2012年10月31日星期三

地上最強?


九間內銀,季績製造全球眼鏡碎事件,事後回想,我地太唔了解內地銀行業既玩法,亦都忽略背後一個人。

劉明康,雖已退役,但無佢,內銀股未必可以喺不斷被睇淡之下,不斷製造驚喜。

經濟向下既同時,內銀季度撥備不盡反映,繼續被分析界圍攻。如果睇八間內銀,撥備季度升只有三間,跌既有四間,工行係無起跌。

但另一方面,呢八間第三季既撥備幅蓋率,就只有一間跌,七間升,部份仲要大升,以農行為例,撥備數跌,但撥備蓋幅率九個月內升近五十個百分點,強如工行,亦升左二十個百分點。

正因如此,劉明康更要勾起大家回憶。目前國際間,壞帳撥備幅蓋率平均百分分之一百二十至百五左右。

記當三年前既劉明康嗎?無論經濟下行定回升,市況向下定反彈,佢總話,驚、擔心,二話不說要內銀最低撥備幅蓋率劃一要有百分之二十五百。

劉前主席,應記一功。

我地唔係讚劉明康,而係無佢,內銀唔會深升兼提升帳目左右轉移呢個高明玩法。

要強調,唔係話內銀做數!!!!!!從會計上,撥備幅蓋率升,同撥備升,影響都係損益表P&L既盈利,有所不同既係,前者因為壞帳,而要從盈利扣數撥備,再轉為資產負債表,列入儲備,筆錢仲喺銀行,反而後者就一撇勾銷,無仇報也。

中環人話,以內銀不良貸款餘額計,間間銀行既撥備幅蓋率足以應付,問題其實在於你信唔信不良貸款呢條大數。

好明顯,全球係無人信。但劉明康當日布陣,在在睇到佢諗的咩!!!

一,佢一早知壞帳多,而且一直多,以逼銀行好天收埋落雨柴,有事既話,現時平均二百幾個百分點既撥備幅蓋率足以頂曬。

二,如果無事既話,預留撥備既呢筆天文數字,就可以隨時侯命,由儲備表重新撥入P&L,到時內銀盈利間間爆新高!!

中環人話,由損益,到儲備表呢種帳目大轉移,內地過去十年一直玩得純熟,近年更進入如入無人之景。你話國家做數?

歷史背景係,八十年代末,祖國要重組銀行業,注銷大量壞帳,話說當年國家苦無良策,因為唔知點做之餘,資金所在亦難以全數購入不良資產。

結果,幫到國家既係美國,原來當年中國金融改革一直依賴美國意見,王歧山、周小川、劉明康,一直依賴既軍師,正正係保爾森。

既然如此,美國佬教中國既野,依家根本又唔輪到美國佬鬧中國!!

無論工、中、建、農,上市前間間不良資產過千億,一時間無曬,其實只係將損益表既
壞帳,轉落儲備表,美其名就係財政部接曬,實際就係一年拖一年既應收帳,筆數大家睇年報會現到,但擺到幾百頁之後。

內銀既然只係發揚光大,數字遊戲間間都有。我地是否要為長期睇淡內銀致歉?

星戰.承傳


作為星戰果粉,對今次迪士尼收購,其實只能說是悲喜參半。

喜的是、已經沉靜多時的星戰熱又有機會重新火熱起來,令到電影可以後繼有片、甚至加快上片時間。

悲的、不用多說,沒有佐治魯卡斯的星戰,就如奪寶奇兵沒有「福伯」,或Ironman 沒有Robert Downey Jr. 一樣、會失去靈魂。

1977年以來,六集星球大戰締造左科幻電影既經典,亦令一手炮製星球大戰系列嘅導演佐治魯卡斯,成為左電影界傳奇。

不過今年已經年屆68歲,佐治魯卡斯話,佢一向深信星戰喺佢之後仍然可以「承傳」落去,而家最重要係喺有生之年、完成呢個使命。

廸士尼今次收購「魯卡斯電影公司」,作價40億5千萬美元,如果稍有記性,會記得佢地09年同樣又是以40億美元、收購擁有「復仇者聯盟」同「鋼鐵俠」既漫畫製造公司「 Marvel 」。

至於今次收購埋「魯卡斯電影」,廸士尼會用一半現金、一半股票嘅方式黎支付作價。

交易完成後,魯卡斯公司會佔迪士尼百分之2點2股權,成為僅於喬布斯信托基金後、第二最大「個人」股東。

迪士尼行政總裁艾格宣布,迪士尼有分參與新一輯、第七集「星球大戰」會喺2015年推出,計劃之後會每隔兩、三年推出新一集。

魯卡斯電影旗下嘅「星球大戰」同「奪寶奇兵」系列,分別為佢地帶嚟45億4千萬同19億5千萬美元票房收入。

分析話,廸士尼除左可以將呢D主題引入旗下嘅迪士尼主題公園,又攞到商品特許經營權,作價算係合理。

不,應是執平貨!!!

迪士尼方面亦都滿意作價,話完全符合佢地嘅發展策略,仲幫佢地開拓到一班青少年男孩子嘅市場。

迪士尼喺06年向喬布斯收購動畫製作公司「彼思」、之後又收購 Marvel,單是一套Avenger,已經破盡票房紀錄。

估計今次收購埋魯卡斯電影可以進一步鞏固傳媒同主題公園王國,肯定是今次大贏家。

2012年10月30日星期二

哈撈喂,無情雞

HALLOWEEN SUPRISE,大吃無情雞。

全球投資大行,過去九至十二個月,原來一直後備PLAN A 同PLAN B。

PLAN A係炒人,PLANB都係炒人,兩者之分在乎幾多人。

瑞士邦之手既瑞銀,就揀A,大手裁一萬人。瑞士邦話,一年前方案已備,但勢估不到,事隔近十二個月,揀既係當日預計最無可能選擇既方案。

投行中人係咪人人自危?唔係,因為預左,亦慣左。

雖然有云「出得來行,預左要還」,不過對唔住,海嘯後既肥雞餐一一欠奉。

三個月通知,就三個月前通知你,返多三個月,好行夾唔送。

呢三個月,基本上係軟性監獄。

位?已經再唔屬於你!! 電腦?密碼被終止!!

好既,係俾你遲到早退。

衰既,變相鎖你入會議室八個鐘。

被裁既,肥雞已死,無裁既,花紅照派。中環人話,大行絕招係,先裁員後派B,因為有前者出現,先確保後者發生。

於是,表現唔好,一定炒,表現一般,同表現大部份時間好,都通通出事。

慳到既,部份歸阿公,部份確保星級員工繼續獲分B仔。

市場係現實,投行係殘酷,但殘酷背後,繼續係迷失。

以瑞士邦為例,投行界最搵錢既定息業務,佢地竟然撤出,改為集中財富管理業務。

瑞士邦迷失例子,近期時有發生。日資野村?由擴張,到唔知想做咩,兩年既事。美林相反由收縮,變擴軍。

任克英之前,原來美林從德銀重金禮聘投行主管,佢行內無人唔識,被譽為係交易巨人。

投行失方向,監管之外,係嚴重缺乏DEAL FLOW。以為股市會改善,交投會增加,點知?
趕尾水,做新股,一隻復星醫藥可以打殘其他新上市部署。

現實的講,市場還是五行欠水,當有人高調話,背後有大水喉,極其量可能係一條飲管!!

市場唔肯承受風險,連對沖基金錢都要湧入定息工具,難道金融界侏儸紀公園有待續集?

三年嚟,買重中國而新開設既對沖基金,據報,平均十間有五間消失,或縮減規模。的確,投行仍然唔敢唔買重中國,但公開講,跟實際做,往往兩回事。

知唔知外國評論點稱呼約翰曾既買家印花稅?

係叫ANTI- FOEIGNER TAX!

拆招


兩招BSD 及SSD 費盡政府心思,原來不堪一擊!

鍾楚義的資本策略果然做慣大刁,喺跑馬地嘅貨尾盤Hampton,發展商諗到將賣樓,變為賣持有物業嘅子公司,避過政府新招。

點做呢?

而家稅務條例容許公司成立一間持有超過九成股權嘅子公司,將單位注入,可以豁免俾「買家印花稅」BSD。

簡單講就是會德豐注入資產到會德豐地產,可以想像只是母子公司之間資產轉移,理論可以避過稅務開支!

hampton就係咁,成立咗兩間新既子公司、將剩底既兩個單位分別注入。

之後將呢啲子公司股權轉讓比新買家。由於無直接賣樓,買家連一般樓宇買賣涉及嘅印花稅,同額外印花稅SSD、都唔駛俾。

同政府搞對抗,發展商成本,只要比公司註冊費同商業登記費,2200蚊有找。

買家呢?

以HAMPTON每伙一億計,慳到425萬印花稅,境外買家仲可以慳埋1500萬買家印花稅,如果半年內轉手,慳埋2000萬額外印花稅。

夾埋俾少近4000萬。

稅務條例、無限制公司開幾多間子公司、即係話,大型發展商賣幾千個單位嘅大盤一樣可以成立數以千計嘅子公司,注入單位轉讓。

原本已經用"公司名義"持有物業嘅市民,一樣可以效法呢種方法賣樓。

買家咁買樓、避到稅,係咪真係著數呢﹖

佢哋買公司股份只要交資產值百分之零點二嘅印花稅、同五蚊轉讓書費用,但呢個資產值可以通過會計手段寫細啲。變相再減輕俾嘅資產印花稅。

不過最大問題係,銀行一般唔會肯造呢種按揭。

仲要留意,如過買入嘅公司有隱藏債務,就會直接承擔埋筆債。

買家每年亦要搵核數師核數、費用視乎樓宇價值而定,至少幾千蚊。

稅務專家話、由於新稅項嘅草案仲要等立法會審議,只要到時加入限制條款、包括設禁售期可以堵塞到漏洞。

2012年10月29日星期一

棺材打釘


今次「曾辣招」最無辜的受害人,唔需要多問,一定係居港外國人!

DAVID WEBB就狠批政策違憲、更甚係形容,香港自由市場早已經等同一副棺材,依家政府出手既樓市政策,基本上就係棺材上打釘,一口唔得,下次再釘多口。

中環人報料,話外資行上周五六點出現嘩聲四起,鬼子佬一眾原本快樂時光,約翰曾一句佢地要即時埋單,部份番公司寫報告,部份CALL客,部份就媽聲四起,事關年底份B仔,即係花紅,諗著買樓,依家要返祖家買!!

有地產分析員統計,探測政府係咪會出招,有兩大指標可以參考。一,樓市過熱既見報率,如果一星期出現十篇以上,就著燈。

二,就係睇樓價,根據過往幾次出招經驗,原來樓市每升兩個百分點,政府就嚟!!!

樓價太貴,理順市場係應該。但從政府角度,添馬艦繼續定性樓市有炒風,變相講到明樓市只可容納用家,不能容許投資,呢一點問題就相當大。

試想,通脹掛勾債券唔再反映通脹、股票暫時投資未見熱衷、港紙唔會有當作投資、香港投資出路其實少得很,依家變相禁止買樓投資,難道政府真係要力谷資金湧入人民幣,為國家出一分力?

之前幾次,官府強調既,只係希望樓價穩定,今次官府揚言會跌,似乎政策已變值得觀察。

理論上,要改變市場就係扭轉預期,政府呢方面無把握,好簡單,資金氾濫係事實,現在又堵窒一個資金出路,錢多製造既壓力一直未解決。

資金出路?車位,鋪位之外,可能仲有龕位,總之越少政策風險,越受惠資金流入。

麥格理大衛吳說得對,政府走上壓抑需求之路,其實引證供應增加無望。

更甚係,交投大減,兼且大價盤受影響,發展商會加快出貨,還是係奇貨可居?值得留意。

的確,無發展商高價開盤,無屯門賣過萬蚊呎,未必觸發政府出變相加稅。但調轉,發展商放慢板,減慢開盤,兼唔減價,樓價未必會達到一手先跌目標。

看來,從堅叔上周五言論,發展商同添馬艦,隨時博奕升級。

梁振英好想政府同內地併軌,樓市可以跟隨國家,既唔大升,亦唔大跌,但祖國有人行同時收緊銀根配合,陳德霖相反就繼續擴大貨幣基礎,基本面上先輸一仗。

瑞信啟棠兄引用結婚數字支持樓價不跌論。搵番舊年,全港結婚數字高達五萬四千八百宗,扣除同期離婚既二萬二千幾宗,淨結婚數字高達三萬多宗。買樓結婚,離婚賣樓,地產中人純粹講笑,要樓價跌,唔通要奇望離婚數字急升???

2012年10月26日星期五

辣招?


政府推出新一輪壓市措施,今次係針對樓市需求,加稅!

第一、提高「額外印花稅」SSD到百分之二十,時限由兩年延長至三年。

第二、非本港居民買樓,同公司名義買樓,比多百分之十五既買家印花稅。

財爺話樓市嚴重脫節、同經濟背道而馳、QE3加劇通脹預期,希望需求加埋增供應可打擊短期炒賣過熱。

額外印花稅實施兩年嚟,樓價累積升兩成七,市場質疑措施反而好心做壞事,減少供應推高樓價!

根據統計,今年以嚟,以公司名義買二手樓嘅比例大約有百分之九,買一手樓甚至有一成半。

加埋對海外買家近兩成比例,一手樓就幾乎即時無左一半客源。呢一招,都算㩒低一批需求。

其中首當其沖,要算係一向受內地人支持嘅新盤,備受新措施打擊!

恒地同新世界喺元朗大盤尚悅,被迫即刻變陣,提早今晚CALL 客揀樓,無謂踩正聽日措施正式生效捱打!

似乎新招真係「辣招」嚟喎,由發展商反應就睇到,地產建設商會即時批評,政府最新兩項措施落藥太重,對發展商賣樓部署有影響,亦影響埋真正用家!

樓價頂破,中環人早打賭,中原城市指數年內先破一一五,再見百五。

但到底兩招係「招」,定係「蕉」?

要強調,曾俊華三次表明,係控需求,在在反映政府自知能力有限,樓價降溫既無可能,做到既只有抑壓需求。

需求細,樓價升可以理直氣狀賴乾升!!

額外印花額有無效,兩年經驗已經有結論,再延長三年兼上調稅率,地產分析員話,供應更貨源歸邊,樓價更有爆升潛力,因為樓價上升動力,唔係無特別印花稅,而係無有效貨幣政策,更無更好既替代品,取代貨幣貶值下既磚頭保障既特性。

約翰以為,特別之外,再來一個向非香港居民再收買家印花稅,按稅率一成半比,較新加坡徵收既百分之十高。

無疑,數字上任何境外人到港買港,數字上比香港人買貴一成半,但唔好忘記,佢地用外幣嚟買樓,以強國為例,升值就有近三成,幣值比港紙升值何止一成半之少。

最大影響,係本港一向沿用公司名義買樓既投資者,或者炒家。一千萬既樓,入場即要俾多百五萬入場費應付買家印花稅。

到底招數係咪辣 ?好似沈大師所言,今次針對公司客招數早應在上次SSD時就應出招,只是當時有人粗疏,放生了公司客,結果令兩年多樓價再升多27%!

所以從一個好角度諗,買家印花稅係有助抑壓需求,而家只係做番應做事情,「英」治政府喺無實際供應增加既情況下,做到供求平衡,服未?!

觀乎政府今次出招相當傖促、未有諗過好似市建局、舊樓重建公司之類,收購同強拍到底係咪都要比15%印花稅? 原來無諗過!!

以呢個講法,擺明係措施急就章,跟本無諗過呢個問題!

2012年10月25日星期四

牛幾?


連續四次要由金管局承接美金沽盤。

港元走勢,同港股近期表現相當吻合,

港紙愈高,港股亦有得升。

市場既共識係,新資金的確加快流入,

但到底幾時流入,同規模幾多,外界有唔同演釋。

如果根據摩根士丹利既統計,流入本港既資金規模其實唔細,而且一早就大舉流入。

佢地用貨幣基礎,再加銀行新增外匯資產計算資金流向變化,

結果,截至八月份在港流動資金高達一萬五千六百億港元,破曬記錄。

當然、萬五億信不信由你,日資大和話,唔好過份跨大資金流入既數量,佢地提到,港匯過去一段時間都係強勢,只要少量既港元買盤,已經足以引發金管局入市。

以0809年一個星接既買盤可以多達六百億港元,而家既規模相對較細。

更重要係QE3後、環球既「風險胃納」係不升反跌,全球股市同商品都有回落跡象,金管局入市未必反映係資金流入本港市場。

當然市場已預先興奮,以恒生指數計,港股連升十日,係06年以來最長升市!

股市見頂未?黃師傅話,RSI八十二,係高,但高完可以再高,一旦出現背馳,見頂訊號先出現。

民間指標?有趣既係,連升差不多兩星期,外界把酒論市之餘,暫且尚未討論一個問題,就係依家係「牛幾?」

當咩SIR、咩叔啟動估牛期,你說牛一,他說牛二,到時再算!

全民是否皆股係一個指標,但未必用得上,事關投資者有「一朝被蛇咬」呢五個字既陰影。

想知頂未,留意大行報告,奇異目標價一旦現形,例如神華一零一、又或匯豐二十八,對上兩次對後市預示準確度,係一百分之一百!!!

如果講市場氣氛好,其實市場指標利好,倒令人有想入非非之感。一,經濟回穩,盈利低基數效應。

二,資金流入,人仔,同港元都持續高企。三,個市真係升,仲要人跌我唔跌,絕對夠營造市底強既賣點。

無人能夠預測後市,但市場有的想法其實同實際有出入,需要糾正。

最簡單係資金流入,在在唔係近一兩星期既事。

大戶有大戶玩法,況且有唔同大戶,如果編制一個大戶入市三步曲,先掃高BETA股,繼而買指數股,最後追落後股,似乎依家出現曬,大戶難道已經全數入市?

中環人話,市場依家有中資大戶,同鬼子佬大戶,前者早期的確已經掃落後又掃周期股,連折讓概念都掃埋,但中資芬佬想法難以捕捉,至於鬼子佬,岩岩掃指數股或者正正係事實。

探子回報,分析員上星期向西人SELL BETA系數高既周期股,結果仍然被冷淡對待。

市場如常複雜,巴菲特叫人唔好沽股票,千其咪信。

任何一位專家都會教,止賺比止蝕更難,嚟緊夾雜於升到你唔信,或相信嚇到你就死,引用約翰曾一句,係冰火之間。

沛沛大師羅尚沛今日從陰謀論推測,鬼子佬知你有聯匯,知你唔敢郁,資產價格上升方程式只會愈計愈準,既然如此,大可炒爆你,上述想法,未必係憑空亂想!!!

2012年10月24日星期三

視而不見


金管局由話無資金入,到三個交易日內四度接美金盤。

由理解資金入係跟隨區內貨幣升,到改口話資金入係美元長倉平盤,繼而又話係股票錢,說到底,原來香港有個「NORMAN發夢」!!

大家鬧金管局發夢,絕對可以理解。

奈何,貨幣發行局根本就係一副機器,一切自動調節,無需人手控制。

既然有機器可以依賴,當然求神拜佛要佢繼續操作如常,正如卡通片入面,大雄一定唔俾叮噹無電。

云云評論入面,文匯報社論最斬釘截鐵,認為有需要密切監察熱錢來源同埋目的。

一句說話,意簡言該,言下之意就係八十八層有失職之嫌。

聯匯制度應改與否,尚且不提。但金管局監察資金流入既警覺性,實在令人質疑。

兩個幾星期前,話過無錢入,八十八層呢句說話一世會被抽砰。

環顧實際情況,多種跡象顯示,資金老早加馬進港,只不過有人陶醉於高空景色、視而不見。

有幾個指標可以反駁之前無資金入既講法,再而引證警覺性低既問題。

首先,大摩每個月都會用貨幣基礎,外貿收支,同埋新增外匯資產去量度香港既資金變動,上一個月既報告已經顯示,前一個月,即係八月份資金多左。

招商證券原來亦運用七項指標,計算有無資金流入,結果陳德霖亦斷正。

根據佢地既指標,包括人民幣走向,港匯,港美息差,新興市場貨幣表現以至美國VIX,多個指標九月份已經全數爆燈。

以股票為例,中港相關ETF最少連續六星期錄得資金淨流入。再者,多間本港企業發行外幣債,一直都無兌換番港紙。

難道呢的資料,金管局係視而不見,抑或從來無見過?

早喺大半年前,任總一篇檢討聯匯既文章,被當局刻意「矮化」,當作「歪論邪說」,但有識之士唔會視而不見,之前ING 經濟師康迪天早就表態聯匯要檢討,今日再訪,態度依舊!

康迪天仲暗諷金記人才濟濟,沒有理由想不到良方。其實以金記經濟師多過掃地阿姐,方法有是有,只是一早掉到夾萬內封塵!

無疑,金記可能唔識股市,但佢地必然對息差有敏感反應。

請大家睇睇,港美無疑近零利率,但同業拆息比較,本港拆息近期其實高於美國,以最近為例,一同三個月港元拆息分別係零點二九六,同零點三九八厘,比美國高幾十點子。

的確,幅度唔大,但行內話,當今環境,所謂既幾十「滴」息差,足以扭轉資金流向。

當一個央行或者極為吃重既財金機構,連資金流向都預視失敗,我地點可以寄以厚望?

八十八層繼續做隱型戰士,余老副余偉文卻盡顯大將之風。佢十幾年前,仲係白頭私人助理,不消幾年已經成為第二把手,管外匯儲備,中環人一早指,此子前途無限。

奈何論資排輩,就算八十八一去,接既未必一定係佢。

鐘擺效應製造既市場力量,最為強勁,今日我們的確為資金流入而興。

但留意的話,今輪升市,可以說既應份,亦不尋常。美金未跌過,美股頻頻跌二百,經濟同盈利暫時局限憧憬兩個字。

股市可以超買再超買,中環人開心之餘,怕既係大戶想單邊炒爆區內。說話至此,介乎興與審慎之間,重要指標,還看日圓匯價!!

熱錢居港權


結餘上升,係咪仲可以叫熱錢流入呢?

中環人話,零八年九月起,避險加QE製造既資金,合共有一百零八個交易日,係有錢透過銀行體系結餘流入,單係美國寬鬆就製造六千四百多億資金,當日還叫熱錢。

但三年嚟未走過,再過多三幾年,呢筆錢夠資格向入境處攞永久居民身份證。

可能知弊家火,陳總裁放假去也,當然以結餘現時數目,再多四十多億等閒事也。

但近期流入既錢,豈止十數億美金?交易員話,以市場既需求無二百幾億港紙需求,係篤唔爆結餘,所以部份錢,其實七七五或以上成功兌換,只不過無經陳總手而已。

金管局發言人上周六強調,資金流入預期不會推低拆息,呢個係轉移視線既講法。

拆息的碓好難再低,但市場關注既係,香港資金氾濫既情況,三年嚟不斷下警號,但一直無人理。

遺憾係,香港有幾個有識之士,了解貨幣發行局運作?

君不見,結餘多,學者話,金管局增發票據,抽走結餘就得。但咁,已經表達佢地對貨幣發行局同真正資金氾濫問題既認知不足。

零九年底,結餘三,四千億,依家千五億左右,主要係增發票據吸納結餘所致。

但唔好忘記,同其他市場一樣,香港有貨幣基礎呢樣野,組成包括負債證明書、即係流通貨幣,再加外匯基金票據,同埋銀行體系結餘,三者之間可以相互轉移,並且獲七點八兌一美元保證。

結餘少,筆數其實去左票據部份,如是者大家睇到,目前超過一萬一千億港元貨幣基礎,比海嘯前,用零七年底為例,多出二點六倍。

一旦再加埋銀行新增外匯資產呢個另一資金流向指標,本港既所謂流動資金,為數就超過萬六億港元。萬六億,兌換成硬幣,可以擲死好多人,如果全數買資產,大家知咩事!!!

香港稅率低,係賣點。但香港由於各種政策,曲線令七百萬港人,成本大增。

聯匯既後果,其實香港人由八三年起,變相交緊聯匯稅,還有高地價稅,近十幾年加入埋強積金高收費,低表現既積金稅,你說香港有競爭力,似乎係自欺欺人。

四個月前,任志剛三十多頁鴻文,提到佢私底下擔心過結餘上升製造既通脹壓力,同資產市場泡沬形成,結果無人理,提都唔俾提 。

聯匯問題,唔應該局限於維持或脫勾既討論,作為因應時勢,做一個過渡期既調節,係負責任財金官員應幹既事。

好多人將問題簡化,或者堅持改一次就失去公信性,就越顯得對貨幣發行局問題認識不足。
試問,廿九年嚟,貨幣發行局強化,微調已經不下兩次。QE1大量錢入,QE2,零錢入,事後回想,根本後備方案一早要有,甚至已經做左。

仲記得一個星期前、陳德霖公開話QE3,見唔到有熱錢流入,勢估唔到呢個預測,一星期就被自己打破!

係錯估形勢定係經驗不足?呢個時候反而我地更加「思故人」,任總喺一年前就已經提出警惕,就係銀行結餘上升,大家要有心理準備通脹同資產價格上升帶來既問題,而家證明到底邊個更有遠見?

或者,金融局職能並無控制通脹呢回事,偉大官員只係按本子辦子,但越講聯匯無得郁,更加令人想郁呢班薪高糧準既高官。

2012年10月20日星期六

引人入勝


零七年賣斷盈科保險比富通。李澤楷興趣原來都係離唔開保險行業。

由電信業再次踏足金融保險業,之前獲得父親李嘉誠答應、「全力支持」發展個人事業,但條件係唔可以同長和業務有沖突。

不過今次166億既作價,只係李澤楷旗下兩間上市公司市值既四分一,同李嘉誠口中所講支持佢買幾倍身家既資產,似乎仍有一段距離。

咁RICHARD係咪要講聲多謝爸爸?
今次收購ING保險業務,係咪屬於爸爸支持細仔發展個人事業既一部份?

中環人答案只是認定,答案無論是與否,小超肯定仲有大把動作。
過百億收購,無問題,就算李澤楷自己做,融資都一樣可以搞掂。

係咪抵?
市盈率廿四點三倍,比友邦低,但過廿倍外界或者認為貴,不過重點所在係,全球金融業的的碓確死剩保險一範,股價表現可以證明,況且保險牌難求,小超盈拓無同類業務,成功收購就等於多付價錢。

自從RICHARD傳出有意加入收購之後,中環人認定,佢一定成功,事關環顧對手,百分百俾到現金收購既就只有佢,ING要還錢,無理由去攞宏利股份,亦無理由將員工送死,他日整合為由,來次裁員。

接近消息指,小超對交易異常認真,交易未曝光之前,老早就召集旗下資產管理公司柏瑞,用唔同模式,做唔同研究。

講到呢度,大家知,大贏家除左小超再下一城之餘,就係PINEBRIDGE、柏瑞是也。

柏瑞兩年幾前,小超用五億美金向美國國際集團AIG購入,被認為係小超交易生涯以嚟既首席交易。

五億美金代價,買入一間定息同資金管理全球有實力既資產公司,買一間管理六百八十億美元資產既公司,唔係抵,係咩?

柏瑞之所以成為贏家,原因係ING港澳,泰國業務正式易手後,保單資金幾乎肯定會由柏瑞管理,按此計,柏瑞規模少則多幾成,大則多一個DOUBLE。

保險加資產管理,就係小超十二年前經常用既一個字眼「協同效應」。

日後到底柏瑞係旗艦,抑還保險業務係小超旗艦,唔知,日後有咩收購?

當然唔知。但兩項業務,橫向,同垂直收購,效益都有。交易贏家已講,大輸家邊個,就係ING。

ING輸,唔係集團輸,賣價遠超預期,想點?輸者,係ING資產管理。原本,按計劃會同保險業務一併出售,之後臨時轉軚,亦為ING資產管理埋下問題。

事關,ING資產管理,大部份區內業務,係管理旗下保險公司資產。現在呢?賣了一個又一個,公司以後仲會跌剩幾多?

小超由九十年代衛視開始,多宗交易單單引人入勝。佢唔介意買貴,唔介意俾錢搵高人相助,更唔介意番頭再買。前科有CSL之後,再買番SUNDAY。依家有棄盈保,買ING,唔知咁,係咪會為下次小超大DEAL提供一定線索?

富.事.通: 即食麵之父:安藤百福


2012年10月18日星期四

春江鴨



第三季經濟數據一出,有外國媒體形容,十月十八日,係中國大淡友最痛苦的一天。


數字一出,大行幾乎全數轉軚,由之前估好大機會減息或者準備金率,改為機會下降,接近零機會,甚至無需要。

睇番第三季經濟增長能夠按季加快,消費繼續成為最大動力,對整體經濟貢獻五成半,相當於四點二個百分點既增長。

其次係投資。


特別係,加批基建項目,九月份既固定資產投資升幅加大到百分之廿二點六,鐵路投資更急升七成七。


最弊係國統局連唔講個句埋。「春江水暖鴨先知」,好像廣東、浙江、江蘇、上海這些發達城市9月已經感受到增速加快,淡友仲唔投降?


更具諷刺係末日博士魯賓尼星期三還大聲呼叫,中國硬著陸風險增加,以後,似乎魯賓尼講咩,通通唔使寫。

淡友唔止魯賓尼一個,陶冬、法興、還有歐美大報評論。轉軚容易,但轉軚背後勇氣最難

在意,又或者要面,請學陶冬,佢一直堅持經濟見底不反彈,中央要三減存準金同利率,仲係「各」。


陶冬叻在,可以選擇性,數據一出,佢強調係一早話見底,至於不反彈,三次減,就隻字不提。

佢維持全年七點五預測,打賭好快陶博士會來一次轉軚。


第三季七點四增長,唔算好,亮點所在盡在九月。投資,工業生產,固定投資通通加快。從好方面睇,證明兩件事,一,內需市場遠比預期好。二,工業生產升幅加大,引證去庫存完結,企業已經開始緊增添庫存。正因如此,上游資源股通通爆升,有其原因。

當然,一季或一個月數字,不代表問題已過,試想,沒有中央加大投資,第三季經濟可能七點四增長不保。

國經濟如此神奇,投資效力居功至偉。睇九月,固定投資升幅由一成九,升至近兩成三,當中鐵路固定投資升幅由八月三成七,喪升至七成七,由此可見,中國第三季其實係一個鐵路奇跡

恭喜阿爺再次成功投資帶動經濟之餘,樂觀亦要審慎,包括,到底是次周期性反彈,可以維持幾耐,係咪又再重複之前情況?

重要係,過去幾季企業同民間累積大幅問題帳,依家既復蘇或回穩期,有無足夠時間令壞帳變好帳,令有問題變無問題,呢個係關鍵。

否則的話,到出年首季,小心淡友又嚟!!!

幾日前,博奕學再獲諾貝爾經濟獎,事後回想,中國更應該實至名歸。環顧幾個月,市場同央行博奕,伯南克,德拉吉輸足九條街,完全就範於市場壓力。

中國?你想減息,你日日話減存準金,博我大規模刺激政策?

偏唔做。

咁樣,市場對中國前景越睇越淡,無咁,亦唔會造就今日遠超預期既反彈能力。從中央財金政策之用心良苦,最後達到成果,令中國人感動。

多謝阿爺令我地上一課更好既公民教育。

2012年10月17日星期三

非凡•李寧



李寧唔再愛李寧,李寧只係愛非凡,李寧只係想當一個非凡既有錢佬。

總之,李寧再次決定將李寧股份轉移到非凡一刻,中環人大嘆,李寧不再是李寧。 
一年前被禁止將股分左手交右手,而家捲土重來,唔同既係李寧既盈利表現已經大不如前。
喺分析員會議上、李寧表示佢對李寧公司既承諾同參與唔會改變,同時出席分析員會議既TPG代表、李寧執行副主席金珍君就形容對李寧既承諾有信心。
不過投資者對佢地既「承諾」就好有保留,李寧復牌股價大跌過百分之六,錄得接近四個月最大跌幅,相反,非凡中國搖身一變成控股公司,一度急升一倍三。
投資者對交易懷疑唔係無道理既。花旗同建銀都話,由於非凡中國曾經有意進軍房地產市場,難免令人憂慮日後有資金需求,會令李寧變成只係一個融資工具。

早上六點公佈既交易,大清早舉行既分析員會議,歷時僅僅廿五分鐘,分析員要知,分析員要問,對不起,通通答不上。

李寧強調,對李寧股份二三三一承諾及參與不變,單係呢句小學生理應分辯到李寧是真是假。
如果仲係認真,仲係愛一樣野,你會直接擁有,唔會好似依家隔多一道門,仲要實際上自行攤薄直接持股權。
經過重組,同增加非凡持股量之後,李寧雖則無減持李寧股份,但直接持股由兩成半,降至一成七,即係比TPG只係多四個百分點。
李寧到底想點,無人知,但動機明顯,就係佢一手創立既李寧,已經由寶貝,淪為幫佢做套現融資既功具。
兩年前,佢的確可能想借殼大搞體育推廣事業,配合李寧品牌再創高峰,依家,計劃似乎有變。
李寧想搞,可能係房地產,做一間王子中國房產公司。
八十年代,中國體操兩大名將係李寧同樓雲。有人估,過去十幾年,後者學前者,依家正式調轉。
樓雲外界所提不多,但知名度不下李寧,退役後佢同樣搞個體育品牌,又移民過美國,回流中國後,拈上地產業務,搞上一間樓雲房地產,做其開發商,結果掂左。
錢無人嫌多,王子當日有理想,平心而論,達標有餘。
房地產,係人知佢想搞,況且有隊友成功在前,但李寧股份,佢亦唔會即時放棄。何解?
中環人話,喺中國要攞地,錢係其次,大前題還須出師有名,或講得更直接,係要識巧立名目。
原來,體育,文教事業項目,攞地最易。聽完呢度,大家應該明,有人計劃掛體育頭,賣地產肉。
對二三三一嚟講,高層跳水,「爸爸」拋棄,外人TPG話事,外界有兩個截然不同睇法。
一,品牌始終係老外好。二,私募基金始終係賺完即棄,李寧不消幾年,又要搵新主人。
有接觸過李寧既中環人形容,李寧財技一般,容易信人。佢行錯一步,唔係李寧品牌既策略,亦唔係無心戀戰,另作他想。
而係佢信錯人,當日行錯買殼一步。以李寧既資產同品牌,無殼反而好辦事。

2012年10月16日星期二

要回家


黎智英喺台灣壹傳媒既總部,向員工道別,仲幫佢地簽名留念。


「真的對不起,我要回家啦,希望你們珍重。」

「此地不留人,我沒有遣憾,人生就是這樣。」

就係咁、黎智英就結束壹傳媒喺台灣十二年既發展。

新買家不是之前已簽訂協議的年代練台生,而是前中信金控副董事長、而家係中信慈善基金會董事長嘅「辜仲諒」,夥拍台塑集團總裁「王文淵」,同新加坡私募基金,已經簽約,以175億台幣,相當於45億8千幾萬港元,向壹傳媒買入、台灣蘋果日報、爽報、壹週刊同壹電視等媒體。

有投行界人士透露,王文淵主要負責出資,只會佔日後壹傳媒大約一成股權。

交易之中,壹電視作價大約20億台幣,練台生出嘅14億多。

至於印刷媒體作價155億台幣,唔止多過黎智英心目中要求嘅150億,亦遠高過富邦金控董事長「蔡明忠」、加碼之後嘅120億出價。

查實整個交易最令人費解、是計晒整個交易作價既近46億港元,比停牌前壹傳媒市值27億,仲要高出七成。

唯一解釋是市場不信任黎智英的營商能力,確信台灣壹傳媒在他手上不會變出甚麼花樣?

相反,辜氏願意比咁高溢價,豈不就是信任自己有能力可以扭轉乾坤?

因為涉及投資弊案,06年逃亡日本,由台灣名門望族辜家嘅第四代長孫辜仲諒變成通緝犯。

到08年突然現身台北。

辜仲諒成為前總統陳水扁弊案嘅關鍵污點證人。

自己前年亦因為非法炒股被判有期徒刑九年,案件目前上訴緊。

雖然失去家族事業 第一繼承人嘅地位,佢並無就咁放棄,而係投身慈善事業積極打造慈善家形象。

辜家係台灣四大家族之一,爸爸辜濂松係商界巨頭,中信金董事長。

佢叔公、海基會前董事長辜振甫更加曾經係政商界風雲人物。
  
辜振甫同大陸關係密切,喺台灣有「第一紅頂商人」之稱。

作為辜家第四代傳人辜仲諒自己亦同陳水扁家族,有著千絲萬縷嘅政商金權關係。

至於收購傳媒企業,對於辜家嚟講並唔陌生。

因為辜家本身有經營電視業務。

有分析指辜仲諒收購壹傳媒係籍著傳媒為佢復出商界嘅舞台。

2012年10月15日星期一

超級周


超級中國周,盡在星期四。

劉老師劉絡文話,數字唔好,無問題,因為預左,一旦數字好,例如七點五或以上,短線見底論可望確認,到時BINGO!!

的確,內地經濟問題重重,可喜係阿爺受過教訓,學得乖巧,你要我咩,我偏唔做。

上星期,南韓、巴西減息,新加坡企硬,在在反映面對新一輪潛在衰退風險,區內為首策略有變。

九月內地通脹數據已出,人人將重點聚焦寬鬆政策力度加大,撇開居民消費價格指數,好一個PPI,工業品出廠價,內裡正面訊息豈止再局限又估幾時雙減咁簡單。

如果睇工業品出廠價,跌幅的確擴大,但指數細份既原材料部份,擴大跌勢無加大,按月更升百分之零點四。

再留意埋工業購進價格指數,九月環比升零點一,六個月嚟首次有得升。

訊息有兩個,一,通脹或者見底,二,係企業購置庫存是否已經進行當中。

我地講內地經濟差,講左好耐,企業盈利死,死左好耐。短期帶動經濟活動,經濟師話,唔係減準備金,下調利率,而係企業長達一年既去存貨行動,係咪已經漸見尾聲。

由DE STOCKING,過渡到RE STOCKING,呢個動力可以足夠令淡友短線投降!!

同時外界重視出口數字之餘,卻忽略進口表現。進口升百分之二點四,唔多。但九月份,鐵礦石進口量創廿一個月高位,原油進口量按月升百分之九點一。

鋼鐵進口繼續跌,但跌幅比八月少。將購進價格指數,同個別資源進口量拉埋一齊,外界開始問,到底內地企業係咪開始添置庫存?

如果要答,暫時答案都係未確定。有交易商話,九月數字部份可能顯示,企業提早進口,避開十月份長假期因素。

再者,鐵礦石價格由高峰期近百四美金噸,到得番九十左右,價跌得太快可能加快港口清貨行動。

亦因為咁,唔少分析員話,要睇埋十月,同十一月,即係仲要等多兩個月。

但等多兩個月,咁點,都係果句,博定唔博??

大行對中資預測,間間都有,早個幾月前,野村提出小春陽理論,升多一,兩季,到基本既素重新浮面,到時又會跌過,呢個意見,可能值得參考。

理論 .實踐


不是伯南克,也不是之前大熱的Robert Shiller!

諾貝爾獎委員會公布,今年八十九歲既加州大學教授Shapley沙普利、以及來自哈佛大學、六十歲既Roth羅思、奪得今屆經濟學獎。

其實呢個選擇相當明智,一來去年獎項已由宏觀經濟學家奪得,今年傳統上應由微觀經濟家攞到。

更重要係在無限QE及歐債危機爭拗中,可以避開凱恩斯或貨幣學派的爭論。

委員會贊揚「羅思」同「沙普利」,能夠以「博奕理論」,應用喺分配上取得成就。

其中沙普利率先以「合作性」既博奕理論,確保兩個互相有利益關係既夥伴,點樣可以搵到對方,達到「穩定」既關係。呢套理論甚至應用喺男女關係上。

Shapley 自認自己是數學家,更笑言今次取得獎是經濟學獎,而佢從來沒上過經濟學課堂。

的確,佢最著名一次試驗,係將未婚十對男女共處一室,再按先後次序由男女選擇合適對象。

方法是先由眾女士選出一名心儀男性,再由該男性選擇心儀對象,然後落選的女性再一次做選擇,直至匹配過程完成。

關鍵是女方一旦被拒,仍然可以在最初「睇不上眼」的男性中、重新選擇。結果會是男女雙方都可以達到最穩定關係。

說穿了,正是今日Speed Dating 的始祖。

正如Shapley 所說,這種選擇理論並非與經濟扯上關係,但其實正是近年方興未艾的行為經濟學始祖。

至於羅思就喺沙普利既研究上、透過實踐,將分配理論應用到「市場機制」既研究,好似係醫院點樣搵到合適既醫生,學校點樣收最合適既學生,或者病人點樣配對捐贈者既器官。

羅思對今次得獎感到意外,甚至講笑話,學生一定會更專心聽書。

其大羅思一個最有意義的研究,正是協助醫療人員、設計有關腎臟的移植程式,幫助病人進行移植。

因為腎臟很容易有排斥作用,很多時有腎病的病人即使取得捐贈者取得腎臟,仍會變成得物無所用。

Roth 就設計了一套機制,可以容許獲捐腎但有排斥的病人,很容易透過配對找到同樣情況的另一個病人,使佢地可以交換使用捐出腎臟。

整套理論建立在捐腎並非一個市場行為,不容許透過價格機制做交易。

但經濟學的模型,仍然可以透過價格以外的條件,達到符合最大利益化的目標。

Roth這套方法,在03年後已在美國醫療系統廣泛使用!

科大經濟系主任雷鼎鳴話,過去都試過有經濟學者以博奕理論奪獎,但今次兩人既理論就成功結合到唔同既經濟學範疇,應用到現實既組織架構上。

過去多屆經濟學變、都試過由研究「博奕理論」既學者攞獎,包括94年由John Nash「納殊」獲獎,佢既事績更拍成電影「Beautiful Mind」 。

其實好像FT 社論說 Shapley 應在 94年就應同Nash一齊獲獎。

至於Roth,他的貢獻更大程度就是將理論用於實踐。

正如Roth 所說,理論只有在現實世界中經得起實踐,理論本身先會更完美。

同樣地,世界本身亦會一樣。

2012年10月12日星期五

我「貼」,伯南克!

恐怕今日諾貝爾和平獎公布一刻,最唔順氣一人、應該係坐喺華盛頓聯儲局總部既伯南克!

過去三年歐洲產生出來既歐豬危機,令全球金融市場「生靈塗炭」,而家居然可以攞到一個和平獎,莫非其實係要贊揚佢地「先置諸死地而後生」,先破壞五國既經濟,然後由歐央行德拉吉出一招無限買債,協助德國阿太「默克爾」一統歐洲大陸,完成和平使命!!!

如果咁講,真係難怪伯南克深深不忿,不過唔緊要,下星期佢仲有一個最後機會!

「貼」伯南克可以攞經濟學獎!!!

既然先有奧巴馬攞到和平獎,跟手又有歐盟而家由伯南克攞經濟學獎都有道理!!!

仲記得一個月前聯儲局年會Jackson Hole上,當時大家都對有無QE3十五十六。

結果睇完佢個篇近乎學術論文既文章,都「丈八金剛、摸不著頭腦」!

對經濟學家來講,睇伯老篇文夾硬將幾個當代既諾貝爾獎經濟學得主既名、支持自己QE既想法,當時學術界已經有唔少不滿聲音,不過礙於伯南克今時今日聲望可以「隻手遮天」,大家都唯有忍佢一忍!

除左伯老之外,路透社亦一如往年,按著佢地自己過去一年既「引用文獻」資料庫既數目,揀邊幾位先係今屆諾獎大熱人選。

首選又係佢,耶魯大學既Robert Shiller,觀眾應該都好熟悉佢,一來佢幾年來都上左熱門人選榜,加上佢有分創立既「CASE- SHILLER」樓價指數,已經成為公認最具代表性,每個月公布既表現都有參考價值。

SHILLER 學術上最著名係佢對金融市場、同資產價格表現既波幅指數,不過美國人更熟悉,係佢早喺07年前預言樓市泡沬,佢寫既一本「Subprime solution」,形容次按危機點樣逐步形成,而當局又置之不理,絕對值得一睇再睇。

至於另一個熱門「Stephen Ross」,佢隸屬既研究所正係85年諾獎得主「莫迪利安尼」所創立,求先伯南克喺Jackson Hole年會發表既論文,正係 「莫迪利安尼」既研事支持QE!

掉轉頭講,作為中國人,我地反而想莫言今次奪得諾貝爾文學獎,有內地博客不禁想到目前仍然身在內地既張五常,慨嘆一句到底諾貝爾經濟學獎、幾時會照顧下中國人?

其實「張老」都睇「化」,呢幾年喺內地都係潛心寫作,反而國慶長假期間老人忽發其想,話如果比佢頒諾獎比「在世」同「已去世」人士,佢首選會係鄧小平、次選朱鎔基、第三選擇就有三人齊名:包括戴卓爾夫人、列根、同前香江財爺郭伯偉,仲慨嘆郭伯偉當年創下既香江自由經濟制度,屹今都難再翻尋!

咁樣講,到底中國人係咪值得攞諾貝爾獎我地無資格說三道四,不過觀乎今次莫言攞獎,居然可以引出內地一眾出版媒體股分全部漲停板,恐怕都係諾貝爾獎創立111年來,只係得中國做得到!

集體跳船


真係好鍾意李寧呢間公司,負面新聞寫極都仲有!

一間企業、年幾內走左CEO、CFO、COO,你會有咩睇法?

八月宣布重組大計,當時鍾奕祺仍然係擔任首席財務官,解釋整個集團既重組計劃。

不過事隔兩個月,呢個上任三年既「老臣子」都選擇辭任。

李寧公布,鍾奕祺因為有其它事業發展,已辭任首席財務官兼執董,十一月起生效。

李寧確認,鍾奕祺同董事會無意見分歧,會喺辭任後會擔任公司顧問。

另外,公司秘書亦同時辭職。

今次已經係一年幾以來,李寧第七個重要管理人員離職。

舊年年5月,首席品牌官方世偉、首席運營官郭建新等五個核心高管陸續離職。

到今年七月,連首席營運官張志勇亦離職。

而作為公司創始人,李寧本人亦要喺退居幕後多年後,不得不重新出山。

人事變遷唔單止影響軍心,改革既過程亦充滿變數。

由今年九月開始,李寧旗下所有門店打出既「收據」,都帶著"歡迎光臨李寧官方商城"既字樣。

有北京市海澱區既分銷商表示,最初都只係以為只係一個宣傳手段,不過登錄到李寧官方商城網站後,就發現第三季好多仍然熱賣既暢銷產品、居然喺商城可以以五五折價錢出售。

分銷商話,佢地喺李寧攞到既來貨價,都接近門市價既六折,而家商城提供既折扣,已經令佢地無法生存。

有經銷商就指,理解李寧要加大網絡渠道清貨,但商城應該只係作為「清存貨」既一個手法,唔應該變成同分銷商搶生意,唔排除部分分銷商會因此減少落單數目,甚至關閉門市。

喺關店同清存貨既同時,李寧同一時間卻大幅增加宣傳開支,繼六月贊助中國CBA後,李寧簽約有「閃電俠」之稱嘅邁阿密熱火隊後衛「韋德」,成為公司最新NBA球星。

雖然雙方無公布合作金額同年限,不過雙方以合作夥伴形式(Partnership)簽約,金額好大會打破內地贊助紀錄,以韋德之前同Converse 每年合約費用就高四十萬美元,部分一級NBA名星更達到一千三百萬美元。

代理人固然有助提高銷售,但唔會成為李寧既白武士,李寧最關鍵仍然係要優化產品同分銷渠道,但目前仍然睇唔到有咩起色。

2012年10月11日星期四

三隻腳


人民幣近日升勢咁凌厲,一個最容易解說當然係市場憧憬十八大後、會有利好政策出台,一掃之前對內地經濟「硬著陸」既憂慮!

無否認呢一種講法,不過內地政經局勢關係密切,與其話十八大後會有措施出籠,倒不如認真諗諗到底新形勢之下、金融改革呢條路會點樣走!

求先都有提到,美林既陸挺近日到訪京城既權力中心,對於匯率改革,有另一番體會。

眾所周知,內地對於匯率改革分為兩派,改革派以行政官員為主導,提倡「三條腳」一齊走路,即係同時實現「匯率、利率同資本帳」同時改革,不過以商業銀行為主既保守派,就傾向先進行匯改,避免利率自由化過渡競爭,甚至令銀行中介地位消失。

講到底其實都係利益掛帥,因為單單有匯率無利率改革,一旦人仔大幅升值,出口商同民間都會怨聲戴道。

據陸挺理據,阿爺已經「一槌定音」採取中庸之道,按著「摸石頭過河」呢套既務實又冒險既原則,將用三至五年既時間進行改革,可以話係「中間落墨」。

講到呢度就要引入香港呢個「人民幣離岸中心」出場啦!

喺阿爺眼中,過去兩年發展「CNH」既經驗,令佢地相信應該係先有匯改、再推行資本帳開放,避免再出現因為開放資本流動,反而令來利率對沖,結果係減弱左利率變動既成效。

咦,咁講法,我地呢個香港試驗場真係好有價值,簡直係為國家改革開放出作貢獻!

另一個推動人民幣升值因素都同我地有關,有細心既交易員提醒,香港既人民幣業務好似存款或者點心債,近月雖然有放慢跡象,不過自從引入跨境貿易結算後,人民幣國際化既步伐,早已經係一日千里!

有留意今年七、八月內地對外貿易,外商願意以人民幣結算比例,由三年前唔夠百分之一、已經跳升到百分之十二。

反映外商真正願意同人民幣做貿易結算,亦成為左真正推動人仔升值既動力!

對阿爺來講至少有三大好處,一來係減少左依賴美元,人行唔需要再儲咁多外匯儲備,同時國際化可以令更多人民幣流向海外,加快形成資金池。

另外一個潛在好處係當人民幣日益國際化,自自然喺IMF既SDR地位可以提升!

小川行長今次無到東瀛、開IMF「阿太」口中講好有價值既年會,自然多左時間喺京城諗計點樣喺十八大後出招,相信聽完拆局既分析,應該都揣摸到行長心中想法一、二!

2012年10月10日星期三

奧巴馬快閃事件


美國星期二又出現一場「快閃交易崩盤」事件!

係外圍市場,仲要講緊奧巴馬既賠率!

話說自從首場總統大選辯論大敗後、雖然奧巴馬被千夫所指無心戀戰,但佢喺民意調查中、對羅姆尼仍然有優勢。

點知喺星期二一個民意調查中,呢個形勢突然逆轉,羅姆尼突然以兩個百分點、領先奧巴馬,得票率去到四成九,係咁多個民意調查中,首次超前。

其實喺民意調查中、兩個百分點連STANDARD DEVIATION都講唔上,不過喺INTRADE 呢個交易平台,就即時觸發左一場「快閃交易崩盤」,奧巴馬贏面由六成四急跌落五成九,如果由上周高位七成八計,足足跌左十九個百分點,唔好本來睇好奧巴馬既人都變成輸錢!

有手痕好事者,曾經將INTRADE奧巴馬賠率、同標普500做左張併圖,發現奧巴馬指標喺過去一年出奇地有領先作用,換言之今次快閃事件,係咪代表已經見到「頂頂地」既美股,開始有向下跡象?

講真,政治分析唔係我地專長,不過作為投資者既然信任市場,咁作為資本主義「終極代表」既高盛,佢既取態就應該要留意!

華爾街日報話,高盛由四年前作為奧巴馬最大單一商界捐款者、當時整個高盛捐款金額超過一百萬美元,到今日成個高盛上升夾埋、捐比奧巴馬既錢只係得番十三萬六千美金,仲少過外交部員工捐既款項!

咁高盛啲「聰明錢」去左邊?當然係羅姆尼身上。

單係高盛員工就捐左九十萬美元,連同佢地另一個關連機構捐多九十萬,合共就資助左羅姆尼一百八十萬美元。

用最簡單「荷包」投票既公式、其實高盛對奧巴馬已經作出左「強力沽出」既建議!

以羅姆尼由於係貝恩資本出身,所以商界特別多友好。

好似前GE行政總裁、就一直公開表態支持羅姆尼既「經營之神」韋爾奇,佢上星期五更公開質疑非農數據既可信性、認為勞工部係為奧巴馬公然「造數」,佢之後仲要向路透同財富雜誌中止撰稿服務。

好似華爾街日報咁講,其實不論奧巴馬定羅姆尼贏,對經濟都係唔會有咩「靈丹妙藥」,佢地預言喺未來四年,無論邊一個上台,股市都會下跌超過兩成!

唔怪得麥嘉華話,如果奧巴馬連任,道指要「負萬三點」;羅姆尼贏好啲、負六千點啦!

易放難收


仲記得當日匯控就係咪搬遷總部、由英國搬返香港,出現過多次反覆,雖然歐智華最終決定無限期押後有關決定,但都呻英國金融業改革勢必令匯控監管成本大增,、每年要多二百幾億港元,形容係災難!

而家佢應該可以話得嘗所願,包括滙控在內既多間英國大型銀行、獲得豁免可以放寬部分資本要求,明年底亦唔需要硬性達到一成核心資本充足率。

英國金融服務局FSA最終同意讓步,對滙控在內既英國銀行作出多項豁免。

FSA已經向匯控在內既英國銀行發信,指佢地任何有關喺當地發放既貸款,只要符合相關規定、包括係向合資格企業發放貸款,就唔再需為相關既資產、額外提供資本金支持。

同時FSA亦豁免部分「巴塞爾三資本協定」既資本要求,銀行唔需要再喺明年底前,硬性達到核心資本比率一成既規定。

金融時報話,跟據新既計劃,好似係匯豐、巴克萊同萊斯銀行,日後既相關貸款,就等同喺監管層面上係Risk Free「零風險」。

跟據新計劃,銀行日後既資本比率、係可以低過一成既要求,目的就係希望比銀行彈性,唔好因為要符合資本規定而「一刀切」削減貸款,引發信貸收縮。

FSA亦同時擴大左銀行合資格資產要求,由過去只係接納國債同現金,擴大至英倫銀行可以承認為抵押品既資產,上限係一成。

FSA表示,今次修訂係避免銀行因為要去槓杆化、最終損害到經濟。

有銀行分析員話,今次係當局喺面對經濟持續疲弱、嘗試放寬部分規定測試銀行反應,但相信措施「易放難收」,日後好難再重新提高要求。

調轉頭諗下,其實今次都係三贏,銀行固然可以慳番一筆,英國政府帶頭放寬亦起到示範作用,更重要係避免銀行收緊引起既信貸收縮。

恐怕今次最不滿意仍然是沃爾克,老人家多次提倡要加強大型銀行監管、避免大到不能倒情況重覆,結果努力又因為另一次環球經濟衰退而付諸流去。

2012年10月9日星期二

政治綁架


美國眾議院今次既調查報告,難聽啲講,其實一啲都唔令人意外!

其實最叫人意外,反而係呢分報告既出處,因為成個調查,其實正係由華為任正非自己「引狼入室」。

時間倒數返去2011年2月,當時華為發左一封公開信,話近年對華為既誤解同不利傳聞愈來愈深,為左可以「清者自清」,決定主動邀請美國政府介入,對華為進行徹底既調查。

所以經過一年多時間,呢分報告終於喺星期一出籠,結論好明顯、就係美國唔歡迎你地,相信絕對唔會係任正非最初預期既情況。

熟知華為人士指,華為早喺幾個星期前已經知道今次調查報告內容,當時已經做定部署,一方面開始安撫客戶,同時向內部員工發電郵,澄清公司自己立場,並認為華為呢個品牌、喺美國以外既全世界,都係獲得信任。

簡而言之佢地立場覺得被美國政府「政治綁架」,特別係報告中提到既「Beaconing」,泛指係間碟軟件程式,可以將資料由軟件發放到主人身上,但報告既指控並無任何具體證據或者有關詳情。

同華為唔同,中興揀左較低調既回應,只係話自己會努力配合委員會既調查,所以委員會都未有對中興作出任何不法指控。

但結果其實未必有太大分別,好似思科就毫不猶疑中止同中興既合作關係,有熟悉相關法律程序既投行界人士表明,未來幾年中興華為都好難重新進入美國市場,更弊係有關既調查,可能會係歐洲展開。之前華為已經澳洲同印度受到唔同程度限制。

事件已經令人諗起50年代、麥肯錫McCarthyism 年代針對共產主義意識形態,而掀起既連串白色恐怖,迫害唔同政見既異見人士。

雖然「麥肯錫主義」既年代已經遠去,但隨著中國式既「國家資本主義」興起,意識形態之爭原來從來未消失過。

華為目前喺美國取得既收入來源,只有百分之四,遠低於歐洲一成三既水平,對手「亞爾卡特」舊年來自美國既收入就係佢地既四倍。

好似金融時報LEX專欄咁講,遇著今年係「選舉年」,任何既政治議題只有被無限放大,任正非只可以嘆句唔好彩!

或者香港可能會「因禍得福」,華為會來到「一河之隔」既香港掛牌,但如果華為真係因為政治因素而捨美取港,咁其實都代表今時今日既香港市場有咩吸引力,要走既最終始終都會走,所以奉勸小加總裁一句、唔好過早高興!

與瘋狂為伍

明燈補習社-- 陶冬博士賣樓的啟示



2012年10月8日星期一

紅十月

十月、最令股民憂心既到底係咩?

如果你答係咪「紅十月」、或節後開紅盤,咁你就錯晒!

今個十月長假國慶遇上中秋,唔少股民為左散一口悶氣,都舉家寧願去旅行,結果所有景點都出現爆滿人潮,好似華山更出現過萬人通宵滯留山頂既情況。

到長假前一兩日,大家都變成只係關心到底仲塞幾耐車、同埋係咪可以準時返到崗位!

有網民話,如果人滿之患唔係喺長城、而係出現喺股市,你話幾好!

市況淡靜既程度,連CCTV 既財經頻道都寧願講下景點熱況或者公路有幾塞車,所以關心股市認真程度既人、可能我地香港散戶仲要多一些!

二千點係咪失守,似乎愈來愈「Irrelevant」!

雖然你睇內地媒體一面倒唱好十月,甚麼「紅十月可期」、「升市不是傳說」,「宏觀經濟回暖」,總之講到你會信好似好有希望,不過大家都知內地喺維穩既大前提下,其實呢啲唱好言論大可不理!

今年八月憑著一句預測、上證跌破二千點而成名既海通分析師陳瑞明,就繼續預測大市未見底,估計仲要跌多一成四,落到千八點先係真正底部。

其實真係要真心佩服呢啲肯講真話既分析師,因為喺內地唔怕官府壓迫講真話,真係一啲都唔容易!

不過中環人話,大家未必需要太悲觀既、畢竟萬事萬物都有周期,A股你總唔信會跌到零!

以今時今日A股市值計,PE回落到11點4倍,對上一次咁低、已經係08年金融海嘯時。
而且同往跡比、PE遠低過過去十年既20倍,甚至平過MSCI新興市場指數12點6倍水平,似乎呢個角度睇,係「平」得有道理!

而且叫投資者買A股既大師愈來愈多。繼商品大王「羅傑斯」後、金磚四國之父,高盛資產管理主席奧尼爾,亦贊同喺BRIC中,呢個C係特別抵買,因為唔少人係低估左、好似係醫改同社保改革對消費行業既刺激。

奧尼爾話,如果你自問夠勇氣,而家夠膽買消費股,將會係一件非常有趣既事。

不過我地就慣逆回思維,既然內地估值真係咁低,我地調掉頭睇睇港股PE去到十五、六倍,既然香港慨念都係Buy China,人家A股明年就跌到只有十倍,咁點解資金仲要留喺香港?

今日瑞銀叫人沽港股、增持A股,都唔係無道理。

2012年10月5日星期五

夫子自道


開市埋位占少,今日來個夫子自道由淡友轉為好友的心情:
「呢個四眼口水佬,長期巨熊上身,面目可憎,連瑞信劉老師都警告佢,再咁固執,終有一天會有報應......

瑞信天王問面目可憎之人,想唔想快樂,做一個快樂既投資者?

想既話,就要少一份頑固,「希望在明天」呢五個字最識用於投資者,要搵希望,就要發掘值得有奇望既事情。」

所以,正當十居其八都驚經濟數據差,內地政策欠奉既時候,其實就要開始諗低基數效應帶動,就算盈利無真正明顯改善,數字上最少都會有。

只要市場由唔信、到半信半疑,再成為共識,咁就搞掂。

如果咁不幸,嚟緊經濟數據同盈利同比再要差,好簡單,認命,抵死!!!

亦因為咁,市場開始有個新想法,將今年餘下兩個多月全數write off,差的,預左、無政策估到,賭既係,出年得,只要有人肯賭,箭咀就有機會向上,亦符合股市係買預期呢個玩法。

無疑,個市升幾多,升幾耐,甚至係咪會再升?無人敢肯定。但肯定,所謂市況好轉,都極其量係一個紙醉金迷,今朝有酒今朝醉既升市,事關市場其他活動,可能繼續一概死寂。

香港市場,同IPO呢三個英文字連成一體,今年例外,嚟緊可能繼續。自欺欺人既說法係,大圍新股活動低迷,信者不幸了。

美國扣除一隻臉書,上市活動仍然活躍,新加坡銀行家忙過不停,馬來西亞幾隻新股通通上
定價,為什麼沒有香港份?

人人歸咎係內地經濟轉差,但經濟差豈不是應該增加公司資金需求?講到底,現今困境都是民企帳目問題惹的禍,導致投資者唔想買,保薦人唔敢做,監管者唔敢批。

情此之景令人聯想光復上水運動,投資銀行界有否需要搞一個光復港股運動呢?理由簡單不過,中資民企惹來的煩腦,竟要由香港市場來承擔,呢的或者係食得咸魚抵得喝。

中資IPO呢碟飯,我地食足廿年。佛利民說對,那有免費午餐?

有時好懷疑,小加到底是否星州無間道?

人人力爭,他卻放軟手腳。近日傳交易廣場大裁員,但據講係小加無間道大增商品相關人手致。

都好,少一宗IPO即係少一宗潛在中資帳目問題發生,幾好呀!!!諷刺係,今日大炒憧憬反彈,主題還是中資股。

商品大王羅傑斯同末日博士麥嘉華話,美股即將調整,但羅傑斯話,中資股仍可以吸納。

羅傑斯話,佢唔相信內地經濟會崩潰,市場目前充斥太多有關中國既利淡睇法,但就忽略中國仍然係全球重要經濟體,未來十年只會更強大。

羅傑斯於中資股零七年瘋狂時間,佢一直叫人唔好買,但到依家,佢相信投資機會已經浮現。

似乎真的值得大家參考!

狼文化


任正非,未必個個認識佢。

但由佢創辦既華為技術,全球知名。

華為係全球第二大通訊設備生產商,全球第六大手機製造商。舊年盈利十八億五千萬美金。多過好多本港藍籌公司。

消息指,華為正主動聯絡投資銀行,探討上市可能性。

外電引述華為消息指,佢地一直對上市有興趣。

但華為要落實上市,解決問題可能比其他中資民企多。

有別其他中資股,任正非雖然係創辦人,兼行政總裁,但佢手持華為股份,唔夠百分之二。

華為股權,係由六萬五千名員持有。

而華為架構極之複雜,業務遍布全球之餘,旗下子公司非常多。

更大阻礙,係華為一直被指涉及其他市場既國防安全問題。

美國一直唔願意向華為批出通訊設備合約。而年初,澳洲總理吉拉德亦以國家利益為理由,拒絕華為參與競投全國寬頻網絡鋪設合約。

華為背景一直神秘。任正非有軍方背景,八八年創辦華為,但資金來源無人知。

強調企業要有「狼既文化」,任正非帶領華為南征北討之餘亦重視研發,指明每年最少要將公司營業額一成撥入科技。

有傳,任正非曾經喺香港打滾。佢上個月撰文就提過,香港藏龍臥虎。

但華為上市未必揀香港,華爾街日報報道,佢地傾向美國上市。

銀行界估計,華為既算盤係透過當地上市,增加透明度,減低喺美國市場發展既阻力。

華為由生產山寨機起家,到而家發展擁有自己品牌,喺生產智能手機既市佔仲超越好多大既外國品牌,如果揀到喺香港上市,對我地金融地位有好大幫助!

咁唯有希望小加總裁努力些,爭取任正非可以回心轉意!

2012年10月4日星期四

大股東


一間上市公司如果同大股東有爭拗,會出現咩情況?

試想像,在和黃、如果誠哥同管理層有爭拗,大概要走既係霍建寧。

又如果在港交所出現小加總裁與財爺不咬弦,走那一個都不用多說。

咁點解渣打會有分別?

淡馬鍚會否沽渣打?中環人一語道破,未到正式沽售一日,都會繼續時有傳聞。

究其原因,係雙方關係大不如前了。

先由金融時報揭序,再由華爾街日報接力,內容相若,但留心既話,立場盡見不同。

可能基於敏感,但明眼人睇出,淡渣雙方已經去到透過媒體,各自放料、各自表述立場階段。

綜合而言,正如一兩星期前拆過既局,淡馬鍚佔有慾強,不甘於擔其被動投資者,更落面係,渣打十八人組成既董事會,陣容如此鼎盛,渣打之前寧揀一名南韓前總理入局,都沒有大股東新加坡份子,試問,淡馬鍚豈能吞下呢啖氣。

更甚係,渣打上周一如所料,增加董事會人數,四人之中,加入竟然係一個香港人,叫張子欣,新加坡代表依然欠奉,結果,觸發華爾街日報擬似擔當影子淡馬錫說話,暗批渣打企管不足。

正如老編所指,難道係何晶自視過高,以為錢就可以令一間過百年老店更改傳統?

淡馬錫發炮,明顯係入股近七年,董事會毫無話語權既結果。今天,淡馬錫質疑渣打董事會內,執董人數偏高,對不起,你當年入股時已經係咁,點解今日先嚟嘈?

環顧渣打,執董佔六名,比匯豐三名高一倍,但唔好忘記,匯豐執董人數一度有五至六個,只不過係鄭海泉,霍嘉治退役,方令人數減少。

董事會六名執董,說多不多,說少不少,用星展、以至建行準則?

有問題!!!皆因兩間實際形同國營銀行,執與非執,皆自己人也,從每次董事會投票通過率高達百分之九十九點九九可見一班。

再者,理解無錯的話,匯豐下面,還有一個管理委員會,負責業務運作,渣打卻沒有,相關角色由董事會十八人分擔。

稍做功課的話,渣打局內,分成兩大編制,包括PRIMARY同 ENABLING,前者有關風險管理及財務,由執董為主負責,後者集中薪酬及企管,由非執董把關。

所以,渣打罕有回應報道,一句對方不了解,白一點,即係話,你新加坡唔識野!!!

無估錯的話,從不回應市場傳聞既渣打,破天荒有話說,似乎反映渣打自覺被屈多年,不吐不快。

曲線話老細唔識野,關係弄至此地步,還信雙方會天長地久嗎??

2012年10月3日星期三

富.事.通:歌劇之王

Phantom of the Opera 創作人 Andrew Lloyd Webber


暗戰-- 後話

感激華爾街日報,將伯南克,德拉吉兩人印鈔真面目,原型畢露。

如果衡量一個人,只係忠奸,正邪之分的話,咁肯定伯南克係忠既,德拉吉既奸且邪。

統粹從報道,從個人言論,甚至睇樣,伯南克就算政策有錯,暫且都尚算係貫徹個人學術思路,衰極都只係一個固執既學術阿伯。

佢將所有印鈔既問題,視而不見,登上自我思想洗腦既學術頂峰、佛利民,佢一而再,再而三唔放過,假傳「佛旨」。

從另一個角度而言,伯老只係寫緊一篇現實版既學術論文,要引經據典。

伯南克可能賠上聲譽,但又試問現今有幾多學者,可以為學術作出無限貢獻,交出沉重賭注?
相由心生,相比之下,德拉吉一直予人來意不善之感。

睇埋華爾街日報六頁紙既鴻文,吉哥盡顯攻於心計本色,為說服阿太,佢處心積累,為打擊異見,佢玩盡架空權術。

超級馬里奧此刻成敗未知,但肯定犯上央行從來不應該涉及政治既大忌。

所以,伯、德兩人,先後共赴無限印鈔之路,但投行出身既吉哥,處事上未能人如其名,無德可言,就難以德服眾。

君不見,伯南克縱然樹敵甚多,但道不同,亦未致於被對手連番暗箭。

說話到此,我地唔係借題發揮,但領導既然不獲尊重,行事陰險,機關算盡,妨如政客,一旦危機未解,美國往後一條路,肯定會比歐洲易行。

相反歐洲,怕既唔再局限債息抽升,股市倒跌,而係當借來的時間用盡,由不滿,到內哄,會否變成行上分裂之路?

印鈔踏入四周年,開市埋位再為伯南克算帳。再次澄清,我地並不痛恨教授,而係替佢難過。

刻下,佢可以言之成理,自圓其說,但請問,佢研究貨幣政策多年,那有一個央行大量濫發貨幣後,會成功退市?

有老前輩憶述,當今之世,有如民國政府印錢,製造金元券時代,期時人人紙醉金迷。

但思考現實,全球數十億人類,已經由被貨幣政策摧毀存款利息回報,蔓延至依家破壞緊一眾投資工具回報。

如果同意,就請自問,我地係咪步入貨幣政策第二個破壞階段?最後結果,是否就沒有贏家??

暗戰


"Believe me"

呢句說話,歐洲財金界認定,德拉吉變左。

亦令佢同德國央行行長魏德曼關係決裂。

華爾街日報披露,呢幾個月,德拉吉點樣令歐洲央行變成第二個聯儲局,踏上印鈔之路。

德拉吉由唔願意買債,到無限買債,理由太簡單,就係歐洲債息持續急升,而六月佢收到既消息,有為數三,四十間金融機構開始研究歐元瓦解後既部署。

結果佢領導既歐央行先行部署,背後亦顯示德拉吉政治手段高超。

事緣要由原本係歐央行行長大熱接班人韋伯突然辭職講起,因為韋伯,德拉吉成為頂頭大熱,當時,德國極有保留。

但聰明既德拉吉,公開同私底下表明,德國穩健模式,係歐洲既典範,結果贏得默克爾支持。

德拉吉求學期間,一直對意大利由經濟大國,淪為財玫一團槽耿耿於懷,歐債危機事態發展,令佢覺得歐央行一定要變,改行寬化政策。

要變,佢知道,一定要有德國支持。

於是,佢幾個月嚟,一直私底下游說默克爾,身為親信既財長朔伊布勒。

兩人最初對買債有保留,但德拉吉講到,咩都唔做,歐元就此玩完。

兩人轉軚之後,魏德曼成為唯一阻力,但德拉吉擺明,架空對方。

當七月底,德拉吉「相信我」呢番談話出街後,魏德曼即時評擊

有別於伯南克熱哀解釋,當時身處倫敦既德拉吉,第一個反應係透過電話,大罵對方不是。

之後,再致電正在北海渡假既朔伊布勒,要對方捧自己,結果,朔伊布勒為支持歐央行,就咁就違反左財長唔干預央行政策既傳統。

呢兩個人,因為買債,成為世仇。點解魏德曼咁抗拒呢?

原來同意大利一個電話亭有關。

話說,佢年青時到意大利旅行,發現當地所有電話亭都塞滿硬幣,追問之下,其實係通脹同貨幣貶值既後果。

自此,就視通脹為大敵。

上個月,魏德曼知道佢喺歐央行內大勢已去,趁德拉吉記者會前,佢提出一個要求,就係要歐央行公開表明,區內分歧嚴重,但不獲理會。

結果進一步激怒魏德曼,令佢每次公開場合,都會批評央行印鈔。