文章

顯示從 5月, 2010 起發佈的文章

「飼料」起革命

「第十二跳」唔單止影響單單一間富士康,甚至挑戰緊中國「世界工廠」呢個經營模式,影響仲要有高度傳染性,而家唔止本田、連國企都有人擺工。 今年56歲,富士康創辦人郭台銘,其實處理今次危機、反應唔可以話唔快,仲要一個星期內、兩次由台灣飛去深圳處理危機。 一向做人較為囂張既郭台銘,甚至要四度鞠躬道歉,仲公開收回了一封被視為麻木不仁既致員工信,對呢位台灣首富,都可以話難得一見。 郭台銘廣為人知係佢多姿多采既娛樂新聞,而佢既管理風格亦都係好多MBA既研究對象,郭台銘一直鼓吹軍事化既領導,佢曾經講過成吉思汗係自己偶像,手上仲有一串來自成吉思汗既念珠。 但今次認晒低威,似乎對解決危機都係於事無補,到底點解? 要答呢個問題,可以先睇下呢個被稱為「紫禁城」既富士康龍華廠房,佔地約1平方英里。 有齊消防局、書局同游泳池,傳聞郭台銘只要喺深圳,每天都會去游早水。 更誇張係有十幾間唔同地方色彩餐廳、聽聞每餐就要煮十噸大米,單係保安,就有超過一千人。 但最核心既幾十座廠房之中,每座就負責一個品牌,包括蘋果、HP、Motorola同任天堂,但每個廠房之間,為了保存客戶機密,工人都甚少互相往來。 高度既分工化,係富士康以至眾多外資企業過去賴以成功既經驗,不過面對新一代民工、唔再係嚟自農村,佢地好容易通過手機、互聯網獲得資訊,知道年輕既工人唔應該再成為大企業賺錢既機器。 睇過華爾街日報駐華記者「張彤禾」08年出版、花左兩年時間追蹤東莞女工既「Woking Girls」,已經一針見血提出左,全國總數達到二億既民工,佢地湧入大城市,好快就淪落為二等公民,而喺高度分工化既工廠,根本搵唔到朋友,而佢地喺工廠之內,只係為視為「飼料」。 喺龍華廠房入面,每個人手上都有一本「郭台銘語錄」,名言之一就係「集體利益高過個人利益」,試問咁既環境,對啲十幾歲後生仔點會令人唔產生壓力? 其實睇番股價,富士康一直都係強差人意,似乎反映OEM代工呢個缺乏創意行業,賺埋賺埋,其實啲盈利都係去左好似係蘋果同諾基亞呢啲大型客戶身上。 為左平息不滿,富士康已經提出將人工調高兩成,到底加人工兩成有無幫助? 富士康基本工資只係每個月900元人民幣,係法定最低工資﹐但大多數工人都加班﹐呢筆錢往往就多達標準工資1.5倍。 某程度上,企業都係盡量要求員工加班,喺佢地清醒時候盡量將時間留喺生產線,一嚟可以提高效率,最重要係唔比時間佢地拍拖、甚至諗

把脈

長江1號,同長江7號同時出現。 論風頭,七號星爺贏曬,仲鬼咁有娛樂性! 但論得著,當然要數番一號誠哥。 正當四叔話睇唔通後市,兼高位沽左部分股票,寧買地產。一日之後,誠哥有俾睇法! 唔單止買,已經尋日買左。嚟緊仲會買! 港股跌至萬九點,李嘉誠話,依家可以買股票,佢喺星期三就入市買咗系內公司股分。 同三月底業績記者會「溫溫吞吞」截然不同! 當然,那時的股市達到二萬一,今日就穿過萬九! 但誠哥都有叫大家小心! 佢呼籲,股市投資者,要決定入市、一定要睇清楚市盈率。 至於樓市,佢話早前政府拍賣兩幅地,價錢都合理,目前市場仲有需求,喺通脹重臨前,如果純粹買樓自住,依家可以買。 面對唔少「八十後」話買唔起樓,李嘉誠以自己親身經歷做回應。 「我當年打完工,再做生意,都賺到錢,但都要十幾年至買第一間樓,所以大家應平心靜氣為香港好諗呢個問題。」 從對股市睇法,聽誠哥,定四叔,大家自有答案。 的確,近日賭後市會升,唔止誠哥。 先有末日博士麥嘉華「彈弓口」,改口話股市超賣,會大幅反彈之後,重量級人馬,亦相繼睇好。 前大摩策略員,著名分析員巴頓碧斯,同新興市場教父麥樸思。 舊年率先話股市見底嘅巴頓碧斯話,美股被過分超賣,估計未來幾日有機會出現急速反彈。 如果股市可以上升至新高水平,佢亦唔會感到意外。 翻查巴頓記錄,佢對後市預測甚準。 至於一直呼籲投資者低位買貨嘅麥樸思就講明,話依家熊市係無根據,因為市況只係牛市調 整。佢最近已經掃緊「金磚四國」,包括中資股在內既股分。 事實無論從市盈率,PB睇,港股確實跌至合理水平。 買咩? 都係聽誠哥忠告,合理PE,具備質素。 不過我肯定唔會買長和就真!

埋伏

內地股市第一個炸彈啟動了--QFII股指期貨。 內地將准許外資透過「合格境外機構投資者」QFII投資股指期貨,陰謀論是中國在第二輪中美戰略與經濟對話期間,由於美方對匯改立場不再堅持,但就要求中方允許在境內設立的合格外商投資公司,可以開展股指期貨業務,合格境外投資者亦可投資股指期貨產品。 結果中了第一個埋伏! 目前外資只准投資上海以美元計價,深圳以港元計價的B股,至於以人民幣計價的A股,只限擁有QFII資格的外資投資。 有內地不少分析已指,容許外資投資股指期貨,會大大增加A股市場的風險。 特別是目前股指期貨開戶人數超過二萬二千戶,但平均每日佔成交額已經達到一千五百億元人民幣,甚至試過高於現貨市場,反映股指根本成了大戶市場。 目前AH股有咁大差價,某程度是內地過往只准買單邊,由於缺少了對沖,令同一間公司的股分,在AH估值上有咁大分歧。 一旦外資可以透過QFII玩股指,對沖工具增加了,自然會更放心打入這個大戶玩家市場。 還記得早前有三名國際大鱷開始部署做淡A股? 單是過去兩日看末日博士麥嘉華變臉變得咁快,已經令人神乎其技!

又熊? 咪玩!

局勢變化之快,相信大家都不得不憂慮今次調整會否高於預期? 特別令人擔心是歐洲債務危機,已經蔓延到信貸市場,倫敦銀行同業拆息升至十個月高位,今日進一步升至0.536厘。 銀行會否再次出現雷曼爆煲後的交易對手風險? 由於信貸市場開始緊張,多左銀行透過向歐洲央行拆入短期資金。分析話,借貸成本仍然處於低水平,但關注連鎖影響。 全球央行量化寬鬆政策,現水平拆息,同前年超過四厘高位,仲有好大距離 問題係,歐洲債務危機未平息,三個月倫敦銀行同業拆息,已經十個月嚟首次升穿半厘水平,較三月時水平,升幅一倍。 觸發歐洲問題惡化,最新只係西班牙央行上周末緊急接管咗一間出現財務危機嘅地區儲蓄銀行,市場憂慮歐洲嘅銀行體系可能出現更多問題,令投資市場避險情緒升溫。 的而且確歐洲債務危機,已經有跡象漫延到美國,以至區內信貸市場。 美國一間上市公司,就因為融資成本上升,取消2.5億美金發債計劃。 美國最高流量通企業債券亦受影響,高盛十年期債券買賣差價,由平日5點子擴闊到20點子,情況少見,反映金融市場信心減弱。 就算港元短期拆息,近日買賣差價,亦都大幅擴闊。 而熊亦率先在國指上體現,高位跌兩成,步入技術上熊市。而恒指再跌多5%亦到熊市區。 轉眼間兩個月內,由天堂,變地獄。 幾時見家鄉係散戶問得最多問題。升市莫估頂,跌市亦莫估底。 不過亦有高人提醒,市況未見有基本性因素轉變,如果說西班牙銀行出事,大家又記唔記得美國有數百間銀行已被接管? 那個什麼朝鮮局勢更令人摸不著頭腦,令人懷疑是否北韓有人上周已沽空韓元同股市、而家借淡消息出貨? 最恐慌的日子令大家忘記眼前機會、還記得去年三月的日子嗎?

血汗工廠

作為一個輸過錢既股東,我對富士康應該都有些發言權。 富士康今年發生了 "第十一跳",公道些講,以一個在內地聘請八十萬人的大型企業,出事率只有0.001%,雖然說得涼薄,不過並不算誇張。 今年第11個墮樓的員工叫李海,年僅19歲、湖南人,中專學歷。 日前才說富士康不是「血汗工廠」,董事長郭台銘晚上要緊急由台灣飛往深圳,處理事件,仲表明會以最公開透明方式處理事件。 事件在社會亦有很大反響,除咗深圳市政府同警方的調查,內地民間亦介入事件。 由今年1月23日開始,富士康已經發生11宗員工墮樓事件,單喺5月,已經有5宗墮樓死亡事件。 統計顯示墮樓者由18至24歲,作為一個有好大前途青年,打分工,使唔使死? 有墮樓死亡員工家屬話,喺富士康工作,心理壓力好大,干部經常駡人,廠方實行半軍事化管理,更令員工冇哂尊嚴。 當然一些社會學家會出來說,一孩政策令孩子承受不了壓力,又有人會歸咎於社會財富不均,令藍領工人變成沒有出頭天。 內地有不少評論話,富士康管理模式,比一般廠房是分工更加仔細,亦都採用咗類似軍事化的管理模式。 其實我相信這個「分工」正是點出了最大問題、可以調轉說亦是富士康最成功的地方。 富士康係世界最大嘅手機代工(OEM)生產商,主要合作伙伴,包括惠普同蘋果。 有網站就追踪過最近運往歐美的iPad物流訂單,發現出貨地點正是富士康位於深圳的廠房。 其實蘋果內部同樣實行類似的分工,喬布斯甚至將科研人員區分成不同領域,部分研究人員的工作,根本就是「放煙幕」,旨在令對手混淆。 看過"Options: The Secret Life of Steve Jobs”都知,雖然擺明是杜撰小說,但當中提及蘋果內部人員互不溝通,甚至不知道自己研究的部分,最終是放到那個產品,這亦正是喬布斯的刻意擺佈員工,而富士康亦緊貼這種文化,令員工變成沒有個人,只有整體。 作為投資看待,我很後期方明白,富士康的成功,不反映在本身股價上,要反映的、應是在蘋果的股價身上。

1算?

默克爾一意孤行,自行宣布禁止沽空同CDS,措施成功令國會通過撥款支持拯救方案。 加上德國同法國承諾加強合作,同擔心央行可能入市干預,消息令歐元由四年新低急速反彈。 而炒家亦有見好收手既跡象,截至上星期二歐元既沽空盤,由破紀錄既十一萬三千八百幾張,減少至十萬七千張,反映唔少投機者開始獲利離場。 那麼,危機是否已經過去? 金融時報Lex提出,現在歐元有三大危機仍然有爆煲風險。 第一是歐元解體風險,當然半年咁講大家會當你傻,現在已經開始變成New Normal。 外界對歐元無信心,單係今年頭兩個月已經有超過五百億歐元淨流出歐元。最好笑係最早估計歐元見一算既法巴貨幣策略員話,自己身為德國人,佢願意為政府愚蠢行為致歉! 預計今個星期、歐元嘅沽壓會重現,大行而家共識更預測六月底前,歐元會跌至1點18美元、呢個歐元喺九九年面世時嘅水平。 至於第二個風險,就是希臘會否真的選擇破產? Lex提出,雖然過去十多年分別有98年俄羅斯及 01年阿根庭違約,不過當時佔的債務合共只有1550億美元。 今天單是希臘債務就達到3500億美元,如果計埋其他PIIGS就不得了。 至於過去最被人忽視、現在開始令人意識到的問題,就是各國之間的協調行動。 情況就像今次德國單獨行動,Lex說不緊手法錯誤,更是錯打對象,更令人意想不到,就是突顯各國各自為政。 法國批評損害債市流動性,對德國造法遺憾,意大利更直指任何金融改革應該共同進行。 有不少報告已經提到,德國處事手法,最終只會令歐盟成員各散東西。 也許默克爾過去的確是一名政界鐵娘子,不過面對民望跌至十年新低,歐洲如果再無法出位像美國一樣的新領袖,一算的日子也許不會太遠。

叛將

美國推動大蕭條以來最大刀闊斧金融改革,結果釀成周四美股大跌! 參議院通過改革法案,最快下月落實,賦予政府更大權力監管市場和銀行業,日後就算有大型金融機構出現財困,當局有權接管、不須動用公帑拯救。 美國參議院是以五十九票對三十九票通過金融改革法案,這份議案會跟去年底眾議院已通過的改革方案整合,預計最終版本會於七月四日美國獨立日之前提交總統奧巴馬簽署落實執行。 奧巴馬指華爾街的利益集團想阻攔監管改革的意圖已經失敗。他強調方案不是要懲罰銀行,而是要雙嬴。 今次的改革方案,被視為美國三十年代經濟大蕭條以來最大規模的金融改革,包括新成立一個保障消費者的監管機構,禁止金融機構進行坐盤交易,以及加強對衍生產品的監控。不過共和黨參議員則認為方案阻礙金融業創新,以及會令信貸市場進一步緊縮,因此一直反對議案。 這個法案一向被認為是阻力重重,為何到最後關頭又變成輕易通過? 當中要歸功四個共和黨內逆將,正因為四人面對不同的政治因素,令華爾街一批大行可能要面對一場夢魘。 當中Charles Grassley是最早表態支持法案,而Scott Brown雖然在19號的最後表決中(Cloture)未有支持方案,不過政圈一直估他作為Senate中年資最淺的議員,因為一直表態支持監管金融業,最終他亦同意了方案。 反而值得一提的是共和黨的Olympia Snowe,此女子曾被時代雜誌選為十大最重要議員,而她亦一直是共和黨內的溫和中間派,包括曾支持合法墮胎及同姓戀權益。Snowe今次可以說是充分運用了政治籌碼,明知民主黨極需要她手的一票,於是對方案作出大量修訂,而共和黨亦是有求必應。 既然方案已經得到參眾兩院同意,是否代表華爾街末路? 由美國銀行股星期五出現「離奇」反彈,相信是市場有另一套解讀。 一個可能令銀行仲有一線生機的機會,是法案仍要整合兩院的方案,方可交予總統簽署,雖然當中的分歧微乎其微,卻對銀行的營運有極大影響。 當中首要的是關於衍生工具的監管,雖然兩院都同意銀行參與衍生工具交易要增加透明度,以及需要在銀行及顧客之間再透過第三者交易,不過參議院的規管更加嚴謹,甚至要銀行將衍生工具部門獨立分拆出來、可說幾乎完全無灰色地帶。 要人知道、那些什麼CDO、CDS、INTEREST SWAP都是賺快錢最多的工具,高盛可以在第一季一日都唔需要輸錢,衍生工具功不可沒,目前要在這點讓參眾兩院統一看法,似乎仍有不

赤裸.空言

歐洲既債市同匯市交易商,琴日收市後經歷左一場恐慌性拋售。 如果無開著個email account,比人「挾死」左都唔知發生咩事! 事關德國金融監管機構喺歐洲收市後,突然透過發出電郵、宣布禁止Naked shortsell(無貨)沽空歐元區債券,亦禁止投機性買入CDS,整個金融市場都比呢個突如其來消息搞到反轉再反轉! 歐元即時已經低見四年新低,跌至1點21兌一美元邊沿,離面世時1點18相距不遠,而資金避險,拆倉潮更推低澳元跌穿84美仙,係舊年9月低位,金價亦都失去避險功能,歐洲股市就大跌。 諷刺既係、呢個德國金融監管局兩個月先講過,無證據顯示CDS係今次債務危機元兇,點解突然間有咁大轉變? 當然大家明白一切都係政治Show! 因為德國國會,今日開表決係咪支持歐盟同IMF提出既拯救方案,「鐵娘子」默克爾要為自己做勢,佢更警告,歐元正面臨最大危機,又首次提到,要研究設立機制、比歐盟成員國有秩序咁破產。 其實默克爾今次既舉動,一啲都無令人意外,東德出身既佢、一向都係以硬朗見稱,佢今個月初甚至講過,今次係危機係執政者同市場之間既戰爭,而佢一定會得到最後勝利。 既然佢都將今次事件界定為開戰,有咩工具唔可以用? 不過熟悉CDS交易的人都知道,但原來全球11萬億美元總額CDS交易中,針對歐洲主權國嘅唔夠百分之一,只有1080億美金。 法巴既分析亦話,由於大部分無貨沽空同CDS嘅交易,都係倫敦進行,因此德國禁止無貨沽空,相信對市場實質影響唔大。 既然影響唔大,加上同樣係禁沽空、上次美國禁止沽空金融股,並無引發過大問題,金融股股價仲推高過一段時間。 但今次德國禁沽空同CDS,居然會引發咁大沖擊? 華爾街日報話,市場見德國採取咁強烈既措施,一來擔心歐洲既債務問題仲有隱暪,恐怕問題陸續有嚟。 另一個憂慮,就係08年時出現既交易對手風險,由於歐洲債市幾乎陷於停頓,利率被大幅扯高,喺大家唔知道對手有幾大問題下,銀行之間流通性顯注減少。 事實上,德國變相禁止CDS交易,已經觸發全球違約交易掉期急升,而企業債券息率升幅仲顯注,更直接增加左公司既成本。 倫敦銀行同業拆息已經連升六日,市場恐慌,歐,美,亞洲企業違約掉期指數全部抽高。 紐約大學教授魯賓尼都認同歐元有解體危機。 魯賓尼表示,希臘等多個歐洲國家出現既債務危機,已經「喚醒」左市場對一啲高負債國家既憂慮,同樣既債務問題,好快會出現喺英國、日本,

投資高手

環球股市,第一季表現反覆,三大投資高手,巴菲特,索羅斯,同約翰保爾森都大幅調整手上嘅投資組合。 巴菲特既變化最易估,投資旗艦巴郡選擇喺第一季選擇大手沽貨、其中,大幅減持左三千一百萬股卡夫股權,按市價計,套現近十億美元。 巴菲特曾經多次,反對卡夫收購「吉百利」股權,話整個交易非常愚蠢,而其中更蠢係出售賺錢既Pizza業務。 好明顯,佢沽售卡夫股票以示抗議。 另外,巴菲特為左完成畢生最重要投資Burlington,亦都減左強生、評級機構穆迪、寶潔以及他認為是近年最失敗投資、能源公司「ConocoPhillips」。 甚至將包括UNTED HEALTH在內嘅四隻股分,全數沽售。令佢股票組合總值,下降一成二,到五百零九億美元。 當然,股神不是部署退休,除了Burlington及「堅守」高盛外,巴菲特早已表明有意擴大海外投資,第一季就入股了德國的Munich Re,至於比亞迪股神都講明無意減持。 事實因為1211的成功,今年佢就已經打算到訪內地,明年再到印度日本探路。 一個擅長價值投資,另一個就精於尋找市場的沒有效率、再大手套戥賺取差價。 索羅斯喺第一季差唔多沽售晒手持嘅花旗,由九千幾萬股,減到萬零股。 基金轉為增持咗248萬股摩根大通,同14萬股富國銀行,亦些微吸納咗高盛股分。 除咗銀行股,索羅斯又增持埃克森美孚、可口可樂、麥當勞、VISA、GOOGLE同甲骨文。 同股神一樣,索羅斯亦減持強生、寶潔。另外更盡沽所有Palm嘅股分。 那豈不是錯過了HP的高溢價收購? 老猫燒鬚! 由股神同索羅斯都沽出傳統防守性強既P&G及強生,似乎二人都傾向轉攻更進取的市場及股分。 又看看最近拒收新客的「沽神」約翰保爾森,就對賭股情有獨鍾,買入4000萬股美高梅,成為第二大股東。 邊個「賭性」最強,都唔使點講啦!

Greed is good

圖片
識唔識"Gordon Gekko"? 可能呢說話你會有更深印象: "Greed is good!" 仲有一句名言:"Money never sleep"! 廿三年前大片,奧利華史東利用左08年金融海嘯既機會,將87年大片拍續集,話說主角Gordon坐左八年監後刑滿出獄,本來準備重投華爾街,點知呢名廿年前大鱷,發現自己已經跟唔上時代了,而家既華爾街中人,比佢當年仲貪婪同凶險! 我地唔係想講影評,雖然部片變成溫情片就真係令人奇怪,不過"Greed is good!"呢句說話,對於一批歐盟領導人嚟講,真係別有一番滋咪在心頭! 見到今日歐元重挫,由十八個月低位變成四年低位,唔恐慌就假,而且啲歐資大行繼續掉轉槍頭,先有瑞銀估歐元會跌穿面世水平,而法巴同RBS仲估要見一算先心息,話歐元已經「無底」! 唔怪多個歐盟領導人,都將今次債務危機傾向歸咎炒家做市,眼見班炒家自從上次「BBQ Party」,就一咪累積空倉,難怪好似希臘總理帕潘德里歐都話,會對要承擔責任嘅美國投行,唔排除向佢地採取法律行動。 難聽啲講,呢個時候仲只係識怪炒家造市,唔諗下自己過去又造數又借高盛出手,真係搏同情都搵對象,而家只係令人覺得推卸責任。 更大問題係歐盟國之間內耗,上星期先傳出法國總統薩克科齊,要向德國總理默克爾威脅退出歐元,今日FT又爆料,話默克爾真係諗過用「家法」,將希臘逐出歐元區,但最終各國因為驚會令歐元解體,呢個諗法先至作罷! 事到如今,歐元全世界都睇得咁淡,我地又試下逆向思維,係咪可以人退我進? 歐洲央行行長特里謝,今日用左一個Quantum Leap「量子躍進」呢個字眼,要求歐盟國要加快改革本身財赤,唔可以容許債務問題蔓延。 似乎各國亦意識到問題嚴重性,意大利亦都繼西班牙同萄葡牙,公布左削減財赤方案。 另一個留意,係519,即係星期三,希臘當日需要償還85億歐元債務,有分析員開盤口,話希臘如果真係可以如期還款,就代表佢地願意承擔責任,可能係歐元逆轉時機既一個好機會! 事實係歐元眨值,金融時報社論都提其實真係有利歐洲改善出口,包括大摩等三大行,都已經向歐洲既出口同銀行股開CALL,認為PE低於十倍抵買。

歐元瓦解

說這番話的、不是孫柏文。 是自稱為歐元支持者、前聯儲局主席、現任白宮經濟復蘇顧問委員會主席PAUL VOLCKER。 佢表明好擔心歐元有瓦解危機,沃爾克有分量,一向慎言,連佢都咁講。 歐洲呢次有禍臨頭,事關絕招都已出埋。 沃爾克話,歐元區組成,理想同現實似乎有距離。佢好懷疑,危機過後,整個歐洲無論政治、定係經濟,係咪真係可以更加團結。 受債務危機拖累,歐元被拋售,跌穿1.2422,係08年十月底、雷曼爆煲以來最低,連英鎊亦跌到一年低位。 華爾街股市重挫,道指跌近二百點。歐洲股市急跌,英國、德國同法國股市跌百分之三至四,西班牙股市跌過百分之七。 Vix急升25%,一切打回原形! 連以為可以避險的黃金,創新高後都要顯著回落,都說「普天之下無樂土」,連以為避險的黃金,都一樣害怕會跌價。 外圍告急,歐元一日急跌超過一百點子,問原因,其實無新消息! 近乎萬億美金,點解說服唔到市場? 因為市場要睇淡,依家話驚滅赤影響經濟。 歐洲面對危機,有幾團結呢? 就係自己唱自己,德國主要銀行德意志話,佢地有理由相信,希臘永世都還唔到錢。 瑞信更話,債務危機,加監管因素,整個歐洲銀行業,面對2400億歐元虧損,到頭來,要再向外集資。 各懷鬼胎,仲要數最高領導人。 滿以為上星期日馬拉松救市會議,大家和好如初。但歐盟之中嘅大國、德國同意拯救方案,原來內裏有段古。 外國傳媒引述西班牙首相爆料,德國默克爾其實一直擺出事不關己態度,最後之所以肯達成共識,原來係法國總統薩克科齊威脅佢,話如果唔出手,法國就退出歐元。 雖然德法已經即時否認有關報道,但仍然引起市場無限揣測,而歐元瓦解既講法、亦都甚囂塵上。 當然,我們同意歐盟已經盡了最大努力,提出最具震撼力方案,不過面對一個結構性問題,要南歐國節衣縮食、共渡時艱肯定係不切實際,而家可以想像最終結果只會是歐元瓦解,到時馬克反而有機會重生,其實未必一定是壞事。

樂. 瘋

圖片
今日同事之間最有趣的財經新聞,是聯想下星期一喺內地推出自行開發嘅智能手機Le(樂) Phone。 擺明挑戰蘋果嘅iPhone,售價更係iPhone嘅差唔多一半。 行政總裁楊元慶仲開大炮,話噤都輸就好失敗。 係咪咁猛料? 睇內地評論又真係唔錯。 用最新既3.7寸AMOLED觸控屏幕,比iPhone嘅3.5寸大少少。 處理器有成1「激」,係目前智能手機之中最高檔,表面就強過iPhone。 作業系統、樂Phone以Android os 1.6做基礎,雖然唔係最新版本、不過就配合聯想自行開發、更切合本地化既系統,有齊QQ、淘寶同支付apps。 再加上Android開放平台,有數萬個開發商嘅軟件。(當然iPhone apps有15萬....) 不過用嚟影相,大家都無乜特別,都係得三百萬象數。 有綽頭係樂Phone仲可以加個外置鍵盤,變身做NETBOOK。 聯想撼蘋果,仲用埋同一個電訊商聯通,再大打價格戰,賣2899人民幣一部,平iPhone超過二千元。 咁多優勢,難怪楊元慶咁大口,預計推出首年,可以賣到一百萬部以上。 事實最近Android同iPhone已經激戰至白熱化,聯想之外,HTC亦係Android支持者。 被蘋果指侵權的HTC,就向美國國際貿易委員會提出控訴,反指蘋果侵犯佢哋五項專利, 包括手機進入休眠模式嘅、電源管理技術,電話簿儲存,同單一聯絡人選取撥號技術。 HTC仲要求委員會,禁止蘋果iPhone、IPAD同IPOD喺美國銷售。 iPhone零七年推出,但HTC北美副總經理話,佢哋早喺零二年,已經率先推出智能手機,依家喺美國賣緊嘅,有十二款咁多, 提出控訴,係要捍衛公司知識產權。 蘋果三月初,至控告HTC,侵犯佢哋二十項專利,但普遍認為,蘋果真正嘅矛頭,其實係GOOGLE, HTC智能手機,就係採用GOOGLE開發嘅ANDROID作業系統,呢個系統,對iPhone嘅威脅,越嚟越大。 GOOGLE年初,仲推出自家品牌手機,兩間公司喺手機市場嘅激爭、有幾激烈,睇吓最新智能手機排名就知。 美國智能手機銷售(第一季度) BLACKBERRY 36% ANDROID 28% iPhone 21% 資料來源︰NPD

大戶點心

日前以低價認購 意馬 九億多股的梁伯韜,不足一星期隨即減持全數股分,獲利三億多元。 我們找到梁生,他說減持純是私人投資,與榮生沒有關係。 令人奇怪的是,585已經連跌七日,累積跌左五成以上,為何梁生揀而家先減磅,仲要今早跌左13%後先來出手! 雖然配股價只有4毫,但不要忘記梁生入股價是七仙。 以為跟大戶搵食,結果又成為大戶點心。 股壇DAVID WEBB指,事件再次證明,意馬供股有可疑,他會去信要求有關方面調查有沒有涉及操控。

快閃股災

上個星期五,美股驚險十分鐘、暴跌近千點,至今仲未搵出真相! 大跌市原兇,事隔近一周,疑兇可能係一間期貨交易商。 商品期貨交易委員會主席詹斯勒,喺國會聽證會上,無點名指一間期貨交易商,有可疑。 佢地番查記錄,發現呢間交易商喺大跌市當日,下晝兩點三十二分入市,大手沽標普五百迷你期指合約,之後嘅十分鐘,道指突然急挫六百幾點。 而佢地喺當日做嘅呢隻期貨,數量佔咗總成交高達9%。 不過佢同有分出席嘅美國證監會主席夏皮羅,仍然強調,未真正搵大跌市嘅主因。 而家可以肯定,只係已經排除有經紀按錯掣,大手錯沽寶潔,或者係受到恐怖組織、以及黑客嘅襲擊。 花旗終於還了一個清白! 美證監已經傳召緊一啲人,搜集資料。包括一啲對沖基金、以及有份沽低個市嘅交易商。 佢地並且相信,納指等多間電子交易所無停市機制,係加劇個市跌勢嘅其中一個因素。 因此證監、同當地六大交易所開會,會後各方原則上同意、成立一個統一嘅停市機制。 不過大家真的相信,停市真的有幫助嗎? 反而事件中突然全數消失的黑池/高頻交易,監管機構卻未見有所行動。 而交易所以六成波幅作為取消交易的界線,亦引發了不少爭議。 有基金經濟就投訴,交易所臨時決定取消喺冧市期間嘅一啲交易,令佢地本來趁機撈底獲利,變咗好夢成空。 有個基金經理,見一隻ETF價格喺跌到接近零之後反彈,喺15蚊美金入貨。 但因為違反咗交易所提出嘅、股價波幅超過六成嘅規定,交易被取消,要見財化水。 反而另一個基金經理,遲佢少少啲先入,雖然入貴咗啲,但無違規,可以獲利。 納斯達克交易所話,呢個規定,係經過各交易所詳細研究之後決定,原先係想將兩點半到三點嘅異動交易取消,最終決定推遲到兩點八。

鬥氣? 捱義氣!

有無人諗過,地皮無人承接,後果會如何? 今日政府拍賣東涌地皮,成績遠比預期差、差到近年少見。 少見嘅、係拍賣官十一次警告、要收回地皮。 更少見嘅(應該說從未見過)、係南豐罕有咁、多次喺無對手下自行承價,連承六次價先至掂到政府心水! 自己托自己價,講落都替南豐難受。 最後南豐以三十四億二千萬奪得地皮,比勾地價只係高出一成九(再次引證八折勾地正確!)比原先市場預期嘅下限、仲要低超過兩成! 十六次承價,十二次係嚟自10號牌南豐。 南豐唔係無要求,佢地忍唔著問拍賣官底價係幾多,可能心中想比個底價我、一嘢KO就算,免得要自己同自己玩咁尶玠。 可惜拍賣官唔肯,南豐又要求降每口價,拍賣官最終就將每口叫價調低到二千萬。 以前、曾經試過發展商聯手投地,壓低地價。 今次相反、係發展商聯手唔投地,效果一樣,成功壓低地價不突只,仲帶嚟場面異常冷淡嘅效果。 九招十二式後首次賣地,令人揣測,係咪發展商想向政府擺姿態? 反擊政府呢排全方位規管預售樓花? 連拍賣官都話,拍賣情況不尋常,不過底線是成交到嘅,就係市價。 地產建設商會照例否認,係發展商發出不滿訊號,唔認聯手推低價錢。 唔係聯手玩嘢,好難令人相信囉! 真係好似陳啟宗咁講,當人家係「傻仔」? 整個新伊館賣地經歷不尋常半小時。全程最騰雞,唔係發展商,而係拍賣官。 照理未到價可以收回,從今日拍賣官表現睇,政府內部無評估過要回收,幸好南豐捱義氣助政府一把,佢賣平地,你唔使收回,勉強叫做雙贏啦! 原來最近已經要數番地皮、要去九四至九五年期間、當時政府一共推出三十五幅土地,有九幅都因為市場反應冷淡而收回,除咗一幅位於元朗公園北路嘅住宅用地外,大部分都屬於商貿用地。 政府希望樓價降溫,理應有勇氣收回,收回結果,係樓市即時降溫,兼唔會出現今日咁難睇嘅結果。不過拍賣官無勇氣、亦話唔到事,政府亦無內部評估,輸家似乎係政府。 成交價比勾地價高唔夠兩成,發展商係咪有心報復? 發展商當然唔認,但全程得三個發展商玩,亦有理由令人懷疑。 花旗話,項目落成仍然賣到五千五蚊呎,但賣地情況,唔排除連番措施後,發展商對後市有保留!更重要係,嚟緊供應增加,無需要搶價! 證明增加供應有效,政府早知如此,理應有所準備,一於收回就收回,屆時就可以更快達到樓市降溫目標,阿爺面前仲唔加分?

伯南克上身

估唔到一萬億美元,只係得一日貨仔! 市場質疑歐盟拯救措施嘅成效,資金只係短短炒左一日, 又再出現避險,流入黃金同日圓,現貨金升至五個月高位,琴日急升既「歐豬五國」股市,回吐番百分之二至四。 對於琴日歐盟提出七千五百億歐元救市方案,有傳媒形容係動用「核武器」,震撼程度史無前例! 不過睇歐元表現,就完全感受唔到,由琴日高位1點31,到今日歐洲市,跌穿過1點27,似乎市場更關心,係稱為「最後堡壘」既歐洲央行,都要放棄原則,轉行量化寬鬆,因此令歐元受壓。 似乎歐洲央行同德國都深明呢點,佢地保證歐盟既拯救方案,唔會影響貨幣政策,需要時會抽走過剩既資金。 不過華爾街日報話,投資者短暫歡欣過後,經濟學家更憂慮既係方案係會引「道德風險」,令歐盟結構性既債務問題,進一步惡化。 歐洲央行行長「特里謝」亦都明白市場憂慮,佢重申央行完全獨立,無受到任何政治壓力,又話有需要時會喺市場抽過剩既資金。 德國總理默克爾亦向市場保證,方案唔會觸發通脹。 不過諾貝爾經濟學獎得主克魯明就大潑冷水,佢話救市方案係犯左傳統既經濟學「謬誤」,即係將一個希臘國家破產既問題、當成流動性問題處理。 佢認為希臘再增加貸款,只會令債台高築。 至於歐洲央行破天慌推行量化寬鬆,佢話特里謝雖然好似係「伯南克」上身一樣,但好懷疑歐洲央行既決心。 新末日博士、紐約大學教授魯賓尼就話,歐盟救市方案先決條件、係希臘等國家係願意執行更嚴格既財政紀律、加稅同削減開支,但咁做反而會令經濟萎縮同引發通縮。 摩根士丹利亞太區主席羅奇亦都同意,方案無助改善「歐豬五國」既債務問題,佢相信最終會引發環球經濟、再次陷入雙底衰退。

震盪療法

一萬億美元! 即係七萬七幾億港元,相等整個香港本地生總值四點六倍,用嚟救市,震撼市場。 有經濟師形容今次歐盟同IMF提出既拯救方案,簡直係一次「震盪療法」,規模之大,仲要多過美國財長保爾森、零八年提出既七千七百億美元救市方案,係人類有史以嚟最大規模既! 歐盟成員國財長召開緊急會議,同意聯同國際貨幣基金組織,提供最多七千五百億歐元、相當於大約1萬億美元嘅資金,以免希臘債務危機喺歐洲蔓延。 歐洲央行同時執行量化寬鬆,「破天慌」購買政府債券,市傳即日已經開始入市,購買希臘 國債。 同時間聯儲局亦配合歐洲央行,重新啟動多國貨幣掉期互換安排,增加流動性。 聯合行動力度異常奏效,歐元匯價上升百分之二,亞太區股市造好,環球股市就急升近百分之二,法國股市升一成,歐豬三國升幅達到一成以上。 如果叫今次救市係「震盪療法」,而更大震撼係嚟自歐洲央行。 或者好似太平洋資產管理董事總經理、When Markets Collide作者「艾爾阿里安」所講,今次係以戲劇性形容今次拯救計劃,反映各國政府已經採取「不惜代價」既措施,去拯救金融危機。 上星期一直唔肯表態,喺歐盟達成協議後,歐洲央行態度隨即180度轉變,表明會介入市場,買入政府同私人企業既債券,即係變相執行量化寬鬆政策。 歐洲央行唔同聯儲局,唔能夠直接購買成員國發行既國債,但就可以透過二手市場買入,亦係成立歐洲央行成立十一年以嚟,首次購入政府債券。 是什麼原因令歐洲央行願意大開印鈔機? 歐洲央行行長特里謝一直唔願意印銀紙,佢上星期四央行會議後,仲話無傾過呢個問題,三日內改變態度。 關鍵係歐洲債券,同拆息市場信貸成本上升。 原來特里謝上星期多次遊說伯南克出手,重新啟動美元掉期,為市場提供資金。 美國一直唔願意介入歐洲問題,並批評歐洲反應太遲。 歐洲問題發生第一日,基本上歐洲已經定性係炒家搞事,炒家邊度嚟,正係美國!更關鍵係,加劇歐洲債務危機,正係美資評級機構被指搞事。 基於呢個假設,歐盟兩大國,德國同法國初期一直闊佬懶理。 作為奧巴馬,一直擺出事不關己態度! 直到上星期四,美股懷疑造市大跌日之後,奧巴馬先變得緊張,仲親自表電話俾默克爾,同薩爾科齊! 到底星期四大跌市,背後發生的咩。美國點解忽然緊張,仲出動埋聯儲局,IMF!都係果句,疑點重重! 而聯儲局公開市場委員會,係喺當地時,間星期日早上,投票同意今次貨幣掉期安排。 但華爾街日報話,聯儲

加速末日

CNBC「Mad佬」Jim Cramer日前在節目中看到寶潔股價大跌,大叫「這不是真正的價格,快去買寶潔!」 但在他吼叫完後,P&G股價已經回升。 機會原來已經一迅即去。 上回說到奧巴馬知悉股市不尋常大跌後,已經吩咐SEC必需要強力介入。 回顧事件,商品大王羅傑斯直指,紐約交易所要人頭落地,因為咁嘅事無可能發生喺紐約! 襟錯制唔足以一次過將市況大規模推低。有市場中人話,現貨跌,期指沽盤大增,連埋同一時間商品貨幣,油價全線跌,話巧合,無人信! 美國市場同香港唔同,大量交易透過超級電腦,非場內進行,有專家話,只要你熟識規則,懂得變通,合法賺錢並唔難! 愈來愈多跡象顯示,快至百萬分之一秘既高頻交易,根本不能設置「安全網」,根本快至不能偵測/預防不尋常交易。 話說回頭,近日金融市場波動異常,令人聯想,係零八年大風暴前翻板。 同樣,零八,同今年,一切由「債」引發。前年係私營機構次按債務,依家層面再上一級,係政府債務引發信貸危機! 前年年頭,市場都覺覺無咩事、無咩事,點知原來真係大件事。 今年,最初又係話希臘係小臘腸狗,無影響,結果會唔會又係大大件事! 人物方面,次按危機初期,評論員破口大鬧伯南克唔做野,到今年,矛頭直指麥克爾「玩野」。 而拯救金融機構,話題就轉為拯救國家! 無論港股,以至全球市場表現,有跡象,但無證據,證明總係有的唔妥。 但從過往經驗,突然大跌市,總係有的事會發生! 當然,唯一唔同係經過海嘯,大家亦學精了。 今次事件會否成為美股牛熊分水嶺? 似乎有相當分歧。 淡友當然會說事件觸動了投資者神經,事關美國無論樓市、經濟以至財赤,其實都唔係好過希臘好多。 不過美股以基本因素看是否如斯疲弱? 由失業數據看,又似乎不能過於悲觀。 新增職位增加了29萬分,遠好過預期20萬分,更利好的信訊是失業率上升至9.9%。 什麼,失業率上升是好消息? 其實可以這樣解讀: 過去兩年的金融海嘯,打殘了不少失業人士重回職場的希望,因為就算努力找,根本就是沒有工作機會。 不過隨著經濟真的見底,大家發現機會多了,於是尋找工作的人亦相應增加,因此失業率回升,未必要看得太悲觀。

陽謀

圖片
五月果然兇險。 相信整個中環今日都係「熊猫眼」,大概表情同NYSE個 Trader一樣,都係眼光光! 琴日聲稱全球最大、交易系統最先進的美股,竟然發生獅王33蚊事件翻板。唔同係,更大規模,更有計劃。 幾分鐘嘅急挫,道指暴瀉998點,指數組成114年以嚟,從未試過。 跌幅百分之9.2,係87股災以嚟最大,比911時仲要嚴重。 如果再跌多52點,就足以觸發Circuit Breaker,到時就真係要停市。 噤樣一跌,美股市值一間,蒸發超過一萬億美元。 當時喺交易大堂嘅出市代表,只有兩個反應,除左只識大叫、就係目定口呆。 恐慌嘅程度,令VIX指數曾經急升63%。 傳聞一,直指花旗嘅交易員落錯盤沽寶潔,觸發股價急跌三成六。 交易員原本打M字,即係指示沽出百萬股,但最後打錯B字,結果十億股就咁大手沽出,隨即引發骨牌效應。 不過花旗話,無證據話佢地係罪魁禍首。 寶潔噤樣一跌,觸發大量嘅程式沽盤,引發雪球效應。有六隻股分,股價由十幾至五十幾美元,一度跌至「零」,即係跌左足足100%! 面對咁大波幅,美國證監會,同紐約證券交易所、以及納斯達克交易所,即時緊急開會,急謀對策。 納斯達克交易所,將錯盤期間,股價波幅六成嘅交易,會被取消,涉及數百隻隻股分。 但問題係一個錯盤唔足以推低多隻股分,NYSE歸究係電腦程式買賣觸發大跌市,但強調無系統故障。 炒家可能故意造淡獲利,當局初步查到,一個嚟自芝加哥系統嘅大規模沽盤,可能同跌市有關。 事關美股跌最多嘅兩分鐘內,剛好喺芝加哥買賣,而同標普五百指數掛勾嘅期指,竟然出現高達16億張空倉盤。 期間標普五百指數交易所買賣基金ETF,亦有唔尋常交易出現。 傳聞證監會正查緊,有無涉及人為製造大量沽盤,從中獲利。 另一不尋常係美股三分二交易、係透過超級電腦系統進行嘅「高頻交易」High Frequency Trade。呢個系統有助製造流通量,亦被批評加速市況波動。 奇怪的是,當美股跌五百點後,多個高頻交易商居然選擇暫停交易,表面講就係避免令市況更波動。 但實際情況係市面突然減少了大量的Liquidity,大量沽盤搵唔到買家,結果就加速市況下跌。 據聞財長蓋特納,啱啱同一時間,由國會返回財政部,䏲Blackberry見到個市跌百分之3,即時問屬下Trading Room鰥發生咩事,回覆係因為希臘同歐洲危機。 之後見跌到百分之九、蓋特納已經肯定係有啲野錯咗

樓市二、三事

兩日前、運輸及房屋局局長鄭汝樺至話,「家家有層樓」唔係政府政策。 呢篇長文可說是近年特區政府最清晰的房屋政策。 可憐的鄭局長,文章出街唔夠兩日,就被老細全面推翻,成為了爛頭卒! 特首話,明白市民憂慮置業難,但係咪要改變樓市政策,包括復建居屋、要有共識,所以會用五個月時間諮詢,留待十月施政報告至公布。 似乎政府有心先「買時間」,再看清楚未來五個月形勢變化,再決定下一步。 難怪既,仲有兩年時間,你想佢點? //////////////////////////// 我們一個月前開始規劃,希望可以針對現行發展商的賣樓手法欠缺監管,作一個較詳細報道。 不過在我們構思以至約政府訪問期間,居然比政府搶先推出九招十二式規範賣樓,結果令部分Story難以繼續發展下去。 但政府所有規管,仍然是靠地產建設商會約束地產商自律,不過市民對地產建設商會嘅運作,知道嘅唔多。 我地問商會點樣監管地產商、以前有冇試過有產商違反指引,以至商會嘅章程同會員資格,過咗接近一個月,全部都未有答案。 商會無網頁,打電話去問,只係話現時有七百幾個會員,但咩人有資格做會員、就唔方便透露。 成立了四十五年,這個自我規管的組織,影響著二百多萬個置業家庭,但完全是以一個私人俱樂部模式運作,會長是由84年到而家,一直連任董事會會長嘅何鴻燊。 佢舊年因病休養,但商會無交代有冇人代任。至於副會長之中的信和大股東黃廷方、同希慎主席利定昌過咗身,商會亦無交代有無成員替任。 為了追查地產建設商會背景,我們試圖由公司註冊、監管組織、以至法定機構等範圍查下去。 結果要找到「社團條例」,先知全港最大孖沙,統統都只係以一個「社團」身分註冊。 由於社團要向警務處註冊,我地又用左半個月、嘗試向警察牌照課,攞商會嘅註冊資料、結果亦都失敗。 最有趣係警察牌照科,對於我地申請要求看公開資料,居然答:「我地仲考慮緊點回覆,至於要考慮啲咩,就係要而家我地要考慮既嘢!」 夠晒玄,死未?!!! ////////////////////////////////// 繼九招12式及市建局後,第3式由地產代理監管局發功。 什麼要講明自己係代表發展商定買家、合理陳述、唔容許提供貸款、以至唔准追車通通都唔係重點。 重點係新規例係代理又未經發展商同意,唔可以向買家發放銷售資料同收訂金,亦唔可以攞走買家嘅身分證同代為碌咭。 要知道,發展商比1-2%佣金代理,不是一個少數

馬後炮

希臘債務危機到底應該怪誰? 怪希臘政府「大洗」? 怪財長「暪數」? 怪人民「Hea」慣? 還是怪高盛幫手「造數」? 債券大王格羅斯話,元兇係評級機構。 佢嚴厲批評三間評級機構,只係識「馬後炮」,指三間評級機構既缺失,正係導致希臘債務危機既元兇,佢地盲目相信希臘同鄰近國家有償債能力,比三個A最高評級,先導致呢啲國家揮霍無度。 到見到危機又怯弱、唔敢採取行動,直到出事之後,先識降低評級。 佢話,投資者應該以批判既態度,去睇清楚呢啲「無常識」既機構真面目。 而評級機構除左對一啲,因為法律要求、仲要依據評級既投資機構外,對其投資公司,已經再無存在價值。 格羅斯話好似佢旗下公司太平洋資產管理,有自己既信貸評估部門,可以利用評級機構既「無常識」同「怕」,往往能夠搶佔先機、爭取優勢。 簡而言之,就係搵到食! 事到如今,危機己經演變成政治事件,仲涉及爆亂同死亡,希臘及歐盟要解決危機似乎變得更不可能。 雖然希臘已經改口風,承認犯錯,不過歐盟內部仍然傾向指摘外界居多,不願承認難題! 法國總理菲永話,歐元正受到炒家狙擊,歐盟委員會主席巴羅佐亦抨擊炒家衝擊歐元,話會採取行動,確保金融市場唔會成為「炒家樂園」云云。 諾貝爾經濟學獎得主克魯明似乎對危機不大樂觀,相信希臘最終都要脫離歐元區, 克魯明話,希臘目前既債務危機,唔係單靠重組債務就可以解決,因為咁會令政府採取更多緊縮政策。 佢認為只有推動經濟增長,先可以解決債務問題,而唯一途徑就係增加出口,包括透過將貨幣眨值,降低成本同價格,增強同鄰國競爭力。 克魯明話,如果希臘國內夠團結,整個社會可以集體同意減薪、就可以透過變相「內部眨值」嚟降低成本,但由近日既局勢睇,明顯係唔可行。 因此唯一出路,就係脫離歐元。 克魯明認為,目前希臘愈來愈似02年阿根庭,又指脫離歐元既計劃必須要一次過進行,任何事先商討只會引致銀行擠提,同時被投機盤沖擊銀行同股市。

破冰

高盛被證監會起訴以黎,股價跌近兩成。 有股東已表明,股價再跌,唔會再支持布蘭克費恩。 布蘭克費恩雖然一直唔承認犯錯,但亦都唔想高盛長期陷於法律訴訟。 英國金融時報話,高盛期望同證監會,關係破冰,正尋求就CDO既民事起訴進行和解,但目前雙方溝通只係好初步。 高盛已聘請著名律師「Wells韋爾斯」組成高層次嘅法律團隊,負責和解談判。韋爾斯專長和解及辯護,曾為紐約前州長「斯皮察」成功脫罪。 佢正為高盛,加快達成其他和解協議,包括就高盛前年違反股票沽空監管條例嘅指控,支付左四十五萬美元罰款。 金融時報指,證監會亦有軟化跡象,而肯同高盛和解嘅前提,可能係要高盛交出巨額罰款,同時改變內部既商業模式。 高盛亦有可能犧牲布蘭克費恩。 華爾街日報以「What if」為題,指近日高盛高層、包括董事總經理,合伙人,同前原老級人馬曾經討論,布蘭克費恩係咪需要辭職。 高盛嚟緊股東會亦會表決有無需要將主席,同行政總裁職位分開。 高盛雖然建議否決議案,但華爾街更多評論話,將職能分拆,係雙贏方案。 因為既保得著幫公司賺大錢嘅布蘭克費恩,亦可以令民憤降溫。 至於之前傳出,由前財長保爾森回巢做主席,已被接近保爾森嘅消息人士否認。

家家有層樓

兩個管房屋的局長,近日再輪流發功,先有林鄭失驚無神指示市建局發八招,蓋過鄭汝樺的9招12式。(聽聞林鄭對URA力度仍然不滿,只拋下一句: 「吓! 就咁咋!」) 鄭汝樺不甘寂莫,索性指示副局長喺報章撰長文,大談居屋,以駁斥梁首席近日的「火星論」。 鄭汝樺想「屈機」,指主張復建居屋的人、只係對樓價急升嘅本能反應,因為起居屋要五至七年、無助壓抑樓價。 最難聽是,佢強調政府責任係令市民「居者有其所」,但並非「家家有層樓」。 鄭呢個講法、明顯係要反駁左行政會議召集人梁振英早前講、政府有義務鼓勵同資助市民買樓,仲話認為政府無需要咁做嘅人、過去四十年可能住喺火星。 聰明的鄭汝樺,舉出八十後的置業要求,嘗試矮化要求重建居屋的需求。她說,很多報道都說畢業兩三年、月入一萬嘅年輕人,買唔起二百萬樓。 鄭汝樺話置業向來係人生大事,要經過多年辛勤工作,努力儲夠首期,至實現到。因此下一個結論: 要訂政策幫單身年輕人置業,似乎唔係社會主流價值。 其實真係唔明白,鄭汝樺與其花時間去新加坡考察人家點賣樓,點解唔返去內地,看看我國真正「家家有層樓」的經濟適用房? 經濟適用住房,等同於國宅。指的是對房地產開發商建設的經濟適用房項目,政府免收土地出讓金和市政相關配套費用(僅此兩項就占房價的13%),加上其他減免費用,令發展成本大降。 當然,經濟適用房對價格、購買資格、利潤水平都有限制,因此經濟適用房是國家為低收入人群解決住房問題所做出的政策性安排。 今年內地早有政策,大幅增加呢類保障性住房用地一倍多,當中有7成會用嚟起經濟適用房,供應會增加近8成,這就是中央明白,既要避免樓市泡沫、同時協助需要市民置業,方為穩定社會的上策。 將居屋視線轉移至壓抑樓價,是政府將政策目標偷換慨念; 單純以80後未能置業就將協助市民安居的要求醜化,就是是政府不負責任。 需知道,目前一般公屋輪候時間長達3年,仲要不問地點,而且入息要求根本令中產難以受惠。 如果簡單將自由市場推向極端,認為樓市只是簡單商品買賣、買唔起就是個人沒有本事,這個政府也太容易做了吧?

魔鬼交易

圖片
要巴菲特公開講高盛,其實有點難為老人家。 四萬股東出席,巴郡股東大會,五小時答問時間,問題離唔開高盛。 對於高盛行政總裁布蘭克費恩,巴菲特讚佢絕頂聰明,希望佢未來十年都可以領導高盛。 如果由佢揀下任高盛行政總裁人選,巴菲特話除非布蘭克費恩如果有孖生細佬,否則佢無人選。 對於高盛,巴菲特唯一彈嘅係,佢地公關做得差。 股神百分百支持高盛,成為歐美財經傳媒頭條,但有巴郡股東就話,高盛唔值得攞咁高評價。 批評巴菲特唔止一班忠心擁躉,連華爾街日報都話,股神有偏頗。 WSJ說巴菲特的說話,與他的一貫立場有反差﹐甚至違反了過去在股東大會上表達的思路。 因為巴菲特過去一直反對他所謂的華爾街自私自利的經營方式。 或許就像WSJ所說,巴菲特為高盛辯護也是意料中事: 巴郡在高盛投資了50億美元﹐而高盛更是巴郡幾十年來的合作伙伴、巴菲特的「兒時夢想」! 其實聽巴菲特長期拍檔Charlie Munger的講法更家直率。 Charlie直言不諱地批評華爾街,但更不留情面嚴斥巴菲特好友奧巴馬。他說金融業體系的確存在嚴重缺陷,但當體系有缺陷時,好人也會做一些事與願違的事情。 佢將責任歸於政府監管鬆懈,說如果老虎跑出來傷人,責怪老虎是荒唐的,要怪,就應該是「白痴」的養虎人。 面對劣評如潮,唔想犯眾憎,布蘭克費恩曾經親身請教巴菲特點處理今次危機。 結果學左一招溫情牌。 整個周末,布蘭克費恩就一直忙於上電視,連Talk Show汁都撈埋! 應付今次公關戰,高盛請嚟前總統克林頓特別顧問協助,仲話自己出身草根,是裁縫之子,明白社會不滿。 由「God's Job」,到打落凡間,仲要係草根,都幾難為呢位CEO。 被證監會起訴以嚟,股價插水下跌,傳媒報道,高盛部署和解,高盛內部亦更改同交易準則,交易員要確保客戶知道,產品涉及嘅風險。 似乎高盛第一間要遊說,應該諾貝爾經濟學獎得主 克魯明 ,因為在他眼中,原來布蘭克費思係呢個樣:

高盛門

經過十個小時國會聆訊,布蘭克費恩在內部電話留言中,提醒員工,在可見將來,外界對高盛既關注仍未停止。 話口未完,聯邦司法部門就對高盛展開刑事調查,導致高盛股價曾經大跌一成。 高盛話,基於近日各界對佢地既高度關注,佢地對有關消息並唔意外。 講到自己好似置身事外咁,果然係高人。 檢察部門同證監會合作早有先例,過去曾經出現過兩個部門同時提出起訴,但有法律界人士話,要刑事起訴由於有較高既舉證要求、要證明詐騙有好大困難。 舊年底檢察部門曾經高調刑事起訴兩名前貝爾斯登僱員,指佢地喺07年涉嫌詐騙投資者,雖然聆訊中調查部門列舉左大量電郵同證供、但檢察部門最終都係敗訴收場。 雖然刑事起訴難,但高盛要面對更多的民事訴訟、就是不爭的事實。 關引起人關注,是一個名為Basis的對沖基金,要求高盛賠償一億美元。 Basis是一間已經倒閉的對沖基金,原因就是他們買了高盛一隻名為Timberwolf的CDO,結果價格大跌要清盤收場。 而Timberwolf正係喺早前高盛交比國會既電郵中、被一名聯席交易主管稱為"Shitty Deal"!(譯作狗屎交易是否恰當?) 回顧整件「高盛門」案,最大證據,就是黎自呢一批電郵。 依家高盛員工人人自危,投資者亦是借呢的電郵,告高盛點解明知係垃圾產品都賣俾佢地。 白紙黑字,成為罪證,二千年科網泡沫時,美林同花旗都試中招。 當時老行尊話花旗,同美林蠢,原來行內人習慣,重大事情商討,只講電話,不落電郵。 原因好簡單,喺電話無論講過咩,將來都好難追查。 布蘭克費恩師傳、即係前財長保爾森,就出晒名從來唔用電郵,有咩全部透過電話指揮。 布蘭克費恩亦深明呢個道理,出事以黎,同員工對話,淨係用電話留言。 所以最終拖累高盛同圖爾嘅,可能就係一部Blackberry,後生一代貪方便累事,一部智能手機在內,據講高盛年資短員工,其實唔識用電話留意呢個功能。 而事到如今,高盛已經成為National Enemy。 有高盛員工就因為太大壓力,唔敢去公開場合,連成班同事外出食晏都驚。 部分員工更被上司提醒,工餘時間,記著低調的。 一代天子門生,今日搞成咁,都咪話唔令人心涼。