財經拆局

今日，真係有九七 FEEL! 喺下晝，歐洲市場傳出有一分由MEDLEY發出嘅研究報告，指金管局高層，係私下遊說緊中央、支持更改聯匯制度，報告引述有參與遊說嘅消息話，金管局總裁任志剛喺呢幾個星期、係遊說擴闊港元浮動波幅、甚至係將聯匯脫勾，不過呢個建議係被國務院總理溫家寶否決。 報告仲提到，美國聯儲局減息，金管局亦唔會跟隨。 呢間叫MEDLEY嘅顧問公司，創辦人係RICHARD MEDLEY，佢喺十年前亞洲金融風暴期間，係擔任當時沖擊港元嘅索羅斯嘅政治顧問。 公司網頁話，佢地專向對沖基金、以及投資銀行提供意見，同各地中央銀行亦都關係密切。 一分報告，就做成金管局手忙腳亂，五度入市，連今日中國證券報都有報道，話聯匯制度可能失靈。 貨幣發行局的運作其實很簡單:有資金流入就增加貨幣發行量;而在「優化」了的聯匯制度下，港元強勢會觸發資金流入，金管局增加銀行體系結餘下，自不然會令銀行拆息回落，理論上「聰明錢」會有套息，買美元沽港元賺息差，自動令港元回落。 不過今次流入原因，是在中國內地、源源無窮的資金帶動下，推高港元，單單套息，似乎都不能令資金轉買美元沽港元，結果就係聯匯制度失靈。 有網友問，金管局係咁接美元，會唔會損手？ 理論上不會，因為港元再強都不會超過強方兌換保證，因此接美元理論上是有賺無蝕的生意。 不過如果人民幣繼續強勢，七點五....七點二......七.....六.....五........ 一旦真係要擴闊波幅，不單金管局接入的美元即時在外匯基金經常帳上錄得虧損，更大件事是我們的外匯儲備，帳面怎麼辦..... 內地加快開放改革已成大趨勢，目前可以做的，因此金管局一方面儘快要分散外匯儲備，盡快降低美元佔的比重.......同時亦要真正做好同人民幣全面自由兌換的心理準備，不過話說回來，任總年期如果只有兩年，你又叫佢可以做咩大動作......

唔知大家點睇「套股換樓」？ 上星期先聽聞中原已經提前兩個月達成全年營業目標(施老闆看來又要提早派花紅)，今日又傳來近日股價創新高的美聯10月分條數好，後勤員工會收到月薪4成作為花紅，已經係今年第6次派花紅，全年累積派相等於2.2個月額外月薪。 樓市似乎真係好好景，十大屋苑成交亦創今年以來單月新高。 再睇近日一分分證券行報告，更家好似大合奏，個個愈唱愈高，愈高就愈唱好! 1. 雷曼話，隨著發展商加快賣樓，第三季貨尾跌至萬四個紀錄新低，加上減息預期，樓市已經逐步由「買家」變成「賣家」市場，估計到明年底前，樓價會升45%(???!!!) 2. 麥格理話，隨著市民收入上升、本港又重新踏入負利率年代，預測中小型住宅會升最多兩成。 3. 瑞信預測，樓價會大升四成。 樓市好似一片欣欣向榮。 我們確信，內地資金持續流入下，港元又無得升值，最終肯定係會推高資產價格。不過香港人、不少都經歷過「負資產」的夢魘，昔日「嘉湖五千、浪翠八千」的經歷，市民都刻骨銘心。 撇開豪宅不談，市區特別是港島的樓盤，的確由於盤源少、地點又方便，是不少人心中的理想換樓目標，但請不要再說甚麼新界區豪宅的廢話，說穿了，與一個騙局無疑。 「套股換樓」，可以的，但同買股票一樣，請揀選有實力的「藍籌盤」! 今日施老闆就提供了一些心水，包括港島西區在無新增上蓋物業供應下、有了地鐵，幾乎係由政府分左六十億比當區居民，大家仔細留意。

孫柏文為青姐做的friend club有三百多人入會，不過愈多人入會，最終都只係會益左晝面著著「拖鞋」的哥哥仔。 廿三歲的Mark Zuckerberg，他亦證明左、肯等待係一定有回報，最終比佢成功搵到微軟呢個大買家，以投資２億４千萬美元，買入百分之１點６「FACEBOOK」股權。 雖然價錢唔多，但以微軟收購價計算，FACEBOOK市值就達到天價１５０億美元，比起之前市場傳聞的１００億仲要多五成，係二千年科網泡沬以來網站最高的估值。 最好笑係，微軟總裁阿BALLMER，今個月初先講過，話FACEBOOK呢類社交網站係泡沬，點知轉頭就要自已出錢去買，到底是談判策略?還是形勢比人弱?。 今期經濟學人就話，微軟跟本無得揀。 其實佢地過去三年來，都已經意識到、單靠軟件開發肯定係會比淘汰，不過多年來都是輸比GOOGLE，連DOUBLECLICK一役，都輸埋!因此幾唔願意都好，叫價幾高都好，微軟真係無得揀。 不過微軟都部署緊一個絕地反擊。睇最新一季業績就知，第一季度盈利增長兩成三，遊戲機XBOX 360，?第一季就賣１８０萬部，而新遊戲「Halco 3」更是賣個滿堂紅。 雖然FACEBOOK預期未來幾個季度，都唔會有盈利貢獻。不過微軟入股Facebook同時，亦已經取得銷售協議，微軟獨家可以取得獨家網上廣告銷售，算是有了根基可以追上Google。 如果看今季的大企業業績、無論Google、Apple、微軟、中國的百度，甚至日本的新力、任天堂，盈利都高過分析員預測，即使是雅虎經過「百日維新」後，盈利都有所改善。不過說到最後，雅虎仍然不能算是捱過所有難關，至少他們上星期就要關閉自己的社交網站「YAHOO 360」。 而最慘的是、連「刪」左都無人知，真陰功!

日前兩大投資大師對中國慨念落下註腳，一個話唔會買，一個就話瞓身買。 其實股神巴菲特同商品大王羅傑斯看的，基本上不是同一個context，巴菲特說的是中國股市，Rogers談的是人民幣。 以價值投資揚名，巴菲特當然較著重的，是基本估值是否合理，以目前內地股市近六十倍市盈率，股神當然是可望不可即，因此叫人審慎是意料之內，反而股神說自己可能早沽了中石油，就是不必要的客套話。回報率有七倍，任何基金經理只有眼紅。 商品大王說要盡沽美元，然後大手掃入人民幣，也實在是市場共識。君不見發行數億元的人民幣債券，在本港都要爭崩頭就可見一斑!美元弱勢幾乎係人都識講，布殊多年來「披羊皮，實狼心」的所謂「強美元」政策也是路人皆見，不過問題是，人民幣會唔會好似羅傑斯咁講，可以升兩倍、甚至三倍？ 人民幣由零五年七月匯改以來，日前剛升穿7點75的水平，累積升幅是7.6%，以一個發展中國家來說，可以說快不快，慢也不慢。 慢著，請大家記著，人民幣的升幅是以美元計數，以過去兩年弱美元已經成為趨勢來看，用實質匯率慨念計算，人民幣實質只是升了百分之二，更甚的是兌歐元一隻貨幣，今年以來人民幣實質是眨值了百分之3點7，邊個話買人民幣一定賺？真係睇下你來自「邊鼠」！ 金融時報話，以目前不交收人民幣遠期合約計，未來一年人民幣會升穿七算水平，即係話升值百分之六。呢個升幅，過去一個月菲律賓披索都唔止！ 因此難怪歐洲一批財長鬼殺咁嘈，人行亦在Ｇ７一個星期後，就加快人仔升值幅度。 說回切身的港元問題，近日戲劇性由兩個月前二十二年低位，一跳就升至７點７５兌一美元的強方兌換保證水平。市場解讀（包括任總？）說是新股認購抽緊資金，要作好最好準備云云。如果說阿里巴巴凍結過千億資金，就令銀行體系應付不了，相信無咩人會信，早前的新股反應咪仲熱烈？ 實質上是市場開始睇到，隨著大量「老細資金」流入，港元又同美元掛勾，金管局根本是綁手綁腳，只有眼巴巴看著通脹被推高，最終又要擴闊港元浮動範圍。 任總說過，強港元是「happy problem」，但自從零五年五月所謂優化措施之後，我們已提出，貨幣管理最怕被人睇穿，所謂做得一次就有第二次，Problem 可以happy幾耐？

最近有幸看過呂大樂的小書「四代香港人」(名正言順係小書，七十頁不到，生吞活?、不求甚解的話，只要十分鐘就看得完)，全書主要是集中講戰後嬰兒潮的一代人，唔肯將機會留比第二、三代人。(其實小書很有啟發性，有機會可以再談。) 本書都有提第四代人，定義乃是第二代人的子女，七五年後出生的一群。他們生於香港物質最富庶的年代，但得到的選擇卻最少。三歲就開始競爭，大學未畢業已被長輩期望可「未學行先學走」，被嬰兒潮出生的父母嚴格要求，缺乏自我。 呂大樂的結論是，他們現在的問題是太沒有個性，要他們說自己不鍾意甚麼很容易，但要他們說鍾意什麼，就難過登天。 以呂大樂的劃分，第一代人的成長空間，就是他們在求學期間，要求「立大志，講理想」，參與社會運動，被認同是擴闊個人視野，而社會上亦普遍對他們偏激的行動予以包容。 到了第一代人成為社會主流，他們倒轉過來，認為這些社會行動不切實際，理想不能當飯吃。小朋友由入讀幼稚園開始，就應該已為入職作出最好準備，好像坐在隔鄰的不是友伴，而是日後的辦公室敵人。 我們一切都自以為為第五代人著想及鋪路，殊不知我們是額殺了他們的成長空間。 就正正因為父母以為一切需要鋪路，我們認為，現在最有前途的行業，除了照顧人口老化、而出現的保健個人護理外，最有前途的，就是補習生意。說真的，那些天王天后又買半山豪宅、又自製相連單位，到底錢從何來？說穿了，咪又係一班緊張子女多於一切的「第一代人」！ 所有人都希望自己有所選擇，施永青就提出一個很有趣的問題，十二年免費教育會否減少了他們的選擇？ 其實到十二年免費教肯有幾大成效，好取決到底課程編排同學習態度。如課程設計是過深，只又無咩實用價值，反而只會浪費他們多三年時間。 施永青提過，本港課程太偏同太深，反而最重要的基礎語文就學唔好，根本就是浪費生命，所以應是殺局(教統局)而不是殺唔校，大家又點睇？

招股前突然加價，阿里巴巴今年嘅預測巿盈率，已經係「過百倍」，科網股爆破咁耐都未見過，完全如入無人之境。 想買貨嘅又點止散戶，基金大戶今次同樣係押重注，由於反應熱烈，國際配售部份亦要提早兩日喺星期三截飛。 雖然有雅虎，思科同多個大孖沙入股，令阿里巴巴成為近期最炙手可熱嘅新股，但有外界就質疑佢哋係咪可以成為另一個科網神話。 我地被網友質疑係咪唱得太好，看過招股書，同大家分享下: 目前阿里巴巴，最依賴嘅收入來源，就係２５萬個，註冊付款嘅「信誠通」用戶。 靠住呢個龐大嘅電子商貿群，形成左佢哋獨有嘅市場壟斷優勢。 不過招股文件顯示，來自「國際信誠通」登記用戶，今年以來只是多１％，即係百多人，與去年增長近四成比較，明顯已經放慢。 有內地用家亦批評，阿里巴巴認證系統唔完善，好難做得成成生意。 係咪能夠為投資者，打開財富嘅芝麻大門，仲要取決於阿里巴巴上巿後表現。 不過今次發行嘅８億幾股入面，有超過７成係來自母公司舊股。 招股書話，馬雲日後最多得三成時間會放喺上市公司，但已經同其他舊股東齊齊套現左超過８５億元。 風險係咁多，馬雲的確是一個懂得控制預期的奇人，到底入唔入，都係個句：量力而為！

GOOG及YHOO目前PE 只有五十多倍，到底阿里巴巴憑什麼可以有94倍PE? Alibaba是內地最大的B2B（Business to Business）網站，專為資源不足的產品供應商找尋海外買家。任何人都可登記成為免費會員，買賣雙方可在網站內互換資訊，及找尋合適的生意夥伴。不過用戶要尋找買家資訊，就必須要升級至收費會員，甚至有「信誠通會員」的設立，讓買家更容易找到信得過的供應商。 鍾意阿里巴巴的一站式運作，在內地龐大的B2B市場淘金，阿里巴巴已經有最好的商貿平台，C2C當然有淘寶網，兩者結合又可以成為B2C模式，最後連結算交付的支付寶亦一併發展出來，以一個綜合的發展模式去開拓網絡市場。 截至今年6月底，阿里巴巴B2B業務共有2400多萬名註冊用戶，其中85%以上為國內用戶，當中只有百分之一是付款用戶，隨著更多外資希望打入內地市場，顯然有很大增多空間。 說到貴、Simon認為，不應以阿里巴巴和ebay及google比較，兩者商業模式是兩碼子不同的事，相反，近日透過zshop，希望爭取成為創業者social networking的Amazon，就比較貼近，而目前阿馬遜的PE是122倍。 高盛就估計，今年阿里巴巴盈利增長將達1.86倍，令明年預測市盈率回落至46倍，而馬雲選擇到香港上市，不爭取估值更高的Nasdaq，似乎也是更平實的做法。 當然，阿里巴巴不會是永遠的藍海，擁有三十六年貿易經驗的全球貿易服務公司Global Sources，亦看準中國市場，已於周四推出全新的網站v2.0版本，並於下月推出中文網站。 Global Sources本身己提供一條龍的貿易服務，包括製訂採購雜誌及籌辦展覽等，而新v2.0版本最大強項，就是一個認證程序，包括提供供應商實地考察資料、以及IP方面的認證，這方面，實際上是阿里巴巴目前的「Trustpass System」中所欠缺。事實上，內地就有不少中小企用家就批評阿里巴巴交易系統僅限於配對，缺乏進一步增值功能。 不過瑞信訪問了內地二十個中小企，雖然他們都認同，Global Sources的新系統較先進，不過由於阿里巴巴有知名度，有「先來者優勢」，即使回報較低，他們仍會使用阿里巴巴的交易系統。 馬雲曾說：未來的需求是個性化的，以互聯網為手段的網商能滿足這些個性化的需求，能實現成本的節約，他們才代表未來。 你有無興趣擁抱未來？ #####...