赤色星期一

俄羅斯央行喪加息六厘半，但對盧布的支持維持唔到半日。

市場仍然對全球新興市場貨幣赤色星期一相當憂心。從好方面睇，俄羅斯央行五日內，第二次加息，幅度之大、表明當局對捍衛匯價信心之強。

但從壞方面諗，一九九八年違約以嚟、最大嘅加息幅度，而且成為歐洲近廿幾年，央行單一加息幅度最高一次，明確表明，普京終於接受一個現實：貨幣隨時有崩潰危機。

金融市場層面而言，全球大於區內，區內大於一國，市場已經不再關注來年中國增長目標，財金政策云云，最新討論主題是，區內為首新興市場，是否已經出現一九九八年的貨幣危機。

比去年年中一次純粹憂慮美國退市觸發的跌浪不同，今次區內為首新興貨幣跌幅持續、跌勢之久，遠比去年更為嚴重，而彭博追縱新興市場貨幣指數，原來已經跌至十一年低位。

既可以稱為赤色星期一，更加貼切形容為、血洗新興市場事件。

盧布急跌同日，印尼貨幣跌至九八年低位、土耳其貨幣單日跌超過百分之三，創歷史新低，印度再跌至十三個月低位，遠至南非，當地貨幣單日跌近2%。

貨幣層面有跌勢之餘，印尼債息上升至十厘，CDS指標反映違約機會，喺委內瑞拉大幅上升。

跟九八年一樣，美元強、油價跌、新興市場貨幣立體式下跌，當年由泰國至香港，至於今次俄羅斯引發，終點不詳。但比較十多年前，有幾點是截然不同：

一，區內市場利率仍然相當低，用最極端香港做例子，拆息一度見三百，現在仍然大概是零點三左右；

二，區內平均外債佔GDP比例大降，由當日四成，減至兩成半左右；

三，九八年區內儲備合共只有六千多億美元，現在累積超過八萬億美元。但到底區內貨幣跌，係代表市場預示經濟轉差？定係市場相信美元繼續轉強？

又或者到底係咪油價下跌、而觸發嘅連鎖影響？

仍然未有確實答案。但敢肯定，美元來得比預期強，徹底擾亂大戶部署，最新調查顯示，基金持有現金水平，增加至百分之五，而更有趣係，對沖基金持股偏低之下，槓桿水平竟然係零七年最高，唔通正正係對沖基金喺油市，以及新興市場輸大錢？

正如沉迷於A股升勢同時，留意事項有二：一，伯南克印鈔機開動以來，數以十萬億計資金流入新興市場，條數找完未？

又調轉問，一旦油價反手夾高，目前因為油價造成的低通脹，令新興市場敢於在強美元之際大做寬鬆貨幣政策，屆時係咪死上加死!?