2008年1月15日星期二

誠信

到底一個中央銀行家退休後,仲有幾大誠信?

退任兩年的格林斯潘,傳將出任對沖基金公司PAULSON & CO.的顧問,是退休後的第三分顧問合約。

格林斯潘話,每個行業、佢只會出任一間公司顧問,而佢揀的公司,都可以在市況波動中賺到錢。

PAULSON & CO.屬下一個對沖基金,去年就因為準確預測樓市大跌,沽出次按相關資產、令資產增加近六倍。

至於前兩間,就包括德意志(銀行)同債券大王「格羅斯」PIMCO(資產管理公司),其中格羅斯亦因為舊年睇中美國企業債券將大跌,轉而持有國庫券而大賺個「滿堂紅」。

格林斯潘一方面不斷唱淡,指近期數據可以反映美國正步向、甚至已經陷入經濟衰退,同時又加入睇淡的大行,難免令人有「瓜田之嫌」。到底是格老的言論還有影響力,還是利之所在......很難令人釋懷。

轉睇伯南克又點?事隔第一次減息已經近半年,伯南克近日亦一改有關評論息口走勢「言之無物」作風,原來是聯儲局內部研究後,決定更改公關策略所致,原因是聯儲局雖然唔同意外界批評佢地「唔貼市」,但承認,當市場處於波動之際,有責任將政策取向講得清楚。

以近日利率期貨同股市表現,金融市場似大有逼聯儲局就範傾向,甚至傳出減息四分三厘機會率高達五成。(歷史上其實聯儲局甚少以四分三厘作為調整基準,而對上一次加減息去到一厘,已經是八十年代的事。)

睇埋大行表現就更令人疑惑:美林,高盛,以至摩根士丹利齊齊唱淡,表明美國經濟步入衰退,有經濟師更話,不排除聯邦基金利率會由現時4厘25,到年底減到得1厘半!而今日高盛一分叫人買滙豐三個月認沽證的報告,更觸發港股大跌市。到底邊個迫邊個,真係「司馬昭之心」!

2 則留言:

damon 說...

富有美國自由經濟發展特色的貪官貪官!!

damon 說...

hsbc..到價了$115.8..孫栢文可以洗去明燈的污名....今晚在money cafe可以用籐條打番當晚打你一籐的女子(講笑啫..)...呵呵..吐氣揚眉..