2017年2月22日星期三

論幸福

處子預算案,外界糾纏於「計錯數」三個字,算吧,基於政府庫房靠賣地及股票印花稅收益主導,假若能準繩算出每年收入及盈餘,某程度上,波司長一定比士佳哥,及一眾樓神、股神更有預測市況之能量。

拆局問過幾位經濟師對波司長處子之作意見,不若而同直指,波司長對經濟之認識,在論述環球金融情況,說得細細有條,有板有眼,惟一看其預測數字,卻露了底!

去年預算案,政府經濟增長預測為1-2%、基本通脹為2%、整體通脹預測2.3%,今年經波司長手筆,增長預測升至2-3%,但通脹預測卻值得商榷。

按波司長估計,今年基本通脹維持2%,整體通脹1.8%,數字比去年更低,難道波司長並不了解,大加樂,大快活已多次加價、租金升幅未有放緩。

更甚是,在全球一片通脹預期升溫,Reflation之聲此起彼落之際,一眾機構上調全球以至本港通脹預測之際,波司長卻有膽量逆其而行。

而更有趣是,撇除補貼等一次性因素的2%基本通脹預測,今年預計的整體通脹數字反而進一步低至1.8%,怕且羅家聰都被考起!

基於經濟及通脹數字預測的爭議,波司長估算下年度整體盈餘162億,再下年度72億,21 - 22年度財赤83億,基本上是毋需要理會。

有錢有有錢的煩惱,九千多億財政儲備,相當於24個月政府開支,波司長並無再重新以量化數字介定何謂合理儲備水平,反過在基本法第一百零七條:以量入為出為原則,力求收支平衡,避免赤字基礎上,加上理釋為「務求在一段時間內保持大體上財政平衡」就可以。

學者不禁讚波司長好野:解釋基本法,猶如人大上身!

預算案觸及不論上市架構、積金電子化、綠色金融、人民幣業務等,完全是重複已發生及正在進行的事項,至於市民最關心的派糖,928億盈餘,但額外舒困只有351億,而且老調重彈。

但波司長某程度上不應受批評,事關財政盈餘急增,全靠是波司長之前掌管土地收益超標所致。

的確,全靠陳茂波搵番來。全年多收500多億,地價,樓價,物價,營商成本繼續升,中資送來的盈餘大禮,輸的仍然是香港人。

現屆政府最後一份預算案,由波司長負責的第一份預算案、未知是否率先而隨即結局,波司長演辭中問了個頗有趣問題:怎樣才會感覺幸福?

中環人戲言,論幸福,說幸運,波司長認一,那會有人敢認第二?

入振英長官班子落空,但不足一個月卻有局長高職空缺以待、振英長官原意讓他當副財爺,現在超額達標,更行將署任特首。

但願七百人市民也可沾上他的幸運、幸福也!

2017年2月21日星期二

十年恩怨


原以為一笑泯恩仇,十年種種怨與恨,就此一筆勾消。

奈何,象哥中午業績一出,整個中環噓聲四起,有分析員戲言,以盈利大數誤差程度,「象長老」執正秉公辦理的話,大抵可以構成十年後另一次盈警。

歷史每有循環,十年前,象哥出事乃前朝象龐約翰沾手Household留下的蘇州屎,事有巧合、十年後今日,業績大數之大誤差,又是出自「前朝」當年併購後遺症。

因為重組私人銀行業務,象哥將九九年收購的Safra Republic Holdings涉及餘下商譽,全數註銷。

大數歸大數,可抵賴於一次性因素,但財經媒體作為極速驗屍官,左抽右拆,最少,象哥核心稅前盈利比高盛及德銀分別低兩成六及三成、用最無水份的經營溢利,按季仍然要跌一成四,遜預期。

上季引以為傲的一級核心資本比率及成本改善幅度大於開支幅度的Jaws,均分別按季跌0.3個百分點,及30個點子。

業績後,花旗致客戶速報毫無保留地以:This is just a disaster去形容匯豐,認為股價少則跌半成,沽貨不用客氣。

花旗,德意志及對匯豐至死不渝之高盛,均異口同聲認為,匯豐勢將面臨 Significant Downgrades 。

業績差,十億回購有如應酬式,青姐下午提出一個頗具參考分析:
按她觀察,象哥復元之際,仍受制於兩大問題:
一:管理層Hea做、
二:「唔夠人」。

的確,范智廉任期已屆倒數,歐智華僅隨其後,情緒上及士氣上有可能進入無心戀戰期,尤其繼任人選極有機會並非內部提拔,幹什麼要益外家人?

而華仔任內,斬頭無數,2015年起已計劃兩年減五萬,現在既使有業務生機,恐怕卻無活動能力,美國監管鬆,歐洲卻動向未明,高盛招聘擴軍號召力,必然比大象為首歐資行為高也。

象哥十年來,簡單可以用三個R形式,包括Rescue;Recapitalize及Return:
由拯救、到增資,及至近期的回饋股東三部曲。

九哥早於去年更改策略,由托資本,轉為托股價,面對一份恐怕程度直逼五星的業績,反過來只應酬式十億回購,前文後理,青姐有關「Hea搞」觀察,似乎更具說服。

而更大問題在於,服侍監管要求多年,肥瘦物以保資本,事到如今,減肥過度,營養不良,但願匯豐不是注定是一隻逆市呈強、旺市中的弱者大象。

2017年2月20日星期一

人民幣力場

對於人民幣,大行年頭還是「巴、巴、巴」,不斷糾纏於貶值幅度預測。

原本日前卻低調地跑出一間「法巴」,將人民幣全年目標由7.4上調至7,成為今年,甚至近大半年首間上調預測大行。

事後回想,法巴也許慧眼獨具,皆因,不論市場力量,信任程度、基本因素都衝著人仔要貶而來,數到最後,人民幣最大力場仍然是繫於總設計師手中。

不論小川行長、易大副行長、或外管局潘大哥,強調的是,不存在貶值預期,但存在大量工具及可管理。

的確,由三大金剛組成的人民幣力場,是有其根據;
皆因,正當挾息既然已經將外資夾至創重至死、
皆因,直接干預可能令Trump總統以人為入罪,不費功夫已可列我國為貨幣操控國、
亦皆因,加息預期控制匯率構思,被內地部份智囊急速叫停、

大家以為工具山窮水盡之際,原來三大金剛人民幣力場,還有修改定價機制一招萬試萬靈的絕招。

繼去年底,人民幣力場將一籃子組成部份修訂,大幅稀釋美元影響之後,人民幣力場報稱再度發功,一個技術調整,縮減一籃子匯率計算時段,由原來每日九時開出中間價後的廿四小時,改為十五,即由原本任由全日環球匯市,可以左右開價,縮減至在岸市場下午四時半收市後至翌日早上七時半。

媒體引述知情人士指,由廿四,縮至十五,為的是可以避免重複計算,及防止日內出現投機活動,包括在中間價及收盤價價差之間獲利。

以此推斷的話,人民幣力場由去年底起計,包括今日的機制修訂,大概是兩步曲的兩個目標:
之前一個屬於透過減低美元比重,以求控制幅度、
而到今日,基於貶值情況已經收斂,修改開價機制為的是一個「穩」字。

在新機制下,簡單而言,上午7時31分至下午4時29分,均不會影響人民幣之後一日的中間價表現,變相是將官價交易時段,某程度上隔離出國際外匯市場。

更有趣是,受制於離岸市場流動性短缺,過去一個月時間,CNH大部份時間均較CNY有溢價,中環人估計,新定價機制一絕之處,是看準離岸人民幣因流動性限制而趨升的勢頭,順勢而出,增加其幅射能力,將離岸價趨強之力,傳導至在岸。

人民日報強調,人民幣穩定大局不變,並且列舉截至2月17日為止,今年29個交易日,十七升,十二貶,升多跌少。

數字並不重要,惟再次證明,內地對外國有關人民幣貶值預期種種,均十分介懷,情況等於索老爺高調唱衰中國一種,任何人等Bear一口,我國必然Bull市還抗。

2017年2月17日星期五

憶良將

事隔五年,丁Sir 世民重返有線財經,拆局同財經組上下仝人要表示熱烈歡迎再歡迎。

丁Sir 闊別大銀幕一輪,雖然身形稍為消瘦,但風采如昔,而套用丁Sir 自己一句,佢更鍾意自己背後身影,每次講座都例必要show 一show。

原因當然唔係唔想見人,而係丁Sir 要帶出一個明確訊號:風光人前、但無限兇險在背後。

特朗普恐慌、美國債務惡化,呢啲原因大家都了解,反而政治上、丁Sir 表現出更深既憂慮,先令人關注。

同內地廠商傾,個個都對前景非常樂觀,但通常都會加多一句生意非常難做,其實正正道出當中難處:經濟係好轉,但同時中央正加快改革的兩面矛盾。

今期經濟學人提出一個好好問題:既然主席是鄧小平以來最中央集權既領導人,點解佢上任近5年來、都唔能推動改革加快進行?點解係時進時退?

背後正帶出兩個考慮:一、主席並非真心推行改革,而係以推行改革之名、實際上是政治手段以排除異己,鞏固權力。
二、主席既權力並非好像外像估計般咁大、往往在推行改革過程中,要對黨內反對分子作出妥協,係退一步、進兩步既政治手段。

如果後者解釋屬實,咁慶幸係來緊既十九大,會代表新一屆政府人事交接,主席可以有更大主導權去推行改革,估計步伐肯定會加快,但問題係、咁對股市係咪一定利好?

丁Sir 就爆料,話佢收到既內地消息係、今年兩會不會發出正面的政策訊號,原因簡單:去加快去產能同供給側改革,其實就係以短痛去換取長期發展,咁又點會有正面因素?

高盛高華既宋宇、最近到過內地沿海三、四線城市考察,經濟表面的確係有起色,但代價其實又係走回舊路,即係有投資過熱風險,包括明明市面交通暢順、但就斥巨資興建地鐵,浪費效能既「鐵公基」,其實先係經濟最大風險。

要推動改革、往往需要借用外力,而眼前對中國最有幫助既、正係美國總統特朗普,事關佢一旦向中國採取保護主義措施,中國就不得不作出回應,咁樣反而做成契機,可以推動內部改革。

「聞鼓響、憶良將」、宋宇話其實最希望係習主席可以完成前總理朱鎔基未完成既工作,包括精簡政府架構、放權比市場自由競爭,更重要係減少央企規模,呢啲先係正確既事情。

2017年2月16日星期四

聯想

對投資者來說,聯想已不能構成任何聯想。

而對聯想來說,它們今日繼續強調的第一,只建基於一個不斷萎縮的全球電腦市場。

至於管理層一度聯想能成為第二戰場的手機業務,對不起,全球品牌排名,已近乎消失於無形,市佔率再降1.6個百分點,只得3.5%!

踏入收購摩托羅拉第三個年頭,即是相當於十二個季度。

曾經何時,楊元慶許下豪言,收購後六個季度止蝕,面對傳媒及投資界追問,一年復一年的止蝕回復盈利預期,從往續睇,信任程度已大減。

楊大哥統領下,聯想最新季績,大摩形容差得叫人驚訝。

即使銷售增長較預期好,但整體毛利按季大跌1.2個百分點,有生意、但盈利能力降,正中死穴!

個人電腦並無驚喜,手機撇帳盈利數字,單以銷售額計,按季增長幅度由20降至7%。

更叫人意外是,另一項一度寄予厚望的數據業務,不論按季及按年均告錄得跌幅。

科技雜誌寫手提過,要搞手機業務,最緊要識做品牌,切忌買其他Brand,皆因賣家既願意賣,幾乎都屬於黃昏之Brand。

奈何,楊大哥不信邪,原來他首部手機就用Moto,情意結之餘,還在於05年買Think Pad一仗自信十足,大哥當日向員工豪言:Lenovo is a global citizen。

華爾街日報月前大談「聯、摩」聯婚後樣樣事與願違,未如人意,當中涉及追訪多名管理層,矛頭直指,楊大哥收購摩記後,頻頻犯錯。

包括,對摩記在美國市場自視過高,收購後食老本,未有加大推廣。

但現實是美國人善忘,早就將摩記等於美國品牌一段記憶一筆勾消。

還有是,集團在內地手機市場策略全錯,維持雙線品牌,難以集中推廣,價格又欠缺競爭,到最後,忽然另起爐灶,搞出Zuk品牌專攻年青人市場,簡而言之,章法大亂。

據報,楊大哥前年見大勢不妙,在高層會議大動肝火,痛斥他們如在夢中,或者,一直如在夢中,其實是楊大哥本人,仍然活在05年成功突圍一役。

當年,有柳傳志臨時壓陣,但現在市場變化複雜,以及聯想存在結構問題,怕且多十個柳爺也神仙難求。

2017年2月15日星期三

大時代?

股市上升,人人歡喜。

耶倫加息金口一開,市場反過來是如痴如醉,高盛十年後終於重返新高,更猶如金融海嘯後,對華爾街大行千古罪人之大平反。

時而世易也!

香江小島今年成交首次過千,以黃師傅用各項指標綜合而成,衡量市場強度的「師父指數」,五分滿分,今日由3.8,裂口升至4.2。

鄧博士強調升市莫估頂,追逐升浪的同時,隨著時而世易,所參照的各項指標,亦未必一如既往適用。

以往,市場慣用港股及港元走勢,並且以兩者拉成一起,後者屬於前者前贍啟示,而成交越多,市況越強,港元亦會更強。

但今日,似乎「師父指數」較之港匯走勢更具備準繩。

以今日為例,港股歐洲時段再度爬升之際,查實港紙反而龜速向下,美電甚至升穿776水平。

難道又是大戶派貨,港股正在走資?

非也!

其實,近數月資金市場怪現象在於,美息向上預期下,美元同業拆息持續向上,跟本港息差進一步拉闊。

看看耶倫大人大開金口未幾,一星期、一個月,及三個月美元同業拆息均全告向上,但與此同時,香港市場利率有如性格演員,你向東,我走西,持續回軟。

不經不覺,三個月港紙拆息已由年初的一厘水平,回落至0.946。

法興早前提及,撇除報價機反映的港元拆息水平,若以掉期隱含引申計算,查實三個月港元資金根本是遠低0.9厘水平。

事實上,觀乎隔夜、一星期及一個月美元跟港元同業拆息差距,原來分別達到53、55及27點子,換句說話,基於美國聯儲局重新展示加息誠意後,不排除市場已再形成誘因沽港紙,買美金進行所謂的套息行動。

德銀日前以「聯匯失效?」為題,發表短評,提及過持續港美息差擴闊,但未有觸及聯匯貨幣發行局機制下近乎必備的套息活動原因。

德銀說得為悄為妙,按該行高見,今時今日,時而世易,過剩港元頭寸主要擁有人,不是香港人,不是美國人,不是歐洲人,而是內地中國人!!

德銀懷疑,套息未見活躍,港紙不見回落,其實問題出自內地人,因為大媽們並不理解咩叫Hi-Li,咩叫聯匯套息機制?咩原來貨幣發行局底下息差息戥,好玩很很。

港紙強勢走到盡頭一日,是德銀日前預言,原因是一旦美息上升預期進一步確立,套息、本港經常帳盈餘下降、內地收緊政策等因素,三合一體的話,勢會帶領港紙下移。

講了一有堆,拆局結論為:基於港美市場利率之不同步移動已有一段時間,套息活動稍為觸及,港紙會跌,而過去四分一世紀沿用的港紙升,港股升假說,或許已不適用。

升市莫忘形,但升市見港紙跌,亦需保持冷靜。

祝君好運!!

2017年2月14日星期二

戲肉

Trump Trade已成泡影?
不打緊,以市場力量,市場製造樂觀元素的能力,沒有Trump Trade,取而代之乃 Reflation Trade也。

中國數字一出,彭博已急不及待為此而呼喚。

內地最新CPI及 PPI分別升至2.5%及6.9%,遠比預期強勁背後,官方也許怕通脹壓力重臨添煩添亂,即時定性為農曆年及低基數效應。

的確,純粹數字拆分的話,居民消費價格指數百分之二點五升幅,約一點五個百分點來自低基數效應所產生,技術上,所謂的New inflation,在在只有百分之一。

但數字內大有數字,以美國慣常招除的食品及能源價格牽涉的核心通脹,已經由1.9%,升至2.2%,升幅五年最大。

下游通脹尚且達至官方所指的健康及受控,很大程度上賴於食品價格升幅不旦沒有加快,反而進一步減慢,按月計,食品價格上升1%,遠遠低於二千至一六年農曆年月份平均3.8%按月升幅。

扣除食品反而是戲肉所在,
一:非食品通脹按月上升幅度,按法巴計算查實屬於17年最大、
二:服務業通脹升幅達3.2%,一個月內抽升0.7個百分點,三年最強

通脹預期能否持續製造經濟活動上升,從而帶動實體經濟?

以PPI工業品出廠價6.9%計,較十二月按年升幅擴大1.4個百分點,惟同期,購進價格指數按年升幅加大二點一個百分點。

一加一減,其實上游工業提價幅度,單以一月為例,是落後於成本上升幅度。

誠然,在通脹預期初段,未有數據證實已出現Bad inflation,市場仍然處於蜜月期,中國由向外輸出通縮,變為輸出通脹,貢獻了全球,何需要靠老Trump?

習Trump二人,一個電話,一個承認一個中國,市場大為受落。

老實,用白宮聲明,所謂承認,乃按大大要求而 to honor。

華爾街日報話,美國在貨幣操控國立場上或退讓,同樣,只可反映華府不會運用故意在市場干預的操控形式而怪罪於我國,取而代之用介意為旦凡涉及以匯率手段,對產品有不公平的補貼,其實更空泛,更具彈性。

用瑞穗沈建光說法,老Trump謀臣及民間智庫隻隻巨鷹上升,貿易戰胎死腹中之說,仍然是個天真幻想。


2017年2月13日星期一

北水

紐約時報周末長文披露肖建華被帶返內地詳情,床單朦頭、水路出境等等,令耐人尋味故事,更添曲折離奇。

唯獨有趣是,以其掌控天文數字資產計,牽涉交易及公司之眾,中港兩地市場出奇地平靜,

本應,內媒對肖建華近乎隻字不提,惟打從劉士余上周五大罵金融資本大鱷之不事,但凡扯皮吸血,一律勢必逮捕,內地亦毫無避忌,劉士余之後,順帶觸及就是肖建華。

問題在於肖建華之後,還有多少肖建華?
老劉表明,嚴打資本大鱷,既然內地捧打,那會否更鼓勵大鱷過江?
而又既然歐達禮多番強調,搞好香港監管,前題在於中港跨境合作,那到底,跨境合作,會否又會常規化至變相跨境執法?

內地一批神奇力量,滾滾不盡之資金,將恒指化腐朽為神奇,看看瑞信,市場推介路演,不再是歐美或新加坡,而是北京、上海及深圳,為的只有一個問案:你們買了港股未?

內地資金是至今日,已僅次美資,佔港股市場活動佔有率第二大,而若以各大機構估算,每年五千億北水湧港計,匯豐曾經何時算出,內地錢及鬼子佬錢,平均分得港股,各佔一半一半。

我們日常話:「我地既港股,我地既股市」,錯了,港股不論左右市況因素,企業及投資者主要組成部份,從來不屬於香港也!

香港市場投資者也許是渺少,亦膽少,對於北方資金,既有期盼,亦有高度敏感症。

而將敏感症推向頂峰,一隻175吉利,中資錢先掃股證,再買正股,上下其手,而巧合在於175卻忽然染藍。

到底,北水威力百般,會否料事如神,春江鴨子在暢遊,而更叫人害怕是,如果人為買至入成份股,那麼下回合,一旦漢能復牌,咪隨時又做新貴?!

2017年2月11日星期六

駕馭

一個外貿數據,既是好消息、同時亦代表壞消息即將降臨。

過晒年、特朗普終於肯同習近平通電話,內地媒體即時解讀,是「Trump Trump」向中國示好,不需要擔心貿易戰降臨。

呢個觀點、實情是非常危險,大家要弄清楚特朗普要取悅既、係佢既選民,絕非國際間所謂利益共同體,以為特朗普係務實商人,就好容易錯估形勢。

高盛就出報告,探討特朗普同美元之間關係,指特朗普靠口頭干預強美元,雖然能收一時之效,但始終美元都係同貿易經常帳掛勾,呢個被美元淡友指為匯率過分高估原因,事實又點?

按美國經常帳逆差,目前佔國內GDP 2.6%,表面看好似言之成理,但高盛指出,當中有1.8個百分點,其實只係來自一個國家:就係中國!

換言之,美元兌日圓、歐元、甚至墨西哥披索,其實匯率大致均衡,相反對人民幣要達到貿易平衡,美元兌人民幣就要貶值10- 20%,因此可以預期,特朗普對中國、絕不會手軟。

呢點都突顯出小川行長對駕馭匯率同利率,的確係手段高明。去年底率先發難將人民幣貶值,就令到外貿先受惠,到見到措施收效,就轉換策略,改用利率政策穩著匯率,「買時間」暫停貶值幅度,避免資金加快流出。

講到高明,「小川行長」在春節前後上調回購利率、再連續幾日暫停逆回購收水,做法就贏得一片掌聲。

人行背後加息原因,我地節目都講左好多次,但背後有一個政治理由,絕對值得探討。

同過去貨幣操作唔同,人行今次無直接調整銀行存貸利率,而係透過多個政策工具,包括OMO、SLF同MLF,即是西方央行貫用既市場利率,去引導市場,呢點對人行來講,絕對係一大突破。

經濟學人猜測,小川行長咁做,其實係意圖突破目前既政治框架。要知道人行在內地、一如法院並無獨立地位,架構上是在政治局同國務院之下,加息減息理論上都要中央批准。

但調整政策利率,就可以突破框架,大可以解釋為工具調整,唔需要上頭批准、令人行有更大自主控制權力。

當然,對小川行長來講,呢個得來不易既獨立性,更加要小心運用,因為一旦有突發事故令情況失控,呢啲僅有既剩餘獨立性,都好可能會被收回。

2017年2月9日星期四

未來報告


連續兩日大成交破頂,不過由美電、由互聯互通、由銀行體系結餘等各方面觀察,市場對大時代入市資金何來,都是摸不著頭腦。

較可信解釋,是有中資投行透露,資金源於準備用於海外併購,去年遭中央下令取消或擱置交易後停泊本港,變成「境外游資」,現時取得「批准」在港買入中資及藍籌股,市場估計資金規模達百億元。

其實早前已有消息透露,去年內地對外投資取消既金額,已經高達750億美元,作為國企老總,既要向國資委交成績,但面對阿爺落閘,比你係老總,都唔會再將潑出既水收番,以AH股差價仍然高達兩成,買港股,幾乎成為唯一選擇。

傳聞呢批買盤必須循序漸進,避免高調,咁可以解釋到、點解近日港股無厘頭板塊輪動,包括先炒起汽車、跟手到內險、內房、之後輪到388同大象。

北水來港、盛如瑞信所言,只會愈來愈多,但資金主導,係咪可以贏到年底,係一大疑問。

的確,香港近年只靠食老本一招,今日匯豐梁兆基都忍唔著主動炮轟、政府高層出外ROADSHOW,只懂以低稅率作為號召,一講就講左十幾年。面對英美稅率已經減到甚至低過香港,其實一個更深層次既稅制改革,已經克不容緩。

話口未完,新加坡李顯龍已經拋出一套全面改革新加坡競爭力既提案、表明係要應對,全球化步入黑暗時代既全國策略。

去年新加坡GDP,降至只有1.8%增長,是七年來最低,一個由政府領導既未來小組,在諮詢過近萬個持分者,製作出呢分未來報告,就係希望改變GDP有三分二都係靠外來需求既局面,而戰略只有一個、就係加強國際連繫、尋找新的市場准入。

大原則就係由多邊變成雙邊貿易談判,包括向東南亞、中國同印度,拓展新既市場,而唔係一味只靠歐美成熟市場。

新加坡支持新興產業發展,已經唔係咩新聞,但令人意外係、政府角色由過去主動甄選贏家,變為願意後退一步,由私人機構自行發展,政府角色變成只係提供資金,以推動創新。

針對稅制,新加坡近年已經將一些優勢產業稅率、降至貼近甚至低過香港既水平,不過委員會仍然唔滿意,建議需要一個更全面既稅制改革,應付本地需求變化。

值得中環人留意仲有新加坡交易所,佢地獲支持推動雙重上市架構改革,透過加強透明度,容許一些高新產業、包括生物科技、生化藥物、以至資訊科技公司,可以用同股不同權既方式,在新交所上市。

當香港既監管機構仍然是果足不前,對同股不同權又驚又怕又想試,新加坡已經願意走出第一步,推動雙重架構,呢個可能係香港金融中心最大挑戰。

新加坡總理李顯龍已經表明、會全數接納委員會呢分「未來報告」,同時全面推展改革。反觀香港、幾位特首候選人政網,似乎都未有足夠勇氣、徹底推動改革,反而好似「小學雞」咁爭論對金發局撥款係咪足夠大做文章,呢點先叫人擔心。

2017年2月8日星期三

十年人事

整個上午,Newsroom 人人躍試匯豐PAYME,但換來係一連串「妖妖之聲」。

本來予人方便既支付轉帳程式、帶比用戶反而係一連串彈APP、無法註冊、收不到驗證SMS,設定不到密碼、甚至過數時間太長等等連串問題,結論係更添用戶麻煩。

匯豐自己都有向用戶解畫,原因係要處理大量需求、引至系統性緩慢等等問題,登記過程好似過五關、斬六將。據知,今次PAYME外判開發商係網龍旗下Cherrypicks,有印象都記得當年佢地幫過某大電視台搞選美公投,同樣出現過「大頭佛」,只係無諗到今次幫獅子錢莊一樣出事。

要知道,涉及銀行帳戶同過數係真金白銀,過帳延誤甚至不知金錢不知所踪都會影響用戶信心。

一個APPS唔會影響到匯控股價,但多少反映到底管理層有幾想搞好創新。講到股價、當然不得不提高盛。

當然高盛唱好滙豐,亦不需要太認真對待、因為幾乎每隔半年到九個月都會轉一次VIEW,不過值得係今次提出理據: 係香港會加息。

高盛指滙豐是全球流動資金最充裕銀行之一,現時有超過四千幾億美元剩餘存款,當中一半來自滙豐香港、估計香港利率平均升50點子,集團今年盈利就會升6%。

所以評級係買入,基本目標價74元,最樂觀情況更會見87元,即係比收市價有三成以上上升空間。

而繼去年大搞回購推高股價後,高盛計過、集團可仍利用美國80億美元過剩資金及核心資本作回購,再加上6厘股息回報,現價值得吸納。

其實華爾街一批大行,眼見匯控回購一招收效,早已有意翻抄。而適逢特朗普放生大銀行,推翻沃爾克規則,有統計今年華爾街大行可以有高達1200億美元剩餘資本,可以用作回購。

作為特朗普身邊、最多紅人出身的高盛,阿總布蘭克費恩已率先表態,話將多餘資本回饋股東,令資金重新有出路,其實係上上之策,而單計高盛,就有130億美元剩餘資本。

不過問題係、十年前金融海嘯大到不能倒的情況,係咪肯定不會重現? 十年前今日,正是滙豐首次發出世紀盈警,之後引爆次按炸彈。

正所謂十年人事幾翻新,當年世紀盈警,隨後供股集資,當年四大金剛管理層、現僅餘兩人已矣。

匯豐當年作出多項強調,事後回想西向東移談得多,但從未實現,反而東向西移越見明顯。

中資掃爆地球,一股北水勢力,既可向全球輸出通縮,亦可輸出通脹,當然不得不提輸出資金之多,查實遠超伯南克任內的量寬威力

某大行早前計算,打從去年北水大規模流入起計,大媽掃入匯豐資金及股數合共,已相等於成為大象哥第三大股東。

純粹天馬行空憶想,憑其第三大股東地位,阿爺要求派代表入局,情況將比有趣更有趣。

2017年2月6日星期一

祭旗


以藝人做功能內衣「生招牌」,原定周一創業板掛牌既芭迪貝伊,成為新監管準則、第一隻「祭旗」既創業板股分。

公司表明,為確保有一個開放市場,需要更多時間進行Book Building,加上因應監管機構就創業板上市規則第11.23條的規定、作出查詢,所以決定押後上市。

創業板規則第11.23條,正正係證監會被用作為整頓創業板重要武器。條文列明,公司股分必須有不同人士持有,而作為持股人數、最少要由100個人持有,而且呢個只係最低標準,單單符合最低要求亦未必可以順利上市。

整個條例背後原則其實係要營造、一個公開市場必需條件,亦成為證監會對「圍飛」行動開刀最有力武器。

據知、監管機構已經留意到,過去多次出現問題既創業板上市股分,所謂獨立既承配人,數目雖然超過一百人、但有一少撮投資者,曾經多次在表面上互無關連既創業板IPO中,成為首要承配人,換言之,就係一群「積犯」,當然會針對佢地列為高度重視名單。

今次為芭迪貝伊擔任保薦人既高企業融資,近日可以話在新股市場相當活躍,十月以來就幫左五隻股分就包銷,當中四隻都係創業板,近作就有縱橫遊。

而且股分有個特色,就係股分表現大部分都係首日高開,之後大幅回落,當中表表者要數8035駿高,4毫1上市,首日高開8.5倍,之後一日最高見過4.8元,但已經無以為繼,持有到今日,收市只有0.285元,比配售股倒蝕三成,較高位更跌足94%。

好似歐達禮今日在立法會內、都表明知道類似投機行為,會令市場聲譽受損,不單投資者輸錢、最終更會減少交易活動,受累既整個金融市場,所以會雙管齊下,由執法以及改善規管兩方面入手。

當然、今次高調以芭迪貝伊「祭旗」,一定會觸碰到部分利益人士以至券商利益,市場肯定有反對聲音。但問題係創業板已經淪落到國際媒體既笑柄、甚至被內地股民戲稱為「老千股」既集中營。到底係要市場質素定係所謂新股排名,係時候要作出決擇。

2017年2月3日星期五

春節紅包

打波先來落雨,立春先來加息!!

川長初七人日,一不做二不休,先加逆回購利率,再加長期借貸便利操作,消息一出,中、外資行,中環、西環以至歐美無不嘩然。

熟識內地資金市場運作人士明言,人行逆回購操作利率一加,寓意不祥是也。
究其原因,每次加息,或減息周期開啟,發源地正正來自逆回購操作利率。

內地券商承認,加息周期已開啟,甚至形容為內地債市黑天鵝二點零版已揭序。

問題來了,人行加息或發放收緊訊號可以理解,但跟之前截然不同在於,川長目前精神分裂嚴重得多。

好簡單,既然政策趨緊的話,央行會從量,及價兩者同時著手,不過今次川長屬於「量仍寬,價從緊」,不然的話,大量MLF,SLF到期,絕對可以選擇不予續期。

而觀乎目前MLF餘額,高達超過三十六萬億人民幣,較之十二月五萬億,某程度上是天量氾濫。

也許,越透過央行操作,向市場注入流動性,在去槓桿、打表外前題下,市場持份者就更要依賴川長,正因如此,人行幾年來一直缺乏左右市場利率功能,隨著市場依靠央行操作,小川長主動性亦忽然提升。

留意的話,人行今日某程度上是變動將利率寺廊上下限全線上調,以隔夜SLF為例,由2點75加至三厘一,意味人行變相發出訊號,現水平隔夜拆息,絕對有條件,及可容許多升89點子。

立春加息太忍心了!查實,川長有其仁善一面,過去數月,市場資金利率及債息升幅25至100點子不等,川長家陣只象徵性加十滴。

當然,仁慈背後一面,亦意味川長在市場操作越見頻繁下,更有進一步調整利率機會。
至於官方存貸利率,算吧,Out架啦!

2017年2月2日星期四

被挾事件

肖建華疑似被挾,消息震撼中環,一來因為佢長期在四季打躉,早已是半個中環人。加上佢擔任「香港文化產業聯合總會」董事,同麗新岳少、新世界純官信和黃志祥同為董事,中環變成人人自危。

年三十晚凌晨一點,胡潤富豪榜排名32的明天系掌舵人肖建華被神秘人士帶走,之後消息就滿天飛,到底人在國內定國外,係協助調查、被調查、定係真係休養,恐怕已成國家機密層次。

現年45歲肖建華背景,呢幾日中國組同事都有詳細交代,而事件再次觸及內地打貪行動升級,詳情大家可以留意返有線中國組。

拆局關注既、係事件背後引伸出,對香港金融中心地位既挑戰。最早報道肖建華是被公安帶走的金融時報,就發表評論文章,表示今次事件已超越銅鑼灣書局既層次,係直接威脅到香港國際金融中心地位。

FT指,銅鑼灣書局引發既問題,作為商界、銀行家、甚至係傳媒,都可以安慰自己、矛頭只係指向出版一啲不盡不實、道聽途說政治傳聞的出版商。但肖建華代表既、就係身家有幾十億美元,與太子黨關係密切的內地富豪,背後代表既利益團體,就非同少可。

彭博同紐約時報早在2012年及14年,分別參與過太子黨交易,更甚有傳聞指,肖建華2013年起就長居本港,原因不單是逃避內地打貪、而係佢曾經參與一宗,國家主席習近平親屬有分的交易,為免受牽連,而避走至加拿大、東南亞及香港等地。

接近肖建華身邊既消息稱,今次被挾事件,是要向同佢相熟既政治派系作出警告,知道領導人太多商業交易既秘密,係一件危險既事。

雖然無人想承認,但過去十年,一批紅色富豪的確為本資本市場、以至經濟貢獻不少,唔信去四季酒店等上半日,肯定所見唔少。

類似事件近四年在內地不同企業、都時有發生,例如2015年就爆出參與中石油貪污案既惠生工程老總華邦嵩,佢個人身家一度達9億美元,最終被判刑三年。

其他個案好似復星郭廣昌、佳兆業既郭英成,都曾經出現失聯情況,之後都傳出曾經協助內地調查,但事件來龍去脈始終都係個迷。

FT已經預言,不排除未來幾日,肖建華會好似郭廣昌咁突然公開露面,然後澄清全屬誤會,但背後帶出訊息已經相當明確:作為一國兩制代表,過去幾年唔少內地富豪視為既避風港,已經不再安全。

短期可以預期、係呢班紅色富豪會絕跡四季甚至本港,牽起新一輪資金外逃。

2017年2月1日星期三

疑曲同工

新年伊始,理應萬象更新,不過市場遇上一個唔知係傻定癲既總統,真係有些束手無策。

連最大對沖基金Bridgewater 老總Ray Dalio 都要一百八十度轉軚,由去年底力撐特朗普可以帶動經濟、推高股市,轉變成擔心一系列民粹政策、最終會是弊多於利,更指明現今推出既措施,現今見到、均是欠缺周全。

由就職典禮人數引發既「另類事實」、到連日簽訂行政指令,推翻TPP,甚至向盟友開火,再提出邊境稅、以至禁止七個穆斯林國家訪客入境,事件已經引發軒然大波,觸發全國抗議示威,甚至要向司法部內部代理部長「You are fired」! 睇番原來香港政壇真係好小兒科!

老Ray預警,特朗普任內,好可能有“民族主義、保護主義和軍國主義”興起的危險、此說法與索羅斯預告、Trump好可能變成獨裁者,算是疑曲同工。

另一對沖基金Carlson Capital 就更加悲觀,形容保護主義抬頭、會觸發世界經濟衰退,亦會令全球股市觸動重大調整。

昔日美國總統有百日密月期,經Trump一役,恐怕會壓縮成僅一百小時,而由佢十月底當選以來、出現既特朗普行程,似乎都隨著幻想變成現實、甚至惡夢,而提早爆破。

有留意我地facebook 觀眾,相信今日開市都會到睇到Sky Sir 張士佳開年貼士,但大家唔好只係一味留意Sky話會雞犬皆升,因為只係一個好短時期,反而重點係要兩手準備,因為當市場過分斜側時候,一個挾淡倉可能會成為常態。

由特朗普行情變成特朗普恐慌,世界似乎開始認知到、全球化一旦被破壞,其實同08年金融海嘯一樣,當時係金融界交易對手之間失去互信,今時今日特朗普只係將呢個層面擴大,將失去互信既基礎伸延到國與國之間。

雖然唔想發生,但SKY話雞年「火上加油」,買石油股恐怕係無選擇之中唯一選擇。

2017年1月27日星期五

有翼難飛?


年三十半日市,開市埋位一樣跟傳統、搵來沈大師同林大師以術數為主題,由投資到經濟到政治人物把脈,得著甚多!

兩位大師去年測市甚準,都預言入市位應是新曆二月後,而立秋後見復蘇,果然在中秋後見高位,重上24000點。

雞年把脈,兩位雖然「貼」指數範圍相近,上下都係大約萬八至二萬五,不過時間就好有分歧,一個估上落上、一個估落上落,某程度就好似黃師傅同SKY SIR之爭,都係英雄所見略有不同。

佢地都同意、今年最大變數,其實係特朗普上場之後,同習主席之間會有幾大沖突,按林建華推算、特習二人,一個屬全火、一個係全土,年中打後、點都會來拼一次!

經濟學人都已經預告,由特朗普坐入「橢圓形辦公室」起,一場災難性既貿易戰已經預定會發生,而當中只有極少數既生還者,一切都值得大家恐懼。

雖然唔少人批評特朗普混亂、政策前後矛盾,不過佢地美國優先既想法,似乎係相當貫徹,特別係貿易上美國一直處於劣勢,誓言要作出改變。

中美一併似乎好似兩位大師預言,係難以避免,問題係點樣先可以唔觸及中國既底線?
經濟學人提出左三個意見:
1. 唔好將貿易同地緣政治掛勾。中國在貿易談判上可以有討價還價餘地,但意圖將南海爭議同台灣地位同貿易掛勾,中國肯定係吋土不讓、

2. 要避免損害自己。特朗普口口聲聲話要列中國做貨幣操控國,但有無認清、中國其實係努力避免人民幣大幅貶值。過分施壓,最終損害只係美國最低既階層、

3. 特朗普應該要好好學奧巴馬,呢點佢雖然絕不會認同,但過去八年來,美國先後十六次向世貿投訴中國,無一單係輸。善用現有機制,有時有意想不到收獲。

話說回來,兩位大師既今早推測,雖然有術數成分,但都係按現今政經局勢作出分析,可觀性高。想重溫兩位大師對雞年運程預測,可以上番我地facebook,另外仲推介有劉紹文劉老師、以及黃師傅黃瑋傑、同埋青姐胡孟青既雞年開市貼士,大家唔好錯過。

做下廣告、有留意我地FACEBOOK觀眾可能會發現,近日我地加強左社交媒體既內容,希望做到可以同電視有更多互動、以及接觸到更多觀眾。

新媒體興起,電視作為單向傳播媒介,已經愈來愈顯得不足,希望觀眾都可以在FB內,對我地節目有咩意見,都歡迎留言,比多啲意見我地。

講左咁多好似壞消息,大年三十晚其實唔多應該,不過正如雞既特性、除左好似沈大師講係「有翼難飛」外、亦都有「聞雞起舞」、「一嗚驚人」特性,我地都希望可以發揮、更早向觀眾提示最新市場變化,令大家可以早著先機,雞年有更好回報。

2017年1月26日星期四

千點大關論

美股破二萬,Trump叫GREAT!! 老婆和應。

Trump rally重拾動力,並無全城響應。

華盛頓白宮歡呼、但華爾街大堂卻表現極為兩極,跟99年道指破一萬里程大關,截然不同!

西報統計,用所謂一千點大關論,道指由萬七升至萬八,用上120個交易日、繼而由萬八到萬九另一大關位,歷時483日,即係近兩年。

唯獨萬九至二萬,所花僅需42日,以花費日數計,為99年由一萬至萬一點,需時24 日以來最少!

當年輕而易舉之破位,很快換來輕易而舉之回落!!

撇除估值、基本因素及理由,美股在Trump總統下創新高,最少標誌三大轉變:
一:財政政策冒起兼大為受落;
二:影響市況權力,由華盛街及聯儲局轉移至白宮;
三:高盛王朝之復辟。

以第三點為例,由Trump當選日起計,高盛累積升幅超過兩成六,為一眾大行之冠。

無他,白宮班底內最少近半打是高盛人! 滲透至白宮高層及各政府部門。

高盛強勢復辟,但預示美股能力繼續不滯,而查實,時至今日,權力移交後的結果,那有一間歐美大行,比白宮來得更有力、更叫座!?

皇蘇說得坦白,以美股市況與特朗普總統指令一併聯結,兩者關連系數是一兌一,有指令、有升幅!

形同Trump每日簽署指令,下令美股創新高一樣。

新政權下,中美博奕升級,惟亦裡應外合,習大大供給側、去產能,重新向全球輸出通脹,Trump總統加以升溫,美股指數某程度上,猶如一條通脹預期指數!

2017年1月25日星期三

神仙難變


陳總裁嘅發言,已經變相證實、外匯基金低回報已經成為新常態。

據了解,金記內部,將2008年後的投資回報,劃為分水嶺,認為已經無法再達到過去十幾年平均5%的回報率,原因正係各國放水、令債息大幅下跌,要搵高回報既項目已經係難上加難,而傳統上股債互補性開始減弱,亦降低投資回報。

拆局之前都提過、新加坡GIC回報倒退,要到美國招兵買馬,而其他主權基金包括挪威退休基金、以及哈佛同史丹福大學、都要增持較高風險資產以提高回報。

以GIC為例、持有股票比重高達60%,而挪威退休基金同兩間大學就持有私募基金比重9-26%。

唔係要88樓講好說話、但以去年高峰時高達13萬億美元既負利率債券,真係神仙都難變,據知金管局內部,就拒絕買任何負利率債券。坦白講、其實都係明智之舉,否則持有到今日,帳面肯定大蝕。

但低還低,回報率只有1.8%,同前年1.4%、同舊年負0.6%去比較,都係相當難睇!
只係勉強跑贏「老婆」負責嗰檔強積金1.5%,可以話完全跑輸通脹!

對於今年投資展望,金管局內部評估、係美債收益率會繼續上升,美元受息差因素影響、而保持強勢。

所以肯定要進一步減持非美元資產,但問題係揸左人民幣、咁點算?
無理由下次見「周小川行長」,會話比佢聽、外匯基金減持左人民幣資產?

所以一動不如一靜,雖然人民幣去年貶值超過6%,但外匯基金決定大約維持人民幣資產規模,出發點更多可能係政治決定。

要突圍,就要靠09年成立嘅長期增長組合,去年回報有超過10%,算係相當理想。其中房地產投資,據聞表現就相當突出。

幾年前外匯基金,決定動用12億在倫敦奢侈品消費區、買入漢諾威廣場五成股權,當時引起全城嘩然,去年中更因為BREXIT,令市場擔心可能有帳面虧損,不過隨著脫歐風險解除,聽聞內部都對回報相當滿意。

至於私募基金、好在金管局算開始得早,唔少買入價、都只係EBITDA幾倍,同而家講緊、下下要十幾廿倍EBITDA比較,算係買得平!

而另一個想拓展項目係STARTUP,不過呢啲項目一向風險偏高、往往投資幾十個項目,只有一、兩個成功,外匯基金以控風險為先,當然要審慎。

所以同投資夥伴取得共識,外匯基金係採取「漁翁撤網」方式,將資金分成小數目,每個STARTUP項目,只係入股極少比例,好處係避免將雞旦、全部放到一個籃內。

但似乎長期增長組合再擴大都有難度,因為去年已投資市值已經超過1700億,連埋COMMITTED未投入既金額都有1338億,加埋已經好貼近上限3000億規模。

除非陳總裁肯改變思維、願意比外匯基金冒更高風險提高上限,否則都係個句: 「神仙難變」!

2017年1月24日星期二

謀奪盟主


政治如賭博,切忌買單邊。

近至本港、遠至世界同樣適用。莊家一轉,派牌諸事不順,大禍往往從天而降。

越南比日本聰明、機巧,早喺去年,見勢色有異,越南國會暫停討論TPP,由積極加入,轉為不急於加入,不變應萬變。

相比之下,日本安倍猶如小狗被燒尾巴,章法大亂,四處乞求見面,大勢將至,路人皆見。

特朗普揮筆簽名,正式向TPP、簽下死亡證無幾耐,澳洲總理特恩布爾,可能呼吸太多新鮮空氣,兼且長期眼望大草原同海洋,忽然間浪漫主義上身,企圖牽頭TPP復辟,令全球捧腹大笑。

特恩布爾貴為高盛人,機關的確算盡,皆因,澳洲最大資源,除煤、鐵礦石外,正正是農產品。

TPP的落實,澳洲農產品出口區內暢通無阻,市場最大尤其日本,正因如此,特恩布爾第一時間主動聯絡安倍,人家看準是日本市場,奈何安倍如在夢中,以為死灰可以復燃。

其實,自從奧巴馬踏入倒數之日起計,美國兩會已經停止處理TPP法案程序,特朗普現時只係姿態上落實過程。

包括TPP在內嘅區域、自由貿易大聯盟,憑住低關稅、低阻礙做招徠,本著互相幫忙、錢齊齊搵原則,某程度上,是全球生產供應鏈深化的象徵,將中國世界工廠模式、無限放大。

但Trump打著MAKE AMERICA GREAT AGAIN口號,生產線本土化、政策美國優先、生產美國優先、購物美製優先,全球經濟新秩序已積極發酵當中。

只要有本事透徹分析現今全球形勢,及新布局,呢個Trading Call足夠未來廿年賺錢。

中國明白轉變既係危機,亦係機會,特朗普就任,但內閣未齊人腳,趁華盛頓只有半個政府運作狀況下,憑住打公關牌,主席好一句: 我無意主動,但美國如果無意做大哥,群龍無首之下,小弟甘願頂硬上,謀奪盟主之位實在明顯。

勢是否順東而來?美帝大搞本土主義,新權力格局未成形情況下,亞投行傳來,最少多廿五國成員加入,有加拿大、有瑞典、有愛爾蘭,實際效益未知,但至少,政治上做定對沖。

2017年1月23日星期一

另類事實

萬眾觸目的就職典禮,結果換來的headline,只係同傳媒開火,以及令人目定口呆的 Alternative facts,咁日後到底仲信唔信政府講野?

為左就職典禮有幾多人出席呢啲雞毛大蒜小事而大發雷霆,絕對令人莫名其妙,反而市場關注既貿易及經濟措施,就幾乎隻字不提,只係不斷重複「美國優先」,但當中已令人警覺入面既緊張氣氛。

當然,唔講唔等於唔做,特朗普一上任,就採取措施重新安排美國經濟聯盟,包括同墨西哥、加拿大領導人約定會面,重新談判北美自由貿易協定,星期五仲會接待英國首相文翠珊,為英美貿易協定奠定基礎。

據了解,特朗普顧問團隊,正在考慮對北美自由貿易協定中、涉及汽車行業的規定做出修改,可能會要求汽車生產商、將更多生產環節留在北美,甚至強制喺美國生產大部分汽車,否則將難以獲得北美自由貿易區內免除關稅待遇。

高盛坦言,對於特朗普當選出現既「特朗普行情」,大部分客戶都開始擔心、一臉茫然,甚至是質疑,明顯市場開始擔心,呢位總統同佢地一樣,都係一臉茫然!

茫然唔緊要、最緊要係市場有方向,睇下個美元指數就知,幾乎跌穿一百水平,係一個月低位,美林調查顯示,全球基金經理將投資組合中既現金水平,由去年12月既4.8%,提高至5.1%,遠高平均4.5%水平。

要知道,一年之始,資金增持現金其實係超反常做法,有基金經理就表明,美國可能打貿易戰同人民幣貶值,都係最大擔憂因素之列。

其他投資者可能甚至開始倒轉部署,在就職前一個星期,就加大了沽空力度,針對追蹤標普500 ETF既沽空規模,在上周四增至329億美元,逆轉左美國大選後兩個月下降趨勢。

瑞信亦加入,列出今年可能出現既十大驚奇,正正係標普五百先升上2500點再回至2000點,美國十年債券息率升至4厘,原因正係特朗普經濟政策令市場失望。

以上預言並非瑞信核心觀點、但去年的十大意外預言中,英國脫歐、油價跌至20美元等都被瑞信估中。

拆局之前已經提出過,靠特朗普可以將美國經濟推高至4%增長,其實只係好友一廂情願想法,以目前國內反對聲音,未來幾年美國面對既內秏絕對唔可以睇少。

而對外同中國打貿易戰可能性,連大好友花旗亦都要調整想法,相信特朗普會「有權用盡」,包括臨時實施對中國施加懲罰性關稅。

觀乎習近平主席一由達沃斯回國,第一件事就係設立軍民融合發展委員會,仲由自己擔任主任,分析相信係要以市場手段改良軍隊資源現置,將軍工商業化,顯然係為未來地緣沖突提早做準備。