球迷世界



5月9號凌晨,好彩無捱眼訓。英超提早封皇的紅魔鬼曼聯,作客藍戰士車路士,一早如期,悶局一場,一粒「士哥」都無。叫做有驚喜,係中國國腳董方卓坐完冷板櫈,有波踢,為紅魔鬼正選上陣。作為球迷,尤其是黃皮膚、黑眼睛的球迷,應該興奮。


失落3年,踢走縮敵藍戰士,重奪英超皇座,紅魔鬼球迷總算可以飲過痛快。曼聯贏車路士,除了是曼切斯特,同倫敦市之爭外,亦可以是美、俄兩國為名與利之爭。

零五年,曼聯原大股東突然轉軚,美國富商加沙成為曼聯班主。當時報章用RED DEVIL形容加沙,提到他善用財技,將債務注入曼聯。曼聯高層據講向職員宣布大股東由美國人接手後一度當眾流睙。

富商買英格蘭球會已經不是新鮮事。車路士班主是俄羅斯有錢佬艾巴摩域治。另外,曼聯、利物浦、阿仙奴都是由美國人話事。仲有仲有,富咸老細是埃及人,韋斯咸就有冰島資金力撐。。

英超球隊商業化,以及賺錢能力數一數二,係吸引外來者參與原因。熱刺係最先上市嘅英格蘭球會,目前大部分英超球會都係上市。而曼聯未除牌前,賺錢能力亦是最高。

德勤會計師行最新統計指,舊年全球廿大球會總收入超過33億英鎊,增長百分之7。頭廿大中,英超球會佔8席。其次係意大利,德國。

錢字當頭,富商力爭入股。做球會生意,最大好處係現金流強勁。天價轉播權費有一筆大錢落袋,單是嚟緊3年,英超批出覆蓋208個國家和地區播影權就涉及6।25億英鎊,當中引伸出的媒體廣播權總收入超過27億英鎊。另外,球迷現兜兜俾錢入場睇波又一筆。仲有仲有利錢極大的紀念品生意。英超球隊單係一件波衫,賣近50英鎊,係來貨價最少3倍。而VIRGIN MONEY的總計亦顯示,英國當地球迷平均每人一生人用140萬港紙買紀念品。美國佬最識做生意,點會唔鐘意收購英超球隊。

好笑係,美國人從來唔係鐘意足球。70年代紐約宇宙隊,搵嚟球王比利,大搞美國特色嘅英式足球,結果兩個字講哂,失敗!

至於萬人迷碧咸肯到美國打職業波,只係個別例字。可能碧咸從來覺得自己係商品,係商品個人化最好例子。去美國,退休打入娛樂圈,呢個決定機會成本唔高。

阿仙奴領隊雲加最近就話,太多外來人入股,或者係商業原素影響了足球本身靈魂。本身在英超亦係「老外」,雲加之言可能言過其甚。因為搞英超,除左為錢,為名仲緊要。

車路士的艾巴摩域治就係一個例子。03年,用4億英美鎊收購車仔,用百億買球員,令佢由最唔受歡迎,變成最受歡迎的人。用錢買名氣,車仔到今時今日仲係蝕緊錢。

仲記得前泰國總理他信當日講一句話想收購利物浦,又令佢知明度,同民望大增。

相反當初私有化的曼聯大股東就實際好多,利字當頭。加沙入股後無大灑金錢買球員,靠青訓上位的史高斯同傑斯繼續係中流砥柱。失去VODAFONE,即刻搵番個同鄉AIG做贊助,仲每年去美國一次搵真銀。

寫下寫下,講咁多球會名和利為乜?都係專心等5月19號足總決賽,紅藍大戰!

費爵爺,好波!



留言

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將