Money Cafe

橙路

2012-02-03T23:29:00.001+08:00

賣「橙」１３年，和黃再次喺歐洲大展拳腳，始終鍾情ＯＲＡＮＧＥ。

誠哥十二年前過千億賣橙，到依家十億歐元左右，買番個奧地利橙。

當中最重要信息係，「我番嚟啦」!

潛台辭當然是、電訊業務亦會繼續搞大。

想喺歐洲大展拳腳，舊年業績已經有迹可尋。評語係負債同現金流穩健，有條件擴展核心業務。

到年底就付諸實行。舊年底已經喺奧地利，推出４Ｇ服務，仲講明會競投新嘅頻譜。

出名眼光獨到，但誠哥對呢個投資加虧損、前後燒咗近４千億銀紙嘅項目，依然情有獨鍾，係咪暗示嚟緊會大翻身？

真實係、超人做Deal啟示性太強，舊年佢賣完港口，又賣東方廣場，時間靚爆。今年頭炮，佢無賣野，反而買野，似乎顯示李生審慎之餘，亦開始撈底，難道後市不用睇得太差?

由賣嘢年，變為買嘢年。奧地利橙意義在於，佢決心進一步將歐洲電訊業務養得肥肥白白，先再作打算，並唔似舊年外界睇法，係賣得就賣。

九億歐元，相當於六點九倍EV對Ebitda，雖然較歐洲同類股份估值高，但由於和黃奧地利依家收入貢獻只有一百萬歐元，一完成收購，盈利即時大增，計埋涉及既即時協同乘數效應，有分析員指，其實低於市價。

調番轉諗，出價比同行估值高，亦曲線提高自己歐洲電訊業務價值，又是一舉兩得。

和黃明顯專攻歐洲，好簡單，趁你病，買「平貨」。

歐洲資金仍然緊張，大把好項目，電訊，零售，碼頭，任你揀。

目前和黃最大優勢，唔係現金好多，而係有企業品牌，借到「平」錢。兩星期內，兩度發美金債，攞超過廿億美金，息一次比一之低。和黃攞完呢批美金，透過掉期轉做歐元，先賺利息。

誠哥今次最高明之處，賺息兼低價買野外。最重要，係提醒市場，仲有隻和記黃埔存在，又係由股價說明一切。

一山藏二虎

2012-02-03T19:18:00.001+08:00

「Xstrata and Glencore are different because they are so similar.」

這是經濟學人對兩間公司合併的評語。

聽落好玄，但其實除左講緊兩間公司無論歷史、規模、業務相似外，兩間公司亦在倫敦上市、但同總部同樣位於只相距幾英里的瑞士(因低稅率)。

更重要係講兩個CEO的進取性格。

嘉能可行政總裁格拉森伯格諗咗五年，嘉能可同XSTRATA合併，終於有望成真。

舊年集團喺倫敦同本港上市，為合併帶黎本錢，為咗掃除最終障礙，佢更斧底抽薪、索性讓出權力。

格拉森伯格會將新公司行政總裁職位，讓俾XSTRATA嘅「戴維斯」，自己只做「副行政總裁」。

佢地兩個雖然係舊同學，同樣係南非人，而且又熱愛運動，性格同樣火爆。

但一說到管理哲學就完全唔同，仲不時傳出有拗撬。

較為經典嘅係，０８年金融海嘯時，戴維斯決定要Xstrata供股。

格拉森伯格唔想出錢，但又唔希望股權被攤薄。

最終經過一輪熱烈嘅爭辯，結果要Xstrata向嘉能可買入煤礦，等嘉能可套現供股。

佢地兩個嘅不和，令之後兩間公司，根本完全無辦法有更緊密嘅合作。

至於主席一職，亦未傾掂數。一個嘉能可係前和黃大班馬世民，而XSTRATA非執行主席、更係匯控前主席龐約翰。結果又係龐約翰勝出。

預計合併後，會部署更多嘅收購，將集團坐大。

因為暫時嚟睇，兩間公司業務無咩重疊，協同效應可能得１億美元。

嘉能可從中可以得益幾多，要睇出價，有大行認為，只要溢價唔高過一成六，都對嘉能可有利。

金融時報形容，一間全球最大商品交易，同一間全球最大嘅火煤出口商以及第四大銅商結合，創造出業界一個獨特嘅營運模式，礦業界會有重大變化。

華爾街日報亦相信，嚟緊會有更多嘅整合。

說回經濟學人的看法，交易目前的最大障礙、完全取決於如何在格拉森伯格同戴維斯之間。

他們對很多事情都有相同睇法，但佢地就很少同意對方資產的價值。

不過經濟學人仍然認同佢地最終會成功，原因正是礦業需要透過大量巨大交易方會成事。

與全世界的礦業巨頭一樣，要成功、不能只集中精神在有機增長同小型收購，必需是應大交易。

398誰是兇手

2012-02-02T23:30:00.001+08:00

電訊管理局今個月中、落實要求電訊商實施公平使用合約指引，清楚界定咩叫「無限上網」。

政策原來是希望電訊商唔好再取巧，明明是有限的數據計劃，卻聲稱無限，原意大概是想迫令電訊商「有限」變「無限」!

豈料一個數碼通，明知客戶已經上癮，索性擺明居馬變相加價，一於話知你政府原意想點!

當然，表面都要冠冕堂皇，話係基於客戶數據用量逐步增加，以及公平原則，決定取消推出無限數據用量計劃喎!

由今個月十三號開起，現有客戶續約，或新客上台，都唔再有無限數據用量收費計劃，新計劃最高用量「兩激」，收費維持而家無限用量既３９８蚊，之後客戶要額外俾錢，買新數據用量。

最高要比多二百蚊，買多三激用量。那一來一回，原來用開4激的用戶，豈不是要乖乖比夠六百大洋?

當然在商言商，數碼通明知自己有網絡優勢，客戶個個用到上癮，根本不需要擔心客戶流失。

諷刺的是，分析員原本估計，營運商大部份會用電盈之前五激收費計劃做藍本，取消無限量計劃後，每月容量範圍最少有三至五激。

但依家，數碼通提供容量遠低於預期，到底點解呢？

相比新加坡，月費數據量幅度介乎二十，至三十激，香港只得低單位數。瑞信之前提過，原因係香港市場競爭太大，容量飽和，將用量上限定得愈低，用者自付，反而係最健康。

無錯，香港流動通訊市場滲透率超過一百，如果睇智能手機滲透率，由零九年得兩成，到今年，大摩估計會有六成，而後年更會增至八成。

加價無人鐘意，但怕且電訊管理局唔會異議。事關，電訊公司今次打正旗號，係響應電訊管理局一早已經發出公平用量指引，所以有數碼通之後，其餘營運商一定會陸續取消無限量數據計劃。

再次證明特區政府無用惱，好心又變成做壞事!!

你會問，兩激，夠唔夠？原來全港智能手機用戶中，只有百分之五係超高用量，其餘平均每月只係用到一至一點五激，表面睇用戶無咩損失。

簡單講，今次因為監管機構推動，變相鼓勵營運商加價。大摩之前就計過，因為取消無限用量計劃，數碼通每名客戶收入，到後年會提高百分之七點五。盈利潛在增長，會額外多一成八左右。

無論如果，輸家一定係用戶。但無計，國際大趨勢。

不過要提醒，美國前年開始，亦取消左無限量計劃，由於大批舊合約鎖死，電訊公司盈利其實無即時上升，分析員提醒，例子在前，想借消息炒番轉既朋友，要留意。!!

撻拖奇材

2012-02-02T19:32:00.001+08:00

被譽為科網股十年嚟最大盛事，FACEBOOK提交嘅上市文件，無提到發行股數、定價或者邊到掛牌，只係話預計第2季開始招股，初步希望集資50億美元，視乎反應再加碼。

消息人士話，FACEBOOK希望集資額，其實係達到100億美元。

上市市值介乎750至1000億美元，以上限計，比零四年集資19億美元上市嘅Google，高出一倍，成為全球最資最多嘅科網股。

以全球八億用戶計，換言之，各位貢獻有一千大洋!

朱克伯格寫畀潛在投資者嘅信，亦都講明公司目標唔係要爭取更多收入，而係透過賺錢嚟提供更多服務。

潛在辭即是根本唔志在搵錢?? 由哈佛中途退學，八年前創辦Facbook ，經典照片係試過著Adidas「拖鞋」出席商業會議。

今次成功上市，以朱克伯格持有兩成八Facebook股分計，身家會上漲至２１０至２８０億美元。

年僅廿七歲，朱克伯格舊年人工係一百五十萬美元，不過文件話佢到出年、就只會收象徵式既一美元薪酬。

文件又披露，朱克伯格會透過上市、出售部分股權，目的就只係要嚟交稅。唔止朱克伯格、facebook超過三千個員工，亦因為持有認股權而受惠，華爾街日報形容會創造數以千計既百萬富翁。

不過近年Facebook比員工既認股權數目係不斷減少，以一個零九年加入Facebook既工程師為例，當時佢既認股權有入六萬五千股，再經過股分分拆，而家已經值一千二百萬美元。

但有最近加入既經理級員工獲得認股權、已經大幅減少至二千股。對朱克伯格嚟講，佢一直唔願意將facebook上市，正係擔心會令員工分散注意力，只係將精神放喺股價表現，而忽略產品創新。

Facebook 既上市文件，其中一個風險因素，正係話公司創新既獨特文化，可能因為規模太大而日漸消失。

相比起華爾街集中注意力喺集資規模，矽谷既科網公司，對facebook既招股文件內容更有興趣。

舊年FACEBOOK收入按年多左八成八，去到37億，但係少過市場預期嘅超過42億。

不過同好多科網公司唔同，Facebook已經錄得盈利，舊年按年升六成五，去到10億美元。

原因係主要收入來源嘅廣告，數目按年多左四成二，每個廣告平均售價，過去一年升左百分之18。

收入來源亦逐步分散，透過發展社交遊戲，畀用戶買賣虛擬商品，就賺左超過五億。

Facebook收入唔夠其他新興科網股，好似舊年上市既團購網站Groupon、收入多左近七倍，就算日漸式微既雅虎，舊年收入都比facebook 多七億美元。

不過華爾街日報專欄作家、仍然認同FACEBOOK係今年最好嘅投資。

雖然市盈率26點9倍、比起Google上市時高出三倍，但正如兆富所講，8億用戶既然都「欲擺不能」，又豈不會成為Facebook 日後的金蛋?

特別是對全球既大型品牌集團、他們開設的Page，就係有好有效既宣傳渠道，宣傳作用甚至超越電視/ 平面廣告!

但有分析師都提醒，嚟自Google、微軟同Twitter既競爭，可能會影響上市後股價表現。而風險因素亦列明，內地既人人網、新浪網同騰訊，都係好大既競爭對手。

問心無愧

2012-02-01T20:57:00.000+08:00

退稅、紓困、保企業，所有措施加埋總共洗八百億。

咁大手筆、因為政府有本錢。

原本舊年派左錢，估計有８５億赤字。但稅收同賣地收入、都遠高於預期。

埋單計數、無赤字，兼有６６７億盈餘。一來一回、財爺估錯咗七百幾億。

財政儲備有６千６百幾億，夠政府洗２２個月。

預計出年有三十幾億輕微赤字。

未來幾年、除左一五／一六年度、都有盈餘。

不過、盤數未必一定估得啱。
睇番曾俊華嘅往績。

年年都估係赤字、但最終都有盈餘，有啲仲相差成千億。由於年年都估細數，曾俊華任內一大特色，就係派糖派得最多、亦引起最大爭議。

佢就話「問心無愧」喎!

其實未知係咪最後一份，但司長一句但求問心無愧，聽落好有離別依依味道。

無派錢，但退稅上限萬二，技術上同舊年派錢加退稅額規模一樣。免稅額提高，強積金免稅加到萬五。加加埋埋，款式多個舊年，收貨與否，各位決定。

簡單嚟講，呢份預算案，樣樣有的。粒糖唔會好甜，但總算人人有糖，而且經過幾年教訓，司長學精左，知道只要了解到令中產滿意、社會就會收貨。

佢用左幾個段落，提到上任以嚟，幾份預算案加加埋埋，公共開支增加七成，比同期經濟增長規模兩成幾，大幅超前。即係話，曾俊華要強調，佢從來唔係守財奴。

既然算係一份擴張性預算，公共開支每年增長，但點解咁多人批評? 咁多人而咁唔高興?

施老闆大駡政黨傳媒有責，令政府唔敢再派錢。

在佢眼中，退稅只係令一部分人受惠，只有全民退稅，先可以真正幫助有需要的基層。

羅家聰亦提出，政府咁多年嚟，收入再分配徹底失敗，有道理。無疑，好多人信奉自由市場，對政府擔當二次收入分配有保留。

但一個社會，有貧窮，仲要貧富懸殊日益嚴重，就需要政府擔任分配功能。

生果金，照顧窮人福利要再加。但免稅額終於肯提高，都要俾個LIKE佢。

唔理紓困部分，整份預算案，其實流露政府大淡友本色。

首先，經濟增長預測一至三，兩個百分點差異，反映政府完全掌握唔到經濟前景，但肯定，通脹唔會好似司長九月時所講，唔再係威脅。簡單講，政府預測，好有滯脹FEEL。

再睇埋一千億信貸擔保計劃重推，政府預最終要洗百一億左右。好簡單計算，政府估計中小企違約率，有百分之十左右，算係好差。

點都好，政府依家實力，係有錢。今個年度，六千幾億儲備，相當於二十二個月政府開支，及得上高峰期。

但政府逃避，到底幾多儲備屬於合理，之前提過話檢討，到最後一任都係不了了知。

政府點止咁少錢，二萬幾億外匯基金資產，有一半支持貨幣基礎，呢部份係浪費。一日撐著聯匯，大量資金要買美債。同時間儲備雖然多，但規劃唔好既話，只會愈錢多，愈俾人鬧。

萬二蚊

2012-01-31T19:30:00.000+08:00

政府有錢淨，消息話、成個財政年度預計盈餘有望超過七百億

庫房水浸，但政府唔會再派錢、會提出一系列的紓困措施，其中中產得益最大。

稅務擔子會輕左、消息話政府會退稅，上限萬二蚊，而個人免稅額、亦有望由十萬零八千，增加到至少十二萬、父母同子女免稅額都會調高。

咁做可能令稅網收窄，但消息話人工上調加上通漲，提高免稅額亦好合理。(此點真是不敢認同，稅網再收窄，日後只會令財政收入更波動，一旦要打逆景波，到時分分鐘要全民加稅，到時一定同你死過!)

供緊樓嘅亦有得益，供樓利息扣稅期有得延長，差餉亦會有寬免。

家家戶戶都享受到嘅，電費補貼亦有望加碼、每戶一千八百蚊，學童資助亦會增加。

至於舊年創先河既iBond，今年繼續有，規模一百億，相信今次認購反應可會熱烈得多! (不過回報其實已經不甚吸引。)

財爺自己在網址話唔追求掌聲，不過觀乎呢分預先張揚既預算案，怎能令人不聯想到大曾要威威下台?

自己口就講到好驚好驚，仲大言不慚話歐債危機最好可以比佢任內處理，但同時就安排自己外訪密密麻麻，請問佢邊有時間處理咁多問題?

回望曾財爺五年任期，每每都係做多派錢工作，對於長遠競爭力可謂乏善足陳。

甚麼六大產業不說，最經典莫過於發展伊斯蘭金融商機，除左任內帶過隊外訪中東，請問呢個伊斯蘭商機仲有咩工作做過? 而家愈行愈遠，留底只係一埋笑話!

其實香港呢幾年最大機遇，莫過如發展人民幣離岸中心市場，但每一年財爺對此描述，都只是適可宜止，市民要真知了解人民幣業務的機遇，我們反而強力推薦李小加寫的萬言書，不論思路及競爭力的建議，都絕對比預算案強出萬倍!

先行者

2012-01-30T21:25:00.000+08:00

喺零九年，國務院明確定出、到２０２０年、將上海建成為國際金融中心。

經過近三年嘅發展，發改委同上海市，定出更清晣嘅目標，首度表明，要喺２０１５年，將確立上海、建成為全球人民幣交易中心，包括喺產品創新、交易、定價同清算方面。

另外亦定出多個具體、要達到嘅預定指標。

一係要上海金融市場規模顯著擴大，交易總額、要由十二．五規劃起步時嘅３８６萬億人民幣，到２０１５年，跳升到１千萬億。

二係要提升國際地位，俾更多境外投資者參與，大大提升上海股市、同大宗商品期貨喺國際價格嘅影響力。

仲要致力將上海銀行同業拆息，成為境外人民幣資產定價嘅主要基准利率，人民幣中間價，亦成為境外人民幣定價嘅滙率基准。

其它目標、仲有將債券托管餘額，由全球第五位，進入前三大。

金融衍生產品交易量，打入全球前五名。

管理資產規模，增加一倍到三十萬億人民幣，從業員去到３２萬人。

上海市政府話，長期以嚟，上海同本港、喺金融領域上一直保持良好合作關係，會進一步發展滬港金融嘅互補、互助同互動關係，合作面向全球，未來不斷開拓新領域、多樣化金融發展。

既然三年後，上海目標做全球人民幣中心，即係代表二零一五年或之前，人民幣國際化目標有望落實。當然，所謂國際化，唔會係人民幣成為儲備貨幣，甚至取代美元。

而係呢幾年，內地已經盤算到，國際間使用人民幣普及程度，同金額，會比依家多好多，好多!!

當然，有人會擔心上海之得，會係香港之失。但將發改委最新二十五頁紙既藍圖，拍埋之前小加總裁新年工作報告，其實兩者吻合。

簡單講，呢三年內，香港會好多大製作，內地會有好多野俾香港試，香港亦大把機會。
上海作為在岸市場，要主導產品同人民幣定價，理所當然。

但上海要做國際定價、做好反映國際需求既拆借市場，香港未來三年係重點示範。

調番轉講，其實係香港做好件事，先有俾上海熱炒!!所以，我地先係先行者!!

三年後一千萬億交投量，好似好進取。但如果人民幣貿易結算有更大成績，中環人話，一千萬億，好少事!!

雖然倫敦同新加坡都有心做人民幣離岸中心，但香港只要一日揸著人民幣即時貿易結算呢個金蛋，再多幾個離岸中心，最終又不是要回歸香港做結算，所以只會有利我們鞏固離岸中心地位！

目前人行同多個地區有做貨幣掉期安排。熟識運作人士話，今年重點，係睇日本。一旦日本亦加入掉期貨幣互換，今年貿易結算量，又邁向一大步。

日本雖然係美國細佬，但錢係最現實。三十一年嚟首次逆差，日本一定會千方百計去扭轉，中國主動的，非旦無乘人之危，對佢地嚟講，反而雪中送炭。

講到底，與其估幾時減準備金率，依家係時候準備，演好呢套三年好戲。

未來太多事會發生，可能幕幕精彩，人民幣業務，國際化進程，大家要勤力學習!!

我有嘢講

2012-01-28T23:37:00.001+08:00

分享了Frances 李燕芬在下周三預算案特備節目"我有嘢講"的心聲, 請大家上呢個facebook 節目留言發表意見!
www.facebook.com/2012budget
/////////////////////////////
尤記得，去年的財政預算案前夕，社會一片派錢之聲。

財爺最初堅守，派錢會刺激通脹，到幾日後「從善如流」豪派六千元。

今年的預算案，派錢之主觀願望仍在，只是退稅的呼聲更高。

陸續有媒體報導，財爺將繼續做財神爺，今年會再度退稅，上限或超過八千元。

其實，自曾俊華上任以來，幾乎每年都有退稅措施：
０８年，他宣布退稅７５％，上限２．５萬元；
０９年，他原先提出退稅５成，上限６千元，後加碼至退稅１００%，上限至８千元；
２０１０及２０１１年，均退稅７５％、上限６千元。
去年更多加６千元大利是，及通脹掛鉤票據（ｉＢｏｎｄ）。

過去幾年，派錢、退稅的訴求，不絕於耳。

經濟不穩，要派錢／退稅，為之共渡時艱；庫房水浸，要派錢／退稅，為之還富於民。

不過，那６千元，８千元，ｉＢｏｎｄ的３厘息，可以代交多少個月的國際學校學費？

代交多少個月的興趣班費？代交多少個月的補習學費？代交多少次的私家醫生診金？

我們是否有這樣一個選擇：政府與其慷慨解囊，何不認認真真地思索一下，將公帑投資在教育，在醫療，在福利，甚至整體經濟？

你還記得六大產業嗎？變凋零落葉。

假如教育辦得好，父母不用送子女到國際學校，或能為大家省下更多的６千元；

假如公營醫療有更充裕的資源，或能為一些捉襟見肘的家庭，省下不少醫藥費。

假如我們的經濟發展模式，能達致更多元化，各階層、年齡的香港人亦能繼續貢獻香港。

生於斯，長於斯。

這一屆政府只餘下短短數月的任期，縱然有許多不滿，許多失望，但這彈丸之地，還是我們每天生活、工作的地方。

加入「我有野講」，儘管是片言隻語，有線新聞為你發聲。

李燕芬

龍騰

2012-01-28T00:34:00.001+08:00

新一期經濟學人雜誌，對中國意義重大。因為呢份過百年歷史刊物，保守色彩濃厚，由佢地確認中國地位，絕對要好好記載。

事關，經濟學人由今期開始，加入中國作為每周固定欄目。

係佢地自從一九四二年，加入美國作為特定國家欄目後第一次。令到，經濟學人以後每星期，特定國家專題，加至三個，包括美，英，中。

佢地解釋直接，話中國作為經濟強國，全世界嚟緊一段長時間，都會受中國影響。但讚之餘，經濟學人話，內地政治體制要進步，更重要係經過廿年每年平均百分之十高增長，中國經濟模式，要演變，否則情港將會是相當危險!

經濟學人對中國評論，唔係新。當然出口，投資帶動模式，唔會繼續年年有高貢獻。但內地好多專家，包括秦曉亦講過，內地既成功，只係由封閉到開放既經濟轉型既結果，講唔上係模式一種。

無疑，一個經濟模式涉及分配制度，市場效率，原始創意等等，中國暫時係零。要講中國，出面唔少專家，可能講足全年。

如果由香港評祖國，既有又愛又恨之感。

兩地融合，文化差異，出現問題，錯在之前香港配套不足之餘，亦不能否認係，中國由好窮，變有錢。一有錢，當然自然想第一時間有人讚佢叻!!

中國既將來，主要睇兩個字，質素。

經濟增長質素，同個人既質素。祖國冒起獲確認，西方會用更多方法影響中國。但同樣，中國發展，又會左右番全球。呢個互相制衡遊戲，有排玩!!

DOVNANKE 鴿南克

2012-01-26T20:53:00.000+08:00

你有無諗過三年後自己會變成點?

認真講，三年流流長、唔好話自己會點，世界會係咪末日都唔知，有無需要做咁長預測?

所以大家都做唔到聯儲局主席，因為普通人根本無呢個預測能力!

聯儲局今年首次會議，喺里士滿聯儲銀行行長拉克爾投反對票下，當局承諾將超低利率，由２０１３年年中，進一步延長到２０１４年年底。

聯儲局同時亦增加政策透明度，歷嚟首次制定通脹目標喺百分之２，可以話了左伯南克多年來既心願。

至於就業目標，聯儲局話由於受太多因素左右，佢地好難制定具體水平，不過委員共識係長期趨勢介乎百分之五點二至六。

所以中環人話，由二零一二年，一月廿五日起，伯南克改名，叫做鴿南克。佢利用透明度做理由，將鴿派本色盡現眼前。

金融時報形容、設定通脹目標將會改變聯儲局日後既運作，政策工具只會視乎單一既目標，換言之只要通脹低於百分之二既水平，聯儲局就有理據推出第三輪既量化寬鬆。

為咗引導市場利率下降，聯儲局亦首次公布局內委員對利率嘅預測。但委員對於幾時收緊貨幣政策、就意見分歧。

鴿南克又好，伯南克都好，無疑係當今世上最幸福快樂既經濟學家。

試問世上，有邊個經濟學家，有呢種福份，將學術能學以致用於全球最舉足輕重既中央銀行?

佢老師費沙，輩份高過佢，依家都只係掌管以色列央行。

鴿南克有呢個福氣，佢為設定通脹目標，同增加透明度，前者爭取廿年，後者傾左近六年，佢終於在委員會內大換班之際、成功爭取。

鴿南克QE，好多人唔鐘意，但無佢，美國暫時唔可以經濟上跑贏歐洲，領導群雄。

如果根據格羅斯推測，三年內唔加息，期間會有QE3、QE4、5、6，甚至變成無限QE!

雖然聯儲局結論係，最快一四年底或以後先會加息。但多謝主席提高透明度造法，十七名委員中，支持出年底或之前加息，同認為最快一五年甚至更遲加息既委員，各佔六票。

所以，認為後年先係加息時候涉及既五票，成為未來關鍵。

即係話，呢五票他日轉軚，支持提早或延遲加息，取態係點，會直接影響鴿南克決定，亦可能變成損害中央銀行最重要的公信力!

所以今次聯儲局有透明度之餘，亦製造唔少混亂。簡單講，以後公開市場委員會會議結果，唔需要睇文字公布，數票做比較就得!

龍年

2012-01-21T00:26:00.000+08:00

瑞信劉紹文憑著「龍游淺水遭蝦戲」，道盡龍年最大風險!

預言小龍潛水，原因就係小企股經營依舊困難。

龍對中國人，有深遠象徵，龍年特別備受重視，局不見甚麼龍囝龍囡已經炒起一批又批慨念股分?

連外國傳媒，彭博電視既股市分析環節，亦搵嚟英語了得既風水佬，為前程問卜!

但唔好忘記，風水佬年年都會話，今年勝舊年，但機中有危。

投資路向，機會日日有，但切忌受左右，如果太過貪，最後變成得個貧!

由於變數太多，近幾星期，主流分析其實都係一句，就係見步行步。

人人話，只要小川行長放水，股市就有得救。但花旗大國，今年由鷹，變為鴿年，正正變成與龍對沖!

鴿派當道，偶一決定按扭印鈔，通脹番嚟。中國又點會咁笨?

市道的而且確地好，街逼爆人，酒樓無檯，鋪頭無貨，連醫院亦都唔夠床位，學校亦無學位。

香港受惠祖國，未有更多人體現之前，先有好多人身受其害。

以通脹為例，內地雖然跌完又跌，但本港並無一如政府預期會回落。

上月綜合消費物價指數繼續企喺百分之五點七，扣除政府寬免因素，基本通脹亦達百分之六點四，兩個數據繼續遠比內地百分之四點二高。

足以證明，通脹未走。

究其原因，是香港結構性通脹問題一直無改，聯匯更係其中主因。

所以唔該大曾農曆年文告，唔好再大聲叫，會盡力做到最後一刻!!

環境複雜，摩通講得有道理，龍年要轉身快，所以萬萬不可做巨龍，小龍已是綽綽有餘。

出現太多解釋唔到既好景，未必係好景!!

利是

2012-01-19T21:50:00.002+08:00

商交所

2012-01-19T21:43:00.000+08:00

小加總裁今日一句”I WSIH THEM LUCK"，道出商交所前景如何。

當年商品交易所一夜之間誕生，背後詳情仍然係個迷。

商交所員工仍在，總部就由ICC搬到CYBERPORT，產品依舊，都係得個金。

撇除租金，洗費，員工開支。唔少行內人士傾開都話，到底佢地生存到幾耐？

大曾好想搞商品，港交所當日認為無得做，於是殺出商交所，事後回想，係有人計錯數，高估形勢？定係受大曾所累呢？

平心而論，巴利張震遠有抱負，中國人要有一個具備規模商品市場。

所以佢當日，率先想搞係石油期貨，仲話有泰山石化支持，之後就會再引入內地大油企，解決交收問題。

誰不知，想法太理想，祖國唔肯，令一切成泡影。

依家，小加口氣，勢必力谷商品。有人會問，當年唔嫁，點解依家又嫁？

好簡單，係國策。人民幣要國際化，中央當然想任何金融產品，特別係商品都有人民幣計價。

既然，香江小地係離岸中心，香港幫手，亦順理成章。

好多人會質疑，香港做商品，無得做。但我地以前都大大話話，有個商品市場。

其次，依家唔係需求問題，而係需要問題，國家要做，豈能說不？

內地無疑有商品市場，亦有多個商品交易所，但問題太分散，亦太土炮。

祖國目的，係要國際金融市場有話事權，定價權同遊戲規則，唔需要再俾美國指指點點。

商品咁重要，內地顯然係想利用香港既市場深度，基建，同國際投資者背景，做一個切合中國需要，同符合中國利益定價機制既商品市場。

我地唔會話，港交所前途無限，講到尾，388只係隻棋子。

但小加講到明要搞，絕對代表獲內地撐場，相對優勢中環一定較數碼港強。

有件事不能忽視，就係如果一個唔覺意，有產油國決定將石油買賣單位，由美元，改為人民幣有份既一籃子貨幣，到時個遊戲會相當有趣！

香港點搞商品呢？就係配合內地，等內地指揮開閘。

內地有存倉，同付運點，無既係系統同市場。香港一定係輔助，既然相比股票，商品更有影響力，要搞一定唔會係小加一人話事。

講到尾，內地上交所及深交所JV，商討咁耐都未有下文，同呢樣野有無關呢？不妨晰目以待!

留底比走的好

2012-01-19T15:56:00.002+08:00

相信無一間投行，會好像高盛一樣咁惹火!

兩個月前行政總裁布蘭克費恩已經預言投行不死。

結果係高盛第四季盈利雖然倒退近六成，但係遠好過預期，受新金融法規影響，坐盤收入大跌五成六，不過固定收入、外匯同商品交易，以及股票交易收入都只係跌一成幾，表現好過晒其他投行。

原因一方面係高盛第四季變得更進取，量度銀行每日承受風險能力既VAR、由一億美元跳升至第四季既一億三千五百萬美元，係二零一零年第二季以來最高水平。

布蘭克費恩更對前景投下信心一票、預言經濟同金融市場都有改善，已經見到令人鼓舞既跡象。

如果再拆細盤數，高盛盤數靚、好大程度係控制成本既能力好過同業，期內員工人數就減少左二千四百人，比起舊年年中預測就多出倍。

不知大家是否記得霍大班名言: 「走左令留底既更開心」?

顯然，布蘭克費恩絕對係支持者，要裁員絕不手軟，至於幸運無被裁走既、雖然整體花紅減少兩成一，但已經「跑贏」全年業績倒退四成七既幅度。

留得底既３萬３千名員工，低至茶水阿姐、上至CEO CFO，平均每人分少左一成半，但仍然有分到３６萬７千美元，即係超過２８０萬港紙，比起華爾街平均減花紅兩至四成，已經足已令同業眼紅。

金融時報統計過、過去十年高盛派出既花紅，高達１２５０億美元，換算就係一萬億港元，比起高盛賺既盈利仲要多出一倍。

單計舊年如果薪金開支減少三分一，就可以令股東回報由百分之七、增加至一成二。

如果將花紅比例同摩通睇齊，股東回報更可以增加一半!

事實再次證明做高盛員工，好過持有高盛股票。

MONEY AND POWER作者Bill Cohen (此君一早提出高盛方為全球真正統治者，真係「真知灼見」!)亦認同高盛不理股東利益，高盛應削減花紅。

話說回來，不論布蘭克費恩及摩通Dimon，都對後市轉為更樂觀，大家又會否視為一枝強心劑?

亢龍有悔

2012-01-17T23:11:00.005+08:00

沈大師今日先為龍年股市把脈，寄之若:「飛龍在天、亢龍有悔」!

送兔迎龍，股市氣氛轉好，人人喜氣洋洋。

但沈大師所言，龍市可能係先高後低、即係「飛龍」之後會「有悔」，對出年投資嚟講，更要小心。

大師話，似零七，升到幾多無人知，但寧信其有，況且外圍一片亂局，經濟基調未改，有的準備，做好風險管理，從來係一個理性投資者應有既責任。

對於近期市況，黃師傅黃瑋傑一語道破，個市要升就要升，無謂埋砌理由。

市況係有MOMENTUM，但更要留意係市場亦有太多MOMENTUM ANALYST!

即係升市買升，跌市買跌個種。市底好，可以叫你任何時間都唔可以沽某隻股份，市底弱，就支吾以對!!

中國數據好，歐洲債息跌，通通係短期支持市況向好理由。

講左好多次，中國數據，一定唔會硬著陸，但樓市泡沬，信貸質素，根本未改。

但好友一派，之前已經製造祖國寬鬆政策預期，認為一寬銀根，市況必升。

但既然數據咁好，係咪要改為睇淡呢？

匯豐范智廉預期，歐債下半年解決，有深層意義。所謂解決，唔係歐洲國家債務完全清還，而係有無擾讓幾年既老問題，正式爆發，成為唔再係問題既問題。

希臘似乎高據榜首。債務重組談判無進展，違約可能倒數階段。路透社既報道，似乎還希臘一個清白。

原來佢地已經盡力配合，只係歐央行，IMF背後指指點點，向銀行提出不合理要求。

歐洲係用時間做準備，係準備踢走希臘。近半年時間俾銀行賣相關資產，希臘一爆，佢地估計影響會減至最低。

但任何影響，都會係估唔到既影響，爆左先會知。就算歐洲行二月底，再曲線QE。大家開心一輪，發現唔對路。立春之後，係咪要小心呢？

貼士

2012-01-17T19:36:00.002+08:00

大行報告信唔過，質疑嘅唔止香港人，美國亦都一樣。

單計標普五百隻成分股，夾埋有五千八百幾個「買入」，相反，叫沽嘅只得五百幾個，足足十倍有多。

最慘嘅係，跟足大行建議買賣，投資表現亦只係同大市同步。

咁仲有無參考價值？原來早喺十六年前，已經有學術文獻探討過。關鍵在於時間性。

實在大行報告同奶類製品一樣，都係越新鮮越好。對股價嘅影響力，喺「最佳使用日期」之後，頂多維持到幾個月。

其次，分析員俾「沽售」評級，通常要左諗右諗。

因為好可能得罪公司管理層、甚至其他投資者、所以可免得免。所以叫得大家「沽」，往往都係證據確鑿、股價跟住行嘅機會亦都大啲。

調整吓策略，照樣跟足大行建議買賣，但只揸一個月就平倉，結果係回報幾級跳!

統計９４到０７年嘅歷史數據，幅度高達４成半。

揀隻股分望望。市值有返咁上下、買入評級又最多嘅，一定係蘋果。

但大行最新俾嘅ＢＵＹ，都要數返四星期前。換句話說，其實已經反映晒。

新鮮啲嘅，可以睇網上零售商亞馬遜，同油氣生產商ＤＥＶＯＮ　ＥＮＥＲＧＹ。

但係歸根究底，更多人唔信嘅係分析員嘅計價模式。

乜嘢貼現現金流、分部估值法，全部建基於盈利預測，除非你有水晶球，根本無得估。

掉返轉。計吓公司要做幾多生意，先維持到現有估值。

呢種ＲＢＰ模式，好處係唔駛斷估。

股價高就梗係難達標，平返，做滿ＱＵＯＴＡ嘅機會就越大，值搏率就高好多。

跟足呢隻投資法嘅「透明價值指數」，舊年四月成立，回報已經跑贏道指０．５個百分點。

邊啲股分唔抵買？例子包括雅虎同ＯＦＦＩＣＥ　ＤＥＰＯＴ，生意達標機會率，原來只得單位數。

不走回頭路

2012-01-16T20:46:00.000+08:00

香港主場，亞洲金融論壇今年絕對唔係雷聲大，雨點少。

既有政策公布，亦有深度內容。更深層次訊息係，中國決定，不走回頭路!

從最新公布政策構思以及舉動睇，訊息有多個。一，人民幣國際化既堅定不移、仲會加快。

二，香港扮演角色繼續吃重，做其離岸市場大佬。

三，就係國家醒我地，我地亦要照顧國家，幫佢地班水。

變相將A股EFT同 RQFII合二為一，算係一絕。未有港股直通車之前，先嚟個A股直通車。

用最普及既ETF產品引資，再經RQFII回流機制投資內地股市，一改以往靠基金產品特性，普及自會大為加強。

簡單講，內地呢招深化人民幣產品之餘，亦有收引資內地股市之效。

但論影響之深，莫過於容許H股用人民幣在港集資。

中證監副主席姚剛輕描淡寫一句，中環人卻形容效果震撼。

有此一著，在港人民幣金額同流量會多好多，一定唔止依家六千億咁少。

由國企帶頭做人民幣集資，香港願望達成，亦解決內地融資多之困，算係一舉兩得!

有得必有失。香港市場融資額會多，但消化問題，係另一回事。

更重要，如果人民幣長遠升值潛力假設不變，手持港幣做買賣單位既H股，地位會點，要留意。更重要，既然大鑼大鼓俾H股在港人民幣集資，港交所交易時間，只有不斷延長，唔會縮短。

為國家效力，未必個個經紀係咁諗。但金管局身先士卒，即時支付結算系統加時五個鐘，延長至半夜十一點，為既就係配合英國搞人民幣業務。

呢招搞到專程來港既英國歐相，不知幾開心，以為執到金!

有人話，俾英國搞人仔，即係削弱香港地位，呢為大錯特錯也。英國有得搞，只係同香港以私人合作性質落實，無左香港同內地官方對等地位。

況且，今次英國搞，係要經香港即時支付結盤系統RTGS進行，簡單講，最重要既交收工作，香港話曬事。

所以，前宗主國唔係搶我地生意。中國人民幣業務，不熟不做，但講信，香港始終係阿爺半個仔。

英國模式似乎會逐步擴展到其他主要金融市場，他日人人有份做人民幣業務，但千萬不要自亂陣腳話驚地位不保。

因為呢的境外市場，變相通通都要向香港匯報，呢招真係唔LIKE唔得!

外流

2012-01-14T10:49:00.000+08:00

過去一個幾月，人行不斷托高人民幣開市中間價，但都阻唔到。

因為貶值預期升溫，造成既資金外流。

同時間外貿順差收窄，資金外流速度遠比預期多。

上個月，外匯佔款大幅減少一千億人民幣，係連續三個月，有資金流出中國，規模比起之前兩個月嘅兩百幾億，走資速度明顯轉急。

導致外匯儲備、亦罕有下跌，到舊年底，儲備少過３萬２千億美元，除咗係連續兩個月減少，總結上一季，儲備少咗２０５億美元，係九八年以嚟，首次下跌。

資金外流趨勢，起馬喺第一季都仲會持續。

當然有弊有利，外匯儲備減少，有助減低國際間對北京操控人民幣嘅指責。

由於熱錢充斥已經再唔係問題，喺資金流動性大幅減少下，人行透過減存款備準金率，或啟動其他寬鬆措施既彈性更大。

其實外匯佔款同外匯儲備下降，唔需要太恐慌。

因為部份係反映匯率波動，同順差收窄。而在港人民幣資金調回內地，部份兌換番美金，會提供緩衝。

數一數，內地儲備仍然有三萬幾億美金，實在唔需要擔心。反映資金外流，會令人行進一步放寬銀根，避免資金外流構成影響。

我們始終相信，人民幣國際化早已是一條不歸之路，經過呢幾年金融同歐債危機，美元反而成為避險天堂，內地亦明白要爭取國際金融定價權，絕對需要有一種國際貨幣支持，大家實在無須過分擔心。

百麗

2012-01-13T22:34:00.000+08:00

百麗變相盈警，揭示左內地消費走下坡嘅事實。

過萬個營銷點，大行話，百麗同店銷售差過預期，反係反映市道變化。

美林更直接，形容百麗盈警可以市場更早「清醒」，因為作為屬於穩健同有實力零售股，都要預警，正好俾同業重新評估內地零售股前景，唔好再過份樂觀。

中央年年鼓勵內需，希望可以推動經濟。

不過零售業喺舊年第三開始、已經再無加快增長動力，無左過去幾年既翹尾效應。

華爾街日報既記者走訪北京、發現行傢俬鋪嘅客人愈來愈少，一個傢俬購物中心更加係空空如也。

家電亦遇上同樣問題，分析指，係同內地樓市受調控有關。

中央原本打算遏抑樓價，可以令市民低價買樓、安居樂業。

可惜樓市調控嘅不確定性反而嚇怕左買家，由樓市延伸到、買傢俬、買鞋買衫。

你會問，係咪誇大左﹖

事實係多間內地零售商發盈警、甚至結業。

舊年最先出事嘅體育用品公司、就話俾大家聽，內地有最低工資導致開支大，積存貨嘅問題日益嚴重。

09年奧運之後出現嘅關店潮重現、由龍頭李寧、最新、中國動向喺四川嘅部分店鋪將會暫停營業。

國美體育成立左一年半，最終抵受唔住競爭大而全線結業。

係咪咁悲觀?

內地經濟係放緩，但未致於人均工資下降。睇富士康員工，依家學埋集體自殺威脅，唔加薪就齊跳樓。

阿爺要和諧，大搞最低工資加薪，除非內地經濟差到企業倒閉潮，大量工人下崗，否則零售市道總唔會太差。

老實說，中國人窮左太多年，消費係發洩多年心結既一種途徑。

十三億人口既市場，潛力太大，條數太易計。只要人人到你鋪頭花費一蚊，你每日營業額有十三億。正正係以為呢條數太易計，本港同內地零售商只有擴充策略，無產品定位策略，呢個可能先係零售股主要死因。

以往，一隻零售股內地同店銷售兩成增長係應份，依家可能係奇蹟。分店開太多，反而製造唔到求過於供既市場推廣神奇效益，令內地人覺得，太易買到，反而唔好。

其實，李寧之死，一早為內地零售股響下警鐘，但當時業界仲未醒。由低檔，發展到中檔，產品定位，完全斷正。

不少內地人都話，百麗一對鞋，太貴。比同樣有品牌既NINE WEST完全不值!

更慘，內地要高檔，香港國產品牌無份。攻低檔，NIKE，LEVIS，一早搞左二，三百蚊低價產品攻二，三線城市。

零售股現真身，其實係好事。品牌效應之下，中國就算連人均收入都超英趕美，就算內需市場搞得點成功，最後的錢都會由意大利，德國，美國等名牌國家賺曬。

看iPhone 4S，有斷貨無存貨，證明中國人暫時仲係有錢。

重新定位，整合策略，中國人的確需要一個中國既國際品牌!!

渾水唱好民企? 又是別有用心......

2012-01-13T16:40:00.001+08:00

教父經濟學

2012-01-11T18:13:00.002+08:00

黑手黨在意大利影響力之大，相信你我都無法想像。

曾經有一位意大利檢察官透露，黑手黨會通過電視轉播的足球賽、向身陷囹圄的大佬們，源源不斷地傳送消息。

最近黑手黨晉身成影子銀行，更被形容為，全意大利最大嘅銀行。

根據當地反罪惡組織SOS Impresa調查，黑手黨放貴利，多達６５０億歐元。

因為經濟唔好，銀行又唔肯放水，估計意大利多達二十萬間嘅細公司，被迫要向黑手黨、借錢周轉。

黑手黨放貴利亦都轉型，唔再局限喺酒吧、娛樂場所放數。

變到直頭好似一個銀行家噤，相當專業，有律師、有公證人，仲好了解信貸市場嘅運作，清楚哂借錢人嘅財政狀況。

當地類似嘅犯罪集團加埋，每年賺過千億歐元，利潤相當於意大利國內生產總值嘅百分之七。

規模之大，將嚴重影響當地經濟命脈，細公司被追數，最終只有倒閉，做成數以萬計嘅人失業。

不過話說回來，當銀行收取年息高達39.95%時候，其實貴利同持牌銀行的界線、早已經變得糢糊。

不錯，黑手黨會經營販毒，武器走私，賣淫嫖娼，賭博，敲詐勒索，通通無惡不作。

但最少他們不會向老弱婦孺埋手賣迷債、又或者在出事時，可以面不改容向政府同納稅人伸手要求拯救。

無論如何，影子銀行今天已經有新的定義。

資本主義的未來......如果還有的話

2012-01-11T17:43:00.002+08:00

響號

2012-01-09T22:15:00.000+08:00

總理一句「提振股市信心」，引起市場無限憧憬。

過去兩年，內地經濟同股市表現背馳，經濟高速增長同時、A股累積跌左三成三，係全球最疲弱既股市。

市盈率得番八倍，估值係貼近歷史低位。
面對投資者失望情緒，溫家寶喺全國金融工作會議上，首次提出要深化新股發行制度市場化，促進一級同二級市場協調健康發展，提振股市信心。

內地四大報就齊發社論，標題係資本市場發展「號角」已經吹響。

中國證券報更誇張，形容證券業站喺新既歷史起點上，未來係資本市場發展既最好歷史機遇。

人民日報就較為平易理解，話要提振A股信心、其實就係需要更嚴厲手段，

近日監管機構雷厲風行打擊內幕交易、新政「招招見血」，正係徹底斬斷過去股市一團「亂麻」，社論形容股市「見底」雖然係滿載著傷痕，但同時亦「蘊藏」著能量。

當然明白各大報都係配合阿爺出口術，但真正要解讀，一來重點應放喺完善新股發行制度上，呢點係以往無提出過，其次就係特別明確提出一、二級市場協調健康發展。

以往幾年內地股市服從在「重融資、輕回報」，新股一隻一隻上只係要配合國家政策，股民生死無人理會。

而家終於知道要重視二級市場既投資功能，令投資者可以充分分享經濟增長成果，總算係今是而昨非。

A股一彈，溫總提振股市信心六個字，又再領功。連成思危周末期間，話股市見底，亦即時攞彩。

市況升，主要係人行暫停票據拍賣，加埋內地銀行高管透露，今年新增貸款額有八至九萬億帶動所致。

如果市況同M2數字走勢睇齊無錯，年頭新增貸款例多，帶動廣幣供應上升，A股又好難有太多睇淡理由。
睇好內地股市，原因之一，撇除政策就係估值，之前實在跌得太深，任何消息都會化身為正面訊號。

所以，信心兩個字關鍵，唔係上證升幾多，而係公司質素太差，新股濫發，估值離譜。

內地股民輸左幾年錢，開始成熟，佢地唔再鬧無政策、而係鬧上市公司圈錢。呢個問題，鬧得好，當局從根本問題著手，搞好公司質素，又豈怕無人買中資股?
金融工作會議結束，洋洋萬字，難以消化。但當中就提及要加大金融市場對外開放，加快上海金融中心建設。好明顯，外圍逆境中央並無落閘，反而堅決開放。

中國知，要走向世界，同美國比併，錢多贏唔到，贏就係要贏有一個有影響力既金融市場。

美國驚奇

2012-01-06T19:17:00.001+08:00

昨日先話美國經濟復蘇可能係今年最大「驚奇」。

言猶在耳，上個月公布的新增職位果然令「拍案驚奇」!

十二月新增職位多達二十萬，遠比預期十五萬多，亦是三個月最大增幅，失業率就差不多跌至近三年新低。

總結2011年，全年新增職位就增加左164萬個，是06年以來增加得最多的一年。

由PMI，到零售銷售，到證明美國經濟有見底跡象，誰說美國經濟不行?

似乎關鍵是大家到底仲信不信這些政府數據。

新一期經濟學人形容，全球今年自食其果，因為之前唔努力果斷救市，令今年全年踏入呆滯一年。

佢地話，歐洲繼續唔得，中國為首新興市場有隱憂。今年，最大潛在驚喜，仍會係美國。

呢份立場親保守派既雜誌，到底是否太高估美國? 但正如佢地所講，係之前市場太低估美國，所以任何數據好過預期，都會成為利好理由。

李小加講得岩，因為要避險，美國贏在有美金呢個兒子。美國乘歐債之危，製造避險天堂後，下一步明顯打做埋美股，美債，繼續係最好投資工具，因為前者有增長潛力，後者有避險功能。

美國國債債息，只會跌，不會升。西方分析師已經轉移，將高息企業債，打造成一二年新希望。話唔單止利息高，而且都好全，認為違約率只有百分之二，就算經濟再衰退，違約率都係得百分之四。

話明係高息企業債券，講白的，其實係垃圾債券。聰明人經過按揭次債事件後，學得更醒目。無三條A，都懶得重新打包，而係索性用把口，講到高息企業垃圾債比三個A更好。

美股不跌，就算散戶資金持續外流，美股都唔願意跌。

的確，云云美股之中，近日雞犬皆升，地產股起飛，連美國銀行，都因為一個政府支持再融資傳聞被捧為全球最有價值銀行股。

我地之前講過，美國軟實力之餘，重型武器之一，就係有左右金融市場能力。全球話要搞金融，利用金融市場融資，搞貨幣國際化，但遊戲規則講到底，係美國決定。

花旗大國，搞完貨幣戰，發揮金融市場影響力之後，石油戰爭，不知不覺已經步入第二階段。美國變為石油淨出口國，油價升，大有受惠。

奧巴馬全新軍事策略，圍伊朗，針對中國，用意亦相當明顯。

亞洲等新興市場因為經濟差，紛紛政策鬆手，隨時會成為半年後製造通脹禍根，需要小心!

大預言家

2012-01-05T19:24:00.000+08:00

水晶球年年都有人模，即使錯多岩少，但總有人喜歡估完又估。

呢位可算係水晶球之王，計埋今年，已經估足二十五年，即係四分一世紀。

前大摩策略員，依家係私募基金黑石顧問委員會副主席韋恩 BYRON WIEN。

韋恩一年一度既大預言已經揭曉。

睇完有的意外，有的驚嚇!!

話明係預言，總會添加味精，帶有跨張。韋恩新一年度水晶球預言，包括油價會落番八十五美金。美國實質經濟增長有百分之三，由於盈利好，標普見千四點。

韋恩對舊年跌到七彩既中國，巴西，同印度市場異常樂觀，認為會出人頭地，今年升一成半至兩成。

同樣舊年跌到七彩既歐洲，韋恩水晶球就話，進一步悲觀，仲預言希臘，同意大利會違約。

如果意大利都爆煲違約，美股又係咪真係咁好景呢？持續低息環境，油價係咪落得番咁多呢？又如果美國經濟有百分之三增長，中國，印度等新興市場就肯定經濟比舊年好，股市止唔止升兩成？

其實講左咁耐，要講句唔好意思，因為韋恩四分一世紀既水晶球，命中率係，係幾乎等同「零」!

遠既唔講，講舊年，已經夠經典。原來舊年既今日，韋恩估美國經濟增長有百分之五。十年債息就因為債務不斷上升，拍債無人問津，息率會升到五厘。

所以，韋恩俾投資市場貢獻就係，同佢相反做，贏面會最高!

西線無戰事

2012-01-03T20:30:00.000+08:00

歐債問題纏撓著整個2011年。

展望2012年，有倫敦既智囊機構估計，歐元今年有六成機會會瓦解。

不過華爾街日報話，舊年歐債危機為害之大，係出於國家同國家之間失去互信，但呢個信任喺年底終於慢慢恢復，只要歐洲各國唔行差踏錯，歐元區反而有機會生存落嚟!

踏入2012，唔少大報評論，亦提醒我地歐債，美債之餘，仲要留意係全球經濟增長模式，根本三年幾嚟未有改善過。

最新公布多個地區採購經理指數，雖然部份好過預期。但歐洲全線五十樓下，區內南韓維持三年低位。

當然，數據唔會不停既差，只要偶然間好，就會足夠令市場暫時興。情況就好似內地PMI數字。

PMI數字，幾年前無人睇，依家個個留意。PMI緊要，但亦好易人為「做數」，事關根本係填落去既問卷。

填落去有幾認真呢？匯豐PMI，企業存貨大升，投入成本繼續跌。官方PMI，就完全調轉。代表的咩？看官宜自行解讀。

市場係要進步，但撇開指數，資產價格水平，市場三年嚟根本未進步過。

華爾街日報指，美，歐，日，新興市場全部經濟增長模式都對面困難。金融嘯後，美國資本主義模式被質疑，到底怎麼辦？

報道話，副總理王岐山，一直同美國前財長保爾森「亦師亦友」，兩人經常交流經濟問題。

但保爾森最後亦不得不同王歧山講，睇嚟美國向中國提供左反面教材。

「THIS TIME IS DIFFERENT」作者，哈佛大學教授Ken Rogoff話，全球資本主義同市場發展模式只要兩個出路，一就係尋求新增長模式，又或者由美國，中國兩大體系主導。

問題係，中國靠投資既增長模式，再行唔通。

金融時報就認為，建立消費形經濟體系係唯一出路。

無論中國，美國雙頭馬，定係新增長模式，市場喜悅就繼續依賴政府出手，新一代經濟模式，其實係政府之下一條寄生虫。

無論點，股市表面有個好開始。暫時未足以令人亢。

客觀上，今年係審慎一年，先高後低，先低後高，唔好理人點講。

多個政府轉屆，全球仲有七萬五千億美金主權債到期。

雖然大方向睇差，但市場總會有起有落，呢的係唯一機會。如果睇唔通未來點走，提議大家登入對沖基金BRIDGEWATER網頁，睇佢創辦人一篇全球去槓桿化既文章，應會更加清晰。

2012

2011-12-30T23:48:00.000+08:00

作為投資者，今年唔值得留戀，凡事從好方面諗，今年實在太差，出年未必唔好。

但從另一角度想，西方衰夠，意想不到既震撼事件，可能喺東方發生。

中國概念硬著陸，印度潛在火山爆發，仲有再融資高峰期，債券供應大增，企業要高息發債，西方經濟唔得，結果出事唔會係歐洲，而係亞洲。

由於太不明朗，如果依家成功睇中出年市況，你唔止係大師，而係超人。

提起超人，今年先賣碼頭，再拆東方廣場，連本港零售物業亦變相出售，簡單講，佢賣一次、中一次。

不得不服，一一年，要頒個最佳套現獎俾佢!

如果講最佳管理層獎，分析員話，應該非獅子彼德王莫屬。三年炒三千，三年後增聘人手會多過三千，咁高深既纙輯，係佢先諗到。

況且三年內，要應付萬幾員工情緒不安，涉及既技巧，唔係個個有咁既能力!

最佳分析員，一早揭曉，丁Sir早在年初已預言第三季股市會見底，亦講中恆指會低見萬六點，準繩度之高，行內無出其右。

有人批評得獎人係明燈。其實咩叫明燈？有燈，黑暗先有光明。況且讀過燈塔理論，大家都明，其實個個咪係搭順風車!!

享受無需付費既著數，調轉，你俾錢基金經理，又會唔會話對方係明燈!!

丁Sir今天預言恒指明年會低萬二點，其實已經比佢之前目標提高二千點，大家震驚之餘，應該要記得今年最大的教訓: Think the Unthinkable!

況且丁SIR無錯的話，其實港股呢個跌幅已經比不少亞太/ 新興市場理想!

點都好，二零一二有人形容為近半世紀以嚟，最睇唔通既一年。沈大師，劉紹文劉老師講得實在，憑經驗，信自己，同信感覺!

歐洲的秋天

2011-12-30T23:29:00.000+08:00

總結2011年，由解構今次歐債危機入手最理想。

希臘到依家未爆煲。

其實，歐盟領導層一早就認定，希臘問題不足為患。

反而早於09年，就已經驚意大利出事。華爾街日報指，早喺八月5日，歐洲央行行長特里謝去信，頓促意大利盡快處理財赤問題。

意大利官員形容呢封信既內容，相比同期間收到另一封嚟自恐怖組織既信件，更具恐嚇性。

亦因應咁，意大利總理貝盧斯科尼好快，就以傳真方式，回覆歐央行，承諾會撤底改革。

特里謝對回覆滿意，於是決定重新啟動二手市場購入意大利國債。

但意大利問題不單無解決，反而惡化。

十一月康城舉行G20前，歐洲領導人嘗試同貝盧斯科尼認真商討問題，點知，
呢位意大利總理，席上竟然訓著左，要助手叫醒佢。

貝盧斯科尼唔單止無認真處理國內財赤，佢對財長特雷蒙蒂更一直不滿，多次批評佢自大，當身邊既同事係笨旦，無團隊精神。

作為歐盟龍頭，德國總理默克爾十月明白事態嚴重、必須要出手先解決貝盧斯科尼。

一直以嚟，歐盟宗旨係唔干預成員內政、不過，鐵娘子打破呢項傳統。

這就是黃金戰士潘國光常說的: 一場沒有流血的政變吧?

10日21日，默克爾終於忍無可忍，秘密致電羅馬既意大利總統。

默克爾直接了當講、「我好感激意大利削債誠意，但總統先生，我有啲擔心，貝盧斯科尼未必夠強勢，可以配合到推行呢的改革」。

意大利總統也是聰明人，一聽就明白鐵娘子的決心。

結果G20「訓著覺」事件幾日，貝盧斯科尼就辭職。

兩年幾既歐債問題，默克爾，同法國總統薩爾科齊表面不和。

但華爾街日報話，佢地兩人其實一直互雙遷就。

薩爾科齊個女出世，默爾斯更親自送隻公仔道賀。

原來，對默克爾最不滿既歐洲財金官員之一，居然是特里謝。

十年底佢既歡送會，變成討論歐債場合。

退休在即，特里謝仍然抱怨，形容自己已經盡力而為，但佢對德國極之不滿。

在場既默克爾只有無奈回應，你係德國既朋友。

東邊不亮、西邊亮?

2011-12-30T19:27:00.001+08:00

中國去年正式取代日本，成為全球第二大經濟體系。

不過股市？

上證指數累積跌兩成多，表現同印度一樣僅次於希臘，係全球最差既主要市場。

經濟同股市脫勾，成為今年投資者最不解之謎，沽空中國亦成勢成為外國基金同傳媒「樂此不彼」既焦點。

有研究機構如渾水專門針對民企。

亦有對沖基金Chanos集中沽空內銀內房，佢部分行家回報更高達五成。

原因其實唔難理解，０８年底以來內地銀行借出破紀錄既四萬億美元，呢幾年唔少都成為壞帳。

官方數字就話不良貸款只有五千億美元，但惠譽話，實際係四倍都唔止，超過二萬億美元。

地方債務同潛在既影子銀行問題，一樣令投資者心寒。

金融時報話單係要解決地方融資平台問題，就要動用比08年美國救市基金多出1.5倍既錢，先可以收效。

而估計高達一萬四千億美元既影子銀行貸款，隨著溫州民企倒閉潮，亦令人擔心中國會成為次按危機翻版。

諾貝爾經濟學獎得主克魯明、正係擔心內地經濟崩潰、會令環球經濟雪上加霜。

佢將幾年前美國影子銀行規模同內地比較，令佢擔心既係、內地既問題更嚴重，而且已經出現崩潰既先兆。

但並非所有西方媒介都一面倒睇淡內地，新一期經濟學人就預測、中國可以提早取代美國、成為最大經濟體系。

經濟學人話、內地經濟規模而家只係美國既一半，佢地假設係、以未來幾年內地保持百分之七點七五增長，同人民幣每年升值百分之三計，會好快跑嬴每年只有百分之二增長的美國。

到左２０１８年，內地就會取代美國，成為全球最大規模既經濟體系，比舊年預測仲要提早一年，到時人民幣亦會成為主要儲備貨幣。

投資雜誌Marketwatch亦認同，內地經濟仍然可以維持穩定、快速增長，認為投資者應該押注、喺中央注重既農業、電信、能源同石油領域。

以我們觀察到投資者情緒，其實大部分人都理解內地放緩的跡象已相當明顯，只是一廂情願相信，阿爺有能力及時調控放寬政策。

希望我們估錯，但這種過分樂觀的揣測，才是最令人擔心，甚至大於經濟放緩本身………

歐洲的春天

2011-12-29T18:39:00.003+08:00

拖延左兩年既歐債危機，華爾街日報展開左深入既偵查報道，了解其實早喺四月分、危機係有解決既機會，不過前基金組織總裁卡恩突然被捕，以及兩名號稱「歐元之父」既歐洲高層官員意見不合，令問題拖延，最終一發不可收拾。

華爾街日報整個調查訪問超過二十四名有份處理歐債危機相關人士。

矛頭直指，歐洲領袖互不讓步，各持己見，最終錯失機會。

成件事，由今年四月講起，報道形容係決定歐債命運既春天。

四月十四日，華盛頓一次國際基金組織高層會議，

當時既總裁卡恩警告，希臘隨時爆煲，於是向歐洲發出最後通牒，夏天要有解決方案。

卡恩當時講明，歐洲唔加大資金救金，基金組織係唔會向希臘撥出第二輪貸款。

當時，歐洲領袖毫無共識，而希臘問題已經波及其他歐豬國債息急升，德國總理默克爾邀請卡恩，五月15日，到歐洲商討，延長最後通碟期限。

點知，卡恩出發前喺機場被捕，佢助手致電通知默克爾，當時呢位德國鐵娘子反應係:「唔可以容計呢件事發生!」

卡恩事件，令歐債問題拖延。

但最關鍵、仍然係歐洲官員對方案寸步不讓。

外界以為，默克爾，同法國總統薩爾科齊分岐最大。

但華爾街日報話，事件背後，鬥到幾乎反面，其實係兩個有號稱「歐元之父」之稱、前歐洲央行行長特里謝，同德國財長朔伊布勒。

朔伊布勒認為，無止境幫希臘並不可行，所以債權人要接納延期還款。

但特里謝反對，話咁會令希臘國債失去央行抵押品地位，連鎖影響太大。

有一次會議，特里謝仲要求將佢既講話記錄在案，話如果堅持私人投資者承擔方案，佢唔會再參與討論。

由於無左歐央行參與、拯救方案並唔可能，默克爾深知不妙，本來想讓步。(可見鐵娘子立場其實無外界想得咁強硬!)

強硬既朔伊布勒反而變本加勵，維持延期還款建議外，仲要求債權人削債。

但歐洲兩派既堅持，敵唔過市場，歐債債息急升，觸發歐盟七月廿一日緊急會議，定出解決方案。

華爾街日報批評，今年原本係解決到歐債問題，但結果任由兩個同樣喺1942年出世既政客、白白浪費機會。

到今日，市場唔再問歐債解決未，而係幾時再惡化。

結果一個歷史的一頁，就此被改寫。

神話不再?

2011-12-28T19:35:00.001+08:00

知唔知今年表現最好股市在那?

一度被認為係投資市場既神話，包括左中國、印度、巴西同俄羅斯，過去十年經濟增長比美國快四倍，一共吸引左七百億美元既資金流入。

不過踏入２０１１年，呢個神個神話已經破滅。

無論係俄羅斯定巴西，今年以來股市都跌左一成六，而中國同印度雖然都採取左唔同程度放寬銀根，但股市跌幅仍達到兩成三，唔止跑輸大地震既日本、仲要差過陷入歐債危機既德法，主要市場之中只係好過陷入破產邊沿既希臘。

而資金流入既趨勢亦都出現逆轉，淨流出印度同中國既資金，分別達到四十億同三十六億美元，連同其他國家，今年總計流出資金就有一百五十億美元，９６年以來最多。

事實上、唔少九七年經歷過金融風暴既亞洲國家，好似馬來西亞、泰國、印尼今年股市表現都可以打「和」，菲律賓更升左百分之四。

去遠啲、南美既巴拿馬同委內瑞拉股市，就分別升左三成同八成，係新興市場之中表現最好。

金融時報社論為２０１２年經濟「把脈」，預言歐洲可以幸免於難，美國總統大選製造出嚟既意外潛力更令人意外，令美元受到支持，反而係內地經濟真係會出現「硬著陸」，太遲放寬貨幣政策未能減慢經濟放緩，最終演變成災難。

八年前，首次引入金磚四國概念既高盛，之後由奧尼爾發揚光大。今日，無論高盛研究部，定奧尼爾本人，亦對金磚四國高增長概念，有保留。

環球星級高手之中，新興市場大好友有四位。奧尼爾之外，有羅奇，羅傑斯，同麥樸思。麥樸思咩時間都話抵買，但羅傑斯近日接受澳洲傳媒就講明，仲沽空緊新興市場股票。

羅奇較學者型風格，佢同意高增長概念受制歐美經濟問題，但講衰，佢話印度數第一，無人夠膽認第二。

的確，我地之前亦提過，印度經濟問題，令貨幣政策進退兩難，如果明年資金外流情況不變，有分析話，要驚既火頭係印度，唔係歐洲。

同樣係學者型，奧尼爾最少有兩樣最愛，就係曼聯，同中國。曼聯，佢得唔到。至於中國，你唔可以話佢睇淡，只係無以前睇得咁樂觀。奧尼爾仍然對中國前景，非常上心。

佢近期，亦多次公開獻計。奧尼爾最近撰文，強調來年世界經濟命運，繫於中國。同幾個月前唔同，佢無寫包單，話中國一定唔會硬著陸，但呼籲來年係關鍵一年，中國得定唔得，要睇經濟係咪成功轉型。

聖誕長假，外國財經頻道製作唔少節目，無獨有偶，五大主題之中，總有中國硬著陸。

華爾街日報亦有分析文章，主題係點應對中國硬著陸，似乎佢地已經假設左，內地經濟會顯著放緩。

中環人話，以內地實力，同市場潛力，大半年嚟不斷俾人製造利淡因素，概念上已經硬著陸左。

但實際會唔會發生，機會仍然有限。講番奧尼爾提出既建議，經濟轉型到底係咪避過到硬著陸呢？

內地仍然靠投資，出口主導，後者唔得，前者規模效益有限，況且投資佔內地生產總值超過四成比重，再谷肯定爆，從呢方面分析，奧尼爾無錯。

但憑谷內需，搞轉型，按內地情況，奧尼爾係咪諗得太簡單呢?

中國無品牌，內地人亦對內地消費無信心。但國家總會有辦法，搞補貼，俾優惠之餘，係咪可以國產貨復興，嚟一次愛祖國，買國貨運動？

蒙牛危機

2011-12-28T19:33:00.001+08:00

一而再、再而三驗出產品問題，蒙牛強調驗出含過量致癌物質「黃曲霉素M1」既奶品、未有流出市場。

公司解釋，係有關問題產品起因、由於四川眉山當地個別奶牛養殖場飼料發霉同變質，奶牛食用左呢啲飼料後、令原奶中既「黃曲霉素M1」超標。

公司強調已經全部封存同銷毀，目前，包括香港在內既境內境外銷售既，全部係合格產品。

不錯，這個可能是事實，但更重要是、到底公眾信不信這個事賓?

對於今次事故，內地傳媒向蒙牛發出四大質問，到底蒙牛牛奶係咪仲係安全？既然產品全部銷毀、點解仲有人買到當日眉山生產既牛奶？仲有係呢批次奶品生產左幾多？點解事隔兩個月事件先曝光？

在網絡、尤其是微博上，蒙牛已經遭到網民口誅筆伐。蒙牛乳業股價跌幅超過20%，民眾已然"用腳投票"。

三年前，在"三聚氰胺事件"的危機公關中，曾有報道將蒙牛和伊利對比，認為蒙牛態度誠懇，而伊利遮遮掩掩。

現在，面對"黃曲霉素事件"，蒙牛難以令人滿意的危機公關似乎要讓其重蹈伊利覆轍。

含糊不清的解釋與應對措施難以給公眾以安全感。在這個基礎上，蒙牛發言人堅稱此事只是個別問題，很容易給公眾造成推卸責任、敷衍了事的印像，難免讓消費者更不放心。

在這種情況下，即使發言人一再表示"我敢保證，沒有問題牛奶"，就如”反正我信了”一樣，根本難以挽回公眾的信任。

說一個曾在”How the Mighty Fall”讀到的故事。

2004年9月，Merck一種皇牌止痛藥 Vioxx，在藥物推出18個月後，接受治療的病人，陸續出現心臟病等嚴重後遺症。

當時Vioxx銷售數以十億美元計，用戶逾億人，是Merck主要收入來源。

CEO Ray Gilmartin 在知道初步的數據可能出現問題後，也不等待全面調查，一個星期內決定將Vioxx全面下架。

當時Merck市值一日內損失了250億美元，股價跌了四分一。之後的六個星期，市值更進一步蒸發了400億美元，事件對Merck的影響可想而知。

直到今天醫學研究仍然對Vioxx副作用難作定論，不過Ray Gilmartin的決定，是他記了Merck 創辦人"George Merck II"的教訓:

「Medicine is for the people. It is not for the profit. The profits follow.」

就是這種前後一致，對保障用戶的堅持，令Merck成為企管達人Jim Collins 研究的成功企業。

今天Merck的 Profit，恐怕不止是Follow那麼簡單了吧?

安全地帶

2011-12-22T18:42:00.000+08:00

過去四年投資者學識既、係好多本來以為係最穩陣嘅債券，都變成高風險。

華爾街日報主筆韋塞爾，形容全球投資者最需要、係一種可以視為「安全」既金融資產。
道理大家明，但喺邊度搵？

瑞信做過統計，市場界定為安全嘅資產，過去四年，由二十二萬億美元，大縮水到剩返十二萬億。

但同一時間，新興市場儲落，要投資嘅外匯儲備，就由四萬億，勁升到七萬億，咁多錢要投資，究竟去邊到好呢？

太平洋資產管理董事總經理EL-ERIAN話，資金暫時都睇唔到有咩可以取代到美國、或英國國債，原因係資金需要避險。

所以美債就算無左三條Ａ評級，一樣吸引大量資金流入，唯一問題係、價格太高，甚至出現負回報。

或者好似係「債王」格羅斯所形容，美債係咁多件污糟衫入面最乾淨嘅，根本無得揀。

但係呢D國家全部都借落好多錢，情況唔好得過歐洲好多。咁可以點算？

其實有一個趨勢、醒目錢年中已經見到出路。

原來而家唔少大型跨國企業，好似雀巢、埃克森美孚同可口可樂等，CDS價格仲低過美國同德國政府，原因係佢地手頭現金充足，加埋甚至富可敵國。

所以優質企業債券、成為左避險工具。

要再搵新投資機會，不妨由新興市場既債券入手。

年尾派成績，根據金融時報統計新興市場所有基金之中，論回報率，頭四位全部係債券基金，回報率百分之九至一成二。

如果單睇新興市場股票基金，跑贏係邊個，怕且大部分人都估唔中。

原來六大新興市場表現最好既基金入面，有三隻係投資突尼斯市場，無錯係非洲果個、年初最先革命。

三隻之中，兩隻更名列頭兩位，回報分別有百分之六，同一成八。

突尼斯，既唔係金磚成員，亦唔係備受吹捧既新興市場，能夠跑中，基金操盤手話，多得年初革命有機會撈底，更好彩係當地經濟遠比預期復蘇快。

除左突尼斯，另一意外就係委內瑞拉股市全年升八成，更係冠絕全球。

當地有賴油企併購，引嚟大批資金流入，基金經理話，當查韋斯總統身患重病消息傳出，係佢一生人收最多電話既一日，全部係客戶查詢!

投資界老手話，突尼斯，同委內瑞拉故事，令好多追求高增長，高回報既投資者醒覺，因為新興市場，高增長，唔限於中國，亦不止印度同巴西呢個BRICS。

展望二零一二，高手繼續話困難，安全至上，債券一定行先。股票就要避開金融，同周期性股份。消費股係首選，但中國無份。

因為佢地心目中，巴西一的煙草股，阿根廷好幾隻食品股，業務更實在!!

有限變無限

2011-12-21T19:46:00.002+08:00

歐洲央行首次提供無限量低息貸款，結果吸引超過五百間銀行、借入近４千９百億歐元貸款，遠多過市場預期既３千億歐元!

計一計，呢個金額等於六千四百億美元，仲多過ＱＥ２多四百億！

表面就話自己唔係印銀紙，但呢招無限借錢，就令銀行改善流動性，而且金額仲要比０９年首次推出時仲要多，係破晒紀錄！

由於市場憧憬、大量低息貸款，可以舒緩市場資金緊絀情況，一度刺激投資風險胃納上升，歐元上過一星期高位。

有分析員就話，雖然借出金額多，但借錢既銀行只有０９年既一半，可能影響左低息貸款成效，銀行亦都未必再好似０９年咁，將低息貸款買入高息國債。

歐洲央行首次提供三年期無限量既低息貸款，比之前既一年期長，呢個被稱為「長期再融資操作」LTRO既工具，同時係擴大左接受抵押品既範圍。

同以往擔心有「標韱效應」唔同，多間歐洲區內銀行都表明有意申請貸款，有銀行更話、當地既中央銀行向佢地表明，鼓勵佢地盡量使用LTRO、以滿足明年既資金需求。

有銀行話，今次真係要「搏老命」，總之啱使既抵押品都攞晒出來，幾乎應付左歐洲銀行出年七千二百億歐元到期資金既七成需求！

德拉吉自己都表明，銀行唔應該擔心會被標韱，機制係希望鼓勵銀行貸款、支持經濟。

有歐洲國家亦希望，銀行取得長期低息貸款，可以買番自己國家債券。薩爾科齊就公布呼籲，攞到錢既銀行，應該支持返自己既政府。

０９年歐央行亦曾經以低於一厘利息，向銀行提供４千４百億歐元貸款，當時估計銀行用左一半既資金，買入高息既歐洲債券，進行「利差交易」。

不過以為呢種變相既「量化寬鬆」、可以再次解決今日既歐債危機、似乎就真係太過天真，亦注定失望!

因為今日既投資環境同09年好唔同，歐洲大型銀行未必再願意購入主權債券。法興就估計，當地銀行持有既歐洲主權債券，已經由年初既近五千億歐元，減少至第三季既４５５０億歐元。

太平洋資產管理董事總經理El-Erian話，佢預測出年有三分一機會、歐元區會解體，最終觸發同０８年雷曼倒閉一樣既金融危機。

我相信......

2011-12-19T19:37:00.002+08:00

稱得上係歐洲股神，但安東尼波頓旗下，推出年半嘅中國基金，回報跌足３成３，跑輸大市。

佢坦承對自己嘅基金表現、感到失望。特別係九月分，更加形容係，佢職業生涯以黎，最困難時刻。

佢歸疚自己持有太多中小型股分，特別係借殼上市既民企，因為最困擾佢嘅，係內地傳聞滿天飛，收到嘅消息、數據，唔知邊句先可信。

中國問題棘手，歐洲股神唔止親力親為，仲有搵外援。

佢請左４、５間外聘顧問機構，進行「盡職審查」，查清楚公司盤數。

好似其中一間保健公司發現「報大數」，誇大銷售增長有４成，結果發現有出入，當然即時沽出股分。

中國故事唔易玩，但都無動搖安東尼嘅信念。

一句"我仍然相信中國"，佢認為種種既漏洞，正係反映對內地既研究嚴重不足，證明仲係機會處處，佢呢個信念比起十八個月前更強烈。

佢仲透露自己揀股秘訣。揀民企、唔揀國企，因為國企好多，都唔係以股東利益為先。

佢仲睇好消費、同醫療保健股，首次特別點名，話睇好百貨公司品牌「金鷹」，仲話自己年半來見過管理層三、四次，對佢地相當有好感。

８月時曾經意興蘭珊，話做到２０１３年就提早離場，但佢衣家又改口風，話最快要到出年７月，股東大會上，先決定會唔會做耐啲。

展望末來，安東尼仲係樂觀，相信兩年後牛市會重臨，事關佢同股神巴菲特、都有共同信念，當別人恐懼時，你就應該貪婪。

安東尼勇氣，仍然令人佩服。但一隻基金，負回報超過三成，技術上已經攞零分。

數學上，佢打理基金，要升值番四成以上先打和。亦即係，由依家到一三年，亦係安東尼計劃退休之日，基金要升五成，先有微利。

難怪，歐洲股神對退休時間有所改口。想用時間追番回報，誠意可嘉。宏觀經濟層面，中國仍然大有前途，但安東尼有意無意已經承認，對民企無信心。

佢睇好盈利前景，但唔信財務狀況，唔止佢，亦係眾多國際高手中資股投資生涯入面最大矛盾。

投資可能係短線，但同識朋友，或者做生意一樣，大前題係基於一個信字。

安東尼投資於一些佢無左信任基礎既股份，我係佢，都覺得難受。繼續硬銷，亦係痛苦。

不過佢好，約翰保爾森好，點醒香港人，亦提議俾我地一條好財路，有前途既事業，就係從獨立研究機構呢門生意模式出發。

呢類財經私家偵探行業，香港人憑內地網絡，門路，甚至語文優勢，的確有得做。

中資股抵，中國有前途，大家都知，唔需要再有硬銷，但入市與否，唔係買唔買既問題，而係信定唔信既選擇。

歐洲股神可能真係對中國有誠意，人地輸左三成有多，中資民企亦係時候還人一個公道。

神話破滅?

2011-12-16T23:58:00.000+08:00

加息十三次，印度央行終於跟隨中國、印尼、新加坡同澳洲，暫停加息周期。

有經濟師話，「印度神話」已經破滅，金磚國家之父、高盛資產管理主席「奧尼爾」亦認同，呢個國家表現令人失望。

擔心經濟轉弱，印度盧比兌美元喺星期四、一度跌破５４水平，創歷史新低，今個星期累積跌左近百分之四。

為左阻止貨幣貶值，印度央行採取多項措施打擊炒家，包括限制交叉盤同持倉過夜數目。

其實何止印度，一個星期內，先有印尼、馬來西亞、菲律賓、南韓以及中國干預匯市。

原因美元轉強、例如南韓元今個星期累積跌近百分之三，菲律賓披索跌百分之二。

反映既、正係驚歐債危機，引發資金「班師回朝」、減少槓杆，撤出區內。

今次印度央行做左一個最難做既決定，就係咩都唔做，去拖延時間。所以既唔再加息，亦唔減息。

的確，印度比任何一個新興市場更困難。事關從數字上，佢地既要加息，又要減息。

經濟數據顯示，印度第三季增長只有百分之六點九，工業生產更下跌百分之五點一，最少兩年幾嚟最差。

至於支持加息因素，包括通脹仍然過九，更甚係貨幣今年累積跌近兩成。

手掌係肉，手背係肉，印度央行無得揀。

印度係不斷加息影響左經濟，定係控制通脹不力影響經濟，呢個係雞同雞旦問題。

但外界評論認為，印度控制通脹太差，新興市場引以為鑑。

當局政府無效率，大量補貼令經濟需求過剩。連番十三次加息，通脹高據不下亦令依家無辦法同其他新興市場一樣，放水救經濟。

經濟差，資金外流。呢個問題唔止印度面對，而係整個亞洲問題。點解祖國咁驚錢走，正係因為歐洲抽資，連鎖效應太大。

九七年亞洲金融風暴，就係由貨幣下跌引發，呢個惡夢，大家仲驚緊。

所以比幾年前，亞洲央行更驚貨幣下跌，亦之所以更積極干預。一嚟，過去幾年流入錢太多，更重要區內雖然底子厚，但短期外債亦唔少。

大鱷玩轉歐洲，重臨區內搞事又談可容易?

區內本錢係儲備多，依家仲撐到。但貨幣不停跌，無止境干預。儲備有一日要用完，事關重大，希望區內央行行長，真係一早就知問題所在!!!

Sum of all Fears

2011-12-15T20:35:00.002+08:00

恐慌由歐元跌穿１點３既１１個月低位開始。

之後資產拋售蔓延到股市、同商品。期油一度大跌超過百分之５，銀價跌左百分之七。

而一直未有太大調整既金價，更跌穿過千六美元，係08年雷曼倒閉後最大單日跌幅。同高位計回落幅度達到一成八。

交易員話，今次歐元回落至１點３樓下，觸發左大量對沖基金同程式買盤、加大賭歐元再跌。
德意志同瑞信估計，歐元有機會跌穿今年初既低位、１點２８６兌一美元。

有對沖基金更開盤口，估歐元會低見１點１算。

有研究機構計過，歐元同股市既關連繫數Correlation，以六十日既基礎計算，高達百分之八十。
其他資產好似係期油，關連繫數一樣高達六成。

恐慌唔係無理由，市場幾乎斷定，法國既三條A評級會不保，法國央行行長諾亞話，無理由調低法國評級，如果係真、佢相信更多係出於政治考慮。

由主權債務引發既危機，更迫在眉捷可能係先喺銀行層面爆發。

金融時報報道，德國政府已經開始籌備、一旦德國商業銀行未能喺明年一月，搵到方法填補５３億歐元既資金缺口，政府可能需要作出拯救。

雖然六大央行已經聯手提供美元流動性，但歐央行既數據顯示，上星期繼續有十二間銀行、借入５１億美元既一星期貸款，比之前一個星期既１６億高，而三個貸款更多達５０７億美元。

有研究機構就估計，一旦實施新既巴塞爾資本協定，銀行資金缺口高達二千億歐元。

面對危機未有解決方法，唔少投資者將最後希望放到去歐洲央行。

今年基金回報跌左超過四成既約翰保爾森，喺金融時報撰文，建議歐央行推出一個主權債務既保證計劃，同時建立防火牆，以穩定市場信心。

今年之前，約翰保爾森係投資市場長勝將軍，高高在上，不可一世。依家佢係投資市場既戰俘，連環敗仗，過街老鼠。但輸得多，真係可以改變一個人。

約翰保爾森以往惜字如金，如今要罕有親自撰文，為解決歐債問題獻計，你可以理解係最後衰號!

保爾森未死，所以唔係轉死性，但歐債問題，的確令佢輸好多錢。今年，佢老兄，買邊樣，衰邊樣。

買銀行股，身家大縮水。買民企，佢揀中嘉漢。就連最後堡壘黃金，佢亦分分鐘失手。

金價大跌，佢老兄旗下黃金ETF SPDR，較上月底貶值一成。而佢另外持有既黃金相關股份，亦跌左近一成。加加埋埋，原本基金已經蝕左五成，依家仲慘不忍睹!!!!!

今次市場立體式下跌，但講真正原因，除左恐慌兩個字，別無更好理由。

歐元穿底，金價二百天線失守，上證二千二無埋。種種事例，證明年尾交投淡靜，殺傷力最強。

評論話，依家唔止調整市咁簡單，但亦有分析話，既然造淡容易，要反手造好亦毫無難度，趁市場極度恐慌之際，反手造好，兩面輸錢。

小巫與大巫

2011-12-14T20:30:00.000+08:00

一個被形容為左右歐洲歷史既峰會、上星期曲終人散。

不過留底既、並非一個好似德國總理默克爾所講既穩定聯盟，而係做成歐盟內部更大既分裂。

走左英國，最少有四個歐盟國家話要視乎文本最終定案，先決定係咪簽署。

捷克總理批評，新既歐盟協議就好似要求佢地喺一張白紙上簽名，形容條約連名都未落實，而家強行推出只係政治短視。

呢啲非歐元區國家，質疑呢個布魯塞爾協定有關收緊財政紀律既要求、到底係單單綑縛歐元區成員、定係所有簽署既歐盟國家。

就算十七個歐元區成員，內部一樣面對巨大阻力，愛爾蘭反對派要求政府，需要就協議舉行全民公投，而結果幾乎係一定失敗。

荷蘭反對派、亦批評少數黨組成既政府，喺處理條約上並唔妥善。

連一向支持歐盟既丹麥，國內反對聲音亦增加。

新嘅財政協議，建議懲處赤字佔國內生產總值超過百分之０點５嘅國家，但係自動制裁機制點樣啟動，仲有待確定。

德法代表更表明，協議係仲需要包括埋稅收、金融監管、以及勞工市場既政策。

匈牙利同瑞典都對呢個建議有好大保留。

歐盟外交人員希望，星期四可以舉行第一輪條約既談判，草案就希望下星期可以完成。

對於上周協議，金融時報主筆馬丁沃夫Martin Wolf不留情面批評，整個峰會只係一次災難性既失敗，帶來只係一個更唔穩定、以及停滯不前既聯盟。

佢先於文首大力諷刺祖家首相卡梅倫，形容佢既要留在歐盟攞著數、但又變成令英國成為孤島。

但真正要鞭撻目標，其實是德法。

馬丁沃夫話，德法係判斷錯誤，認為喺歐元區內經常帳問題未解決前，任何既收緊財政措施，最大機會引發既、唔係復蘇，而係更大規模既經濟衰退。

佢指，卡梅倫的確鑄成大錯，不過同德法相比、小巫見大巫。

說文解字

2011-12-14T19:52:00.000+08:00

中央經濟工作會議閉幕，政策定調簡單講，係保民生，不變應萬變。

對前景，領導人似乎少左舊年既信心，一句經濟下行同通脹壓力並存，顯示來年政策異常困難。

近五，六十年，中央經濟政策從來係見步行步，零九年野心初現，隨即出事。的而且確，內地經濟活動正在減慢，同樣係新興市場，印度已經證明左俾大家知，人口多，市場大，呢一刻神話不再。

經濟轉弱唔係壞事，正如做人，咪趁放假，調養好身體。

搞好經濟，做好轉型，中國經濟最大敵人，唔係西方，亦唔係外國造空中國既大鱷，而係自己。

外界重點仍然流於幾時再減準備金率，甚至幾時減息，以至新增貸款額度出年有幾多。以中國調控經濟老練程度，從來唔成問題。

國家今時今日經濟規模，亦大有條件，無需刻意保八。幾時真正經濟轉型，減少依賴外來需求，先係重點。

三年前既野心，美國為首依家反擊，奧巴馬政府呢三年，向世貿組織投訴中國次數，差唔多多過曬小布殊年代。

中國發火，向美國汽車實施反傾銷，貿易對抗，但最先傷又係中國自己。

經濟工作會議五大重點，詳細有餘，新意欠奉，但字裡行間，有幾句發現係可喜。

洋洋萬字聲明，領導人提到要牢牢把握改革創新，著力提高原始創造能力，不斷增強集成創新，引進消化吸收再創新能力，多次提創新之餘，領導人五大重點其中一項，就強調要制假售假行為，讓廣大群眾放心消費。

鼓勵創新，反對造假，評論話，有呢一日來臨，中國經濟真正轉型，真正建立內需型結構，能否達標，羅湖城會係一個主要指標。

但好肯定，一個經濟體系，勞動力之餘，要有創造力，羅傑斯話麥嘉華唔了解經濟，羅奇批評好多唱淡中國專家未返過大陸，但兩位中國大好友，亦唔會否認，中國創意有限，品牌欠奉。

深圳假貨，老翻，質素公認第一。中國其實大有技術，搵快錢會令人疏於創意。但國家每年奉行超高增長目標，中國呢部大工廠機器，只會有秩序繼續沿地運行。

中國識講，要經濟轉型，但關鍵一步似乎係時候踏出。

局長，生日快樂!

2011-12-13T20:32:00.002+08:00

呢個十二月，對伯南克嚟講有雙重意義。

３年前果次，同樣係當年最後一次議息，美國正式進入零息時代。

嚟到一一年，最後一次議息會議，揀咗喺１３號舉行。

咁啱，撞正佢５８歲大壽。０５年上任到而家，生日正日要議息，今次原來已經係第二次，但都好可能係最棘手嘅一次。

人馬座嘅典型特徵，樂觀、熱情，求知慾強，又好冒險。明明任期要到2014年先屆滿，但外界形容今次會議，係佢央行行長生涯最後重要階段。

政治壓力大。共和黨人唔鍾意佢，總統候選人金里奇話要炒佢魷。

再加上伯南克身邊唔少朋友，都質疑佢仲有無興趣，冧莊落去，做足三屆。

講明係朋友，大家明白好大機會係本人放風!

難怪，本人心灰意冷嘛。經濟學者出身，喺華盛頓打滾十年，單係儲局主席都做咗六年，外間評價仍然唔突出，好壞參半。

成績唔算突出。０５年上任，但察覺唔到海嘯逼近。

殺到埋身喇，決策講得上勇敢果斷，總算阻止經濟陷入三十年代形式嘅大蕭條。但講到復蘇？主導政策走向，但進度失望。

其實唔得怪晒佢。息口減無可減，削赤又唔喺自己控制範圍，連前財長保爾森話，實在係神仙難變。保爾森仲讚不絕口，話佢夠晒主動，想像力豐富。

主動到教埋人哋點救市。表面講到自顧不暇，但華爾街日報爆料話，伯南克原來同歐洲央行德拉吉密斟，叫佢哋著緊啲撲火。仲攞美國啲舊橋，借俾歐洲偷師。

但唔一定領情。講咗咁耐，ＥＣＢ都仲未肯開印鈔機，除咗話係德國企硬，亦可以話係舊橋、原來唔一定受!

老實講，叻到要教人，不如先顧掂自己。唯一可再做嘅，可能係再次買ＭＢＳ，但局內都係分歧，睇嚟唔會咁快有共識。

無共識，就引導吓市場先。近期都做多咗。講短期利率目標，通脹仍然受控，經濟增長、失業情況。有方向，先說服到市場嚟緊應該點樣走。

反觀債王一於買大，仲要賭身家，旗下最大「Total Return Fund」，十一月持有MBS由三成八增加至四成三，增幅係舊年十二月以來最多。

值得留意係TRF現金水平，喺十一月跌至「負六百億美元」，係有紀錄以來最低，而同四月時比較，一來一回相差一千五百億美元，真係諗著買重伯老一鋪翻身!

喪屍基金

2011-12-12T20:33:00.003+08:00

歐洲繼續吊鹽水，美國又觀望議息，結果係，買賣兩閒!

市場係咪缺水？未必，睇新股反應就知。年尾幾隻巨無霸，公開認購普遍都夠數，少則幾倍，大則二百幾倍。

唔上市嘅，都只係嫌估值太平，唔想下限定價。斷估都唔係無水。

啲錢去咗邊？坐緊艇，可能係合理解釋。

唔理你係股神定沽神，今年嚟長渣股票，無乜邊隻唔駛輸。唔少基金今年嚟，跌咗兩、三成，要交數，唯有認輸離場應付贖回，呢類消息近期聽唔少。

持貨力強嘅，就可以再坐一會。調查話，原來有五成七投資者，啲錢買咗隻跑輸大市嘅基金，鎖死咗。唔係講緊普通嘅零售基金，而係入場費閒閒哋幾球美金嘅「股權私募基金」。

連專業投資者都要坐艇，其實大家都應該要睇開啲。

自己買賣，輸咗都無得怨，坐艇至少可以收吓息，慢慢捱。但呢班坐艇嘅超級大戶唔同，每年俾緊百分之２嘅管理費，賣點係往績好，跑贏大市。

今年？對唔住喇。收費高、無表現，呢類基金被歸類做「喪屍」基金，可能想笑班基金經理行屍走肉，無晒心機？

其實佢地更擔心點留住班客先真。市好，梗係容易達標，亦唔太介意分紅俾基金。但今年完全相反，無得賺之餘，唔少仲要倒蝕。時候一到，都係要揮手說再見，亦解釋到贖回潮點解咁洶湧。

睇準心理，原來早有部署。調查發現，呢班私募基金嘅客人，原來有八成都已經收到基金經理建議，叫佢哋將投資期，由原來一般嘅五年，延長多幾年，賣點係願景，亦即係明天會更好。

其實都幾難取捨。走，即係即時認輸，弊在街外又搵唔返更好投資，無仇報。

唔走，又驚傷口越踩越深，管理費硬蝕。所以，有錢又煩，無錢又煩，喺搵到新出路之前，似乎大戶仲係心甘命抵，俾班Fund佬呃。

峰會二之百年孤獨

2011-12-09T19:39:00.001+08:00

有時諗，歐盟以至歐元存在，其實係建基於歐洲人天真同浪漫，明知不可為而為之，最終造成今日亂局已定。

太平洋資產管理El-Erian形容，今次峰會係歷史重要一頁，其實講得無錯。

因為，峰會期間，及初步結果證明，十二月八日係見證歐盟或者歐元區走向由大變小之路。

一個國家，可以容許有一個強勢領袖，但一個充滿烏托邦色彩既大聯盟，根本容唔上有德國咁強而有力既成員。

強者只會想愈強，亦無可能放棄本身利益。歐元區依家問題，德國責無旁貸。

歐盟領袖依家仲可以自欺欺人，公開話改革來得正確，問題最終解決。

德國亦無疑攞到想要既野，就係透過財政聯盟再擴大實力，學潘國光所言就是贏了一場無須流血的政變。

但德國堅持，歐洲穩定機制不能成為銀行，歐元區共同債券不能上檯，令成個歐債爛局，只會再拖。

經濟學人批評，德國由始至終反對發行歐元債券，最終只係會威脅歐元既存在。

佢地認同，歐盟成員國如果可以透過修例，推進「新財政協議」，係邁出左重要一步，但如果唔能成立一個共同既融資機制，表現好控制到財赤既國家、唔能夠受惠(Reward)歐元債券而降低融資成本，最終只係會令投資者失去信心、唔能夠成功拯救歐元。

經濟學人鬧德國唔係無道理，德國事到如今仲堅持，只有財政聯盟，不能有共同金融機制。

硬要將救市基金數字上加夠一千億，但錢從可處來，怕且再擾釀三百六十五日都未有答案。

德國想透過財政聯盟汰弱留強，但意外係包括德國最想踢走既希臘為首多隻歐豬，竟然無半點異議，兼肯全數參與簽署修訂條約，劣豬不走，反而英國可能最早出局。

廿年前保守黨執政，先有第一代鐵娘子戴卓爾因為不願加入歐元被自己內閣倒戈下台，而接任的馬卓安同樣決定不加入歐元。

啱啱好廿年後又係保守黨，卡梅倫同德法唱對台，未致於決裂，但英國唔參與簽署修訂條約，再留底，又意義不大。

英國評論話，卡梅倫怕做張伯倫第二。三十年代張伯倫係英國短命首相，因為同希特拉有協議，國內被批評有辱國體。卡梅倫企硬，係保守黨近期一直想公投，佢依家決定同德法反檯，歐盟官員話佢完全係打無成本既仗，志在攞著數。

英國雖然唔係用歐元，英倫銀行亦有印鈔功能，但英國評論提到，英國變相將自己孤立，到最後唔會有好處。

所以一邊有英國大不列巔主義上身，另一邊有德國要攞盡著數。二零一二年繼續好戲連場!

峰會(一)

2011-12-09T19:37:00.001+08:00

經過長達十二小時通宵談判，薩爾科齊喺當地時間凌晨五點召開記者會。

重要利好消息係:
1.歐盟既領導人、已經接納德法提出既所有修例建議。
2. 歐洲央行會同時管理「歐洲金融穩定基金」EFSF，同出年年中提早推出既歐洲穩定機制「ESM」。
3. 歐盟向國際貨幣基金組織、提供二千億歐元貸款。

至於不利消息，可歸納為:
1.並唔係所有２７個成員都同意咁做、英國同匈牙利都會退出，而瑞典同捷克就要先諮詢國會。
2. ESM將唔會擁有銀行牌照。
3. 發行歐元共同債券，未能取得協議，會留待明年六月再研究。

到底應點樣消化今次會議成果，似乎市場亦是莫衷一是，由港股急跌，到歐洲股市由跌轉升，市場反應只能告訴大家是一片混亂!

之前一日在央行記者會先大吹淡風，歐洲央行行長「德拉吉」突然一百八十度變臉，形容會議達致良好成果，亦為未來一個緊密既「財政聯盟」、定下更好嘅基礙。

雖然ESM無銀行牌照令佢地唔能夠透過歐洲央行借入資金，不過德國亦願意作出讓步，同意由歐盟出資，向國際貨幣基金組織、提供二千億歐元貸款，其中五百億由其他非歐元區國家提供。

不要少看這個動作，原來背後大有文章!

德國之前一再反對，歐洲央行同德國央行亦對建議亦有保留，原因係擔心出資比IMF、即使再繞個圈返嚟借比歐豬國家，仍然會違反歐央行、唔能直接借錢比成員國既規定。

如果細心留意今次既本文，會發現由歐盟借出既資金，並無講明係比基金組織進行點樣既用途。

錢、原來只係會撥去ＩＭＦ屬下既「一般帳戶」。

消息話，歐央行行長德拉吉，係堅持只有呢個做法，先同意出錢。

咁做既另一個好處，係可以吸引更多國家出錢。

巴西財長星期四重申、包括中國、印度同俄羅斯既金磚國家，只會願意喺基金組織既機制下，提供資金援助歐洲。

金融時報話，除左歐元區提供既一千五百億歐元，其他國家亦同意出資相同既資金，換言之會加馬到四千億歐元，加埋基金組織現有既二千九百億資金，將可以說服市場有足夠「火力」拯救歐洲。

不過會議亦留底唔少疑問。

主流媒體標題形容會議「「緊張升溫」、「會議破裂」，原因係英國在內四個國家，唔願意參與修改條約。

不過問題係、無左四個成員國，歐盟現有既機制並無法定權力執行、新既財政聯盟。

相信呢條尾巴仲會繼續纏繞多好一段時間。

No Return!

2011-12-08T19:39:00.001+08:00

兩個城市，去年同樣受惠新興市場增長、今年同樣先面對通脹威脅、繼而再面對歐債危機引發的衰退風險，沿何會使用兩套截然不同措施面對樓市?

先說我們的財爺，曾俊華喺南非約翰奈斯堡接受彭博訪問，話受歐債危機影響，加上全球經濟放緩，本港樓市正在緩慢下跌。

佢提到一旦觀察到樓價急跌，政府一定會採取逆周期措施應對，包括放寬部分冷卻樓市措施。

雖然財爺之後想Downplay呢番言論(那分澄清聲明真值得一看，簡單講係”九唔搭八”)，不過碰巧又有個運輸及房屋局局長鄭汝樺，話政府目前正審視樓市變化，喺有需要既時候、會考慮提早檢討額外印花稅措施! 市場自然無限猜想!

現實係差餉物業估價署既資料顯示，七至十月分本港整體樓價已經跌百分之三點六，個別之前升得多既屋苑，好似係太古城，調整幅度更達到百分之八。

相比樓價、成交跌幅更大，上月分十大指標屋苑只有193宗成交、貼近沙士水平，全年計估計就少四成。

其實要數樓價跌幅，一成都未到，政府就話要鬆手，是否反應過敏?

抑或是政府害怕地產代理上街?

相反另一邊廂，新加坡不單沒有手鬆，反而加大力度強調控樓市。

新加坡星期三公布、周四起向非本地居民既樓宇買家，徵收百分之十既額外印花稅，連同之前已經要繳交既百分之一至三既印花稅，增加左投資樓市既成本。

而本地居民一樣受害! 買「二套房」亦一樣要比百分之三既額外印花稅。

當地地產商會批評，政府喺環球經濟轉弱既時候再收緊樓市措施，係政策失誤。

目前外地居民佔新加坡樓市買家比重，大約是一成八，比起香港平均水平三成其實要低(香港主要買家當然是內地同胞!)。

有分析指，當局冒大不違重手再打擊樓市，其實係希望為政治取得更大籌碼，因為新加坡人對於外來人引起的輸入通脹，非常不滿。

但今次動作很大機會引來反效果，高盛之前已經預測，新加坡樓價未來18個月會累積跌15%，明顯通縮風險大於通脹。

當然，我們不是贊成政府今天咁快就向地產霸權投降。政策「朝令夕改」，只會令人無所適從，更弊是產生”道德風險”!

所以今天絕不是鬆手合適時間，而一些長遠增加供應及居屋，Please No Return!

BOP 危機

2011-12-07T19:28:00.001+08:00

要炒美股，原來有終極贏錢方案!

條件係要你肯半夜三點起身，打開電腦，網址度打入「ft.com」五個字，錢就會繼續嚟!

星期二先由FT 報道標普會降低歐洲多國評級，結果拖低美股收市前表現。

到周三又係FT 喺美股下晝寫左EFSF 同 ESM合併既消息，又曾經炒高Dow 過百點，難怪又有人話FT 成為左「Mother of ALL Rumors」!

其實歐盟啲大帝要不斷透過FT放風，都放映佢地都方呎大亂、進退失據，意圖用ESM消息、沖淡前日被標普降級既威脅!

其實睇下蓋特納又「飛」轉歐洲，就知今個星期五大家都係唔好寄望太多。

見到「卸膊」財長表面就讚財政聯盟做法，但轉頭問佢聯儲局同IMF可以有幾多貢獻，就晒套太極拳話歐洲自己有本事搞掂，就知美國係講多過做!

可能真係旁觀者清，繼琴日華爾街日報一篇「市場先生」後，同樣來自花旗國既高盛、都已經提醒大家千祈唔好放太多期望喺星期五，原因係睇完星期德法兩國元首「懶」有默契既記者會後，高盛已經心知不妙，認為周五既峰會、注定係一千「無米粥」!

佢地提醒，要享受Christmas Rally，就要已經喺幾日出現左，大家千萬唔好心存厚望。

就算係謠言既始作俑者，FT既社論都對呢個Plan A不予厚望，佢地話呢個"默科齊"Merkozy既雌雄混合體，根本就無解決到長期既結構問題，好似無一個強制機制要求成員國堅持改革方案，而對於一啲早已經水深火熱、面對衰退既國家嚟講，制裁亦唔見得有好大威脅，呢個默科齊只係喺度買時間。

FT 主筆 Martin Wolf 批評得更坦白，佢話喺07年之前，好多而家既歐豬五國，財政狀況甚至比德國仲健全，搞到今日咁既田地，部分除左係因為佢地管理財政不善外，最根本問題其實係德國本身，因為佢地透過歐元將德國既出口競爭力提高，而代價就係犧牲其他既南歐國家。

了解一下整個歐元區外貿形勢，雖然整體係無咩經常帳盈餘，不過單計德國、無論對其他歐元國、抑或其他地區，其實係有龐大貿易盈餘。

代價當然就係其他歐元國利益受損。

所以馬丁沃夫認為，整個歐債危機，其實就係一場BOP , Balance of Payment 即國際收支既危機，係德國犧牲其他國家嚟狀大自己。

所以今日既德國，其實係應該有「出得嚟行、預左要還」既心理準備!

如果唔能夠根本性去解決呢個問題，單靠歐央行印錢，都只係救得一時。

或者CNBC呢個標題可以更貼切形容大家既心情: 投資者與其將希望放喺歐洲，倒不如寄望聖誕老人仲實際喎!

等價交換

2011-12-05T20:32:00.001+08:00

雖然只係十二月，不過先來一個2012年既大預言!

香港首富地位明年有變，李超人要讓位!

雖然係有些嘩眾取寵，不過周日推介會一句「萬世千秋」既鄭家純，真係令人目定口呆!

周大福集資計劃一波三折，好在最後埋單計埋數集資額都有三百億，雖然市值計埋得二千一百億，同和黃市值既二千九百億仲有距離，但純官只要繼續識得用佢套「鍊金術」，要攀上首富之位都唔難!

呢套鍊金術，有研究過招股書都會發現、就係一套不斷衍生銷售點既「無中生有」術!

今年四至九月半年間，周大福開設新店/櫃位既速度，簡直就係神速，半年就增加了一百四十個以上銷售點，而之前平均每年新增銷售點，都只係一百五十個。

唔好咁開心著，鍊金術有所謂「等價交換」，快速擴張代價係犧牲左直接管理權，廣招加盟店，佔總數比例由 27%升至 34%。

當然大家心理明白，鍊金術目的係提升周大福上市前既業績，令佢地盈利急漲一倍。
肯花時間肯比心機，其實周大福分招股書仲有唔少嘢學既!

華爾街日報就形容雖然呢分招股書客套話多、但都不乏真知灼見，例如周大福形容內地黃金地段零售店面難求，但咁反而更難解釋，佢地未來五年點樣可以加開500家新店?

仲有一個難解之謎，係內地店鋪佔左公司總數94%，但只係貢獻左56%既營業額，反而只係佔6%既澳門香港門店，就提供左44%營業額，如果內地真係咁好賺，點解盤數係咁?

講真，一啲小型既零售品牌、好似係莎莎包浩斯、甚至大家樂大快活，個個都話未來都係喺內地，但真正可以喺內地搵到錢既品牌，一隻手都數唔出!

唔好唔記得，要認購周大福，仲有個「Management Discount」，見佢單係解釋公司架構「欲言又止」、真係擔心上市真係會發生「分身家」風波!

唔少芬佬坦言，本來諗著今次係彤叔出手都落少少疊，點知一見又係有純官領軍，心中都涼左半截!

唔係要阻大家發達，不過或者好似華爾街日報咁講，內地的確係遍地黃金，但投資者唔好比呢啲未來既黃金蒙蔽左雙眼!

面包債

2011-12-02T20:29:00.003+08:00

一間喺德國既面包店，最近喺佢地全國三百五十間分店，都貼出一張宣傳海報，唔係推銷新款面包，而係面額有七厘息既「面包債券」。
迫到企業要自行發債，原因係銀行已經喪失左金融中介既功能。
市場一直有疑問，六國央行星期四咁緊急出手，向金融體系注入流動性，係咪銀行已經到左水深火熱地步？
金融時報同經濟學人、今日不約而同發表專題報道，指歐債危機已經逐步引發既信貸緊縮。
銀行既三個資金來源、包括客戶存款、發債、同埋同業拆借市場，都已經唔能夠再提供資金。
今年六月以來，歐洲銀行發行既無抵押債券、總額只有１７０億歐元，比舊年同期大跌八成半，只係足夠應付到期資金需要既三分之二。
更惡劣係、銀行出年到期要還資金，多達六千億歐元。
為左搶存款、有西班牙銀行比高達四厘高息，但一樣吸引唔到客戶。
企業存放資金更幾乎全面消失，德國既多間大型車廠，原來都有銀行牌照，索性直接將資金存放到歐央行。
同業市場方面，一樣失去功能。
擔心交易對手風險，好似匯豐就喺第三季將歐洲同業拆借減少四成。
歐洲銀行委員會之前做既壓力測試，指資金缺口只係有一千零六十億歐元。佢地要求銀行透過集資提高資本。
不過事與願違、銀行寧願減少借貸，收縮資產負債表應付監管要求。巴克萊就估計，最終會令銀行總資產減少一成，即係相當於收縮三萬億歐元。
有一間歐洲銀行主席、向金融時報抱怨，坦言歐洲銀行委員會、只係一群「蠢才」，一手導至信貸收縮。
咁經過星期三六國聯手，信貸危機係咪可以解除?
經濟學人話，央行提供既資金最長期頂多都係一年，唔能夠應付客戶更長年期既資金需要、銀行如果揾唔到相應既資金配對，信貸緊縮仍然係迫近眼眉。
佢地認為再唔做任何動作，後果會係災難性，而家雖然走出左第一步，但時間亦已經所剩無幾。

路線圖

2011-12-02T20:29:00.001+08:00

有無跑過馬拉松?知唔知最難受係邊一個階段?

聽人講最辛苦係起步後大約跑左３５公里，果時就最易令人放棄，因為一來已經撐得好辛苦，而且前路漫漫，要走落去一啲都唔易。

咁講唔係想約大家跑，係諗緊歐債危機嘅終極方案！

求先所言，其實係默克爾提出，想講係歐債問題就好似馬拉松一樣，仲需要幾年時間先至可以解決。

佢喺國會表示，要真正解決問題，只能夠通過修改歐盟條約，各國達成財政聯盟。

現實係、解決歐債既路線途開始逐漸清昕。

由話無限印鈔、發共同債券、到最終，出路原來係成立新歐洲既政治聯盟。

歐洲央行行長「德拉吉」，喺星期四率先露出口風，話十七個歐元國要先訂立出新嘅「財政契約」，歐洲央行可以採取進一步行動。

金融時報話，德國總理默克爾、法國總統薩爾科齊、意大利新總理蒙迪，以及德拉吉經過一輪又一輪磋商，終於取得共識，就係先修訂歐盟條約，成員國要執行更嚴格既財政紀律，降低債務水平，之後先同意發行歐元債券。

德法仍然就聯盟既部分細節進行爭拗，包括係咪有機制向唔達標既國家作出懲罰，甚至係要求撤出。

目前十七個成員國態度仍然分歧，波蘭已經同意加入德國既陣營，不過愛爾蘭就以退出歐盟作為威脅，反對財政聯盟。

意大利星期一會公布最新既削債措施，透過加稅同徵收物業稅，提出總值二百億歐元既減赤計劃。

希臘既減赤措施，亦可望喺下星期三交到國會審議。

被外界稱為「D DAY」，歐盟峰會會喺星期五召開，德、法兩國會喺下星期一、先提出嘅修訂歐盟條約嘅新建議，然後提交俾歐盟執行委員會拍板。

雖然明眼人都知，默克爾係希望透過今次「置諸死地而後生」方式，一統天下，不過佢今日就駁斥外界指德國想統治歐洲，指呢種講法「太離譜」!

係咪離譜？只有佢自己先知，不過憧憬歐洲危機有解決跡象、今個星期MSCI 環球指數升左百分之九，係三年來最大升市，環球股市市值，更進帳左三萬億美元。

經歷過周四升一千點，相信大家都要抖一抖，下周再戰「D DAY」!

救生圈

2011-12-01T20:36:00.001+08:00

唔係救歐債危機，英美既主流媒體都相信，今次六國央行聯手，係避免債務問題蔓延到銀行身上，唔好再出現０８年雷曼倒閉後既環球信貸收縮。

華爾街日報形容，美元掉期安排只係一劑止痛特效藥、根本唔係醫病既治本良方。

美元互換掉期早喺０７年已經推出，喺雷曼０８年倒閉後，成為左全球銀行既「救生圈」，０８年底動用既掉期規模高達六千億美元。

呢個機制喺舊年５月歐債危機再惡化後再重新啟動，但使用既規模一直唔大。

今次六國央行咁急著出手，市場不禁有個疑問、係咪仲有一啲隱藏問題未曝光?

Pimco埃爾阿利安話，中央銀行肯定係觀察到、銀行體系有問題令佢地憂慮，所以要先發制人。

既然唔係治本良方，市場好關注係下一步既救市行動，關鍵又係喺歐央行身上，會唔會進行量化寬鬆?

多國央行既聯手措施，就係向歐洲央行同德法領導人施壓。

日本央行行長白川芳明，喺記者會上都講明、今次行動只係為歐洲國家「買時間」。

克魯明話，美元掉期並唔係新鮮既事，市場過分亢奮，唯一合理解讀係歐央行下一步會配合進行量化寬鬆。

話說回來，零八年以嚟，央行神奇之手，無處不在。市場一次又一次證明，股市愈跌、央行出手機會愈高既諗法係正確。既然慣例已開，以後無謂再堅持講什麼避免道德風險!

奇在美國經濟數據奇佳，股票市場尤其突出，伯南克點解要化身為全球教父，牽頭救市，呢個疑問，始終解唔開。

聯儲局美其名，係解決資金流動性風險。但係行內人都知，掉期從來少人借，因為一借就會俾行家唱通街。

況且，掉期利率，對市場利率既傳導性唔算太大，零八年已經證明一切。

官方解釋欠道理，英美兩份大報講得坦白，聯儲局盤算，就係用半厘掉期利率既成本，將歐債問題白熱化，要你歐洲央行禮尚往來。

金融時報講明，減得美元掉期，歐洲央行無理由拒絕減息，同削減抵押品要求。

華爾街日報主筆DAVID WESSEL講得更赤裸。文章一開始就話，歐洲應該心知肚明，歐債問題大過雷曼。

Wessel更發炮，話零八年美國問題由美國一手搞掂，今次歐洲在情在理，責無旁貸。

全球股市，美股一枝獨秀。彭博同華爾街日報近日鬥揭聯儲局同財政部點樣相繼向對沖基金放料，經常私下接觸。

美股唔跌，依家開始明點解。講到呢度，大家都明，伯南克當然唔會一次就收手!!

伯南克周小川齊齊做聖誕老人，時間或有巧合，又或真係配合天依無逄。

投資者感動，更令人感動係內地股市事前似乎無風可收，一反常態，非常進步。

所以二零一一年十一月三十日，係值得記著既日子。

出奇不意

2011-11-30T20:11:00.001+08:00

上星期減農村社差別準備金率既時候，都仲係話唔代表政策全面轉向!

唔夠一個星期，人行就公布調低存款準備金率半個百分點，係三年來首次。咁先貫撤到佢地「出奇不意」作風!

唔等通脹數據、唔等PMI，仲要唔等中央經濟工作會議，有分析認同，中央開始放鬆貨幣政策!
財金官員多次否認，會放鬆銀根，但人民銀行以行動推翻言論。

人行傍晚宣布，由１２月５號開始，全面調低金融機構、存款金率半個百分點，至百分之２１。

中央鬆綁，其實都唔係無跡可尋。

過去年幾，一直偏緊嘅調控，喺第四季，開始逐步放鬆。

由溫總理提出「預調微調」，到農村金融機構獲下調準備金率，市場對內地放鬆銀根嘅預期，愈嚟愈強烈，但都只係相信，如中央一直立場所謂，會定向貸款，針對性放鬆。

早到喺１１月最後一日就宣布，調低準備金率，市場普遍都預計唔到。

分析指，１２月就減準備金率，都可以理解。

因為近期內地通脹，有見頂回落跡象，而且憂慮經濟，會被外圍拖累，臨近年關，資金會較為緊張，人行今個星期喺公開市場，就提早實現資金淨回籠，都反映，當局有空間調低準備金率。

至於明年嘅調控指標，係咪會持續放鬆呢？內地傳媒引述人行消息指，出年廣義貨幣供應Ｍ２，唔會高過今年百分之１６水平，預計大約係百分之１４。

而新增貸款規模就係８萬億人民幣，通脹目標就介乎百分之３．５至４。

另一個觸發人行考慮、係資金外流。

過去兩個星期，無論係華爾街日報、定係金融時報或者CNBC，每隔一兩日總有篇特稿，標題唔係「人民幣升值過程停止」、就係「資金外流內地」，似乎真係有唱衰中國之嫌!

先有內地十月外匯佔款、減少咗２４８億人民幣，四年嚟首度下跌。

而第三季嘅跨境貿易人民幣結算總額，亦出現０９年中試點啟動以嚟，首次下跌，市場開始質疑，人民幣國際化嘅步伐，都可能走回頭路。

我地之前都有分析過，外國媒體固然對中國威脅論有戒心，但內地經濟放緩、外資資金外流，又的確係不爭事實，所以人行今次減準備金率，其實同資金外流都有關係。

一千大洋的臉書

2011-11-29T19:30:00.001+08:00

形容係世紀最期待既上市，相信無咩人異議。

問題係、估值係咪同樣等到大部人認同?

多次話過唔急於上市，創辦人朱克伯格終於決心明年四至六月，會將FACEBOOK上市。

FACEBOOK 計劃集資一百億美元，以呢個價值計算，相當於整間公司估值高達一千億美元，即係一上市市值已經等同阿馬遜，僅次於Google既二千億美元。

令Facebook董事會下定決心，係由於佢地現有既股東人數已經超過五百人，按規定就算唔上市、公司都要喺明年四月前公布財務資料。

董事會認為咁做、可能會令佢地處於不利局面，因為對手更了解佢地既業務模式，但就享受唔到上市公司集資既功能。

集資一百億美元、將會係歷來最大規模既科網公司上市，不過上市時間就令唔少投資者質疑，特別係近日上市既團購網站Groupon 上市首日急升後，連續五日下跌左四成二，而另一個社交網站LinkedIn亦喺首日急升後，由高位累積跌番三成六。

今年收入估計唔夠四十億美元，雖然比舊年增長左八成，但盈利既模式亦有投資者懷疑。

不過有市場調查公司話，Facebook既網上廣告市佔率、預計可以由今年既一成六增加至明年近兩成，將會繼續支持高增長發展。

數下數下，Facebook而家全球客戶有八億個，如果當佢係一個國家，用人數計已經僅次於印度同中國，即係全球第三大國!

以一千億美元呢個現市值計一計，啱啱好，包個用戶包括你同我，估值係一千大洋!

呢個估值、比起LinkedIn上市時，每名客戶一百美元仲要高，難怪有分析員質疑、估值係太過進取。

今次上市最大贏家當然係朱克伯格，淨係佢揸著股分都值２４０億美元，果然係最年青首富！

但唔好唔記得香港都有個誠哥係股東，粗粗地揸０．７％，都值七億美金！

珠光寶氣

2011-11-28T19:40:00.001+08:00

到底係咁巧合定大戶發功，新股呢個星期輪著開車，股市就全面攀升，完全好似係為佢地鋪路!

周大福公開推介會，被指為本港財經界今年最重要既BALL。久未露面新股既四叔撐場，Peter王俾面，連平保馬明哲亦有赴會。
上次平保集資，彤叔出手，難道今次禮尚往來?

周大福呢場BALL，係星光閃閃。來賓亦每人獲贈鍍銀蝴蝶結鏈咀做記念。

見過既行家話，好細。禮品細唔緊要，集資額仍然有機會破今年記錄。

今次周大福上市策略，似十足十賣樓手法，唱高開低。

集資額由原先講四十億美金，到依家廿八億左右。市盈率由最少三十，到依家最多廿一，最少十五倍。

基礎投資者，由原本估好多，到零。

中環人話，周大福上市，到目前仍然係個謎。

的確，周大福有品牌，有慨念，內地又有網絡，根本無上市逼切性。但既然又有品牌，又有概念，依家更大減價上市，咁，係咪要買呢？

黃師傅認為，預一半，即係十萬本錢，頂多放五萬，將來至算。

有零售分析員就話，單睇隻普拉達，已經較上市價低一成有多。
零售股係咪見頂，係抽周大福之前、要先問自己問題。

更重要，減價還減價，周大福比同類股份，甚至非本港上市國際品牌，一啲都唔覺得平!

但講到尾，彤叔透過周大福上市，為市場開左兩條大難題。

一，你信唔信個市已經跌完? 二，就係你信唔信本港經濟，尤其係零售市道會繼續興旺?

前者無疑難估，但後市目前仍然有保證。之不過市道既野，今日鋪頭人頭湧湧，一個月後，亦可以水靜可非。

不流血的歐洲政變事件

2011-11-25T19:37:00.001+08:00

話過唔會容許被金融市場「綁架」，但現實係默克爾唔能夠唔考慮、星期三德國拍賣債息既惡劣反應。

太平洋資產管理話，德債息率09年以來首次高過財赤問題更嚴重既英國，市場已經清析表明、德國國債唔再係安全既資產。美林更形容、市場已經認同歐元資產，已變成「不可投資」(Uninvestable)既工具。

所謂的財政聯盟，其實就係指擴大歐洲法院既權力，可以裁決要求成員國強制執行削債。

同時歐盟專員亦成為歐盟區內既「超級財長」，有權力向唔能夠執行財政紀律國家、施加懲罰。

華爾街日報同金融時報都話，雖然默克爾口頭上唔願意作出任何承諾，不過喺成立左共同財政聯盟後、相信佢喺面對國內反對勢力下，最終都會妥協。

不過問題係、到底是三數五月、抑或三五七年? 市場等唔等到呢一日?

解鈴還需繫鈴人，歐債問題，德國作主。經濟學人大鬧完意大利前總理貝盧斯科尼係歐元罪人後，就愈鬧愈激，矛頭依家直指德國。

經濟學人最新一期話，德國同歐央行唔行動，歐元幾星期內瓦解。對德國總理默克爾，佢地唔客氣，暗示佢有能力踢走貝盧，同帕潘德里歐，但未必有能力推低債息。

到底呢的係咪激漲法，不得而知。雖然我地都好唔明，德國到底搞邊科。但有睇德國足球，你從來知道日爾曼民族既有機動性，亦有部署，從來唔會急他人所急。

所以，德國贏波多，輸既少。但每次都係臨完場，入一球波就算。

黃金戰士潘國光形容，意大利，同希臘領導被撤換，係一場由歐盟策劃既非流血政變，因為現任兩位總理已經不再是由人民選出，而係由歐盟、歐央行同IMF三頭馬車成為攝政王。

如果信既話，德法，特別係德國，下一步就係直接或間接踢走毫無前途，只有負累既歐元。進行完清洗之後，他日既歐元，就係嚟自新歐元國成員。

德國基於歷史包袱，要歐央行印鈔，就等於要德國退出。

印鈔機會不大，歐元共同債，阿太無封死後路。外國分析亦相信，只要成功修改歐盟條約，歐元區成員進一步拱手相讓主權，日後一切德國話事為主，咁歐元債就會出現。

默克爾呢步棋，愈玩愈明顯。德國退出歐元，唔會係首選。因為佢會無左相對強國優勢，亦唔可以喺匯率上攞著數。

零八至一一年十多個年頭，德國正正受惠係歐元區龍頭，發債成本慳左超過二
百億美金，出口增長亦因為歐元弱勢而大大跑贏日本及英國。

所以夠膽說，今日的歐豬五國，除了起因自己貪威識食外，德國其實亦有分將自己今日的幸福、建築在這些歐豬身上。

有人會質疑，依家形勢危急，德國債息都抽高，唔等得好耐。但唔好忘記，德國十年債息雖然升左，但都係兩厘二咁大把，零八年同期債息係四厘多。德國仍然玩得起。

況且你記著，日爾曼強項係打持久戰。

人民幣外交

2011-11-24T19:13:00.001+08:00

有美國智囊機構話，美元嘅國際地位，五到十年內就會被人民幣取代。
金融時報隨即反駁，認為喺人民幣大量用喺、真正嘅跨境貿易結算前，呢啲美國智囊唔駛太擔心。
證據在於人行剛公布的跨境貿易人民幣結算總額。第三季只得５８３４億，按季減少百分之２，亦都係０９年中試點啟動以嚟，首次下跌。

市場第一個反應係震驚，原因在於人民幣國際化步伐其實唔錯，數字跌咗、其實相當令人驚訝。
但諗深一層，又係咪咁國際化？

有支付系統公司統計過，原來內地同香港嘅貿易，佔咗總額超過八成，直正「離岸」嘅，只佔大約百分之８。

銀行界人士更加話，情況根本唔理想。因為全球主要跨國企業，無一間用緊人民幣做貿易。咁累積有超過２萬億嘅金額，從何而來？

原來大部分都係內地嘅企業，同境外嘅附屬公司做嘅。

目的，亦只係借「跨境貿易結算」嘅名目，買賣人民幣做套戥。最新數字跌咗，亦只係反映呢類活動減弱。

除咗純粹炒賣，貿易結算嘅另一個用途，係籌組海外貸款。先喺內地銀行存錢、攞高息，再聲稱要做貿易、問銀行攞信用證，喺香港接應嘅分公司，就可以用嚟做抵押、借平錢???

情況有幾活躍？睇本地銀行對內銀嘅應收帳，兩年幾之內急升六倍就知。

當然由陰謀論看、國際間大力踩人民幣策略，本身亦可能是居心不良。由批評人民幣升值幅度不足，轉移至質疑人民幣國際化成效。

雖然仲未係太著跡，但技倆太明顯。

其實開首提到、兩星期前美國智囊機構的報告開始，整個踩人民幣行動進入新一頁。如果有留意，歐美兩大報，金融時報，同華爾街日報，每日都有一篇半篇報道，或分析或評論，目標都係彈人民幣。

華爾街日報最近先發表一篇顯為升值賣點消退既文章。金融時報亦隨即用最新數字，大造文章，話人民幣國際化暫時有聲勢，無實際。用一季數字都結論係咪洽當，好難講。

但要記著，第三季正值市場動盪，美金稱皇。人民幣升值預期降溫，亦係正常。況且，歐美可能遺忘，亦可能係擔心，就係尼日利亞，泰國，以至南韓等央行，已經或者將會喺本身外匯儲備資產中，加入人民幣。

林行止今日專欄講得啱。祖國近年經濟成績彰顯，但外交表現平平。圍攻中國勢在形成，但中國被圍慣。七十年代，乒乓球外交可以突圍。今時今日、莫非阿爺諗到可以搞人民幣外交??

中環人話，只要肯用人民幣結算，保證有著數既賣點。利字當頭社會下，人民幣國際化仍然有機會提早達標，除非中國唔再係世界工廠！那歐美是不是出於驚青，連人民幣外交都想打擊呢！

貼士

2011-11-23T18:17:00.001+08:00

聯儲局每個決定、伯南克每句言論，都左右全球金融市場上落。

央行要獨立，內容要保密，幾乎係全球每間中央銀行都要遵守既底線。

但原來，全球央行之首，聯儲局獨獨例外。

繼早前爆過有委員將聯儲局會譏紀錄預先賣比基金公司後、華爾街日報向聯儲局要求提供官員每日議程記錄，揭發過去幾年，包括伯南克在內多名高層，都多次私底下同對沖基金等投資者有接觸。

例如 Nancy Lazar 係美國一間投資公司SIS既首席經濟師，8月15日，佢致電客戶強烈建議大手買長債。

原來，佢當日曾經喺伯南克辦公室，同對方會面，獲悉聯儲局拍板決定進行扭轉操作即係OT2。

而聯儲局真正宣布OT2的日子，是足足隔了一個月，要到9月21日。

多得蘭西，佢既客戶八月到依家，回報雙位數。

報道同時揭發，經常同投資者私下會面最多既、係聯儲局第三號人物，身兼紐約聯邦儲備銀行行長既杜德里Dudley。

華爾街日報話，根據杜德里既工作安排記錄，過去兩年半，呢位重量級官員最少12次同對沖基金，或者華爾街大行私下見面。

名單中包括對沖基金SAC，貝萊德，仲有係舊老闆、高盛行政總裁布蘭克費恩。

講關係密切，出身高盛既杜德里，當然同高盛最熟。

報道形容，高盛首席經濟師哈祖斯，係杜德里甚至伯南克常客，華爾街一早知，高盛有關聯儲局政策預測，近年一向準確。

例如，今年中唔少經濟師擔心聯儲局退市之際，高盛哈祖斯今年六月五日一份報告，就提預先及聯儲局會將低息環境，維持到2013年。

事有巧合，聯儲局五月25日內部會議，重點主題的確由退市，轉為討論經濟增長。

聯儲局發言人，同杜德里都否認，曾經向投資者提供一手資料。

聯儲局同投資者接觸，其實係始於現任財長蓋特納、佢仲係出任紐約聯儲銀行時提出，當時理據係要加強同市場溝通。

早於03年已經有專責人手，幫佢主動聯絡市場人士。

聯儲局今年修訂內部指引，講明局內官員唔應該私下會晤投資界，但如果議題係之前已經公開，就可以例外。

咁即係繼續有人可以預先收風???

愛國債券

2011-11-18T19:26:00.001+08:00

恐慌蔓延整個歐洲大陸。由萄葡牙到奧地利，由挪威到芬蘭，法國同西班牙。

賣債反應唔理想，擔心歐洲主權債息繼續上升、呢啲地區同德國既債息差距都創歐元面世新高。

更驚係恐慌有跡象提升到、全球資金市場。

惠譽連番警告，環球資金鏈問題，同埋會波美國金融業唔係無道理。

首先，歐洲債息持續上升，債券沽家多過買家。

面對出年歐洲多國數千億再融資潮，令整個融資機制可能受影響。

單係意大利，出年二月就要再融資360億歐元，全年超過二千億。

更大問題係，環球資金成本不斷上升。歐洲掉期利率升至三年嚟高位，即係用歐元借美金成本，係雷曼出事後最高。而三個月倫敦同業拆息亦升至近四個月高位。

目前單係美國金融業，計埋貸款在內，喺整個歐洲風險涉及一萬三千億美元。筆數仲未計貨幣基金涉及既近2900億美金。

第三季以嚟，多間美資銀行同基金已經減少向歐洲交易對手提供資金。

歐洲會唔會爆煲，引發全球金融業危機，目前仲未知。但肯定係，歐洲無論上至國家，下至金融機構都好等錢洗。

靠傳統批發融資途徑行唔通，歐洲轉移向市民埋手。

包括西班牙，意大利，愛爾蘭在內多個財困國家，都加碼向國民發行零售主權債券。

呢的債券，擺明係向國民集資，但美其名就叫「愛國債券」，或者「國家團結債券」。

當然愛國有代價，意大利為認購國民提供稅務優惠，令債券回報高達十二厘半。

而金融機構亦唔執輸，法巴今年430億歐元融資當中，一成七係嚟自存戶或零售投資者，較舊年百分之九比例高。

當然市場最後希望仍然放在歐洲央行身上。

原來歐央行一早秘密定下每個星期、購買二百億歐元債券既上限，而且限額早喺上任行長特里謝、二千年開始購債行動既時候，已經定下。

消息仲話，一開始既規模比而家大，只係由於市場開始質疑呢個做法，所以先降至二百億歐元既規模。

新一期經濟學人話，德國總理默克爾而家只有兩個選擇，一係由所有歐洲國家孭起整個南歐債務; 又或者選擇由歐央行做最後貸款人。

經濟學人話，雖然德國有歷史包袱，擔心印錢會做成超級通脹，不過佢地認為呢個憂慮係多餘既、因為需求疲弱同收緊財政開支，中短期根本睇唔到有通脤風險。

就連彭博亦罕有發表社論，否定默克爾話歐央行唔能夠做最後貸款人既言論，因為跟據馬城條約、歐央行係容許喺二手市場買債，而佢地最近一直做緊呢個動作。

彭博認為條約既精神係值得尊重，意大利同希臘的確要為自己行為負責，但喺市場極度恐慌既情況下，違約與否已經唔係重點，歐央行而家就需要採取行動。

國際化

2011-11-17T19:22:00.001+08:00

美國人政治技巧高，但智慧好多時，只係一般貨識。甚至連小朋友都不如。

喺人民幣議題上，就可見一班!!

奧巴馬總統踏入今年起，四出做路演，主題係人民幣升值不足，中國玩弄機制。

但同一時間，美國國會又發報告，話人民幣國際化係危害美國利益。兩者，係咪自相矛盾呢？

對美國嚟講，當然無啦。佢地心入面只係想，既要馬兒好、又要馬兒不吃草。

弊在連兩大美國智囊機構亦有保留。

董事成員包括前聯儲局主席沃爾克，前財長奧尼爾既「彼得森國際經濟研究所」IIE，今個星期發表既報告就指，人民幣對主要貿易夥伴既一籃子貨幣匯率低估既程度，已經由年初一成六，改善到最近既一成一。

而另一個由一批美國商界為主既保守派、成立既智囊機「傳統基金會」更直指，批評人民幣有欠理據。

佢地表明美國政界連番逼使人民幣升值，目的係想中國有過激反應，之後將責任推向中方。

人民幣問題上，顯然美國既要人民幣加快升值，又唔願意見到人民幣地位提升。你話，中國會唔會上當!!

人民幣係咪被低估，人民幣大幅升值、貿易伙伴又係咪得益，從來係一個雞先、定旦先既問題。

如果根據高盛奧尼爾計算，答案係否定。中國可能受圍攻，要再盤算之後，先至還拖，就算要還拖，中國亦有大條理由。

首先，中國仲係世界工廠，大幅升值，貿易對手進口成本大減。其次，今年第三季起，區內貨幣開始玩貶值，中國仲未加入貶值潮，已經算有義氣!

如果睇區內貨幣今年嚟兌美元表現，新加坡，南韓，印度都要跌，印度貨幣仲要跌近一成二。唯獨人民幣，其實係區內升幅最大既主要貨幣，升左近百分之四。係跑唔贏到日本。

美國咪就想中國跑贏日本，行番當日廣場之路。但有日本失敗例子在先，中國豈會上當??

人民幣升值幅度，我地影響唔到，反而擔心人民幣國際化，有無中央心目中部署咁順理呢？

的確，花旗大軍壓境，部份國家可能臣服、君不見金磚國都出現兄弟相殘局面?

最大問題係，環球多事，美元一日相對較強，而且一日顯示相對重要地位。人民幣國際化呢場球賽，可能又打加時。所以，美元突然轉強，實在有其原因。

UNDE指數

2011-11-16T19:25:00.001+08:00

格林斯潘零六年講過，為左掌握經濟實況，佢唔會放過任何數據。亦因為咁，連底褲都唔放過。

格老認為，內衣著喺底，唔會有人睇，所以係咪買新底衫褲，好視乎有無多餘錢。
如果底衫褲賣得好，即係經濟唔錯，相反證明經濟差。

佢重視既UNDE INDEX，早一兩年的確同經濟表現吻合，但今年有人質疑可信性，因為截至第三季，UNDE指數反而係升!

市場有好多解釋，除左話因為數字反映唔到經濟實況，仲可能因為前幾年男人慳錢無買新底衫褲，但依家著到殘殘舊舊，穿曬，所以局著買番新。

歐洲呢個骨牌，愈搞愈大，美國經濟如果比預期好，會有一個緩衝作用。

的確，美國最新無論零售，紐約工業製造業指數，都全部比預期好。

就連花旗自行編制既驚喜指數，亦重上四十樓上，上番第二季水平。顯示，美國經濟的確無預期咁差。

但另一方面，沃爾瑪自己做既調查，十個媽媽，只有一個話經濟好。經濟好壞，美國各界有不同判斷，同觀點。

巴菲特可能講得啱，美國依家只係樓市唔得。但樓市對經濟潛在影響，股神有無低估呢?
的確，下周四感恩節前前後零售旺季，會係對美國經濟好壞有定奪。

Amazon 一部Kindle Fire 提早一日推出，就幾乎令Tablet 市場變天，反應遠比預期好，似乎真係下至底底、上至高消費電子產品，一樣滿堂紅!

如果信股市左右消費市道，咁樣，十一，十二月份經濟理應唔會太差。

藍巨人

2011-11-15T18:57:00.001+08:00

今年比股東既信，形容自己手頭已經裝滿彈藥，正瞄準一隻大笨象Elephant Gun。

原來巴菲特睇中既、係有「藍色巨人」稱號既IBM。自言唔識科技、巴菲特睇完2010年IBM 既年報，睇中IBM 提出的五年計劃。

喺取得證監會批准，三月開始秘密動用咗１０７億美元，買咗６４００萬股ＩＢＭ。目前持股量大約百分之５點５，成為僅次於道富既第二大股東。

今次巴菲特入股IBM有兩個異常: 1. 打破從不沾手科技股的紀錄 (他同時購入 Intel); 2. 作為價值投資者大師，居然會在歷史高位買入IBM。

華爾街日報話，無一個分析員好似巴菲特對IBM 睇得咁樂觀。

今年以來IBM累積升幅近三成，係道指成分股表現最好股分，主要係歸功下個月退休既總裁「帕爾桑科」，佢決定二千年出售個人電腦業務比聯想後、一直提高來自軟件既收入比例、由兩成半增加至四成四，而跟據佢地五年計劃，未來比例會增加至五成。

彭博就形容、巴菲特正係重複緊佢98年年買入可口可樂既故事，當年巴菲特買入既時候，可樂股價已經喺四年間升左兩倍。

結果之後既十年、可樂既升幅係超過十倍。

巴菲特話佢親眼見過，ＩＢＭ點樣發掘同留住客人，而企業換電腦公司，同換會計、律師一樣，都要花好多功夫，簡單講，即係客戶延續性好強。

所以正如兆富所說，其實IBM 早就脫離左單單科技股範籌: 一間有穩定回報的科技服務公司。

自己講過買入可口可樂前、已經先留意公司表現近十年，原來巴菲特亦一直有留意IBM發展。

佢既傳記就透露、九一年首次同微軟蓋茨會面，已經討論過微軟同IBM既合作。仲有一個令巴菲特睇中IBM既原因、係對股東慷慨。

過去十年IBM 透過派息同回購，向股東派發左８９０億美元，而未來五年預計派發會增加至七百億美元。

巴菲特話，佢之所以睇好IBM，好大程度就係相信呢個五年計劃，特別係五年內可以提升每股盈利一倍。

咁多隻科技股，巴菲特揀左市盈率14倍嘅IBM，反觀微軟，市盈率只係10倍。

但股神就話，同蓋茨太熟喇！

同蓋茨無咁熟嘅你，又會唔會考慮呢？

技術官僚

2011-11-14T19:10:00.001+08:00

蒙蒂上場，唔單止係意大利人民歡呼，金融市場一樣興奮。

意大利十年債息跌左近一百個點子，歐盟、基金組織都傾向支持新政府。

歐央行總裁德利吉，已經同蒙蒂會面，華爾街日報話，咁係證明歐央行支持蒙蒂權力交接。

先有「帕帕季莫斯」接提「帕潘德利歐」出任希臘總理，之後由「蒙蒂」代替「貝盧斯科尼」。

顯然，技術官僚Technocrats 已經成為左歐洲解決債務危機既最後希望。

其實意大利人對技術官僚一點也不陌生，上次意大利同樣出現財赤問題，正是95年，當時亦是靠一批技術官僚、最終成功解決危機。

的確，今天的危機遠比當年嚴峻、市場更需要既係一個更講求紀律、嚴格控制開支既政府。
但這分Italian Job的工，其實一點都不容易打下去。

今年意大利既財政赤字只係佔本地生產總值百分之四，好過好多先進國家。

不過問題係公共赤字一直偏高，佔本地生產總值達百分之一百二十。

金融時報話，蒙蒂未來幾年都要每年取得大約百分之五既財政盈餘，國家債務問題先有解決機會。

債務更緊急係流動資金，出年四月前，意大利要償還二千億歐元債務、連同額外一千億票據，就已經用晒所有EFSF 剩底既資金。

金融時報計過，由而家到2015年，累積要還既錢更多達7500億歐元，目前唯一希望、就係要靠IMF同歐盟提供資金、再由歐央行作出擔保，意大利先至可以避過違約。

更重要既、亦係蒙蒂最大挑戰，係點樣應付國內一系列結構性問題。

意大利既競爭力、由九十年代中開始，比起德國就差唔多下降左五成，當地既逃稅問題亦非常嚴重，金額估計佔本地生產總值一成八。

作為經濟學家、高盛前顧問，蒙蒂出任歐盟期間，成功贏左微軟同通用電氣既反壟斷訴訟，西方媒體例如上周提到的經濟學人、以至金融時報及華爾街日報，均對蒙蒂有極高評價，似乎意大利到了他的手上，真的似有一線生機。

那意大利國內又如何看待? 有評論提出、蒙蒂雖然唔係由人民選舉出來，而係由歐盟、歐洲央行、基金組織甚至係金融市場委任出來。不過意大利人都明白，蒙蒂已經係目前唯一選擇，他們宣稱已經準備好接受更高增值稅、延遲「退休」、以及接受更多外來競爭。

真心希望，今次南歐人民可以看到、是危中有機，那世界末日可以還久一點。

一個都不能少?

2011-11-11T20:14:00.001+08:00

今周炒股真係要睇著一班政客來做人。

一時話希臘邊個邊個上台、就炒高幾百點。

到意大利先搞鬼，先傳貝盧斯科尼下台、股市可以先升幾百，到之後一日相同借口，居然又急插一千點，真係比啲政客玩死!

最新發展似乎係有穩定跡象，為免局勢失控、消息話「貝盧斯科尼」最終亦同意、支持由前歐盟競爭事務專員、意大利經濟學家「蒙蒂」領導過渡政府、預料佢會更嚴格執行削赤措施。

同時令市場緊張氣氛紓緩、係意大利拍賣５０億歐元十年國債反應。

雖然中標息率升至６點０８７厘，係９７年９月以嚟最高。不過債券拍賣反應比預期好、有近兩倍認購額。

認購反應唔錯、部分原因可能來自歐央行支持。

雖然佢地唔可以直接買入一級市場國債、但交易商話，見到歐洲央行再入市買入意大利同西班牙債券，令意大利十年債息由星期三最高嘅7厘半，回落到七厘樓下。

摩通統計過、近日歐央行買入歐洲國家同銀行發行既債券總額，多達九千七百億歐元，佔左總發行額一萬一千億歐元既八成八，同推行量化寬鬆無咩分別。

經濟學人今期就以貝盧斯科尼、在一眾意大利文藝復興人物中「姿姿整整」來做封面，文中猛力批評「貝盧斯科尼」係一手催毀歐元既人，只有佢盡快落台，意大利先有一絲希望。

對於新組成既過渡政府，經濟學人可能因為蒙蒂的經濟學家身分而極受落，認同以民間財富高達九萬億歐元，係國債接近五倍，加上當地無樓市泡沬同銀行危機，佢地相信由蒙蒂領導既政府、係有能力同決心處理問題。

經濟學人話，只有拯救意大利，先可以保得著歐元。

因此歐央行必須承擔責任，無限量購入歐元區國家發行既債券，而作為德國同法國元首、默克爾同薩爾科齊，亦應該表達支持整個歐元區既決心。

相同睇法都有末日博士魯賓尼話，佢話如果歐央行再唔出手，意大利脫離歐元區既日子、已經係「指日可待」。

不過話說回來，如果黃金戰士潘國光無錯，到歐央行真係印鈔之日，就是德國離開歐元之時，屆時希望不是另一個末日開始!

狼來了

2011-11-11T19:51:00.001+08:00

香港經濟體系細少，但一個季度經濟數據，到兩個月零十一日後，先至有公布。

相比祖國，新加坡，遲左最少三，四星期。係我地數據搜集太認真，抑或人地太快呢!!

第三季香港數字，最大驚喜唔係下調預測，而係第三季按季增長力保不失，令我地暫時避過連續兩季負增長技術衰退。

呢個都可以歸功特首兩日前「狼來了」，不過興奮過後、大家都係要回歸現實: 衰退今天不來明天來!

消費力撐，外圍唔得，第三季驚喜之處，係固定投資竟然雙位數增長。

勢估唔到，祖國固定投資推高經濟呢套，香港用得著。

第三季投資按年有百分之１０．２升幅。而受惠機械，設備等投資部份、錄得兩成六強勁升勢。好大程度上，係受基建工程上馬刺激。

如果剔除投資部份遠比預期高升幅，肯定第三季會係按季負增長。前景點，政府講左好多次: 外貿風險最大，消費增長未必維持。

但同幾次經濟調整期唔同，學者擔心係香港今次唔係衰退風險，而係滯脹。

財爺之前話，衰退風險取代通脹，未必岩。外圍需求的確放緩，亦相繼加入印鈔，同貨幣寬鬆。

最斃係製造唔到需求同時，但就令整體物價好難由高位大幅回落。你睇近期油價古古怪怪就知。

以往，香港經濟轉差，但成本下移，到一個均衡點，就會帶動番經濟活動，97金融風暴如是、沙士一樣係衰極反彈。

但如果今次情況估計無錯，就算經濟未衰到負七負八，但高成本因素可能拖慢實際復元期。

由於美國數字真係無預期咁差，大行衰退預警，暫時未夠響。但近日，已經有銀行界，監管者提出警告，歐洲抽資，或者歐資銀行減少信貸，殺傷力都係最大。

亞洲貨幣轉弱，人民值唔貶值，從穩定資金流角度睇，係岩!!但第時如果歐洲央行印埋錢，歐債問題以為解決，呢個局，只有更難拆!

亡靈

2011-11-10T19:00:00.002+08:00

繼續昨日匯豐的話題。

美國次按嘅惡夢，喺滙豐身上死灰復燃。

滙豐第三季，壞帳撥備大幅增加超過十億美元，當中來自北美嘅撥備，急升十倍，去到十八億美元。

原來，美國按揭借貸人，似著監管機構最近唔容許銀行，立亂向業主強制收樓，視之為Payment Holiday「還款假期」，斷供嘅情況越來越嚴重，拖欠比率喺九月分突然急升。

最新數據顯示，當地有六百四十萬個貸款人開始延期還款，佔左整個按揭市場比例一成二，情況可用急轉直下形容。

經過三年來重整美國業務，年初仲大刀闊斧，出售300億元信用卡業務，同賣斷195間紐約分行，滙豐北美嘅消費信貸規模，已經縮到得五百一十五億元。

不過一次過為北美組合做大額撇帳，就已經抵銷晒滙豐喺新興市場嘅業務增長，最接近匯豐的「消息來源」金融時報提出，未來五至六年美國呢個Ghost of the Past「亡靈」，會繼續困撓匯控。

記得上次FT 已經用Past Sin來形容歐智華上任面對的困局，今天回看、原來這個Past Sin 從來就沒有離開過。

大行亦唔睇好，瑞信指，正當市場以為美國撥備見頂，但匯豐大幅增加當地撥備，對市場相當負面。

最大淡友里昂更直指，滙豐由於核心業務轉差，一級資本水平下跌，已經唔再屬於資本水平相當充足既銀行。

美國既問題揮之不去、歐洲市場又啱啱起火，金融時報話而家睇番轉頭、行政總裁歐智華喺五月策略日公布既節流同裁員措施「有理」。

其賓作為匯豐「友好」，FT 的Lex 對歐智華已經是推祟備至，一開首已話大笨象雖然又重又慢，但對匯豐來說是祝福多過咀咒。

原因很簡單，最少他不會像其他投行一樣、不顧後果沖去次按/ 歐債市場。

至於日後就要視管理層能唔能借著今次危機，推行一次更撤底既改革。

當中有兩個指標特別值得投資者關注，一個是香港及亞洲的成本效益比率; 另一個是歐智華的炒房GBM、能否進佔成熟市場。

匯豐話，二零一三年會有新一頁。其實所謂新一頁，對佢地，對投資者，最好結局係將規模有咁細，縮到咁細。

歐智華自認師承浦偉士，佢最好選擇就係將匯豐時光倒流到九十年代初期模式，由頭玩過。

煥然一新

2011-11-09T23:45:00.000+08:00

今次滙豐業績、又妨如一批歐美銀行業績一樣、出現了糖衣毒藥。

表面風光，整體盈利賺五十二億二千萬美元，按年增長六成半。不過盈利上升、只係受惠債務重估公允值有四十一億美元特殊收益，核心稅前盈利係比舊年同期少左三成半，賺唔夠三十億美元。

市場怎樣解讀呢分業績都不消說，看看市場反應也知一、二。

不過有些現象還是值得拿出來說一說。

1. 先看北美，以為出售了信用卡業務後可以洗底再來，豈料穩定了兩個季度後、貸款減值撥備又比年中增加左十億美元，主要係來自北美撥備再次增加，令匯豐融資又出現了16億美元的虧損。
這證明了美國的復蘇仍然有很大局限、至少有部分地區的樓市仍然是向下。

2. GBM環球銀行及資本市場盈利倒退了53%，即是炒房難再發功。其實同樣情況亦出現在高盛身上，既然伯南克已經搞壞了眾多利率曲線，歐智華這位炒房老手亦要認輸，表明作為初級債券交易商，今天的利率期貨根本無利可圖。

3. 裁員。兩個月前喺本港公布、有史以來最大規模裁員三千人既計劃，歐智華話，經濟有向下風險，前景非常困難，集團第一季以來、整體員工數目已經減少左五千人，而本港最新既裁員行動亦已經展開。

現在業績已經說明了為何當日要失驚無神大規模裁員，問題是今天大象面對的困境，單單靠裁員就可以解決得了?

4, 總部。面對英國開始徵收銀行稅，增加開支25億美元，歐智華話，佢地有責任回應股東搬遷倫敦總部既要求，未來年半會作出決定。
想當日紀勤西向東移，到歐智華上台又決定總部留在倫敦、直至今天又猶豫不決，這個雙城記的故事恐怕仲有排發展。

5. 最令人費解還是歐洲情況。喺歐債危機下，滙豐歐洲業務稅前核心盈利錄得輕微虧損，主要由於投資銀行業務轉差，同撥備增加。
集團第三季，已將歐元區主權同國債風險承擔，由年中既８２億美元減少至５５億美元，期內為希臘國債撥備一億七千萬美元，其他國家國債就未有減值。
既然歐智華形容歐債危機可能比市場想象中嚴重，很容易「擦槍走火」，為何匯控選擇不增加撥備? 為何不像法巴德銀主動Haircut五六成?

總結: 歐智華說到2013年，大家就可以見到一個「煥然一新」的匯豐，問題是，你會選擇等這兩年嗎?

花市

2011-11-09T22:06:00.000+08:00

特首美國之行，唱好香港之餘，亦警告，經濟會短暫技術衰退，由於香港既開放，規模唔算大，所以經常要有養生之道。

香港人唔須特首擔心，因為賣點仍然夠靈活。所以有得投機，就會投機。

無得投機，就會回歸基本，馬死落地行嘛。

係人都知出年環境複雜，至於有幾差，當然無人知。亦分分鐘會遠比預期好。

衡量經濟前景指標，劉老師劉紹文一直留意維園年宵攤位競投反應。

的確係，舊年以為經濟好好，點知，維園年宵競投反應差，結果今年經濟原來只係一般。

零七年股市大升，但當年競投反應亦唔得，零八年果然有準確啟示。

今年維園年宵，頭炮結果，好好。最大熟食檔成交價五十一萬，破記錄。

但之後兩個檔位成交，就比舊年低。

濕貨表現亦一般，現場同事報稱，部份要收回。

依家要睇埋星期四乾貨檔反應。但點解年宵檔咁有指標性，對唔著，無人答到。

無解釋之中，唔可以忽視，係民間智慧，佢地無夾雜市場之間太多混亂信息，直覺判斷，可能比經濟師更準確。所以金融機構既唔可以睇低低收入存戶，反而要多聽佢地意見。

香港經濟仍然較易掌握，走入內地，要評估經濟好壞，困難無比。數據，如果信的話，通脹回落，零售，工業生產增長就只係輕微放緩。你話差，一定唔係!

中央台一年一年黃金廣告時段競投，亦有一定經濟啟示性，情況等同香港年宵。

但今年，競投價創記錄，部份時段每秒要七千七百萬。如果係咁，內地咪要加息!!

但另一邊，廠家話無訂單，內地原料價大跌，廣交會亦好唔得。

經濟前景是好是壞，後市係咪咁樂觀。彤叔咁將周大福上市，誠哥破天荒發布和黃季度業績，答案似乎俾左你!

死亡關口

2011-11-07T23:44:00.000+08:00

金融市場走勢，有時係無辦法解釋。

明明係有問題，會被淡化為無問題。而明明係小問題，又會化大為大事件。

希臘之後、火頭又燒到返去意大利。

貝盧斯科尼喺上星期參與二十國集團峰會後，立刻回國安撫執政聯盟內嘅反對聲音，游說佢地繼續支持。

傳聞七十多歲的貝盧斯科尼、原來計劃出番套情歌集，一於大唱Love song 冧選民，不過國事當前，兒女私情暫時只好放到一邊。

市場關注，貝盧斯科尼係咪會下台，意大利十年期債息升至六厘六記錄新高。

路透社嘅調查顯示、一旦貝盧斯科尼落台、意大利同德國十年期國債嘅息差，即係足足值近一百億歐元!

作為歐元區第三大經濟體、國債總額高達16萬億歐元，明年要還債超過三千億歐元，市場已經關注如果意大利債息突破到七厘既「死亡關口」，肯定分分鐘步希臘愛爾蘭後塵。

即係「大到不能倒、亦大到不能救」!

面對意大利政府落實削赤措施，國際貨幣基金組織喺二十國集團峰會上，曾經要求意大利向佢地借款500億歐元，換取進一步監管意大利政府嘅落實削赤措施。

但建議被貝盧斯科尼拒絕，佢只係願意接受基金組織、監察意大利嘅財政改革進度。

成為Ｇ８第一個要ＩＭＦ監察既國家，意大利早已顏面無存!

不過好一個「貝盧斯科尼」、一回來又施展三吋不爛之舌，四處遊說判徒黨員重新支持政府!
所以唔敢批死佢唔得、只是大家心中明白，根本問絲毫沒有改善過!

匯豐艾爾敦，兩個幾月嚟再次更新個人網誌，就話無論歐洲，美州，以至中東根本問題重重。
佢老人家講左一句最直接，就係美國依家安穩活在歐洲混亂之中(The USA is taking some comfort from the European mess to deflect from its own less than stellar performance)。

只要歐洲繼續亂，美國問題就唔會有人理。美金，美債，美股就可以繼續升。

所以，美國經常以歐洲問題愈煲愈大，大到七七八八，就會扮幫手，希望做下好人，咁就唔會燒到自己個疊。

提起歐洲，火頭當然係銀行，講銀行實力，歐美其實不相伯仲。但華爾街日報一篇報道，睇完你可能盡沽歐洲銀行股，轉為買美資行都唔定。

報道引述瑞信一份研究報告，再無限放大。話歐洲銀行歐洲主權債風險以外，另一個火頭更大件事，就係歐洲銀行持有相關結構性貸務資產。

話條數加埋超過三千八百幾億歐元，多過曬銀行手持希臘、西班牙、意大利主權債加埋總和。
報道話，歐洲銀行包括匯豐在內，海嘯後對手持結構貸務資產，點處理並唔積極。所以正當美銀，摩通，花旗呢三年內，大手減持結構性貸務工具超過八成之際，歐洲銀行只係象徵性減少。

所以，一旦市況繼續轉差，歐洲銀行潛在破壞力會遠比預期大。

歐洲銀行唔得，無人反對。但美國金融機構又安全咩，亦唔見得? 淨係明富，已經否定答案。

美國數據，暫時未進入衰退，但十一二三削減開支大限傾唔成，評級可能再出手下調，經濟可能出年會低迷，連美國傳媒亦認，下一輪總會燒番到美國。

但美國實力不容忽視。玩完歐洲，佢地就可以加馬唱內地，今日大鑼大鼓吹內地鬆銀根，他日亦分分鐘可以發動中國硬著陸攻勢!

超級瑪利奧

2011-11-05T01:06:00.002+08:00

公認係傳統鷹派，上場第三日，德拉吉第一個公開動作、係減息。

歐洲央行成員一致通過，指標利率減四分一厘，落到１點２５厘，係０９年５月以嚟首次減息。

經濟學家表揚係「果斷」、「領先形勢」，更令市場意外、今次減息決定係一致性，包括德國央行行長同委員「史塔克」都無反對減息、反映鴿派勢力抬頭。

雖然目前歐元區通脹率係三年新高，不過德拉吉話，出年就回落到低過百分之二，睇唔到有通縮風險。

利率期貨顯示、十二月歐央行會繼續減息，即係一次過推翻前任行長特里謝既加息決定。

更爭議性問題係歐央行會唔會學聯儲局、開動印鈔機做QE?

歐央行已經累積動用左一千七百億歐元、買入有財政問題既歐債，其中為左救區內第三大經濟體系，八月以來就買左七百億歐元既意大利二手國債，佔發行量達百分之六。

如果不是有歐央行出手，恐怕意大利債息早就不止六厘水平，與目前希臘的兩年債息一百厘肯定有得「揮」!

作為前任意大利央行行長、德拉吉並無避嫌，佢話就算歐洲穩定金融機制成立後，都唔等於歐央行唔可以繼續買債，但重申有關措施只係過渡安排。

此話應理解為德拉吉係為自己保持「彈性」，彭博更形容佢似伯南克多過特里謝。

華爾街日報就話，德拉吉既行動已經證明前任特里謝係加錯息，但今次U-TURN 轉軚、並唔能夠一次過解決晒所有問題。

德拉克馬

2011-11-03T20:33:00.000+08:00

有陣時、一個人真係要被迫埋牆腳，先會認真諗到底可以有咩選擇!

我地呢度都講左幾日，今次希臘帕潘德利歐搞公投玩嘢，德法就應該醒覺，認清楚呢個國家既真面目，本質就係無得救!

所以消息話，德國總理「默克爾」同法國總統薩爾科齊、喺帕潘德利歐會面過程中，係全力向佢施壓，問既問題只有兩個:
一、到底你想唔想留底?
二、你搞公投就一個「仙」都唔會比你!

華爾街日報話，歐盟向希臘發左最後通牒、歐盟領袖已經對希臘無晒耐性，要希臘盡決作出抉擇。

消息令希臘兩年期債息、第一次突破一百厘水平!!! 係107%

而事件繼續有戲劑性發展，帕潘德利歐本來諗著借公投取得更多政治籌碼，不過佢呢個動作引起左希臘執政黨內部不滿，有議員更要求總理帕潘德里歐辭職。

軍方背景出身既財長「維尼澤絡斯」，已經擺明同帕潘德利歐反面，公開反對公投，話除非希臘將所有未能解決嘅問題、都交畀國民決定。

希臘公投嘅決定、事前無通知其他成員國、惹嚟批評。

除咗鬧，亦開始為希臘退出歐元區做準備。歐元集團主席「容克」話，要確保其他成員國，避受希臘退出嘅影響。佢強調唔想希臘退出，但唔可以不惜代價。

希臘嘅經濟規模，只係佔整個歐元區嘅百分之２，債務亦只係佔百分之４，就算最終退出，影響都唔大。

為左解決債務問題，希臘已經多番削減公共開支同加稅，令民怨愈來愈大，示威、罷工無日無之。

希臘民眾認為，與其無了期受制歐盟、歐元，不如直接退出歐元區，那不是要用返舊貨幣「德拉克馬」DRACHMA? 至少民仲可以攞返自主權。

但呢個做法，會帶來沉重代價，首先就係希臘５千億美元債務會違約，本土銀行好大機會擠提，貨幣會貶值多達一半，通脹大幅上升，銀行好可能面對擠提。

民生大受打擊之餘，未來要重返國際信貸市場，條路會好漫長同痛苦。

但德拉克馬嘅支持者，用阿根庭做例子，指阿根廷０２年因為負債破產，貨幣雖然大幅貶值，不過出口大增，經濟得以復蘇，認為用返舊貨幣，都會有同樣效果，好過係咁減薪同裁員。

而且過去兩年大幅削減開支之下，唔計債息，預算赤字已經幾乎填補哂，下年預算盈餘，佔GDP 百分之一點五，有權停止還債。

經濟學家指，自從希臘十年前用左歐元之後，國家競爭力跌左三成。

不過，根據希臘傳媒調查，有超過六成受訪者，反對用返舊貨幣，而且希臘本身出口就疲弱，加埋人民懶慣嘆慣，即使想學阿根庭，都未必有足夠嘅技術同資金。

忿怒鴿

2011-11-03T20:08:00.000+08:00

華爾街日報形容係為ＱＥ３打開大門，不過伯南克未行埋呢一步。

聯儲局無即時宣布QE3，可能令好多人失望，但作為最後彈藥，呢發子彈一定要係有把握，兼最危急，先至出招，應都非常合理。

聯儲局手頭仲有三發子彈可出。順次序: 1. 買按揭債券MBS; 2. 跟手用貨幣政策直接同失業，通脹指標掛勾; 最後先係QE。

所以，他日一有QE，呢個可能會係「無限」QE。

亦所以，市場無需失望。要失望，應該再次對伯南克能力懷疑。

兆富講得岩，伯南克能夠當上聯儲局主席，已經係仕途頂峰。不幸，佢在聯儲局日子真係可能倒數階段，如果共和黨明年贏出總統大選，伯南克可以執定紙皮箱!

伯南克係技術型學者，經濟學界中，唔算大師級。如果睇佢經濟預測功力，更屬於一般級數。佢根本唔知經濟前景點。所以聯儲局今年嚟，幾季都向下修訂預測。

聯儲局聲明，無論對第三季經濟增長，家庭開支，到嚟緊經濟表現，都比上次樂觀。但佢最後又有注腳，話經濟嚟緊有重大下行風險。

唯一可以解釋，係佢要兩手準備，但單睇分聲明，市場已經足夠精神分裂!

主席無QE，令四年嚟首次有鴒派投反對票。今次兵變係芝加哥聯儲銀行行長，佢代表包括麥歇根，依利諾依等五大城市，正正係工業重鎮，失業率全國數一數二。

埃文斯反對，不難理解。但伯南克係咪可以再貨幣政策推高就業，好有疑問。

無可否認，佢係菲納普曲線Phillip Curve信徙，即係相信通脹，同就業水平係正比。

伯南克為菲納普曲線，就將目前美國所有利率曲線，通通搞跨!!

菲納普曲線，六十年代，甘迺迪期間證明有用。但早由七十年代全球滯脹期間已經證明失效。菲納普曲線過份著重通脹預期，但當成本勁升，同時需求長期疲弱之下，會進一步影響生產。

曲線行唔通，但伯南克執迷不悟，因為一條曲線，將所有曲線全部壓平，相信歷史最終會予伯南克應有評價。難怪共和黨人講明一旦當選、對佢絕不手軟!

公投

2011-11-01T20:30:00.003+08:00

呢幾日既股市表現、令我對一個人，更家徹式佩服!

量子基金既索羅斯。上星期歐債危機叫做有初步曙光，佢已經喺周末大唱反調、話今次拯救方案耐者三個月，快者一日就會失敗!

結果真係得五日、只係五日貨仔，歐債危機又由一線曙光、變成水深火熱!

正當各國以為希臘債務危機，會因為歐盟同意出手挽救而稍為喘定嘅時候，希臘總理帕潘德里歐突然宣布，係咪接受歐盟方案，要交由選民用「公投」決定。

佢冇交待「全民公決」嘅確實日期，而財長就預料，公投會喺明年初舉行。

反對黨隨即批評帕潘德里歐推卸責任，美其名俾人民選擇，但其實只係政府唔想再做艱難決定、得罪選民，於是搵公投做「借口」，任由民眾根據個人「好惡」決定國家未來、置國家於險境。

民意調查顯示，有近六成希臘人都唔睇好新方案、擔心歐盟會要求希臘實施更嚴格嘅緊縮政策；唔少人都話寧願忍受像冰島「債務違約」引嚟嘅短期動盪，都唔想無了期咁「勒緊褲頭」。

如果方案真係被否決，希臘除咗要立即宣布破產，亦難以再留喺歐元區。

結果希臘公投加深違約風險，加上環球採購經理指數唔理想，令法德股市大跌百分之四，持有歐債多既法興法巴同法農更跌超過一成，而要求公投既希臘、股市更跌百分之六。

咁到底帕潘德里歐、係咩葫蘆賣咩藥?

上星期先叫做喺歐盟峰會千辛萬苦傾到一個拯救方案，突然又失驚無神話要搞公投，將歐盟達成協議嘅拯救方案，交由人民表決!

要了解背景，呢個總理擺明唔會連任，佢揀呢個時候開聲，就要喺星期四康城召開Ｇ２０峰會前、向歐盟、特別係德國總理默克爾施壓，擺出一副「一拍兩散」既求死態度，目標就係要德國盡量放寬拯救既條款。

反對黨就批評「帕潘德里歐」用一場賭博，決定國家未來，公開反對公投、要求即時舉行大選!

Pimco既「埃爾阿利安」都話，今次希臘一旦舉行公投，有機會令歐盟既拯救方案失敗。

不過計我地話，今次公投事件可能先係歐債危機真正拐點，因為大家發現希臘本質根本係無得救，可能咁樣反而堅定左默克爾踢希臘出歐元區既決心!

頭馬

2011-11-01T20:29:00.003+08:00

到今日為止，通脹派同衰退派都未知輸贏，但澳洲決定先博一鋪。

澳洲減息係預期之內，但唔係全數預期。作為第一個G7發達國減息，海嘯後又率先加息，作為全球最出色央行行長史蒂文斯行動，有啟示性。

配合減息，澳洲議息聲明，將上個月講既全部調轉寫一次。之前有保留既，變為睇差。之前睇好既，轉為審慎。澳洲有評論話，未足以要減息，但關鍵係樓市。

澳洲依家最驚係樓市有事，因為借貸佔每人平均收入超出一倍半，主要就靠間屋撐重組債務，所以減息之後，澳洲總理吉拉德即時呼籲，銀行最好跟足央行減按揭利率。

先有印尼，巴西，土耳其。澳洲墨爾本盃今日先來減息，貸款人開心過拉頭馬!

分析亦相信，有澳洲跑最前，全球可能短暫出現集體貨幣政策寬鬆期。

好明顯，區內火車頭動力不再。南韓數字唔好，台灣採購經理指數三十三個月嚟最低。有分析相信，呢兩個市場利率有機會郁。

反而印度未睇得通，事關通脹仲係高，但PMI十月無跌。

的確，無論澳洲，印尼，巴西，通脹未係落到好令人舒服程度，貨幣政策已經賭單邊，就係買嚟緊經濟會差。

中國會點，大家無謂估，因為從來都多數係有憧憬、無估中。

要留意係，今次賭邊，可能比零八年更危險。話曬，當日未印錢，依家美國印左兩次半，日本亦印左好多次。

大量流動性情況下，再減息，變相再製造流動性。央行嚟緊好大機會，會出現彈弓手情況- 減完又加，加完又減。

市場成日話驚內地，驚歐洲。但香港本身更令人擔心，因為，無論經濟賭中邊「邊」，我地都無貨幣政策用到。正如匯豐講，租金、同勞動力兩大結構性問題。通脹仲會升溫。

所以，曾俊華其實俾人打左一把。因為佢太早講，明年關注重點係經濟回落，而唔再係通脹。可能佢並唔識咩叫滯脹!!

十月股災原來是傳統謬誤？

2011-11-01T00:01:00.001+08:00

十月尾嘅大升市，令全球股市由今年低位顯著反彈，普遍錄得一成升幅，美股更加有望錄得三十七年以嚟最大單月升市，同「股災十月」嘅傳統諗法相違背。
專家話，按歷史數據睇，全球股市年底前仲有得升。

借東風

2011-10-27T23:38:00.003+08:00

不認須認，股市的確繼續升，擺明市場原來已經認定嚟緊歐洲終極峰會，會有利好結果!!

歐盟峰會結束，同意希臘債權人削債50%，銀行亦要用半年時間增加資本。關鍵的歐洲救市基金原則上同意透過槓杆借貸將規模擴大。

長達近11小時的峰會，歐盟領導人都滿意結果。但他們在歐債三大核心問題中只解決其中兩個，即希臘債券持有人削債50%；以及歐洲銀行界明年六月底前，要集資1060億歐元，令核心資本比率升至9%，最終妥協。

而資金來源關鍵將在救市基金，當局希望透過槓杆化，透過成立特殊公司發債，將基金由現時4400億歐元，擴大至最少1萬億歐元，但仍未具體定案。

今次峰會，歐盟在最後一刻才能取得進展。其中最大阻力為希臘債券持有人，他們原本堅持只肯削債40%，直至德法元首親自施壓才肯接受，但50%削債額，比基金組織內部建議的65%少；至於銀行集資額方面，1060億歐元金額，同樣比外界估計的少很多。

當然仲要歸功懂得看風使履的法國總統薩爾科齊，再使出一招「借東風」，同胡主席傾過電話會議，中方都未有作出任何承諾，就已經主動放風話中國支持EFSF，再次證明係矮人多計。
不過留心一看、其實債息升勢，其實無停過。但投資者係咪已經轉為樂觀，就睇下你問咩人。

散戶仲有保留，大戶據講，長線基金之前未沽過貨。短線基金，就的確因為近期美國情況，要搵的受惠美國經濟股份。
無疑，大家認定美國經濟差。但數據反映出兩回事，更利好，係企業盈利繼續爆燈。所以呢一刻為止，睇淡美國，要繼續寫個服字。
標普五百指數，十月升幅達一成二，暫時係1987年嚟最好，完全抵銷晒今年以來跌幅。

美國仍然處於牛區。第三季，美國已公布企業，百分之七十五係好過預期，所以暫時間，美國利好抵消歐洲利淡。
但有人提醒，企盈利係滯後。第三季盈利勝預期，亦同之前分析員調低左預測有關。要留意係，第三季業績好，但分析員反而將大部份企業盈利預測調低。

而按比例，已公布業績三十間美國企業入面，有廿間對前景睇淡。
美股好，港股亦有跟足趨勢，仲一舉由萬六邊反彈至萬九點樓上，但不可少看的是基金部署。
無錯，短期大市的確可以炒多一轉，正常謂睇淡不等於要做淡，不過基金會唔會增持買貨，背後涉及佢地到底多唔多貨。

如果睇一的數據，有賴之前對大中華市場過份憧憬，基金對中港股市，就算依家都係處於偏高既增持水平。到底嚟緊會唔會有減、無增？

適時微調

2011-10-27T00:15:00.001+08:00

溫總一句「適時微調」，又引起中港無限憧憬，其中又以香港股民最自製興奮。

坦白講，這句適時微調早已是市場期待已久、但又不知幾時會出現的甘露。那為何目前才是合適時機?

要數水深火熱，大家可能會想之前的溫州民企倒閉潮、又或民間借貸飊升至過百厘，不就是反映信貸已經緊缩至極點? 那為何中南海不選擇那時出手，反而等到現在?

對北京來說，其實股市下跌並非甚麼重要事情，因為買股票的人被當作是輸得起; 同樣、被樓市套著的置業人士，雖然有很多不滿發展商減價賣貨尾而上街，但基本上也不威脅到中央; 溫州老板因為付不起高利貸要跳樓要破產要走佬，始終也只是一小部分人的生計，傷不及平民白姓。

真正令中央著意回心轉軚，其實不應留意經濟或政治版，而是應將視線放到社會版上: 當民眾的埋怨由物價轉到下崗就業等問題時，就知道政策風向真的變了。

話說回來，大行近日都已經轉軚唱內地會減RRR，不過真正值得大家關心、反而係內地會否仿效印度，讓銀行利率自由化，唯有如此，銀行先可以通過向大額存戶實施利率差別化，真正可以解決負利率的問題。

與市為敵

2011-10-26T01:23:00.000+08:00

沒有收看今早開市埋位，肯定就錯過了法巴鄺樂天的精采推介。

不錯，我們經常聽到不少唱淡分析，例如歐債危機深不見底、又或是美國經濟如何雙底衰退，以及內地硬著陸風險等等，不過股市近日反應已經清楚說明，就算睇淡也有反彈的時候，正如兆富所言，作為一個市場主義者，就只好純粹信任市場行為。

歐洲的救市基金槓杆化似乎已有共識，即使在德國國內，就算不滿意默克爾的反對派，骨子裡其實也是支持援助希臘等多個歐豬國家。即使默克爾如何擺姿態以搏取國內民眾支持，槓杆化肯定最終都會成事。至於法國雖然不想要再出資而影響本身評級，但事而至此、似乎薩爾科齊也沒有太多選擇。

既然股市不死，我們也沒有理由要與市為敵，要做淡也要看準時機，總不能一部通書看到老。而作為小投資者，實在有必要在亂世(市?)之中、尋求一個較安全的容身之所。

像鄺樂天所言，因伯老之名，如今不單小投資者難尋避風港，就算強如保險資金

，由於失去了孳息曲線，今時今日投資債券根本難以尋求利差，但資金終需有個出路，不論分紅或應付賠付在在要錢，那何去何從較好?

其實大戶一樣是要避險，倒要尋找穩定回報的工具，既然債券已失去了投資價值，退而求其次會是一些有穩定現金流、有持續派送股息紀錄、以及市盈率偏低的高息股。

試想，一旦那些過萬億美元資金真正轉勢，那股力量將勢不可擋，這令我想起數個月前石Sir已不斷推介中移動，這可能解釋了這隻巨無霸的近日強勢。

佔據「畢打街」？

2011-10-14T20:32:00.002+08:00

華爾街只得一條，紐約以外，其餘都係假。但佔據華爾街行動，就似乎蔓延全球。

彭博報道，透過網絡推動，全球，包括倫敦，澳洲多個城市，台北，南韓，日本，甚至香港，新加坡，都陸續有人表達，會自發組織類似佔據華爾街行動。

倫敦暫時話會有四千人參與，澳洲已經分成為佔據悉尼，佔據墨爾本，佔據布里斯班等行動。

突然間，諗起魯賓尼，佢預測經濟雖然一次中，多次錯，自己研究所仲要蝕讓，但佢幾個月前已經預言，世界將會混亂。

佔據華爾街行動，原因係經濟差，市場失效，但造就金融機構貪婪。民眾發洩對象所剩無幾，終於要淪到金融大鱷。

美國媒體一直低調報道呢件事。CNN女主播，因為訪問示威人士期間帶有貶意，爭的要停SHOW。但半島電視台，幾乎每日有直播。如果從媒體處理手法，美國由始至終都係親華爾街。

金融機構成為全球普羅百姓頭號敵人。佢地有錯，錯在大貪。但政府，財金官員更錯，因為到依家為止，從政者都係買佢地怕，驚一旦金融機構出事，整個經濟會被拖累。

所以沃爾克，避免大至不能倒閉係岩。問題係做唔做到?

資本主義的確進入十字路口，市場派步入下風，因為呢幾年不斷證明市場功能有問題。但亦唔等於政府主導既凱恩斯主義會大獲全勝。

克魯明近日專欄，高調支持佔據運動之餘，仲列出凱恩斯主義有用既四大原因，其實都係舊調重彈。

更大問題係，佢根本唔記得，歐美已經無錢，又點有彈藥幫凱恩斯發揚光大。

我地成日講市場主導自由經濟，又批評海嘯後市場失效。但記著，呢個世界無絕對自由市場呢回事，街市要守規舉，市場亦有規則。鬧自由市場之前，其實要先鬧之前規則定得唔好!

說真，香港人即使仇富，對象也不會是大銀行，因為最有錢的、並非銀行家，反而有人如果提出反地產霸權，又或包圍長江中心，可能引起的共鳴會更大。

躲得去邊？

2011-10-14T20:31:00.002+08:00

今期經濟學人封面係「Nowhere to Hide」，中文應簡單翻譯: 普天之下無樂土?

環球經濟前景轉差，以往認為係高增長既新興市場、都備受壓力。

今日華爾街日報都不約而同有文章，形容新興市場一樣感受到西方成熟市場之痛!

巴西零售數據大跌、南非製造訂單急跌，連內地出口是七個月以來最差，有不少廠家就說：「今年西方無聖誕！」原因是急單全部不見了！

且看呢兩個星期先後有巴西同印尼央行減息，而南韓同澳洲都維持利率不變，最新有新加坡都加入寬鬆行列!

新加坡金管局公布收窄坡元上下限政策操控波幅，減慢坡元升值步伐，變相採取寬鬆貨幣政策。係繼印尼之後，今個星期內，區內第二個市場調整貨幣政策。

面對第二季經濟按季大幅倒退百分之六點三，第三季亦只有輕微增長，遠比市場預期差，新加坡金融管理局隨即出手，

調低坡元既上下限波幅，當局表示，由於成熟經濟體系面臨調整壓力，威脅到新加坡主要貿易夥伴增長前景轉弱，加上預期核心通脹有放緩跡象。

新加坡元一向係透過同一籃子貨幣掛勾，但從來未有向外披露組合比例，亦沒有如內地人民幣一樣、有向外公布升跌幅度限制，一切可以說相當神秘!

今次調整上下限波幅，等如變相放慢升值步伐。

面對歐洲債務危機同美國經濟放緩，唔少新興市場經濟備受沖擊，最近先後有巴西同印尼央行減息，而南韓、馬來西亞以及澳洲央行亦都暫停加息步伐。

經濟學人話，面對全球風險升溫、根本無一個市場可以逃過第二次衰退，國際貨幣基金組織亦都警告，新興市場係面臨向下調整風險。

其實都幾諷刺，幾個月前新興市場仲係擔心資產泡沬同貨幣升值呢啲過熱問題，轉頭已經話擔心資本外流同貨幣眨值，有大行就計過，單是最近幾個星期，新興市場為左阻止本國貨幣下跌，已經秏資３５０億美元既外匯儲備。

所謂長貧難顧，難怪基金組織都警告，新興市場經濟，正面臨向下調整風險。

師奶上身

2011-10-13T20:33:00.000+08:00

中國經濟放緩成點，從來唔會有人知。面對一大堆、令人半信半疑數據，有時只有用雞蛋裡挑骨頭方法。

最新九月份出口數字，似乎係近期較老實數據。出口增幅放緩，市場預左。而從出口到主要地區表現睇，某程度上有一定可信力。

九月出口數字，顯示兩件事:一，係香港無運行，二係歐洲肯定衰退。香港出口靠轉口，睇番九月內地出口到本港總額，由八月增長一成六，或一至七月平均三成增長，篤一聲，大幅回落到只有百分之七。

至於內地出口到歐洲總額，亦全線下跌。意大利更錄得負數，法國增長只有百分之一。德國由八月兩成一增長，大降至唔夠百分之七。反而美國經濟仲未算太差。

出口增長嚟緊仲會放緩，呢個係市場共識。要歸納內地經濟表現，要睇埋入口。九月，內地進口仍然有近兩成一增長。但有趣現象，隨即搵到!

出口訂單差，無人懷疑，但內地同時間對原材料需求，不跌反升。亦因為咁，進口數字唔算放緩太大。所謂不跌反升，其實已經講得保守。如果睇鐵礦石進口增長，再升百分之二點五，九月進口量竟然係今年一月嚟最高。

如果睇埋銅，更加驚人。九月內地銅進口量升一成二，不得了，十六個月嚟最多。單睇兩組內地進口數字，難道我地諗多左? 事關內地根本經濟無放緩，反而有加快跡象，否則原材料進口需求，唔會升咁多。

但留意兩個報道，又會發現，可能係兩回事。首先，近期乾散貨運費持續升，有機會升至全年高位，原來據業界話，中國的確入口大批鐵礦石，不過咁佢地買嚟儲為主，部份行家亦唔知中方買家，係咪有實際需求。

「儲」鐵礦石之外，內地亦鐘意儲銅。金融時報提過，單係截至舊年年底，內地銅儲量，竟然高達一百九十萬噸，數字高過美國一年需求，亦比行內人士估計既多。

舊年內地工業同出口相當唔錯，固定投資平均每月最少升兩成半，但銅儲量咁好景之下，數字遠比預期多。即時令外界議論紛紛，到底中國係咪一直被高估左產能，同實際需求?

中國入口原材料，到底幾多，有即時用途，無人知。但肯定係，國企好，民企好，都有種師奶習慣，就係儲野。原因好簡單，中國無資源，一直覺得唔安全，所以有錢就買嚟儲，就算無用
途都買，總之買番嚟擺都係好。

所以，銅價之前破萬蚊一噸，可能係中國儲嘢習慣造成。而近幾個月，國際商品價格下跌，中國進口商又再次師奶買平貨上身，瘋狂掃貨。如果估計無錯，未來幾個月，內地可能出現出口差，進口旺情況。

翻生

2011-10-12T20:20:00.000+08:00

人之將至，特首打倒昨日的我。舊年力拒，今年還迎。

於是，居屋翻生，加埋繼續有公屋，同置安心。情況等於十年前，居屋，公屋，夾屋樣樣齊!

特首份施政報告極長，用上兩個鐘宣讀。骨子裡，根本係一份樓市政策報告，因為篇幅最多，亦行喺最頭。

希望當係，不滿佢既市民，見到居屋兩個字，就怒氣全消。

特首話，樓價升，脫離購買力，政府需要介入。依家先做，一般覺得太遲。以特首講，第時四，五百呎單位，要百五至二百萬，呎價唔算太平，而且售價按申請人入息計，太複雜，太不可行。

政府從來無可能滿足所有人訴求。全新政策下，月入四萬或以下家庭夠資格受政府資助，有人批評門檻太高。

土地傾斜做住宅，又會有人批評再造成另類土地政策問題，遲下寫字樓租金繼續急升，影響競爭力。

其實復建居屋大家早有心理準備，反而令人意外係無諗過出手咁闊綽，因為五年禁售期後、賣樓唔駛再按市價補地價，等同可以享受樓市升值!

有分析員批評，咁係以大量公帑傾斜用嚟資助人買樓，形容就好似「中六合彩」。

假設家庭收入三萬蚊樓下、就夠資格做新居屋業主，預買二百萬樓下嘅樓，政府實際補貼咗幾多呢﹖

睇番將會有新居屋嘅沙田，而家一般細單位市值三百幾萬，咁計法、政府每個居屋就補貼咗至少百五萬，

樓價平啲嘅元朗同荃灣、都起碼補貼幾十萬。

如果將來樓價升，佢哋都唔駛按未來市值補地價，可以受惠樓價上升，有分析員批評，復建居屋、係將公帑傾斜資助少數人買樓。

不過更令人關注係而家近三十萬未補價既居屋居民，咁佢地既居屋係點處理，係咪可以好似新居屋咁，補地價可以鎖定喺買入時水平?

政府就留左條尾巴，話要顧及現有居屋既公平性，但到底界線點定，如果真係用二、三十年前買入價，好多居屋業主一覺瞓醒就會成為百萬富翁!

何況對於已補地價的業主又點處理? 估計為免更多人眼紅，頂多只會係劃條界線，一切由當日開始計數!

其實睇成分特首報告、一開始，提出一個政府本應有既三大目標，就係令市民分享繁榮成果，改善生活，同埋安居樂業。

無錯，佢任內經濟出奇地好，但同期貧窮人數，出奇地升得多。

因為樓市爆破，政府退出市場，徹底將主導權俾發展商，自於二零零二年，曾先生可以巧妙將隻鑊送俾董生。

但貧富懸殊惡化，作為政府佢某程度上責無旁貸。

佢自稱政治家，自有政治家技巧。所以一早封死後路，話香港資本主義，好難解決貧富懸殊，又對社會對政府介入再分配要求既聲音增加，話有疑問。

講真，即係話俾人聽，除左居屋復建之外，我技窮至此。

施政報告，唔係樓市政策報告。而係為市民需要制定施政藍圖。

市民需要，唔係一層樓咁簡單，況且弱勢社群，根本唔敢諗個樓市。有人俾施政報告九十分，但將問題放遠，肯定施政報告唔值咁多。

大市場，小政府係曾特首創立既口號，零六年率先激死佛利民。佢認為，市場同企業家要先行一步，已經係錯誤假設。又講到，香港有三個A評級，股市集資全球排第一。

既然話自己係政治家，呢的功，就無謂邀!

激素

2011-10-11T20:32:00.002+08:00

內地用過四萬億激素，催谷經濟，依家證明唔係一枝營養大補針就收效，激素副作用之大，今日各方仲嘗緊苦果!

但壞習慣難改，阿爺終於忍唔著，打左枝「匯金」激素。

零八年以嚟，今次已經係第三次出動匯金激素，但對內地股市效用，三次之中最細。

內地股民羊群效應比任何一個市場為大，點解匯金激素今次無力呢?

現實係同胞買股，從來只睇概念，唔理估值，同佢地講市盈率、帳面值，你問下一批分析員，肯定無人會理你。

中央行錯一步，係唔夠針對性。要收激素效應，好應該用匯金買中小板股份。

一嚟，內地蟹民有機會走貨，二嚟可以收到曲線救中小企之效。

不可否認，阿爺谷經濟有一手，但控經濟水平仲有距離。正如美林所講，幾次因為結構問題造成調整市，當局都係靠印花稅、停批新股、甚至發人民日報社論呢的小動作應對。

中國經濟唔會大爆，至少短期內唔會出現。但匯金激素一出，太多負面分析同揣測。瑞信陶冬講得岩，中國今時唔同往日，依家受太多結構問題拖累，好似中小企，地方債，以及泡沬等。

外國傳媒對今次匯金增持內銀，抱有懷疑態度。

連華爾街日報，亦趁今次匯金增持，以長篇文章質疑中央係刻意托市，因為外國投資者，已經開始對內地既企業盈利、甚至經濟數據既真確性，抱有懷疑態度，而唔少資金開始減持拋售點心債同人民幣遠期合約。

投資者開始唔相信政府公佈既統計數據、唔信公司公布既盈利、甚至唔信政府官員既評論。
唔信歸唔信，同歐美既債務及經濟放緩問題比較、內地唔代表無能力拆彈。

兩個當前最大隱憂，包括出口放緩同樓市泡沬，計一計數，出口佔既經濟增長既比例，已經由零七年既35%，降至兩成七，瑞銀就計過，出口放緩最多只會影響GDP一個百分點。

樓市、特別係房地產業既固定資產投資，舊年佔左本地生產總值一成四，雖然黃金周「不黃金」、但人口流動同工資增長，仍然被認為足以支持樓市。

至於超過十萬億人民幣既地方債，雖然有機會增加銀行壞帳，不過以上半年整體不良貸款比率唔夠百分之一，內銀似乎仍然有能力吸收。

何況以內地公共財赤佔GDP比重只有六至八成，同美國既九成四、或者日本既百分之二百二十，仍然有好大距離。

當然，外國有懷疑，唔係唔合理，嚟緊，會有好多高層會議，分析經濟形勢。

講真最直接最簡單方法，係中央根本咩都唔使做，只要拿出誠意，講出事實真相，兼有數據支持，一直存在既信任問題，先有望改善!

托市

2011-10-10T20:29:00.003+08:00

江澤民復出，連股市都翻生?

難怪令人有此聯想，內地股市經過黃金周長假後、表現都係令人失望，收市兩年半低位，成交都係３３個月以來最少！

不過內地收市後，就有個驚天消息發布，就係中央決定出手托市！

中央匯金公司高調表態、話由即日起，增持工農中建四行股分，其中工農已經率先用左億幾人民幣增持。

消息一出，內銀股Ｈ股價，尾市由低位急速反彈。

眼見內地銀行股價長期積低迷，中央喺國慶假期後終於出手，穩定股市。

新華社報道，作為內銀最大股東中央匯金公司，為左支持國有重點金融機構嘅穩健經營同發
展，穩定國有商業銀行股價，

匯金會在二級市場自主購入工、農、中、建四行股票，並由即日起開始有關市場操作。

其中，單計增持工行就用左五千幾萬人民幣，用既錢雖然唔多，但就佔左全日成交嘅三成八，可以話買起左全日四成既貨，入市決心可想而知!

之前其實匯金都試過增持，不過今次有兩點唔同，一來消息係經新華社發放，第二就係開宗名義提出，增持係為咗穩定股票市場！

分析指，中央匯金高姿態增持隱含咗政策導向，目的係要表明，唔容許股市再跌落去。

08年9月中，金融危機爆發後、中央匯金亦曾經高調公布增持內銀，單係工行同建行，就分別增持咗二億幾同一億幾股。

消息一出，上證指數股市單日反彈百分之九點五，所有股分幾乎都升停板。之後內地股市逐步攀升至零九年嘅三千四百點水平。

不過，今次匯金出手托市，似乎股民唔多受落! 新浪網做嘅調查顯示，仍然有超過六成網民認為股市仲未見底，超過四成受網民話，唔會跟匯金入市買股票著。

內地透過匯金買內銀股，變相托市後，市場下一步係關注貨幣政策有無機會放寬?

似乎答案係未! 人行依家到年底，好大機會處於貨幣政策觀察期，利率同存款準備金率唔會加，但會密切留意，國外內經濟情況，有需要就不排除減存款準備金率。

不過亦有另一派看法、包括部分人行貨幣政策委員在內意見，就認為基於通脹仍然處於高位，貨幣政策無調整理由，應該要繼續堅持。

呢派認為，用貨幣政策去解決問題，唔係好辦法，要幫中小企亦應該限量進行，反而透過稅務方式，呢的財政政策幫中小企，會比貨幣政策更有效。

唱淡

2011-10-10T20:28:00.000+08:00

近日多隻股份，被大行手不下留情，大幅將目標價劈低。

市況問題，預左。講理據，部份係有理有據，但部份假設錯誤，作為小股民，要份外留意。

明富MF GLOBAL將匯豐目標價大減七成到三十蚊。第一時間，大家會「嘩嘩嘩」!!

但將焦點放喺三十三蚊同時，唔可以忽略係報告立論。因為，一有犯錯，成份報告可以掉入咸水海。

匯豐係咪要見三十蚊，無人知。市場情緒逆轉，咩事都會發生。但明富份報告，建基於兩大假設，一，係匯豐歐豬涉及三百一十九億美金潛在風險。二，係今年要全數百分之一百撇帳，令到全年業績會虧損!

首先，會唔會百分之一百全數撇帳，呢個假設，到依家絕不成立!

因為，要百分百撇帳，簡單講，係要歐豬五國一齊違約。呢個只會係比惡劣情況，更加惡劣，先會發生!

另外，匯豐何解突然變得有咁多歐債風險?。明富八月時仲講緊八十億美元，依家突然大升三倍，咩事!!!!

原來係，明富今次將歐豬國相關貸款都計埋入去。一來，中環人話似乎為結論，而篤數。
更重要係，假設違約不突止，仲假設埋所有歐豬貸款都無錢還，呢位分析員，都唔係似乎，係直頭太不客觀。

市場逆轉，連好多投資老手，都通通思緒混亂。劉央三星期前，仲話恒指見二萬五，依家唔夠一個月，竟然少一萬點。

到明富寫手，其實資歷相當高。只能怪，亂市令人做傻事!!

相比之前，約翰保爾森都算老練。輸五成，雖然唔知佢有無面不改容，最少，無亂講野。

而且唔少星級既基金經理一樣損手，有新興市場之父稱號既麥樸思，佢旗下既鄧普頓基金，九月回報跌左兩成三。

就連另一個著名基金經理Bill Ackman，之前估港元會同美元脫勾，話要做成世人最大既買賣賭港元會升值，結果呢?

九月基金回報一樣跌左一成六。

有老行尊話，正常嚟講，有一半分析員都咁激，即係個市就算未見底、最少都唔會咁快有過激跌幅!

魔術師

2011-10-06T19:43:00.000+08:00

兆富斷定、沒有喬布斯的蘋果，他最輝煌的日子，幾乎肯定已經過去。

曾在蘋果打工的科技達人黃岳永就預言，蘋果食老本，至少可以捱多兩、三年，之後嘛........可能Fackbook的Mark Zuckerberg更有力接班挑戰蘋果地位。

蘋果官方網站聲明話，呢個世界，失去咗一位、令人讚歎嘅人物。

的確，喬布斯留低一間，只有他至能夠創立的公司。

作為三十多年拍檔、蘋果創辦人之一沃茲尼亞克形容，喬布斯離世，就像約翰連儂和約翰甘迺迪逝世一樣。

WSJ 就將喬布斯成就、同發明大王愛迪生、以及創辦福特汽車的福特比較。

無左巨人既蘋果，日後會否不一樣?

做左CEO 六個星期，庫克星期二主持左自己首場iPhone4S 發布會後，就要面對自己喺蘋果１３年來最大挑戰。

喬布斯任內推出既多個數碼產品，包括iMac、iPod 、iPhone同iPad，唔單止令蘋果超越微軟同Google，一度成為全球市值最大公司，仲改變左整個電子消費品行業生態。

華爾街日報話，蘋果員工對庫克既支持，並無減少，公司既運作同喬布斯年代無異。

不過講到帶領蘋果創新，庫克好難同佢前任比較。喬布斯對細節專注到左驚人地步，自己講過、對電話既標誌設計、甚至蘋果店每一塊玻璃有幾透明都要過問，精通執行既庫克未必有呢種天分。

而庫克未來既挑戰、更多係來自外面既競爭。

作為後來者，Google 推出既智能手機系統Android，喺三星HTC同LG既支持下、已經後來居多，喺美國既市佔率由五月既三成八升至四成三，相反蘋果既iPhone，只係保持喺兩成七左右。

硬件市場外、最大網上零售商亞馬遜，亦推出左運出Android既平價平版電腦，可能會威脅到蘋果一直想踏足既消費市場。

投資者可能仲會關注、係蘋果點樣運用手頭７５０億美元既巨額現金，庫克將會面對更多機構投資者壓力，要求派息或者回購股分。

一直大家都重視喬布斯既創作，但對於呢個傳奇人物既個性，都實外界所知唔多，每每都係傳聞佢會點會點，但真正接觸佢個人既就少之又少!

我地推介大家可以睇下華爾街日報科技專欄作者Mossberg既專欄，佢由於工作關係，都有同喬布斯接觸，最初教主都係同佢反映啲測試評論唔公平，不過之後就發展出朋友關係，佢提到喬布斯好鐘意失驚無神打電話比佢，甚至往往係周末，搞到佢老婆都有微言!

聽落呢都符合佢既性格，就係夠晒自我中心!

但即使喬布斯近年飽受病魔困擾，但仍然能夠帶領蘋果公司推陳出新，Mossberg就透露左、最後一次會面，係喺佢屋企，當時佢都舉步為艱，但都堅持要同佢行出花園，並且希望可以逐步行出屋企、甚至行得更遠，呢個正係佢樂觀既性格反映。

講多一條喬布斯既小事，你咪睇佢台上做presentation表現精乎，佢往往會用多八倍時間做預先採排，少一分專注都做唔多!

更有趣係、佢做presentation時對做slide 既堅持，試過有次出次研討會、因為大會無預備slide，令佢大發雷霆!

如果咁樣比較，星期三睇庫克台上表現，就的確令人憂心!

鵝「尾」

2011-10-04T23:29:00.001+08:00

第三季，投資主題係避險，問吓普遍損手爛腳嘅對沖基金？

第四季? 繼續要避險。

問題係，「險」從何來？

歐債危機未解決，希臘問題日日新鮮。

美國歷史性被降級，失業率高企，經濟瀕臨雙底衰退。

新興市場雖然表面風光、負債又偏低，但投資者過往喺當地輸過好多，所以高風險嘅標籤，仍然洗唔甩。

以為市況難玩？但投資市場叻在識推陳出新。

最新玩法，係炒「黑天鵝」事件會唔會發生。

見過雷曼倒閉，仲有啲咩可能性極低、但影響極大嘅「極端」事件會發生？

可能係經濟衰退？基金研究機構ＥＣＲＩ就講明，美國經濟已經陷入惡性循環，以為而家經濟差？

你根本未見過風浪。

具體會點發生，暫時真係估唔到，但已經有基金陸續成立，專炒呢類情況。

暫時統稱為「風險尾部基金」TAIL-RISK FUND，仲有唔少錢流入。

有「黑天鵝」作者塔勒布Taleb 座鎮嘅UNIVERSA，年初以嚟流入嘅資金，多咗至少兩成。
機會率咁細都有人買？

原因係因為傳統用嚟對沖跌市嘅工具，已經炒到貴晒。

以ＶＩＸ恐慌指數為例，由歐債危機升溫計起，兩個月內升咗八成。相關票據仲誇張，累積升幅一倍四，再炒空間有限，隨即錄得１１億美元資金外流。

嫌玩法太複雜，可以揀低風險少少，高盛近期都向證交會入紙，申請成立專買「低Beta」股分嘅基金。

簡單講即係風險系數比較低，好似煙草製造商ALTRIA呢類歷史長、係行業龍頭、現金流穩定又有息派嘅藍籌公司，普遍符合晒。

好處係喺大跌市當中股價往往唔駛跌，甚至有得升。

但都唔係一勞永逸。出咗名係大淡友嘅、野村「詹久阿」就睇，標普５００指數可以落到７００點，即係比現水平跌多３成８。如果中嘅話，睇嚟邊隻藍籌都唔會有運行。

預左要還

2011-10-04T19:22:00.001+08:00

三年前「大到不能倒」既恐慌、又再次係全球銀行界蔓延。

觸發點源自歐洲，穆迪表示，正係檢討將比利時銀行DEXIA降級，消息就指係佢地持有超過二百億歐元既南歐債券。

DEXIA隨即計劃出售喺法國嘅貸款分部，以及分拆業務、成立「壞帳銀行」，由國家財政支持。

現實係歐債危機一拖就兩年，歐洲銀行出現問題早已經唔係新鮮既事。

問題係、如果有危機唔係歐洲，而係全球最大金融中心--華爾街?

可能好難想像，不過由違約交易掉期反映、全球最高危既金融機構，唔係歐洲、反而係喺美國。

摩根士丹利同美銀，違約風險高達四、五百點，比起水深火熱既意大利銀行UniCredit仲要高。
就算係堪稱最賺錢既投行高盛，違約風險一樣高過法興法巴同法農。

觸發摩根士丹利違約風險急升、事緣係上星期一篇分析文章，披露佢地喺法國既涉及貸款高達３９０億美元，仲高過大摩本身既市值，事後文章經Twitter廣泛流傳，令大摩CDS急升至08年雷曼倒閉後最高水平。

面對危機擴散，大摩行政總裁戈爾曼，向員工發出內部電郵，指市場有太多混亂同錯誤既信息，佢歸疚係人心虛怯、令恐懼戰勝左常識。

而大股東東京三菱UFJ亦罕有發表聲明，重申佢地既長期投資承諾不變。

消息就話，３９０億美元既法國貸款係截至舊年底總數，而且涉及既數字係總額而非淨額，經過今年減持後、大摩對法國既貸款實際已經係降至接近零，佢地計劃未來兩星期會公布更多相關數字。

不過有基金話，投行既運作就係黑箱作業，當風險蔓延到所有行業既時候，資本市場就會對欠缺透明度既投行作出懲罰。

平? 可以更平!

2011-10-03T18:53:00.001+08:00

星期日，拍賣行拍賣法國名酒Chateau Lafite，但居然出現十七次以嚟首次流拍。

一支九六年VINTAGE LAFITE，成交價跌至四萬八千四百蚊港紙，但幸好，同日拍賣名晝，仍然有市場。

內地資金鏈斷裂問題，已經由溫州蔓延全國、甚至加速令澳門疊馬仔資金鏈同樣出現問題。

雖然里昂堅持話無事，但據澳門行業了解，似乎同現實有出入。再加埋今次蘇富比紅酒拍賣成績，你或者真係要開始擔心，內地資金的確響起警號。

唔係專登睇淡，亦唔係叫一的有實力長期投資者，現水平唔好買貨。但任何決定前，先睇下Pimco El-Erian 一篇文章，因為可觀性極高。

雖然巴菲特話既然股分大減價、點解唔買？不過埃爾阿里安串得好，佢話除非你好似巴菲特有「永恆既資本」，否則都係審慎啲好。

原因？好簡單，好既股票、平左可以更平。

佢話第三季經歷環球股市下跌，唔少投資者都好似巴菲特一樣、認為好多股分都跌低過應有既內在價值，派息率又高，加上跨國機構財務狀況理想、認為而家係理想既吸納時機。

不過阿里安話，投資者喺參考傳統智慧前、要先了解過去幾個月，點解以往被認為唔可能發生既事情，最終變成事賓。

原因係過去主導金融市場既因素，已經由公司盈利同資產負債表，轉為環球經濟同政策問題，令股價比起企業既基本因素、可以有長時間既偏離。

佢認為，而家雖然有唔少機會可以趁低吸納，但投資者要賭既、就係企業可以避過環球經濟進一步衰退，而主宰呢個因素、係要靠喺雅典、柏林、法蘭克福同華盛頓既一批政客，有無足夠決心。

呢篇文的確係近年佳作，的確唔少名家、好友，大半前都不斷叫入市。但阿里安文章，兩大訊息:

一，係你有無人地咁有錢先？
二，係好多之前估唔到，以為難以想像事情，已經發生左!!

的確，唔少大行策略員都提出，依家要一注撈底。其實係賭緊三件事，一係歐洲無事、二係美國經濟無事、三，係中國無事。

簡單講，投資者係要買中一條三重彩，當然位置不限!

以為意想不到既事都會發生，呢句說話可圈可點。呢句話，未必等同黑天鵝，但或多或少係顯示、之前我地對形勢高估，同對問題低估所致。

同樣可以引申到近月跌市從正面睇，係進一步教識我地，以後環境仍然會混亂，做好個人預期，比一切更重要。

正如石SIR講，有咩未見過? 要對前景樂觀。但周圍發生既事，周圍聽到既野，令我地對前景能見度極低。

所以就算有實力，但最好問自己一句，同說服到自己，嚟緊唔會有難以想像既大件事，會發生先?

記著我們作為散戶、唯一比專業基金經理既優勢，就係可以唔揸貨，將資產長揸現金!

害怕

2011-10-01T00:17:00.001+08:00

星期四香港打風，美聯儲主席伯南克的一篇演說，大家很可能會錯過。

重點不是佢首次解釋OT，反而是後半部如何表述新興市場的角色。

極為罕有地、作為全美國第二個擁有最高權力的人，伯南克居然呼籲美國在內嘅發達國家，應該學習新興市場經濟體嘅成功經驗!

原因係要學習有負任責嘅財政紀律政策，指政府只需堅負必要嘅公共開支、同時鼓勵私人投資同開放貿易。

當然、伯南克原意是想告訴民主共和兩黨，如果再糾纏於政治意氣之爭，可能會賠上整個國家的經濟前途。

但要奉行資本主義與民主政制的歐美學習新興市場、豈不是連政治意識形態亦要改變??

巧合的是，新一期經濟學人所講的、也是同一個類似話題，形容如果政客唔盡快有果敢行動，全球只會走入一個大黑洞。

事實放在眼前，而家根本依家係過得一日得一日。經濟學人形容歐洲水深火熱，但鬧到面紅耳熱，政客先肯計劃、去諗下有咩計劃???

歐債問題從來無露出曙光，以為問題就此解決，股市可升，但留意債市無升過，債息繼續高企。

建議各位，以後歐債任何發展，睇債市表現，好過用股市作為判斷。

無謂興奮，好快過眼雲煙。「許多世界上現在正在為自己的膽怯：見證日益黑暗的經濟背景。」

歐洲為例，德國荷蘭為首一派，認為希臘問題僅限於過去實在太「揮霍無度」，而之前落實的方案實在對債權人太過「慷慨」，而家應「預左要還」!

但正如三年前雷曼倒閉，歐洲看不到的是關連系統風險，一旦希臘真的出事、不單法國銀行受牽連，德國一樣難獨善其身。一些最近的指標表明，歐元區陷入衰退，德國出口放慢，信心低迷加上銀行危機意均味著信貸緊縮。

歐洲一個黑洞，美國仲有一個。

經濟學人形容美國經濟仍是一瘸一拐的，加上美聯儲「敷衍了事」，而最令人不安，是美國的政治家，再次威脅要破壞不負責任的財政邊緣政策的復甦。

唔好忘記，仲有一個亞洲、一樣開始步入黑洞。

呢個新興市場雖云增長快、但視野度最低，最難判斷會有幾大件事!!

中國硬著陸講得多，之前話係鬼子佬唱衰得多，但有無留意，近期連分析中肯一批，都同樣對內地有保留。

外圍話俾你知，出口死緊，有廠家形容今年歐美無左聖誕，隻隻出口貨櫃船都係空空如也。
中國一旦放緩，香港唔使諗。靠出口既台灣亦警告，訂單少左，台幣第三季就大幅眨值，跌幅有超過半成。

南韓情況更要留意，一個有技術，有品牌市場，但問題仍然未解決，就係銀行體系短債過多，當地銀行今個月就試過多間被接管，第三季南韓圜跌幅就有近一成。

五大洲數落最少有三大黑洞，點收科？

正如經濟學人說，政客官員先至有決定性影響，而最大致命傷、絕對是誠實問題!!

美國，以至中國咩都話，無事，無問題，正是政治家們沒有告訴選民真正問題的勇氣。歐洲係咪相對較誠實，可能事知不妙，歐洲相對肯講多少少真相，所以結果係，歐洲先爆煲。

由於缺乏認罪的勇氣，可能這才是真正令人害怕的理由。

金融幼兒班

2011-09-28T22:32:00.001+08:00

中央決心人民幣繼續升，但敵唔過市場力量，繼早前香港嘅離岸價，連在岸價都失守。

人行開出嘅中間價，定喺６．３６２３兌一美元，再創０５年７月、匯率改革以嚟嘅新高，係三日以嚟第二次。

唔止升穿６．３７水平，百分之０．５７嘅升值幅度，更加係七個星期以嚟最大。

但係去到交易時間，喺上海嘅中國外匯交易中心，根本做唔返咁高，頂多只係見過６．３８水平，差距有成達２百點子。

嚟到香港，離岸價更加就更低，只係造到６．４２兌一美元附近，低水幅度由上星期、破紀錄嘅百分之２．５，收窄到唔夠百分之１，但仍然高過歷史平均水平。

市場價忽然急跌，華爾街日報形容，人民幣政策而家只係「幼兒級」，市況突變，係幫積極將人民幣國際化嘅中央政府，睇清咗現實有幾殘酷。

更令人擔心嘅係，人民幣國際化進程會唔會再受阻，甚至好似０８年嘅危機咁，停止升值步伐，甚至容許少幅貶值？

市場而家有兩大隱憂: 1.外貿順差減少 2.驚大陸好似08年咁停止升值。

蘇皇就話有可能。貿易逆差收窄、實際匯率升幅加快，同美元大幅上升，人民幣貶值嘅可能性，比３年前大幅增加。

當年為咗抵禦金融海嘯、引發嘅出口大跌而唔再升值，提高出口競爭力，金融時報形容政策成功。

失去咗「必升」嘅光環，就連本港嘅人民幣債券市場都受拖累。

債價急跌，點心債嘅平均回報，由４厘半急跌落１厘２嘅水平，唔少諗住嚟發債嘅，包括馬來西亞投資公司，計劃都推遲咗。

當然亦不排除人行係有意夾大鱷，將憧憬人仔升值的炒家擊退!

上帝出手

2011-09-27T19:19:00.000+08:00

話說上星期默克爾同教宗會面，由天上既事慢慢講到凡間。

「我們討論了金融市場表現(教宗都會睇指數??)，仲表達左作為政治家，我們制定政策是因為人、而非由市場作主。」

作為第二次連任、任期剛屆滿一半，默克爾的政治前途已經繫於五隻豬的身上。

雖然話唔會被市場繫著鼻子走，不過面對星期一有史以來最大規模的洗倉潮，更有主見的政客相信都難作抗拒。

面對荷蘭芬蘭等成員反對擴大救市基金，將現有既四千四百億歐元「歐洲金融穩定機制」EFSF槓杆化，成為左唯一出路。

消息話，歐盟正考慮推行金融穩定機制槓桿化計劃，由歐盟成員合組成立一間、「特殊目的工具」SPV公司，向佢地作出抵押、發行債券，透過呢個種子基金，最多可以倍大「八倍」槓杆，預計集資最多二萬億歐元，作為購買歐洲主權債券。

SPV債券亦可以被歐洲央行認可為貸款擔保嘅抵押品，向歐洲央行借入資金。

歐債一個大問題，市場表面被一個當局可能將救市基金槓杆化消息，大為受落。

但認同既話，要搞清兩個問題，第一，你真係信歐洲？第二，有呢樣野，係咪問題完全解決?
的確，歐洲問題已經惡化到唔見棺材唔流眼睙既地步。

但歐洲做事，效率奇低，傾一個方案最快要六星期。歐洲仲有幾多個星期呢？

就算歐盟成員全數通過，但肯定由拍板到執行，少則兩，三個月。除非假設金融市場毫無風浪，否則中間仲有唔少變數。

更大核心問題係，將歐洲救市基金槓桿化，只係顯示歐洲無誠意。槓桿化方案，透過基金發債，集資所得用嚟買問題主權債，一嚟過份假設市場完全運作無問題，其次係根本反映歐洲國家唔肯再出錢、歐豬五國亦無能力作財政改革決定!

救市基金有四千幾億歐元，計埋救希臘，同注資俾有問題二十間銀行，所剩得千幾億歐元。就算將剩餘資金，用八對一槓桿倍大，筆錢只係相等於歐洲主要銀行出年八千幾億債務到期要再融資既金額。

係人都知，以歐債問題規模，救市基金先要加碼，下一步到底用嚟買債，定係救銀行，依家根本唔需要傾著。

歐洲算盤似乎擺明係拖美國，同基金組織落水，實行我出事，你付鈔。

不過好似金融時報話，將EFSF槓杆化係走對左正確既一步，以二萬億歐元既規模係足以拯救歐豬五國，單計經濟規模最大既意大利、未償還債務亦只係有一萬六千億歐元。

事到如今，連同歐洲央行減息半厘，半推歐洲版QE，總好過咩都唔做等死。希望平息到市場恐慌，以免再有歐洲銀行出事，否則真係要上帝出手!

歐洲高血壓

2011-09-26T21:21:00.000+08:00

當默克爾公開對著電視機話自己有高血壓、要接受治療，有資深中環人已經暗叫不妙!!!

作為政治女強人，又係全球影響力最大既女姓，新一代鐵娘子公開話自己身體有事，表面就係公開想搏同情。

但想想戴卓爾夫人在位十一年內，幾時見佢呻過辛苦?

唯一一次就係喺人民大會堂前跌一跤、就尊定左今時今日香港既命運!

所以金融時報專欄話，從未見過歐洲既政治家、上星期喺華盛頓出席IMF年會時候，個樣係咁恐慌!

計我話，係市場對著佢地個樣感到恐慌先啱!

一場希臘債務危機２．０，就完全暴露佢地手足無措、做事荒失失既表現，好似ＦＴ批評，明明已經係系統性風險，但就將ＥＦＳＦ設計成只係針對細少國家，又完全學唔識玩財技、連點做槓杆化都唔識！

佢地一日都黑只係講：
不要歐元債券
不要救市基金
不要歐元區解體
不要拯救銀行，
淨係識係度講ＮＯＮＯＮＯ。

當危機己經擴散到下一階段，班「大帝」仲係喺度糾纏到底係要對ＥＦＳＦ作技街性修訂、定係要收抵押品，徹徹底底係Behind the Curve!

其實到今時今日，歐洲既未來、已經完全繫於一個ＥＦＳＦ身上，市場都開始擁現更多有建設性既建議，有經濟學家就建議比ＥＦＳＦ一個銀行牌照，等佢地可以喺歐洲央行身上取得資金進行槓杆化，一旦擴大到四萬億歐元，何止希臘，買起晒五隻豬都不成問題！

難得係有大行居然係叫歐洲學我地曾特首９８年入市取經，話當年政府入市買起一成半流通量藍籌，就成功打退大鱷、幾乎令索羅斯輸突，認為歐洲一樣可以照辦煮碗。

擦鞋擦到出晒面，唔通綠藍銀行真係想趁獅子病、取代埋佢地位？

似乎歐央行亦意識事態嚴重，佢地已經考慮重新啟動擔保債券購買計劃，即係歐洲ＱＥ～！

既然歐洲可以無限量引錢，聯儲局亦唔應該再手軟，特別係面對通縮威脅可能重臨，華爾街已經唔再係講緊ＱＥ３，而係要求ＱＥ Infinity，即係無限量ＱＥ，如果真有其事，大概先可以解釋到點解歐洲市可以有反彈！

睇錯市

2011-09-24T10:00:00.000+08:00

一個OT2害死股市，熊仔橫行，作為依靠佢地既大行，都要面對「落雨收遮」既物理定律!

如果今年頭同你講，話高盛會蝕錢，你肯定話係天慌夜談，但今日已經有大行落Call，話第三季業績，高盛「蝕硬」!

巴克萊計數，估計高盛第三季每股盈利、由之前估計賺２點４美元，修訂為要蝕３５美仙，將會係呢間投資銀行０９年以來、再次出現虧損，亦係佢地歷來既第二次！

原因其實都不難想像，無論股市、商品大跌、加埋大deal買少見少，第三季不論金股匯波幅都咁驚人，算你叻仔安全過到八月，到九月呢一浪恐怕都難以全身而退!

另一個反映高盛氣數已盡既證據，係佢地不斷睇錯市!

繼早前站錯邊、撐錯伯南克ＯＴ２，搞到要出補充報告，之後仲要再連環失手！

佢地既策略員先叫人繼續買商品，仲特別唱好銅價話未來十二個月可以升四成，點知一場環球股災，就令銅價即日跌近一成！

另一個仲經典，高盛既貨幣策略員落下「世紀賭注」，就係買歐元沽美元，仲要定出目標價喺１點５５！

結果都唔使多講，高盛要喺歐元跌至１點３５後止蝕，話明帳面虧損百分之四。

輸錢事少，但以過去高盛保持過「百日不蝕」既紀錄，廿四小時內三度落錯CALL，以「布蘭克費恩」昔日呼風喚雨既Track record，真係好難想像，難怪近日不斷有傳聞話佢明年會「起身」!

當然、蝕錢既大行，唔止高盛一間，大摩更被傳喺法國既Exposure 超過３９０億美元，仲多過佢地本身市值，而包括美銀、摩通、花旗、富國、高盛同大摩呢一季既盈利預測，呢個星期就再被調低百分之七！

而家最驚係作為大行一旦收遮、既會緊縮信貸損害經濟，同時「瘦身減磅」、裁員潮第二波分分鐘成為感恩節禮物！

環球銀行肯定會有下一輪裁員潮，睇番轉頭、匯豐之前喺本港裁員三千，可能只係一個序幕!

又話本港失業率得百分之三既? 都係算吧啦，有生之年見唔見到，Who care!#

雷曼時刻

2011-09-23T23:54:00.003+08:00

作為研究三十年代大蕭條既經濟學家，伯南克「翻用」1961年既扭轉操作ＯＴ２、雖然成功將十年債息、推到記錄新低，不過就害左股市，加快環球市場步入熊市。

經濟學家David Rosenberg總結ＯＴ２點解令市場失望，佢話一來扭轉操作原理係沽短債買長債，希望可以將長期利率推低刺激放貸，不過就會損害銀行既邊際利潤，未見其利先見其弊。

同時三十年債息大跌，亦擴大左退休基金既虧損，需要贖回填補資金缺口。

不過更重要係滿足唔到市場期望。ＯＴ２時效會到明年六月，「羅森堡」話，市場解讀成為未來九個月，聯儲局只會以靜制動，換言之市場期望既ＱＥ３，喺呢段時間都唔會出現。

諾貝爾經濟學獎得主克魯明都同意，美國經濟已經陷入流動性陷阱，「扭轉操作」唔可以改變市場對利率走向既預期。

其實大家又有無想過，要評定OT是否成功，股市可能不是唯一指標?

要說股市反應，QE1及 QE2不是初期表現突出嗎，但結果? 大家明白，由於大量印鈔將資金流向資產市場，結果令各類風險資產水漲船高。但結果是資產價格與實體經濟脫節，一旦印鈔完成，股市要回歸基本，近日的大跌市已經說明了一切!

所以不以股市、相反以債息來看，十年債息不是已經跌至新低? 問題是下一步會否反映在實質放貸上。

話說回來、既然市場不受落，咁伯南克係咪已經技窮?

華爾街日報話，聯儲局而家係等待一個更合適既時機。

原本由一日既會議變成兩日，據了解會上除左討論OT2既利弊外，公開市場委員會花左大量時間，商討點樣向外界傳達、將利率同通脹就業目標掛勾，以及調低超額存款準備金率，甚至進一步擴大買債既可能。

但要等既、係一個更合適機會。

要明白伯南克一面要面對國內「叛國」指控、甚至共和黨夠膽死冒干預聯儲局獨立地位都要發信警告伯南克，就知這群政客已經輸到失去理性。

就像「黃金戰士」潘國光所說，與其現在加推措施只會令錢如流入大海，倒不如等一個真正「雷曼時刻」來臨，例如希臘違約，可能更收效果!