2007年12月15日星期六

蜜月期


傳統智慧話,新嘅行政人員上台頭三個月、都係HONEYMOON蜜月期,因為為免影響軍心,即使係有咩大動作要做,都會等蜜月期過後,先至會進行。

不過對於只係上任兩日嘅花旗行政總裁「潘迪特」嚟講,呢個講法肯定唔合適。

呢位華爾街最矚目新星、係前大摩總裁,到花旗上任只有半年時間,一來到已經新官上任三把火,兩日來,有三項動作非常引人注意:

第1日--話要為集團「瘦身」
第2日--要求同前總裁普林斯關係密切的COO提早退休
第2日--效法滙豐、將七個相關SIV投資組合注入資產負債表

SIV的決定相當矚目,因為花旗於第三季業績都仲講無意拯救SIV,原因是花旗截至九月底、一級資本充足比率只有百分之七點三,如果計埋今次「食左」呢幾間SIV,會令一級資本充足比率再下跌十六點子,離目標百分之7.5愈來愈遠。

但凡事均有兩面,新官上場雖然大壓力,不過亦勝在無包袱,因可以將所有責任推卸比前一任。

好似SIV、裁員這等「DIRTY WORK」固然唔怕做,就算係減少派息呢啲咁唔得人心做法,亦都可以以「撥亂反正」做借口。

又突然想起,早半年普林斯一直好抗拒將花旗拆骨,現在到潘迪特上場,華爾街日報已經提出,指潘迪特一向都不是很BUY 「FINANCIAL SUPERMARKET」的方向,面對花旗今年以來股價下跌四成四,現在好大機會將花旗一拆四、成為美國零售銀行、海外零售銀行、投資銀行同證券業務,估計可以令估值提高一成六至三成二。

無論如何,花旗即使冒被調低評級的風險,讓市場知道最大的黑洞到底有多大,讓危機不再蔓延,金融機構肯展開自救,滙豐又一次成了好的榜讓。

而家最「頭癢」反而輪到PAULSON,因為他提出的「SUPERFUND」,連最大發起人花旗現在都唔使救,真係分分鐘變成爛尾收場!

1 則留言:

chaco 說...

與貴節目無關,但:
係咪以後都由黃偉康取代熊麗萍出席周五晚之十至十一?係就要讚貴台決定英明,值得鼓掌。