財經拆局

去年底已感覺到物價飛升，對低下階層做成的生活重擔，想不到二月分的通脹率，一下子已經飊升至百分之六的十年新高。 原來當日陶冬預言會有百分之六的通脹，還是太過樂觀。 對香港來說，真是雙重打擊。我們一方面依靠內地，衣、食都是由內地進口。不過我們的貨幣就是與美元掛勾，單單過去一年，美元已經崩潰了近一成八，可惜香港又不是靠美國進口，結果輸入來的貨品就成了洪水猛獸。 未來一段時間情況恐怕只會愈來愈糟。美元不斷出現崩漬式眨值，已經令商品價格不斷暴漲(早前調整只可以說是大漲少回)，不要以為金價油價對我們的通脹影響不大，因為農產品今天也成了最灼手可熱的商品期貨。 星期四有一個很恐怖的商品出現漲價，單日暴漲了超過三成。是什麼？就是你我每兩餐都會食到的大米價格。 最有指標式的泰國大米價格，單日由原來580美元一噸，急漲至760美元一噸。如果與一月時380美元一噸比較，升幅剛好是一倍。 甚麼因素令大米暴漲? 作為主要大米出口國，埃及決定即時禁止大米出口，目禁是降低國內飛升的米價。而越南、印度以至柬埔寨亦有類似舉動，希望可以透過減少出口令內地米價回落，大米供應幾乎即時減少了三分之一。 當然類似舉動不單止無法壓抑米價，反而人為地扭曲市場，最終只會令大米供求進一步失衡。 泰國的大米出口商會就話，根本無法知道入口國目前有什麼方法可以取得大米。 菲律賓早前無法按原定計劃在國際市場購入五十萬公噸大米後，已經再次在市場上大手吸納期貨。 Jim Rogers 的 A Bull in China，較令人觸動就是對農村的描述。中國的農地並非有想像中的大，可耕作農田只有美國的四分之三，而卻要養活四點五倍的人口。 油價高可以唔揸車、金價高可以唔打龍鳳手鐲，不過米價貴，你又豈能不折腰。 最慘是換來五斗米也沒有。

積架呢類豪華房車，在回歸前曾是不少香港司級官員專車，不過近年在街上已非容易看到。 積架與及「越野路華」(對，即是LAND ROVER)這兩個有幾十年歷史英國高檔汽車品牌，這個星期落入印度最大汽車集團「Tata Motor」塔塔公司手中。 大家如果記性好，會記得TATA這個品牌在我們一月的CAFÉ時都曾與阿黃師傅一齊傾過，當時他們推出一款定價只是二千五百美元的「TATA NANO」平價人民汽車，就曾經成為全球焦點。 但今次收購積架及LAND ROVER，就令市場有好中質疑，因為大食車同NANO呢類細車市場定位有好大出入，會有什麼協同效應？ 這正是今期經濟學人提出問題，不少看淡的人提出，今次收購是VALUE DESTRUCTIVE，因為受全球經濟放緩影響，貴價車銷售大不如前。 LAND ROVER都仲好些，去年仲賺十五億美元，積架就慘啦，今年頭兩個月，在美國及歐洲銷售額，比去年同期大跌三成，相信會錄得虧損。 所以TATA MOTOR 收購公布以來，在NASDAQ股價一度下跌百分之七，而舊年七月以來，TATA股價累積跌了一成三，跑輸同期印度股市上升百分之五。 不過經濟學人話，千祈不要少看總裁「拉坦．塔塔」能力。 雖然塔塔是家族企業，但能夠發展成全國最大車廠、甚至透過平價車NANO進軍全球，證明拉坦．塔塔甚有洞察力。 有熟悉「拉坦．塔塔」人話，不要看他是一個怕羞人少有社交生活的人，就睇少佢，經濟學人相信揀這個時候出擊，其實就是睇中這些大品牌飽受信貸危機同經濟衰退所困撓，你又點知他不是在執平貨! 「拉坦．塔塔」就話，會保留兩個老品牌嘅形象，風格同質感，而新一代積架的傳統X-TYPE再生版亦好快會亮相，有分析員形容會係積架的文藝復興。 無論如何，在印度這宗二十三億美元收購，是成為了全國振奮大事，有當地人甚至當成是國慶，認為是光宗耀祖。 不過呢，並實這兩個英國老品牌其實早已經歸福特旗下，不再是印度的前宗主國英國，未知有無表錯情？

今日執下孫柏文「口水尾」。 試想你係一個酒樓老闆，買accumulator輸了大錢，被銀行追收數百萬元。 無計可施之下，原來發現天無絕人之路，有條絕世好橋可以救命。 做法是先將自己間「歡樂」酒樓結業，除了將公司清盤，漏夜將一車車的龍蝦、鮑魚、海參運走外，欠下員工八十幾萬人工，原來可以叫佢地個個乖乖到破欠基金處「領薪」。 為了避免員工到勞工處投訴爆大鑊，仲要有後著，就係在結業後一個星期，在原址同一地點開另一間酒家，今次改名做「福滿」，員工在破欠基金處領薪後，就再到新酒樓番工。 如是者有「福滿」、「福運」一間又一間開業，總之每次事隔數月就「老馮」叫員工到破欠基金領薪一個月，幾年下來終於還清銀行條數，員工亦習以為常。 原來破產欠薪基金就成為了酒樓老闆的「道德風險」。 同樣道理，引伸酒樓道德風險在投資銀行上，你係投行CEO，你會點做？ 橫豎最終有人救，仲要係愈大愈救，一於有咁投機就咁投機，最好個盤仲大個法興阿魔鬼交易員或者高盛三人組，愈投機得大，回報可能愈高，自己地位愈穩固。就算最終真係睇錯市，買錯SIDE，最終一定有人拯救，自己亦唔使上身，十八個月後又是一條好漢。 星期三在貝爾斯登總部，就有壓力團體組織六十人示威，反對聯儲局救市。 面對公眾壓力，泰晤士報引述消息表示，美國總統喬治布殊同佢嘅顧問團，開始對聯儲局做法有保留，擔心的就是道德風險。 喬治布殊擔心，公眾會指摘由公帑出資、去拯救作出錯誤決定而面臨財政困難嘅投資銀行，特別今年係大選年，他擔心會被指偏幫華爾街的銀行家。 財長保爾森星期三的演說，亦都透露左雙方分歧。 保爾森話，聯儲局面對嚴峻挑戰時候能夠推出創意救市措施值得表揚，但新推出信貸拍賣機制係咪會成為長期措施，目前是太早落定論。 他說貝爾斯登事件反映世界已經改變，政府係有需要檢討目前監管投資銀行架構。 保爾森最近更指示，美國證券及交易委員會邀請埋聯儲局，參與監管投資銀行。 一旦聯儲局將勢力蔓延至商人銀行，到底最終會成為什麼局面。 不單美國，英倫銀行繼早前拯救北岩後，亦揚言要採取革新措施，可能會以SWAP形式，收購銀行MBS。 酒樓老闆引起的道德風險頂多影響整個行業、以至業界數萬名員工生計，但投資銀行的影響力，相信大家都心裡有數。

喺復活節長假期期間，美國金融市場真係出現左一片復活跡象，有兩宗好消息，被市場形容為最差情況可能已經過去，包括左摩根大通提高五倍出價收購貝爾斯登、以及數據顯示，二手樓有見底跡象。 成日話美國樓市係「危機之源」，到底樓市見底未？ 美國二手房屋銷售、二月銷售上升百分之２點９，七個月以黎首次上升，表面睇好似唔錯。 不過，成交上升背後，係買家成功壓價，樓價就要急跌百分之８點２，係有紀錄以嚟最大跌幅。 樓價出現咁大跌幅，係斷供物業不斷增加，喺一啲重災區好似係內華達州同聖地牙哥，有四成樓市成交都係嚟自斷供物業。 有代理話，佢地每賣出一個單位，就會收到兩個嚟自銀行收番嚟嘅斷供物業。 斷供物業唔止嚟自房利美或者COUNTRYWIDE，仲有係政府嘅房屋及城市發展部(HUD)。 HUD由於向銀行提供按揭保險，最終都係變相持有唔少斷供物業，最近為左減持物業、政府甚至向一啲非牟利嘅地區發展商，提出一美金一間屋嘅計劃。 有分析員認為，銀行同按揭機構肯大幅擘價，係面對現實嘅做法，至少可以吸引一啲仲有供樓能力嘅公務員、教師呢類中產人士買入過去佢地負擔唔到嘅樓價。 不過到底樓價仲要跌幾多先至夠？ 瑞信話，喺邁阿密要跌多四成、喺洛杉機要跌兩成六、喺內華達州要跌兩成。 另一個可能影響樓市成交因素、華爾街日報話係唔少物業都已經按揭證券化，賣家要減價求售，要先向按揭機構證明成交價係合理價，可能會影響樓市調整速度。

當摩根大通提出兩美元收購價時，已經有同事提出，不如博聯儲局提高收購價，可能有平嘢執! 當摩根大通願意提高出價五倍，提高至每股十美元時，同時肯真金白銀孭十億美元虧損，證明十美元作價仍然偏低。 傳聞華爾街大行的銀行家對今次聯儲局出手不單毫無謝意，更是「恨之入骨」，他們認為江湖事就應該由江湖處理。今天我可以穿Paul Smith戴名表駕名車，就有心理準備明日預左PK收場。 到底當日貝爾斯登出事前，想公布的業績到底盤數有幾差、抑或像雷曼一樣根本無事？可能成為歷史另一大懸案。