2013年7月3日星期三

善心人? NO La!


今日,相信會有一萬人同時大失所望!

因為為數一萬個、價值一百萬嘅平價上車單位,一筆勾銷!

政府正式表態,不接受恒基李兆基捐地起樓,仲反建議,捐地人士不如搵非牟利機構洽商、會較適合。

坦白講,政府無論係咪接受捐地,都一樣比人彈! 一旦接受發展商嘅好意,就一直會有話柄係另類官商勾結。

唔接受嘅話,眼白白無咗一萬個潛在供應,演變成三輸局面!政府、四叔、上車人士都輸!

輸唔輸,就睇政府! 增加供應呢個重任,唯有靠晒政府,但加快興建公營房屋方面,政府又無能為力,仍然係困局一個!

政府婉拒四叔損地提議,四叔對於被拒於門外,表示歡迎。

作為主要發展商,四叔毫無損失,但對於政府,問題似乎來得複雜。

印象中,陳茂波就四叔捐地發言次數不多,勢估唔到,最詳盡,最實質一次就係SAY NO。

中環人話,政府決定可以理解,但亦反映內心膽子小,既爭扎又無奈。

對梁振英來講,由無地,變任揀地,到唔要地,本來肥肉在前,但怕風險太大。

一,接受損地本來就諷刺之極,最大地主理應係政府。
二,攞一幅,或七幅,就會觸發日後潛在雙向性利益輸送話題,政府日後只會附近建一條路,或者起一個公廁,都隨時製造話題。
三,「平」樓何謂「平」,對象定義等等,唔係一時三刻。

亦因為唔要冒風險,梁振英寧願用三十個月樓花期,人為數字谷高供應,而非實地,建實樓,自我保護,抑或增加供應,已經有先後之分,重要及次要之別。

但如果外界再今次拒地放大,政府增加供應是自打咀巴,未必係SAY NO就係NO MORE 咁簡單!

正如施老闆所指,本港確實需要土地興建房屋,只要問心無愧,受你就受你,何需怕外間閒言閒語?

本港地產分析員一直認為,四叔捐地,政府要地係雙贏,當佢地中午知道政府拒絕免費要地之後,第一個反應係「有無搞錯」!!

講真,地,肯定唔夠。輸家一定係想有「平」樓的市民,以及之前因為捐地,有助提升恒地每股資產值而買恒地既投資者。

以恒地農地總量,大行計算每股資產值介乎每股六至十二蚊左右,但四叔一捐,體現價值之後,再以現金方式補償,有大行計過,恒地農地每股估值就會提升至近三十蚊。

如是者,思歪不止止斷市民買屋夢,兼且搞埋破壞,恒地股東難體現價值。

公平的講,接受捐地與否,政府都會俾人鬧。但事後檢討,成件事涉及兩大問題:一,為何當初吹得咁大,又傳政府極高層出動,又話積極研究等等,控制市場預期呢一環,政府錯!!

二,係咪處理得唔夠叻,唔夠醒。叫四叔搵非牟利機構實現夢想。但點解政府當初唔一早穿針引線,搵房協,或者其他機構全線負責?有波唔入,兼失球,政府亦有錯!!

沒有留言: