家話要糾正監管洗黑錢問題、改變企業文化,聽落唔似「空口講白話」。

的確,前朝錯誤,前朝負責。

呢個正係歐智華第二招: 秋後算帳。

匯豐似乎劃清界線, 講明監管失控,前高層可能被收回部份花紅。

每日電訊報報道,前行政總裁紀勤,同剛退面退休醫病既前打丁美州主管霍嘉治,合共七百萬英鎊股票遞延花紅,隨時被收回。

被問到仲有咩高層受影響,集團主席范智廉話,會逐一睇。

如果要追究。外界估計,兩名前主席龐約翰,葛霖,甚至管集團帳目既范智廉本人,都可能要負責。

反而歐智華由於負責投資銀行業務,並唔受影響,所以帳,算不到佢頭上。

七億美金夠唔夠,匯豐講明,數字可能更多。美林,同里昂指,訴訟開支大增,歐智華最少一成二股本回報肯定未能達標。

或許想多,這不又正是中了歐智華下懷? 既然市場認為多了一個不明朗的監管因素、令三年計劃難達標,那又何樂而不為,索性來個順水人情,放棄ROE 目標?

高招!高招!

2012年7月30日星期一

迷失大象


作為全球最大銀行集團之一,滙控中期業績所有焦點都一面倒去晒違規指控,其實都是一件令人可悲既事。

第二季、匯控為監管洗黑錢不力,撥備7億美元,只係一個開端。

因為目前仲喺調查階段,集團預咗未來幾個月,美國會正式展開執法行動,下半年撥備隨時急升。

至於涉及操控銀行同業拆息LIBOR又要撥備幾多呢?暫時係冇!

匯控解釋係手頭資料不足,加上調查進行緊,暫時預測唔到要罰幾多、換言之只是暫時不想面對現實吧!

連串醜聞,有股東已經提出歐智華應該引咎辭職。

作為賺慣「大茶飯」、炒房出身的歐智華,恐怕也沒有想到自己今天會面對如茆田地吧?

今天的歐智華只能為集團向投資者道歉,但強調冇打算下台。主席范智廉亦力撐佢唔使走。

既要為監管成本增加撥備,拖低了半年核心業務賺少百分之三,雖然未算太失色,但對要業務大幅追上先可以達標既三年計劃,似乎愈來愈遠。

失望嘅係,管理層開出三張期票出年就到期,兩張未兌現之餘,個別仲惡化咗。

最差係股本回報,跌到得返百分之十點五,成本效益就略為回穩。只係一級核心資本達標,六月底去到百分之十一點三,按季升近1個百分點。

其實全分業績,更值得關注係主席范智廉一番主席感言!

滙控喺6月底有千五億美元資金,存放咗喺各國央行,范智廉話,反映銀行失去中介作用,將資金轉化做有回報嘅投資。

除咗係由於信貸需求低,銀行過分迴避風險、甚至監管機構施壓增加資本,都係令問題嘅成因。

呢筆錢,雖令匯豐資本優勢勝同業,但歐洲已經零息,美國亦可能減儲備金率至零,匯豐呢千五億,滴水利息再無得收之餘,如果中央行之計,將過剩資金投放,唔覺意喺決策上,又再迷失。後果會點!!!!!

同樣的迷失感覺,歐智華亦有所感受。

CLEARLY LOST ITS WAY!!!

呢句說話,出自一名戰鬥力驚人,可以廿四小時不眠不休既銀行家,有的驚!!

匯豐業績唔算好,但可喜係,匯豐唔係一無是處。四十八億撥備,再加超過廿億美金英國同美國相關賠償開支,近七十億美元呢個銀碼,幾乎等於半年盈利。

但大象可愛之處,係一級核心資本比率仲可以升至百分之十一點三,比舊年下半年同第一季還要好。

即係,匯豐即係匯豐。數字上,匯豐食得起潛在訴訟,呢個係賣點,但最慘連匯豐本身都唔知,多宗訴訟不明朗因素,何時完結。

匯豐無將英國還款保障既賠償,同美國洗錢案潛在罰款列入撥備,反而視為開支一部份,明顯大象百分百打輸數,數字上無回撥可言。匯豐好野之處係,廿億美金訴訟賠債新增開支,但整體經營開支大數,只係多左七億美金。

點解咁?  一,匯豐期內有形商譽撇帳開支大減。二,更重要係,員工繼續少。根據中期報告,匯豐集團全球全職員工,截至年中有廿七萬一千幾人,比舊年年底少一萬六千幾人。

匯豐控股呢四個字,以往矛人穩健老實,但洗錢案令溢價折讓,更甚係投資者愛匯豐,係愛佢穩健。

匯豐半年撥備四十八億美金,有趣係按年,同半年比半年,都有所減少。按年撥備升得多只有區內,反而全球火頭歐洲,按年撥備可以少一成二,半年比較更減少兩成三。

難道,匯豐歐洲特別叻?

2012年7月27日星期五

只管信


論央行行長,強如沃爾克,格林斯潘,任總、又或弱如陳德霖,未曾試過面對鏡頭,有勇氣講「你信我啦!」
 
歐洲央行德拉吉做左創世之舉。
 
一句信我啦,下星期議息前,德拉吉扭轉三周前既講法、公開表明歐央行既職能、係容許佢地喺貨幣政策既傳導工具受阻時,出手去糾正問題。
 
市場既傳繹係、經過二十幾個星期無出手買歐元區既國債,德拉吉已經表態,會再出手啟動「證券市場計劃」SMP,喺二手市場大規模購入西班牙同意大利既國債,以壓制歐元區國家急升嘅債息。
 
原因或者唔同,過去受制歐央行唔能夠向國家直接融資,就算喺二手市場買債都係「綁手綁腳」,以家以「傳輸工具受阻」做理由,買債就變成「理所當然」。
 
除左再喺市場買債,市場亦憧憬歐央行有更多「非常規」既政策工具,包括向即將成立既救市基金發出銀行牌照,令佢地可以向歐央行無限量融資。
 
另一個選擇係為歐元區國家既債息「封頂」,呢種利差設限既做法,係將強弱國家之間既債息差距、設立限制,但前提必定需要歐央行作出更大承諾。
 
主流財經傳媒都形容、今次係歐央行決策一次重要轉捩點,華爾街日報更進取,話德拉吉今次表態,係作出果斷同勇敢既決定,係將整個歐央行既信譽賭上,一反前任「特里謝」既猶疑不決作風,話今日既德拉吉,更似聯儲局主甫伯南完。
 
確實,叫佢超級馬里奧,並非浪得虛名。上任唔夠一年,出既招數,用既政策、口術,多過特里謝一年加埋總和。
 
超級馬里奧一招比一招強,你信我呢三個字,有如用身驅抵檔子彈,令人感動。
 
市場暫時信德拉吉一言九鼎,百分百預期佢會二手市場恢復買債。
 
奈何市場大貪,恢復買債之外,已經開賭,歐央行會成為首個實行負利率既主要央行,將隔夜存款利率,由零降至負四分一。
 
超級馬里奧暗示,意、西債息太高,左右貨幣政策傳導功能,買債預期呼之欲出。但呢個只係屬於第一傳導性,就算啟動,唔代表會落實到貨幣政策既第二傳導性,即係貨幣政策既終極極目標:刺激經濟。
 
歐央行到目前為止雖然遲遲落後形勢,但再次揭開更具爭議性問題,如果信貨幣政策功力仍在,點樣將數以萬億計停泊央行過剩資金踢走,再製造貨幣乘數效應,係歐美央行當前最大課題。
 
亦因為咁,歐洲實行負利率聲音大增,亦因為咁,聯儲局剩餘既「一滴利息」,都可能郁埋,包括建議減貼現率,同埋將現時四分一厘既儲備金利率,減到零,到時銀行放錢聯儲局,再無息收。
 
所以,下星期唔係超級央行周,而係貨幣政策世紀一星期。任何決定,市場最後未必滿意,但任何舉動,都象徵貨幣政策盡頭,再行近一步。

2012年7月26日星期四

爆裂盈警



過去兩個月、「盈警」呢兩個字充斥著整個港交所既通告欄。

兩星期前,瑞銀睇味千會發盈警,不幸言中,但股價反應仍然大。

盈警潮下人心惶惶,下一個高危行業可能係鐵路基建股。

有樣學樣,巴克萊預告南車時代會步同業後塵,為半年業績發盈警。

中唔中係後話,但散戶預咗、大行白紙黑字警告,證明盈警概念市場好受落。

一夜間五隻盈警,今個月嘅數字已經升到近100間,直逼08年金融海嘯過後嘅單月新高。

由4月到而家,更累積有270個盈警,同高峰期嘅近290百間比較,越嚟越近。

高危行業都越嚟越廣泛,由原先最嚴重嘅水泥股,大大細細有7間;

其次係金屬同新能源股,5、6間走唔甩;

最新連內需股都捱唔住。發盈警嘅常客、賣洗頭水嘅霸王繼續上榜,當然唔少得全城睇淡嘅體育用品股。

但最差情況可能過去。

瑞信計過,港股喺7月分嘅企業盈利表現,係區內表現最好,按月只係下調百分之0點9。

年初計起就下調咗1成2,跑贏區內嘅平均1成8跌幅,樂觀情緒其實早喺2月起有出現。

即使係表現較差嘅中資股,重災區好似係原材料,以至電訊、內銀同內房板塊,跌勢亦減慢咗,按月下調幅度普遍唔夠百分之1。

大行有大行樂觀,不過內地股市繼續跌至超過三年低位。

二一三二,鑽石底淪為豆腐底。內地人未必擔心經濟,但資金鏈問題,盈利信心不足,構成當前內地大熊市,刻下呢種陰乾式下跌,死最多人。

匯豐,花旗,摩通,一日又一日發出最後召集,既說盈利有憂慮,亦力陳盈利會恢復,好一套經濟好,盈利會改善,洗腦式說教。連外資行,都幫內地搞投資國民教育,呢點難明究竟。

香港盈警公司,幾近記錄。如果睇內地已經公布業績既A股公司,過半盈利按年倒跌,數目之多,差過零八零九。無錯,整體盈利預測下調,論幅度就唔算多,眾所周知,中資盈利今年靠金融股,金融股未衰到要發盈警,但不明朗因素,上半年無,下半年先會浮現。單係咁諗,盈利談何見底?

有政策就等於經濟好,經濟好就代表盈利改善,言之有理,但法巴,法興先後篤爆問題所在,刺激政策,係咪一定刺激盈利?信可以繼續信,但不能否認係,三年前既事,三年後未必重演,當年企業無大量存貨問題,亦無負現金流困難,但依家通通有。

法巴認為,公司內部問題,令盈利最少要滯後經濟兩季,更甚係,政策推動,往往導致企業再度心雄,為擴張而擴張既老問題,唔單止無助盈利改善,更令到既有問題解決拖延,誰敢說盈利會好?

內地經濟舊年下半年放緩,公司盈利要到舊年第四季先開始走樣,短短三季搞掂,似乎樂觀。分析員接觸唔少內地中小企,部份講明無單,部份對前景睇法逃避。

踏入七月底先大量盈警股出現,明顯公司避無可避,經濟好,盈利得呢類投資者國民教育,唔係太陽從東面昇起諗得咁簡單!!

富•事•通: Michael Lewis

強力推介-- 兆富在「富.事.通」中,介紹Big Short的 Michael Lewis,一個寫財經故事令人如追金庸小說一樣的高手!


2012年7月25日星期三

代溝


李澤鉅同庫克本來大欖扯唔埋,一個係中國人,一個西人。

一個掌管全球最大科技王國,一個成為全球華人社會成功實業王國既最新擁有人。

兩者不同,性質有別,但同樣係現實商業社會活生生既代溝問題寫照。

代溝,中文未必譯得全神,往往俾人父母同仔女溝通問題咁簡單。

所謂GENERATION GAP,定義可以好廣,產品上,公司決策層面上,其實用得上。

長江基建,同蘋果,無獨有偶,似乎同時面對代溝問題。

長建既代溝,在於管理層決策上功力之分。長建一直由李澤鉅打理,但李澤鉅成為長實王國話事人,中環人一直擔心,功力不足似乎已經反映。

長建取代和黃,成為系內併購之王,論潛力,講概念,一零三八贏十三。

長建要批股,基本上零難度。市況問題係因素,但未必係全部,爸爸以往逆市集資成功例子無數,奈何長建最新批股個案,令唔少中環人搖頭慨嘆。

頂盡六千六百萬股,三十多億,對爸爸?濕碎。對大仔?困難?

批股近二十四小時未能完成,有可能創近年記錄,論涉及時間幾乎跟新股國際配售睇齊,從呢方面,大公子贏阿爸!!

如此結果,中環人自然擔心,長江後浪未能推前浪。有賓卡話,長建股份大有市場,要怪係,公司太惜售,二至六個巴仙折讓,毫無退讓,吸引力降之餘,改用匯豐、中銀國際掛單,配股經驗有限,銷售網絡遠遜美資大行,結果係: GOOD STOCK!! But WRONG PRICE同 WRONG BANK!

中環人話,換轉阿爸,或者細佬,「依斯執」。

但只要從錯誤中學習,一時失威算係咩!!

同樣,庫克亦抵打八十大板。庫克領導既蘋果,決策層功力代溝一直叫市場擔心,問題未全部浮現之先,蘋果就先爆出產品代溝問題,令季度業績罕有差過預期。

iPhone 4s之後,遲遲未有新機,iPad因為成本上升影響毛利,一個問題,加一個問題,蘋果業績後,市值蒸發三百億美金。

有幾緊要呢?蘋果第三季iPhone,加iPad銷售收益總和先得二百九十二億八千萬美元。

換言之,新產品更新唔夠快,造成既產品代溝,蘋果嚟緊一季,銷售收益要倍升,先可以抵銷市值蒸發既損失。

不過回心一想,一年前4S版本推出,相同局面亦曾經出現過,之後新產品雖然驚喜,低粉果個個投入,股價同市值可以沖完又沖!

所以今日一跌可能係苦心經營,況且只係數字上遊戲,實際上,iPhone 5即將登場,又會製造另一輪排隊黨。

大行因此無因為一季半季差,而睇淡蘋果,反而建議加碼。

不過令人憂心始終係、蘋果產品周期太慢,食老本,坐以待弊。大如蘋果,亦無世代天王呢回事。

況且,愈遲推,市場期望愈大,用家希望愈高,如果產品同預期稍有差異,會點?

所以,兩個例子證明,無論家庭,同公司做生意,代溝絕對並非好事!!!

2012年7月24日星期二

跨國併購


歷嚟內地最大宗海外收購,中海油千一億買尼克森,好可能係睇中旗下嘅頁岩氣資源。
 
新收購56億桶資源量,近4分1係嚟自頁岩氣,包括首次打入加拿大「霍恩河」盆地、超過30萬英畝嘅頁岩氣礦區。
 
華爾街日報話,收購有助中國掌握相關技術。特別係內地對能源需求咁大,要滿足將來需要,頁岩氣先至係答案。
 
數一數,六月以來,國家先由特區開炮,將倫敦金屬交易所LME收歸版圖。
 
之後央企中信證券吃掉里昂,再嚟中海油千億現金併購加拿大油公司。三項交易,代表中國雖則經濟差,但人窮錢不短!!
 
一百八十倍市盈率,二點二倍帳面值,六成溢價或者係廿二倍市盈率,係呢宗併購活動既天文估值。
 
國家有錢,但品牌欠奉,軟實力比下去,國家BOUGHT BY CHINESE,相信仍然不時出現。
 
當然大前題仍然係合理溢價之外,再加高溢價!!
 
撇除中信里昂之交,港交所用大約三年盈利代價做收購,中海油用大約年半盈利併購,數字上證明,相對實力比併,中國還有錢產生剩餘價值。
 
假設歐洲真係面臨死亡,國家買既東西會更多,而所俾既高溢價,可能學溫總理所講,係對穩定全球,貢獻經濟,出一分力!!
 
先嚟一個商品交易所,再來一次巨額收購資源公司,阿爺牌局已定,就係資源勝於一切,既想擁有更多,亦想有定價話事權,背後亦變相底牌再露,中國是怕資源短缺,怕得要死!!
 
明顯,爺爺明知政治阻力大,七年休養生息再由中海油強勢出擊,同當年優尼科純粹為買而買不同,今次策略部署更見明高招,就係既想有油田,亦想有頁岩氣技術。
 
的確,專家先後提到,未來幾十年能源市場,因為Shale Gas 頁岩氣既出現而徹底改革。內地情況特別,因為,本土頁岩氣量潛在含量多少,因為技術問題,從來不得而知。
 
從數字上,內地希望到二零一二年,每年頁岩氣產出,會有六百,至一千億立方米,按北美情況,目標唔算進取,奈何,祖國目前為止,成功開採既頁岩氣井,僅僅六十個,大幅落後北美既十萬數字。
 
要八年後,每年供應最少六百億立方米,中國每年就需要發掘一萬個氣井。
 
基於技術怎麼可能的原因,中海油之後,857、386,陸續海外併購可期。
 
從好方面諗,定價權同資源兼備,祖國減少依賴進口資源,以及避免買貴貨,係合理預期,但地理環境所限,中國無可能做資源大國。
 
坦誠向外國交心本身既現實缺弊,有可能換來少一份阻撓。錢多係要用,買野客氣的,人地都賣得開心的,祖國暴發戶,已經係最佳反面教材。

2012年7月23日星期一

明燈補習社-- 盈警的浪漫





神? 神棍?


兩星期前,我地話亂,兩星期後今日,更似有亂世之感。

鬥負利率、玩糧荒,驚經濟、沽歐債、希臘,西班牙通通傳出九月大限將至。到底全世界發生咩事?

到底發生咩事?係人人知大件事,但想唔出解決辦法。

亂世出英雄,但英雄未見,市場先有一派胡言。

堂堂聯儲局高層公然呼籲要無限量寬鬆,歐洲各界死到盡頭,只係曉要歐洲央行印鈔,內地數據公布一星期,外國既造假言論升溫,美國媒體竟然斗膽將中國數據同 LIBOR操控相題並論!!

臨到盡頭,別無他想,最後希望又再放喺政府央行出手!!

九十年代撰寫THE END OF HISTORY巨著既右派學者福山,幾日前發表文章,直接了當提到當前經濟同社會問題,令全球政府左傾,個個干預意慾增強,惟能力所限,形成不左不右,要解當前之困,政府要先諗自已角色係的咩?

福山份屬右派,一定唔支持政府主導,但佢認同時代有變,想政府袖手旁觀無可能,最佳出路應該係政府本身先限制規模,做到既小,且強。
可惜,市場暫時只係奇望政府一次又一次強勢干預。美國世紀量寬,債市泡沬未爆,反而成為效法對象,如果信短債長債關連走勢,十年長債債息萬一真係穿一厘,到時唔知咩世界!!

愈印錢,債息愈跌,係咪成功,市場心知肚明,面對比美國更不知所謂既歐洲,美國差,有歐洲墊屍底!!!

問題係,歐洲會點死,係壽終正寑,抑或突然死亡??

弊在,人人知歐元神仙難救,但人人暫時視而不見,自欺欺人,歐洲主流意見,甚至國際貨幣基金組織,仍然堅持,德拉吉即使無伯南克身軀,但有伯南克腦袋的話,歐央行步日,美,英印鈔之路,歐債問題會Get it done!!

信者得救? 但若是神棍,信者必死無疑。

無錯,技術上由央行不斷主動買債,會推低債息,如果兩年前咁做,係解決辦法。

但時至今日,係人都知歐洲問題無限大,歐洲經濟步入衰退,歐元區早日要有成員出局,全部加埋,等於市場認定歐元區雖則止血,但前景欠奉,德拉吉傻到創歐央行先河直接買債,變相即係將有毒既食品,自己一個食曬!!

亦即係話,由於全球第二大央行,有潛在中毒身亡風險,市場詭計達標之餘,以後造淡,唔再局限個別歐豬,而係整個歐洲。

有此一日,歐洲Game Over或者踏入倒數!!

收容所



被自己總裁戲稱為「瘋人院收容所」。
 
里昂研究部門既獨特、偏離主流既觀點,好多時都引起市場哄動。
 
首席策略師「Christopher Wood」每周發布既「貪婪與恐懼」研究報告,觀點獨到,亦敢言其他大行不敢言之事。
 
或者係曾經預言匯豐會跌至廿八蚊,多年來里昂都無改變過沽HSBC 建議,呢啲報告內容都會引起市場關注。
 
里昂每年舉行的論壇,邀請的Keynote speaker都異常另類,試過請George Clooney (不是講荷里活, 是講平等社會),米高道格拉斯講Greed is Good,還有膽量請輸左選舉的Sarah Palin!
 
花巧些,更有風水指數,一樣係綽頭十足!
 
數近一些,近日喺梁振英上台後、里昂地產分析員甚至公開叫投資者未來五年唔好掂地產股。
 
作為海外拓展業務既第一步,中信證券分兩階段以93億收購里昂亞洲業務,點樣保留呢個研究部,成為整個交易最關鍵一部分。
 
里昂總裁施立宏同中信證券副董事長殷可、係促成今次交易既主導人物,長達兩年既談判過程中、兩人每個月都會搵一次機會坐底食晏或者Happy hour。
 
殷可心知肚明,用到帳面值二點二倍進行收購,係出價偏高,而收購係咪成功,就好視乎係咪可以留著里昂近千五個員工。
 
殷可就公開表明,會將里昂員工當作一家人看待,話唔想失去家庭任何成員,佢地亦唔會過問施立宏既日常運作。
 
華爾街日報話,面對著佣金下跌同交投量萎縮,中信證券今次收購可以話困難重重,關鍵正係施立宏同殷可、係咪可以克服文化差異,留著研究部既人材。
 
施立宏自己都講過,里昂既DNA,正是容納一批無法在業內主流大行可以收容的分析員。
 
特別係過去唔少外資大行想進軍內地市場,鮮有成功經驗,好似大摩95年有分參與成立中國國際金融,但十五年後都要分手離場。
 
大行亦潑泠水,認為價錢貴,同時關注中信入主後既執行能力同業務融合。
 
最擔心係交易導致里昂員工流失,特別係里昂有三成股份,係由員工持有,唔排除佢地會獲利套現。
 
有留意開大行報告,其實一向都會愛看里昂的報告,真係寫得唔錯,雖然觀點有時係比較另類,但非主流既建議,有好多時都更加可觀!!!
今次中信證券出手,就要視乎佢地有無本事留人!

2012年7月20日星期五

饑餓


細個老師有教,糧食係日常生活嘅必需品,意思即係經濟起跌,價格上落,大家只會食多、食少,但最終都係要食。

同樣道理,對麵粉廠嚟講,小麥價格連升5星期,一個禮拜貴咗一成,暫時唔入貨一、兩個星期都仲可以。拖得再耐,唔通真係執咗佢唔做?

所以當外電話,停止入貨一個月嘅印尼嘅麵粉廠,重新買料開工,仲要係大手大手咁買,大家知道需求始終有,小麥價錢好可能跌極有限。

越南亦有廠家話,為咗趕起批貨喺八、九月付運,仲要係小麥、玉米同大豆,全部掃貨,幾乎可以肯定,加價壓力好快轉嫁俾消費者。

罪魁禍首,大家歸咎係美國、遇上咗五十六年嚟最嚴重旱災。好快令人諗起,乜同08年食物危機咁似?

同樣都係旱災,上一次影響澳洲,大幅推高白米價格,兩年內升咗兩倍。

漣漪效應,好似小麥同玉米,同期都貴咗一倍幾。唔好忘記,豬牛羊飼料都係食呢幾樣,教科書話,肉價一定跟住加。

今次一旱,大豆價格已經創新高,意味超越08高位,大家會問,食物危機係咪重臨?答案係未必。

經濟師話唔駛驚,雖然亞洲有結構性通脹問題,不過,從來同呢幾種穀物價格無關。反而油價升、米價貴,先真正帶動食品通脹。

區內指標─你同我都有食嘅泰國米,雖然升到4個月新高,但同當年高峰期、每噸1千蚊美金比,仍然高出4成。

油價的確連升幾日,但同百五蚊一桶,相距仍然好遠。即係話,仲有排唔駛驚?

睇完供求,當然要睇埋資金面問題。08年嚟頻頻印鈔,資金流入商品市場,投機性炒作因素,令食品價格遠離正常水平。

4年前撳掣,伯南克成功沖喜股市,但流資四流亂竄,發展中國家深受其害。4年後,市場繼續期待一撳再撳,喺建築自己嘅幸福之前,係咪應該先諗諗別人嘅痛苦先?

2012年7月19日星期四

認錯大會

現實既投資市場,炒政策既一班小蜜蜂,幾年時間都敵不過大熊啤啤。一隻大熊睇淡,可以
唔理,兩隻,繼續當佢傻,三隻,半信半疑,四隻,開始驚!!

貝萊德芬克,係經典小蜜蜂變熊啤啤例子,對沖基金教父RAY DALIO係活生生嘅終身熊啤啤信徙。兩人意見相近,債息不斷見負,經濟永無止境無起色,再因為政策有無謂懂憬,其實同黃袍加身分別不大。

一年一度全球對沖基金武林大會紐約舉行,往日,各派別,各長老,互不相讓,各自炫耀。

今天,一眾人等異常落寞,各自訴苦,有如一個末世聚會。

今年首季,全球新增對沖基金,有三百零四隻,數字四年高位,同一時間原來仲有二百三十二隻對沖基金結束,兩年最多。一加一減,實際增加既對沖基金數字,僅僅七十二。

對沖基金代表咩?賺錢本領最強,能力最高,稱得上叻中之叻,但俱往唉!!

上半年,呢班叻中叻再跑輸大市,星級高手投行認錯,一個接一個。

對沖基金派別眾多,常見有宏觀型,同長短倉型,結果通通敗北。傳統,買一隻,沽一隻係對沖基金絕招,但行內人講明,上半年呢種策略,衰到貼地,輸就係輸俾政府央行干預。

以往,對沖基金兩成回報係必需,三,至四成係應份,依家,能有此績,總算奇跡。為生存,部份愈玩愈僻,包括喺同一隻股份,買優先股,再沽普通股,為既係賺少量差價,半年計呢種策略回報百分之四點一,云云對沖基金之中最突出。

量寬干預因素,令對沖基金額外對沖,行內人舉例,以往沽債,買股為例,簡單不過。到依家,沽既層面上,就要涉及既沽又買既雙重對沖,所以,簡單一套PAIR TRADE,演變為一開三,最直接影響係對沖成本增加,資金進一步乾塘。

老行尊話,報價機偶爾令人想入非非,但報價機唔會有最可靠既EYEBALLING ANSWER。蜜蜂係唔會大,細蚊仔識,無理由大人唔曉!!

和解

環球金融,地方智慧。依家,變為環球金融,助洗黑錢。美國參議院對匯豐既指控,毫不客氣,從好方面諗,錢解決到既問題,就唔係問題,罰款了事,重新開始。

但從壞既角度想,穩健經營,保守策略,唔再屬於匯豐溢價,罰款係一次過,但千金難買好商譽。如果三百幾頁調查報告,句句屬實的話,對匯豐股東嚟講,或者係繼三年前,另一次痛心經歷。

目前,對匯豐影響最大係點收科?外界認為,罰款了事,事件解決,但當中有可能低估幾個問題。

最簡單,幾多錢先擺得平?最近一次同類事件,ING 要俾六億幾美金,留意既話,佢地被指幾年嚟,二萬宗涉及古巴同伊朗交易,總額十六億美金。

匯豐呢?可疑交易被指最少二萬五千宗,金額百億計,論規模,匯豐似乎大件事得多,十億美元,難道就係咁簡單?!

再者,美國司法部縱然和解成功,美國監管當局調查未完,其他司法管轄區,會唔係跟咬可也,值得關係。

匯豐對成件事處理策略、認咗衰、極謙虛。無錯,對住政界人士,三百幾頁報告,過百萬份文件證據,無謂死撐。

但所謂既和解,係無承認、不否認嘅前題下,用錢解決問題,依家擺出一副理虧在先態度,籌碼上又蝕一章!!

兩年前,環球金融界係強逼監管時代,兩年後今日,係咩?It's fine time,罰款不斷。單係美國,近似匯豐指控既罰款有三宗,英國巴克萊操控拆息亦被罰,論金融機構比併,不被罰款,就難以成王。

對歐大班嚟講,當日為節省成本,做嘅一切架構重組,竟可以套用為向美國當局表達悔改既證據,而當日為提升盈利,而節省嘅開支,亦勢估唔到,分分鐘被接連訴訟罰款一筆勾,
環球金融呢四個字,代價的確相當大。

2012年7月17日星期二

黃金屋

市好、成交多,相關財經資訊氾濫。而家市淡、無方向,未見有財經媒體做唔住,但財經書市場,的確失色不少。

睇書名都睇到潮流變化。最傳統嘅投資秘笈、致勝心法;07、08市旺,實戰攻防、「我的101隻股票」,任君選擇。

可幸嘅係全球危機逐個爆發,亦幫香港人開闊眼界,完美風暴、黑天鵝呢類陰謀論,亦慢慢喺書架上出現,「經濟恐慌」、同出到第四版嘅貨幣戰爭,應運而生。

再近期啲、民企被狙擊,匿名機構以年報、公開資料做切入點,美其名係踢爆造假數,實則係先沽空、後獲利,變相催生「財技密碼」呢類、網誌作家新作面世,嘗試幫大家走在市場前面,夠晒噱頭。

嚟到暑假,問到今年書展有乜焦點?

天窗出版社老總Derek話,除咗曹SIR再接再勵,似乎要交白卷。點解咁揀擇?佢俾出財經書首要條件,係著重有智識性,讀者睇咗有啟發、有幫助,自然就會賣得好。


兩年前潘慧嫻嘅「地產霸權」為例,當初預賣兩、三千,但反應出奇地好,賣到今時今日,卒之銷量超過四萬。點啟發、點樣幫?

正正就係睇中民怨沸騰呢點,書賣得好不特止,無論係街頭嘅「佔領中環」示威者,定立法會議事堂,甚至係特首選舉論壇,上盡大場面。

相比起財經書,政治呢期更熱。一場特首選舉,背後嘅利益集團轉移,傳統權貴貌似失勢,新晉集團備受攻擊
,比金魚缸精彩得多。

難怪有文化人慨歎,題材咁多,邊有手寫得晒?讀者、評論員亦都吃不消,個半月就有一本新書,睇都睇唔切
。至少,可以擺脫文化沙漠呢個惡名先?

亦都寄望市再旺,帶動財經書回勇。否則,書局會變劏房,一幢幢賣唔出既財經書藉,可能夠間好幾間房!

歪思


振英管治第十六日,受制民望,同危機不斷,終於推出十六日維新運動。醫療券,生果金,還有居屋,中環人話,三大方向,內裡目的亦有三個,谷民望,撐自己,要派糖。

政圈中人明言,思歪大時份時間並不討好,但部份時間又似有可憐。現在既房屋問題,社會
分化,甚至近日既國民教育風波,係前朝問題繼續留。

但思歪亦算老練,於是來一招前朝舊橋,循環再用。

快捷之外,萬一計劃負面,大可搬出「唔係我諗」呢四個字。

思歪競選時,索造高樓價救星形象,但十六日維新運動中,樓市政策暫時只此一招,白表居屋申請者,可以免補地價買二手市場居屋,每年名額五千。

首先,從補地價入手,強化二手居屋市場,預算案已提。

政策有無用呢?地產分析員承認,有好過無,但有又不代表有用。因為,免補地價,自然最直接係會製造二手居屋市場價量上升既假設,既然有呢個假設,計劃賣樓既現有二手居屋業主反應會點?

更重要,補地價機制無疑影響居屋流轉,大拿拿幾十萬補地價,其實亦係一個影響居屋二手叫價因素,準買家出價會審慎,賣家開價亦會就著。依家,補地價關卡打開,有利之餘,會唔會觸發二手居屋價錢升溫,值得關注。

居屋流轉加快,係市場認為必須,而當中涉及向上移既機制可以打通。預算緊既,容易的因為居屋流動而上樓,居屋業主財政改善,受惠市場活躍,可以加快套現買私樓。問題係,私樓價太高,屯門新盤一萬蚊呎既話,黃大仙居屋業主,會唔會七千蚊呎價賣出單位,再貼多三千蚊呎價搬去屯門?

同埋唔好忘記,居屋補地價機制仍然存在,受惠所謂免補價,其實只係繼續買入單位居住權,涉及土地既業權仍然係政府,思歪依家,僅僅係將補價機制引申出既問題,人為推遲。

樓市問題,不能全數可以歸咎思歪,無錯,俾的時間佢。要解決樓市,供應之外,港人港地佢彈弓手,除此之外其實外國有把好橋參考。例如,新加坡外國人買樓,稅項要額外負擔。祖國二套房有限制。

澳洲外國人買物業,只限於買佢地叫既NEW DRILL即係新動工物業。政府求其抄一條橋,都足夠代表盛意權權!!

最後,有人問,青年宿舍係咩嚟。根據特首所講,咪就係專為岩岩投身社會,想過獨立生活既青年人,提供既住宿單位肯定,構思誠意有餘,便宜租金,變相幫你慳錢儲首期,技術上居住期滿後,有錢上車掛?

簡單講,咪即係青年人中途宿舍。或者希望集中營,甚至可以叫政府推動既青年中劏房!!!但單位從何處來?起得嚟,怕且要好多好多屆之後既畢業生先會受惠。為免流於空談,我係思歪,倒不如向發展商拍門,將部份空置單位轉做青年中途宿舍,第一個就搵扶貧委員會籌備小組既鄭家純拉!!

2012年7月14日星期六

替代


最代表香港既地方,同標記,唔係中環,亦唔係飛龍。

廉署,同北角,更具象徵。一日拘捕四人,另一日就落案起訴五人。兩日內,九個人代表咩?

代表現任高官,同前任高官,官字唔係兩個口。財團,唔係惡曬。僭建繼續爆,醜聞未了完,香港反貪之城,形象確實鮮明。

新地事件,事情至今,唔算意外。案件會點,進入司法程序,不能揣測。

但涉案五人,許仕仁被控八罪,眾人之最,結果似乎不言而喻。

熟悉許老人稱,佢近日已是深居簡出,悉日親密戰友亦避見,而家恐怕他日真是罪成,未必受得起如此打擊。

藍籌巨企,七名執董,三人被起訴。有兩件事可能留意,一,哥哥湘,暫時無事。二,江聯兄弟二人,前者被
兩罪起訴,後者多加一罪。形勢上,郭炳聯係仕仁之外,最為不利。

哥哥湘無事,但分析員同熟識新地人士相信,由佢重新接掌機會微也。技術上,江聯兄弟僅被起訴,普通法之下,未入罪,一日清白之身,就唔抵觸擔當董事資格。

但中環人話,三月事發至今,新地股價明顯落後,企管備受質疑,江聯二人,好應該暫時一退。

兩人退,不代表哥哥湘上,分析指,原因係幾年嚟,佢攞唔到分之餘,在新地勢力大勢而去,更係金手指嫌疑人物。所扣剩無幾,老太復出,似乎機會偏高。

老太喺新地壓到場,係精神領袖兼決策人物,由佢坐陣名正言順。問題係佢老人家身體唔好,外界相信,老太復出只適過渡,不應長久,新地好應該借事件,調整企業管治,同董事會架構。

分析員指,如果從新乎內部高層睇,七名執董,陳國威之外,其餘全屬郭系,但坐正擔大旗,個個唔算合適。而執行委會中,董子豪一向譽為潛力無限,但主席一職,未免太高。

萬眾期待,卒之只係開兩個從來唔存在嘅位,美其名係「替代董事」,實則只係為籌備終極接班安排,拖延時間。

中環人話,好明顯新地主席及董事總經理兩個最高職位,一向由郭家出任,基於第三代未得,呢個習慣可能有變。新地點安排,索性局內或空降主席人選,但如果屬於執行性質,郭家未必想由外人掌管。最有可能係,將主席職位性質
,回復到鄺老太臨危復出時既非執行性質,再由相熟人選,或者真正獨立人士出任,當中以後者安排會最好。

另一個問題係,新地依家主席及CEO基本上係兩人兼任兩角。任何改變,有機會係先將職位分拆,如果認同獨立人士出掌新地非執行主席係最佳安排,咁,邊個擔董事總經理,人選更難。

郭系三人入面,鄺準年紀大,雷霆口碑一般,剩番只有黃值榮。非郭系,陳國威企業經驗最多,財務強項,但新地資歷最低。

其實講咁耐,如果江聯二人不退,之前估既有事,亦唔會發生,即係大家可以當無睇過!


2012年7月12日星期四

亂象

中環人慨唉,今時今日,不禁諗起黑澤明大作,「亂」。

無論官場,市場,的確亂也。 似乎新班子過到一個月,要擺滿月酒,但依家?慳番。

同亂差唔多同年代既互相租樓事件,問責局職員短命十二天,思歪再創特區記錄。

記錄憑創,思歪咩鴻圖大計,係咪唔使理?近幾日,都知咩事。好打得幾日前力撐,還有官員任職要通過品格檢查,依家?

係咪上至政務司司長,下至公務員事務局,通通會被圍。如此下去,善哉唉!!

黑色星期五前,市場提前預演。你沽我,我沽你,怕既唔係歐洲亂局,債務危機,怕係不久之前仲憧憬處處既中國市場,驚既係數據會好差。

坦白講,市場最初太天真,抑或故意裝作,不得而知。

肯定,佢地原本對內地經濟,已經由二步曲,放緩後見底,演變為三步曲,放緩,加劇放緩,然後惡化。 上周四,三大央行出手,七日後,三大央行都忍唔著手。計埋減息,同寬鬆政策,即係七日內,七間央行做過野。平均每日,有一間。 要問?

中國經濟破壞力是否異於常人?答案唔在於中國本身,而係外界之前過份賭單邊,太樂觀,於是預期一變,俗的講,係反轉豬肚就係屎!!

熟識中國經濟同政情中人承認,好耐未試過睇唔通內地個局點玩。

地緣政治上,中國被圍。中日外長見面,晝面見,幾乎有人爆粗。中國大動肝火,自有理由,被挑釁越見明顯。

比幾年前,弊既係經濟硬實力削弱,從外圍及政治局勢,祖國更有理由要盡快穩定經濟,總理列入首要任務自有原因。更弊係,內地問題層層疊扣,為經濟增長之路加添困難。夠膽再來四萬億一次,外界亦會批評,懷疑,多過受樂。

今日市場之亂,體現市場之前視不而見既後遺症浮現。去年中起,區內為首新興市場唔得,早有人起,但波有人理。

外需求持續減少,訂單製造既增長好景不再,前景怎麼辦?不會太悲觀,亦不適抱樂觀。

世界唔會末日,但可能只會更亂。減息可以拖延時間,延幾耐?

以巴西利率計,每次假設減息半厘,到第十六次先見零利率。南韓,祖國,甚至澳洲,每次減四分一厘,還有十二次可以減。

以最頻密每月減息一次計,區內新興市場,最少仲有十二至十六個月時間拖延。建議大家真係睇下黑澤明既亂!!!  

2012年7月11日星期三

賊帳

要發生既,終於要發生。建行向單一企業貸款三十億,企業出事,三十億危危乎。呢筆錢,其實相當於建行一至三日既盈利,論影響,係近零。

但股價表現擺明,市場係唔知。簡單一條數,輸三十億貸款,但股價跌幅相當於市值無左三百五十幾億,即係市場估,最多有多幾單中江控股事件發展。

建行作為龍頭銀行之一,如今爆發壞帳疑慮,拖累既係整個內銀。無他,市場對內銀股敏感度增加,以往相同事件,可情若無睹,現在呢?誰敢說盈利再創新高?

誰敢包保不良貸款比率仲會向下?誰會認為內銀盈利能力最強。

愛既反面係恨,要一段時間先回搵到新既均衡點。值得一提係,無論銀行本身,同內地媒體,似有低調故意淡化。媒體報道不多,銀行方面就歸咎分行違規。但分別違規係咪可以全數消除市場對內銀壞帳上升既擔心?一定唔會。

事實情況係,內地企業有企業無錢,地方有地方撲水。內地何止一間中江?同樣,地方土地收入被限制,地方政府起保障房,籌銀團都有困難。更有趣係,在美民企除牌潮,救佢地既唔係中外商業銀行,反而係一間國開行。國開行係咩?

係百分百政策銀行,協助政策性貸款,難道中央政策已經擴大到拯救帳目擬似問題企業?

以往,內銀好處由一數到十都唔夠。依家,內銀不明朗因素,由十倒數都
會嫌少。外界經常話,國家錢多,內銀出事一定無事。

呢個好大程度係準確,但太天真判斷。斷估,的確內銀有事,中央會幫,但依家全世界,歐洲、美洲金融機構有問題,政府亦沒有助理不理。

所以,政府會救呢四個字,根本唔係內銀獨有賣點,相反其實係一個國際性做法。

人係矛盾,當郭樹清呼籲要有中國巴菲特出現,好自然會諗,有咩中資股
值得好似巴菲特既長線投資,亦好自由結論,非內銀莫屬。

信國家經濟得,內地一定更得,但一年半載,咪望。五至十年,可以等。要內銀見曙光,短期最重要,係等更多負面消
息,不利數字浮現。因為,要發生,始於要發生。

2012年7月10日星期二

變臉

一周已過,新班子印象一般,見番班財金官員,小曾,阿強,同八十八層高,親切感有,但認受性仍然弱。

人既溝通,在於語言,表達之外,最重要係取決於人地明唔明你講咩?以及你明唔明自己講緊咩?

單係呢點,佢地已經順利過渡,但沒有進步。

曾司長幾日前,先至為經濟憂心重重,話有可能下調增長預測,今日來個大變身,又話有信心全年增長達標。

即係點?無疑,小曾無需要為經濟前景做假作謊,好大程度佢既經濟判斷,來自政府經濟顧問,刻下政府經濟顧問出身統計師,統計師睇得通係歷史數據,但唔知歐洲咩事,更唔知內地經濟好有問題?

八十八層高既陳德霖,幾個月前一句樓市睇唔通成為佳話。

幾個月後既今日,佢信哲旦旦話美國即使再有量寬,都唔會加快資金流入,對通脹及樓市影響,無對上幾次寬鬆咁大。

如果係,咁又幾好!!幾個月時間可以睇通全個局,難道證明佢能力高超,判斷高強?

無論伯南克,細孖德拉吉,近期對前景都係摸不清,看不明,的確,佢地貨幣政策考慮太多,相反八十八樓,貨幣政策零照顧,人工比伯德兩人亦要高,佢睇得通,只係一個理所當然。

八十八陳點解咁有信心淡化寬鬆對本港影響。可能有三。

一,如果話有,大家就會圍攻聯匯,攻圍聯匯,即係同前上司任白頭造勢。

二,係秉承新一屆政府河蟹精神,盡量減少憂慮,勾劃將來。

三,佢講既,係真話。

中環人話,三個可能性都有。陰謀論撇開,依家為官之道不在能力,而係誠信。財金官員,有數據憑藉,說服力強。

的確,自從伯南克一Q之後,六千四百億港紙襲港,之後無論二Q,同扭轉操作,技術上再無熱錢流入,呢點,八十八陳說得過去。

再者以香港貨幣基礎之多,拆息之低,再多一千幾百億流入,意義不大,從技術上講,陳總百分百對。

用數據基礎做當前分析,說服力強,但不代表前贍性高。六千幾億之後,係咪再無新錢流入香港,上帝都未必答到。因為,熱錢無聲無味,更重要係,經銀行體系結餘之外,錢可以真接由銀行或金融機構轉入香港,有幾多,部份係反映銀行外幣資產變動之中,結餘睇唔到。

來一個三Q,對資產市場影響有限,判斷係咪過份武斷太值得商確。

無錯,伯南克三Q,幾乎百分百機會唔會再推低港息,但唔可以因為咁,就結論樓市不會升溫。

無論樓價係乾升,抑或有成交既升,總之都係升。外圍愈印錢,市場就會愈認同磚頭可靠,資產市場既上升預期,只會進一步形成,而不會減弱。

無人會知香港通脹幾時落,樓價幾時跌。但八十八陳可能太與世無爭,對外圍了解未深。出面依家講緊咩?歐洲?OUT晒。

QE3?預左!!

最新既話題係新一輪貨幣戰,繼鬥零息,鬥貶值之後,依家全球玩緊鬥快,鬥多負利率。
所以不妨一賭,一至三個月內,八十八,會再一百八十度改口!!!

2012年7月9日星期一

困局

歷時近兩年嘅通脹壓力,終於告一段落。

但隨之而嚟,有更大挑戰,通縮會唔會重臨呢?

先睇數據。

一直推高通脹嘅豬肉價格,自舊年夏天開始錄得雙位數增長,近幾個月開始放緩,到6月分,無論係按年定按月都係下跌,按年更加急跌超過1成2。

足以抵消菜價升幅之餘,並拖低通脹率0點43個百分點。

整體居民消費價格指數仲係正數,話有通縮,似乎講唔過去,關鍵在於工業品出廠價,已經連跌四個月,反映中央「穩增長」措施,未能夠成功刺激需求之餘。

最令學者同市場擔心係,出廠價跌勢持續,做成既價格下跌心理預期,會傳導至下游嘅消費品物價,最終釀成全面通縮。

佛利民形容,通脹係破壞性傳染病,係無需要經立法程序既徵稅。

通脹係唔好,但單係因為通脹回落而高呼,亦何嘗唔係自欺欺人。

中國既通脹,只係比澳洲高零點六個百分點,比美國高零點七個百分點,當然,絕對唔可以直接比,正正係中國仍然係屬於高增長市場。

環顧金磚四國成員,我國通脹最低,比鄰近市場,亦都係低。低有咩問題?係低得太唔正常。

外界可以搵理由,通脹高低,成也豬價,敗也豬價。無疑,豬肉價格為首既食品價格回落,係推低通脹主因,有人會美其名,話撇除食品價格,內地物價走勢健康。

但請睇下非食品價格,連續兩個月環比無增長,消費品物價升幅,由年頭百分之五點五,回落至只係升百分之二點三。

所以,搬理由搵借口之前,需求真真正正放緩,係不能視而不見。

其實,內地通脹仍然有百分之二樓上,原因之一係服務業價格指數,按年升幅仍然維持百分之二左右。係咩嚟,正正係勞動工資既反映。

雖然存有偏頗,但某程度上內地仍然有通脹,正正係靠最低工資政策帶動。

經濟學上,最少連續兩季負物價,先可以斷定通縮,內地出現情況不大,但通縮壓力已經形成,係不爭事實。

有通脹,固然難解決,但經濟回落之下,有通縮風險,環顧目前內地情況,政策更加困難重重,更唔可以忽略所產生既連鎖負面影響。

首先,物價唔升,企業幾乎無提價能力,呢個問題好重要,因為唔少製造業剛剛完成第二輪去存貨,將之前高價買入既原材料轉化為製成品,呢的貨,成本比依家市價高,加唔到價,即係硬蝕。

更重要,係內地經濟仍然靠投資主導,呢樣野無得騙人。要投資,就要借貸,通脹大幅回落影響咩?就係直接令到實質借貸利率上升,同時間投資回報一般既情況下,試問有咩企業有意慾借錢投資。

祖國比三年前,政策困局更大。如果問有咩解決辦法?其實都係要靠「減」。

包括減息,減準備金率,減人工成本,企業要減盈利,市場亦有市場要減低對中國既預期!!

困局之中,內地會面對一個極大掙扎,撇開樓價不提,單係點可以谷大貸款同時,唔導致壞帳上升已經係一篇博士論文題材。

明眼人都知,要谷貸款,就要減準備金,但事到如今,亦可以理解減息先,而唔減準備金既理由。

明顯,內地減息似乎唔係為貸款,或救經濟,而係將實際貸款利率推低,推低既作用,幫到幾多得幾多,盡量拖延壞帳上升。

如果通脹仍然回落既假設無錯,內地減息幅度有可能遠比預期多,減幾多?市場利率反映最少減多一厘!!!

咁股市買得未?無人知市場氣氛同判斷係點,但內地股市走勢,同一樣野相當一致,就係煤價。

如果認為煤價見底,又或者數夠數,內地最少減多兩,三次息,否則要入市,日後大把機會!!

2012年7月6日星期五

Plan B


2012年七月五日,絕對值得紀念!

四十五分鐘內,中國,英國,歐洲央行同時放水,遠至非洲肯雅,同北歐丹麥亦減息,即係一日內,平均每四點八小時,就有央行做寬鬆舉動。

雖然未破當年七+一國央行聯手記錄,但可能係前奏,但奏既未必係樂曲。

歐央行行長德拉吉話,唔係事先正式協商,但喺全球一體化下、對前景一致悲觀都並非唔尋常。

下一個焦點就放喺月底召開會議既聯儲局。但華爾街日報話,唔好咁快賭美國有QE

對於歐洲只係減息無推出更多寬鬆措施,諾貝爾經濟學獎得主克魯明批評,歐央行無盡本分、根本無觸及核心既銀行問題,以及國債同資金外流。再係咁落去、歐元會變得無可救藥。

央行真是可喜亦悲。喜既唔係終於願望達成,令人稍為安慰,係市場少一份唔成熟,開始多一點理智,唔再為無謂既事情,而過份雀躍。

從市場反應,評論觀點,大家知咩事。幾間大媒體,減息反應,唔再係以往問市況升幾多,而係第一時間話,弊,經濟好大件事!!經濟差,係預期之內,問題係,無人知有幾差。央行呢次,可以視為慣性行動,當然亦係一如預期,但有幾點值得關注。

首先,再次證明,其實全球成熟以至新興市場,已經俾人睇穿,貨幣政策是唯一工具,除此之外,沒有PLAN B。亦因為咁,引申出第二個問題,就係呢的所謂寬鬆措施,已經失去為市場帶嚟正面驚喜既能力。

基於技已至此,問題重重,大定都知,總會有更大危機,更有件事會爆發。商品大王羅傑斯對,要發生,好應該俾佢發生,發生左,到時,大家咪可以正式用「已經解決」呢四個字。

有問題,但唔俾爆,非理性主義充斥,拖延策略被睇穿,市場決定大鬥大,一於煲大佢。阿爺一減息,即時有人估幾日內減埋準備金。

歐洲利率跌至新低,即刻令各大行賭,歐洲一定會行美日之路,有歐版QE

其實,有無人諗過全球就快唔會再有利息呢回事?又有無諗過,日捱夜捱賺既錢,其實只係一張有簽名既紙?有無諗過,薪高糧準既政客,財金官員,都係見步行步,日日如是?

如果繼續寬鬆貨幣政策,係為金融市場恐慌降溫,減低震盪。與其再做市場奴隸,又有無諗過索性取消市場,股市唔會跌,債息唔會抽高,大家唔使驚,呢個咪係最好,但最消極既PLAN B!!!

2012年7月5日星期四

英雄遲暮


八四年奧運,令李寧成名,集中國之光,體操王子於一身。

到八八年奧運,李寧失手,從此豹隱體壇。

但李寧呢個名,令李寧成為內地商界典範。二三三一呢個股份代號,令佢體現到財富。奈何,好日子總有盡頭的一天,李寧個人事業,似乎重複一九八八年體育事業既挫敗。

一人有一個夢想,李寧廿年前,正本著個人夢想,建立中國最偉大運動品牌。

呢番說話,佢過去講左多次,今日重複,內容依舊,但樣子特別殘。

依家終於明白,英雄遲暮箇中感受。

廿年嚟拍檔,張志勇退下火線。李寧亦明顯心不在焉!簡單話,一間公司唔可以長期得一個首席執行官去交待。

但呢句說話,應用於中國已經絕對政治不正確?

李寧強調,公司依舊,主席仲係佢。但明眼人都睇到,TPG代表擺明係空降,從金珍君表現,誰是主人,誰是僕人,一看就知!!

TPG算係俾李寧體面落台,通告再三強調,擴大主席角色及責任。即係加重李寧喺李寧既角色。

但李寧專注的咩?佢話,係對外事務同關係。簡單講,李寧其實掛主席之名,實際淪為公司既外事部總監,或者大公關。

從好方面諗,李寧管對外,TPG掌管理,業務營運有憧憬之餘,亦同時證明,李寧呢個前體操王子,仍然具備剩餘價值。

只要佢繼續有機會運送聖火,出席國家盛事活動,公司變相有一位其他名星做唔到既代言人角色。

但話說回頭,TPG入股李寧好一段時間,今時今日,高調插手,反映既係,李寧營運同業務,已經到左佢地忍無可忍階段,於是強勢出手,先執爛攤子,之後再算。

TPG係咪有神奇力量,呢個有待觀察。但李寧肯定唔係達芙妮,後者成功,唔代表TPG可以翻炒。

體育用品比任何一個零售市場經營來得困難,大如NIKE,ADDIDAS,銷售,毛利已見放緩。

TPG可能講得岩,李寧產品下一步定位係先決定,要專,定要濫。後者既話,李寧區區一個國產品牌,普及性,競爭力,輸曬。

前者要專,佢地亦可能低估,體育用品涉及好多技術科研,設計秘訣等等,李寧亦唔係強項。

同李寧合作過既人形容,王子做生意夢想有餘,但能力不足,對財務認知更係零。李寧憑李寧之名打響品牌,但管理及策略,李寧過問甚少。

股價證明,換管理層係無選擇既選擇。

單靠TPG三個英文字,李寧市值最多增加五億,增幅接近一成。股東有期望,係正常不過。但同樣,今日亦為中國品牌奏下哀歌。

堂堂國產零售品牌,國際體壇有少量認知度,依家要靠外資基金先令市場再有期望!!!?

豈能不說是可悲!!??

頭啖湯


只有四十五分鐘。

人行、英倫銀行歐央行聯手寬鬆,不過對環球股市的振奮,只有短短45分鐘。


是反映力度不夠、抑或早已消化?

先說飲「頭啖湯」的人行。

原本預會再減存款準備金保經濟。

但人行出乎意料喺1個月內,第二度減息。

一年期存款利率減零點25厘,減到去3厘水平。貸款利率就減零點31厘,減到去6厘水平。

在下星期出一系列經濟數據前夕、出咁激招數,阿爺,只能說句五體投地, 真係估你唔到, 明明係諗著減RRR, 你走來減息, 今次威晒啦.......

有內地學者話,人行唔減準備金率、而直接減息,相信係考慮到近日透過逆回購操作、令市場有充裕資金,減息可以更直接刺激經濟。

各個年期嘅貸款利率,統一減四分一厘,但2至5年期嘅存款息,至少減0.35厘。

但對內銀來說,今次只能說真係「福佳鳥」.......

不對稱減息不特止,人行更宣佈,將金融機構貸款利率浮動區間嘅下限,由原本基准利率嘅0點8,調整到零點7倍。至於存款利率區間亦無調整。

只能嘆,內銀作為政策工具,最美好的日子已經過去,而家係時候要還.......


至於歐央行,今次減息四分一厘只能說是交到功課,市場反應亦充分說明已經反映價內,德拉吉需要的、其實是更進取的救市措施。

早在議息之前,已經有預測歐央行可以減息半厘,或索性再推LTRO或直接買債,總之是希望有更非常規措施出台。

可惜又是另一次事與願違。

其實不論經濟學人抑或金融時間的Martin Wolf,都一再呼籲環球央行應更勇敢些,在政治家無能及市場失效之時,應負起最後的責任,擺脫一些無謂卡鎖或批評。


再說那些什麼批評央行只識印銀紙的經濟師,說來說去只懂滿口狂言說應由經濟自行爆破。我敢說,真係有呢一日,銀行第一個就應炒左那些不事生產、毫無建樹的人........

2012年7月3日星期二

財經通識: Made in USA??


他朝君體


I am Sorry,I Love Barclays!
戴蒙德向巴克萊全體員工既告別電郵中,最少兩次提到,佢愛護巴克萊。
Diamond話,依家既抱歉,又失望,而且憤怒。字裡行間,反映佢係喺毫不情願之下辭職。
的確,佢走得突然,據講係星期一晚先至決定。無疑,巴克萊因為同業拆息操控事件,被破紀錄罰款之餘,已經人頭落地,主席艾吉亞士已經遞信,當時消息引述佢話,戴蒙德仍然備受股東支持,唔會有事。
但事情突然峰迴路轉,簡單用三個字形容,係「唔簡單」。
事關,戴蒙德即將就操控利率事件,到國會出席聆訊,揀呢個時候辭職,似乎講明一件事,就係英國當局調查同業拆息操控事件,已經屬於一個政治性問題。
其次,戴總信一遞,財相辦公室即時回應話歡迎。併埋一齊諗,戴蒙德似乎已經成為政界選票犧牲者,係政府指令佢一定要走!!
講番戴蒙德本人,英國評論相當中肯,金融時報話,佢具備能力,難以取代。英國廣播公司亦指,戴蒙德對巴克萊有功,但風險控制能力方面,亦可能有過。
作為局外人,一句公道說話,戴蒙德呢幾年,似乎係功大於過。美國人性格,投行出身,佢為巴克萊擴展業務立下奇功,海嘯期間無需要拯救,仲有本事幾乎買起整間雷曼。
唔講唔知,正當英國政府對交易諸多設限既同時,戴蒙德二話不說,唔係致電俾當時財相戴理德,而係搵巴菲特幫手做擔保,奈何股神不敢莽下判斷!!
股神話出手前要計掂數,拖吓拖吓反而造就巴克萊更低殘價錢,買入雷曼部份業務,到依家仍然被譽為海嘯經典交易。
銀行分析員一早話,無呢單交易,巴克萊過去幾年,業務會更差!!
當然,戴蒙德依家係咪罪該致死,難下定論。但英國銀行界警告,事件非同小可。因為,既然已經政治化,以後咩事都可以發生。
就同業拆息市場操控呢件事,銀行界明顯形勢比人強,被逼就犯。
但做過銀行都知,拆息係由幾間主要銀行每朝報價決定,而呢個價,純粹係形式上報價,或者係MARK價,真正利率要按情況定奪。
亦因為咁,賓卡驚,係巴克萊在先,依家被查緊既匯豐,萊斯亦分分鐘出事。更甚係,打壓金融業既然成為民粹政治下攞票既途徑,今日發生喺英國,難保整個歐洲,美國,甚至香港CY,都會跟。
卡梅倫政府明顯視金融業為敵。BBC評論估巴克萊起一石二鳥之效,既重挫業界,亦為金融機構業務分隔政策大響聲勢。
有留意係,卡梅倫,歐思邦對投行出身既金融機構CEO零好感,既然如此,歐智華,你小心,睇路!!

七翻身?


今年大家都預市況難料,眾多預測之中,原先大部份都估走勢係先低後高。 

但半年已過,情況有變。 眾多嘉賓中,原本一直對後市樂觀既鄧聲興話,頂多只係上落市格局。

黃師傳黃瑋傑更擔心,全年高位上半年已經見左。 

睇番上半年,歐債危機纏繞,加埋內地經濟放緩、上半年,恒指進帳百分之五,算係中規中矩。

但同大行目標仲有距離。

股評人審慎,大行相反繼續進取。 

匯豐講明,下半年如果睇淡,錯既機會好大。全年恒指目標維持二萬三千點。麥格理話,技術走勢好左,上到二萬既話,可能已經代表轉勢。花旗就認定,中資股再跌空間有限,嚟緊最少可以升一成半。睇好內房,保險同工業股。 


留意番,大行理據,離唔開政策因素,同估值吸引,到底見解有幾新,大家要衡量下。 


有印象既話,不止一間券商用相同理由,呼籲五月要買貨,不能沽貨。 


結果係點,無需重複。 吊詭的是、為金融市場迎接下半年、係一系列差無可差既製造業指數。 


整個歐洲大陸繼續陷於衰退,意想唔到係、連美國製造業表現都係三年嚟最差。 


亞洲一樣失色,連一向高增長既台灣同南韓、都要跌穿五十既盛衰分界線。 


結果係廿八個公布PMI既市場,十九個處於收縮。 


不過逆向思維,華爾街日報話,愈差既經濟數據,令投資者愈有信心各國央行會出招救經濟,無論係聯儲局既QE、歐央行非常規既LTRO,都成為下半年投資市場既強心針。 


的確,美股預測市盈率、跌至低於十三倍既長期平均水平,同樣經過第二季調整、亞洲市場既估值,已經回復到零八年金融海嘯以來最低水平。 


瑞信就指區內既市帳率、已經跌至一點六倍,比五年既平均水平,低左兩成。 


太平洋資產管理董事總經理EL-Erian話,正係美國同新興市場,成為下半年投資市場最大既賣點。 


不過好似埃爾阿里安預測,下半年投資市場仍然係烏雲密布,好似美國下半年既國債限期、以至年底就到期既稅務寬免措施,甚至係總統大選,一旦處理得唔好,都會引發連鎖效應,經濟師預言係甚至引發衰退。 


問題係、到底呢啲不明朗,會唔會令投資者卻步? 


花旗統計過去37年當估值跌至而家水平,未來十二個月賺錢既機會高達七成,平均回報有兩成二,相反跌既三成機會中,輸錢既損失只有百分之八,因此目前係適當時間重新建倉。