2008年3月7日星期五

孖展追魂


信貸危機幾乎係橫掃整個高風險嘅次按市場,無論CDO定SIV,銀行都已經大幅撇帳。

不過故事好明顯未完。

新受害者係一批過去賺大錢嘅對沖基金。

隨著最高風險嘅資產已經收得七七八八,銀行開始向風險次一級嘅對沖基金追收孖展。

即使佢地持有嘅資產係被喻為高質素嘅按揭債券。

專做按揭貸款嘅THORNBURG表示,佢地由於無法應付摩根大通要求、提供二千八百萬美元嘅額外抵押品,已經收到對方提出申請破產通知,

而對沖基金凱雷最旗下一個基金發行嘅按揭債券,亦未能償還四個總值三千七百萬美元嘅孖展資金贖回。

凱雷呢個基金,部分係投資左喺房利美房地美發行嘅債券上,評級都係三個A。

對沖基金過去同銀行都係以回購協議安排融資,通常佢地以持有證券做抵押品融資、喺一段時間後以溢價購回。包括摩根士丹利、高盛同貝爾斯登,就擁有高達四萬四千億美元呢類回購協議,其中涉及對沖基金就有十九萬億美元。

最大隱憂係呢類回購協議、通常只係需要一日通知、對沖基金就要向銀行還錢,直情是孖展追魂,相信好似凱雷同THORNBURG個案仲會陸續有嚟。

聯邦基金利率期貨價格顯示,今個月要大幅減息,減4分3厘機會率,更超過百分之100,即係話市場又估會提前減息。

不過鷹派代表、在議息會議「無」投票權的聖路易聯邦儲備銀行行長普爾警告,不可以忽略通脹風險。

佢反對減息,因為聯儲局要有長遠策略目標,唔可以只係諗「短期」或者「聽日」會點。

愈來愈多人將今日衰退局面同1930大衰退比較,不過金融時報Lex話,唔會。

佢地以銀行今年可能撇帳二千億美元為例,但同時指出歐美銀行單是tier 1 就有二萬億美元,銀行未傷及脾胃。

即使樓市再壞,今日斷供比率大約是只有百分之六,同三十年代百分之五十仍相差很遠。

我寧願信匯豐紀勤所講,目前美國經濟是個別州分衰退,但整體不至於陷入Great Depression。

至於紀勤說的美國人負資產問題,又是一個有趣的話題,希望有機會再談。

沒有留言: