2007年7月13日星期五

富田農場 薰衣草 昂平360 (題外話)


今年賞薰衣草最好地點不在富田農場,而是商業味較淡的彩香之里。

去到富田農塲,你會被眾多遊人數目嚇親,每張相一定會影到隔離嗰個,真係人山人海。

不過令人奇怪的是,諾大一個農場,少說也請了數百人營運,遊客卻不費分毫就可玩過夠,又無政府資助,點為皮?

翻查富田農埸歷史,原來曾經一度面臨倒閉,1972年薰衣草由於貿易自由化、引進外國合成香料,令薰衣草一夜變廢草,價格大跌,農民連收割的成本也收不回,於是遍地薰衣草無人理,富田亦想將農場結束。

就在1975一張相片不但拯救了富田農場,亦改寫了富良野歷史。

當時有攝影師拍下富田農場的面貌,並印在翌年JR年曆上。日本人一看之下驚為天人,認為係世間仙景,之後遊人絡繹不絕,到八十年代富田農場正式發展成旅遊區,不但靠手信紀念品、農產品及飲食業務帶來收入,一度成為廢草的薰衣草,亦成功提煉特製香水「FURANO」,於九零年法國大賽中榮獲冠軍,可以說,今時今日的富田農場是結合了務農、旅遊及飲食事業,遊人亦可以免費賞花。

由富田想到我們特區旅遊事業,到底特區而家最需要救的旅遊項目是什麼?不說也知是「跌左落地」的昂平360。

要點救? 千祈唔好再搞鬼佬拜神,香港雖然無薰衣草,不過就獨有四隻國寶。不如就將海洋公園入面兩隻「老國寳」安安佳佳送去大嶼山,再在昂平360重開之日,影一張安安佳佳頭上有纜車相片,發送全球,效果肯定好過搵特首來「開光」。

安安佳佳而家對海洋公園都無咩剩餘價值,而家搬到大佛腳下,邊際效益大大提高,可以仿傚澳洲動物園賣樹熊屎, 用個靚樽仔裝住國寶糞便賣給遊人, 到了安安佳佳百年歸老,又可以起番個熊貓紀念館,到時賣紀念品賺到錢,360可以學下富田農場,免費比人搭又有咩所謂!

沒有留言: