應驗
呢頭長實主席李嘉誠先至呻完, 話起樓唔一定賺, 嗰頭就即刻應驗! 有批發展商要蝕添!
地價一個月內下跌近兩成!
百利保以近24億元, 中標九肚56A區地皮, 平均樓面地價只是6837元, 較月初批予俊和的鄰近地皮, 低咗18%。
相比年頭九肚地王要過萬蚊一呎, 今次地價甚至大跌37%。
換句話講之前七幅地皮嘅得主, 已經買貴咗!!
越賣越平, 賣地計劃中最後一幅沙田九肚豪宅地, 結果由百利保, 以低於市場預期價中標
6837不單是今年內, 同區五幅地皮中最平宜, 比年初兩幅景觀較好的地皮, 低至少33%, 亦都是三年內區內第二低地價地皮
測量界形容一個字: 差!!
原因正是入標標數不少、不止一兩支標，都有六七八支標，即是代表發展商不約而同都很保守!!
由今次賣地睇到, 李嘉誠對明年樓市預測, 咁快已經應驗!!
亦睇到超人雖然, 最近絕跡於記者會, 但始終不吐不快!
超人話自己對樓市、無話可說! 樓市由特區政府決定, 發展商已經無討價還價嘅地位咁講!
任憑發展商、代理界等等點樣軟硬兼施都好, 財政司司長曾俊華強調會繼續堅持樓市辣招。
但臨尾司長漏了一句口風，說是會於適當時候取消辣招。
此言是否有意回應超人? 財爺又話，尊重李嘉誠決定不遷冊，但係唔遷冊啫，亦都唔投資又點計?!
由舊年十月推出買家印花稅以嚟, 長實只係成功投過一幅、價值只係29億嘅馬鞍山地皮, 相當保守!
連誠哥都話睇唔通四至五年後市, 政府又認為自己真係把握到適當時機咩?!
睇怕、李嘉誠口中嘅政策風險, 仲要揹落去。
講真，連李嘉誠都話唔識睇樓市前景喎, 同以往幾年叫大家自住可以買樓自住嘅口吻、有好明顯變化!
事關誠哥話, 樓市辣招嘅負面影響, 估計會滯後到出年浮現, 到時將會影響整體經濟。
以佢老人家一向發言保守，言下之意的潛台辭，向淡、多過向好!
唔怪得之, 誠哥表明而家係全力減債、去槓桿為上!
加辣招喺二月尾, 推出至今半年, 二手樓註冊量只係得萬八宗, 比起出招前半年大幅急跌38%。
銀碼越大, 跌幅越「甘」, 1000萬以上嘅成交得一千宗, 勁跌一半。
即使500萬以下嘅中細樓價, 跌幅亦接近3成半, 確實反映政府辣招, 同時打擊換樓、同上車人士置業活動。
李嘉誠表明唔會撤資, 但行動上就散緊貨。
不過亦唔係話散就散到! 喺大窩口嘅昇柏山仲有35%、涉及140伙未賣, 當中三房單位賣得慢啲, 佔五成七, 唯有變相減價百分之二去貨!
咁就更加貼近區內二手樓價, 甚至同居屋盤呎價, 只係相差一成多啲! 亦反映長實減價, 由歷史證明, 往往就是樓市最後一根稻草。
留言