2007年9月16日星期日

動盪


格老新書「動盪年代」要到星期一先公開發售,不過彭博同華爾街日報都已經提早買到。對於目前經濟狀況,格林斯潘並唔樂觀,佢喺新書中提出三個預測同三個趨勢,將會大幅度改變未來二十年幾年世界。

格林斯潘三個預測,包括經濟增長由而家到二零三零年,將會放慢至只有百分之二點五,相反、通脹就會由而家百分之二上升至百分之四點五、而十年期債券孳息率就會由百分之五升至百分之八,最終會迫聯儲局提高利率到十厘水平,去壓抑通脹。

格林斯潘呢三個預測唔係憑空構做,而係建基三個佢認為而家已經可以觀察到既趨勢預測出嚟。

第一個趨勢係環球股市不斷攀升既最大功臣:全球生產力,格林斯潘認為,將會出現明顯放慢,由二千年科網泡沬時既百分之三點六,放慢至只有百分之二。

而另一個趨勢係中國降低全球通脹因素將會消失,廉價勞動力同埋產品將唔會再出現,中國入口產品會不斷漲價,唔可以再壓低全球通脹。

而第三個構成通脹既轉變,就係嚟美國政府本身,聯儲政府吸納左私人開支後,將資源使喺一啲更無效率既項目上,最終只會構成通脹。

格林斯潘係特別在意最後呢點,佢話,作為一個「終生自由主義共和黨」成員,佢對喬治布殊唔能夠控制政府開支感到好失望,認為重大錯誤,亦注定佢地喺舊年選舉中失利。

本書揀左喺聯儲局議息前一日發售,不過搵勻全本書,都無提過伯南克呢個人,淨係喺其中一張相片有一句注腳:「我很放心將聯儲局主席交比呢個富有經驗既繼任人」。

3 則留言:

chaco 說...

周一喜見iris在第8台不斷亮相,回來後狀態上佳,超讚!

damon 說...

我個人覺得iris未在狀態...好明顯的..你試看看她去澳洲前的主持節目.昨天笑容少了,表情少了...中氣好像也有點不足(清姐都好似中氣不足).!!最重要係昨晚iris那條大項鍊..問心...頭套衫唔係好襯.((p.s.喂,我諗我們不要評論女主持太多...免得以為我們係不懷好意之徒hehehehhe))>>最後我想講句..現今社會,個個都為個人利益而做事,好像格老選這天出書.陳水扁又攪台獨.李卓人赤膊上陣...「司馬遷之心,路人皆見!」.但如果今晚伯南克不減息...我便相信有人不會只為個人利益做事...因為真係減息只會博到短暫的掌聲..不減才是今天美國真正的需要!!

damon 說...

我想補充多一句..香港地仲會講真心話的人還有一個..他便是為我們賺錢的任總.為何好像無記者問問他覺得美國今晚會減息嗎?莫非怕他講真話!!>>想當年..香港一街都係負資產,我們政府都冇實質出手啦...而且早兩個星期布總統已經出左手救自己陷入次按危機的國民....減息看來真係冇必要!(我要申報,我都供緊樓的..我都想減息..但不能主觀願望)