2008年3月27日星期四

道德風險

今日執下孫柏文「口水尾」。

試想你係一個酒樓老闆,買accumulator輸了大錢,被銀行追收數百萬元。

無計可施之下,原來發現天無絕人之路,有條絕世好橋可以救命。

做法是先將自己間「歡樂」酒樓結業,除了將公司清盤,漏夜將一車車的龍蝦、鮑魚、海參運走外,欠下員工八十幾萬人工,原來可以叫佢地個個乖乖到破欠基金處「領薪」。

為了避免員工到勞工處投訴爆大鑊,仲要有後著,就係在結業後一個星期,在原址同一地點開另一間酒家,今次改名做「福滿」,員工在破欠基金處領薪後,就再到新酒樓番工。

如是者有「福滿」、「福運」一間又一間開業,總之每次事隔數月就「老馮」叫員工到破欠基金領薪一個月,幾年下來終於還清銀行條數,員工亦習以為常。

原來破產欠薪基金就成為了酒樓老闆的「道德風險」。

同樣道理,引伸酒樓道德風險在投資銀行上,你係投行CEO,你會點做?

橫豎最終有人救,仲要係愈大愈救,一於有咁投機就咁投機,最好個盤仲大個法興阿魔鬼交易員或者高盛三人組,愈投機得大,回報可能愈高,自己地位愈穩固。就算最終真係睇錯市,買錯SIDE,最終一定有人拯救,自己亦唔使上身,十八個月後又是一條好漢。

星期三在貝爾斯登總部,就有壓力團體組織六十人示威,反對聯儲局救市。

面對公眾壓力,泰晤士報引述消息表示,美國總統喬治布殊同佢嘅顧問團,開始對聯儲局做法有保留,擔心的就是道德風險。

喬治布殊擔心,公眾會指摘由公帑出資、去拯救作出錯誤決定而面臨財政困難嘅投資銀行,特別今年係大選年,他擔心會被指偏幫華爾街的銀行家。

財長保爾森星期三的演說,亦都透露左雙方分歧。

保爾森話,聯儲局面對嚴峻挑戰時候能夠推出創意救市措施值得表揚,但新推出信貸拍賣機制係咪會成為長期措施,目前是太早落定論。

他說貝爾斯登事件反映世界已經改變,政府係有需要檢討目前監管投資銀行架構。

保爾森最近更指示,美國證券及交易委員會邀請埋聯儲局,參與監管投資銀行。

一旦聯儲局將勢力蔓延至商人銀行,到底最終會成為什麼局面。

不單美國,英倫銀行繼早前拯救北岩後,亦揚言要採取革新措施,可能會以SWAP形式,收購銀行MBS。

酒樓老闆引起的道德風險頂多影響整個行業、以至業界數萬名員工生計,但投資銀行的影響力,相信大家都心裡有數。

8 則留言:

匿名 說...

我是於投資界工作的,只知現時每個行家也風聲鶴唳,巳經開始有公司狂出warning letters;因員工跑唔夠數...

裁員潮巳經開始了

MoneyCafe 說...

香港沒有銀行界的破欠基金,金管局也不是聯儲局。

早前看到滙豐入稟法院追一個客accumulator數千萬元虧損,就知今年銀行界不易為。

保重。

匿名 說...

個漏洞連我哩d盲毛都一早諗到, 奇在政府有關當局點解無人諗到.

Louis 說...

那香港的銀行你或金融機構到底最後會點的? 見永隆都好像要賣...看來生意難做..而且利息這麼少, 把cash 拿回家中放好過

midnightrun 說...

作為一個"夜鬼"(mid-night run是也),才剛看完今集的money cafe。也看到現今金融界尖子的可惡嘴臉。
今晚嘉賓的論述,跟本就是為了金融界自己闖的禍鬼辯!金融界以大話(假的評級),及專業失格(包銷垃圾)"變"財富,之後私相授受(建立SIV分肥+自發獎金)這些虛假的財富。到大話被揭破,就以深入各層面的規模,騎劫政府,進而透過政府將整個社會的資源來將他們手中的"公仔紙"變現,還要我們多謝金融界想到辦法迴避系統風險!?單看到這,火大!無言!!
節目中提及,沒人出手相救的話,就會出現日本的情況。的確,要不是香港背靠"祖國"(要不是阿爺救了香港一次又一次,應懷疑有多少港人會使用祖國二字...),我們要何時走出負資產怪圈還是未知之數。救是要救,但不是這種"一個也不能少"般的救法。為何不等金融界狂徒計好數才出手,救助真的因爆煲而出問題的無辜?聯儲局再大,資源還是有限。面對無窮無盡的貪念,能以現在的方法救到永遠麼?
青姐在節目中問到這次危機要點收科。我擔心的是以最差的方法了結:政府(不只美國,我想很快英國澳洲等"起泡"的地方很快就會跟隊了)不斷的救,金融界劫匪們不停的將政府多發的錢吸乾,直到一係政府投降,一係印銀紙直到美元不能承受。有經濟學常識之士也應該知到後果為何!

會計仔 說...

要監管就要執埋唔比班金融機構用市價將債券liabilities 入賬, SFAS159 之下, 自己發既債券, 因為人地覺得你可能冇錢還, 市值就下跌, fair value 入賬liabilities 下跌既幅度就變成盈利, 高盛同匯豐都係咁睇落去多左profit, 依d 睇到明就流到出汁,市場一唔恐慌就會倒嘔番出黎,但一般人跟本唔會睇得明。

pakman 說...

Yo 會計仔,

Wrote about it on Friday.

And I agree... It is completely ridiculous.

Shuen

大傻 說...

會計仔提一提,我想起匯豐嗰損益表有個細項我睇唔明,第362頁註解3裡面有條數係derivatives managed in conjunction with HSBC's issued debt securities US$2,476m(2007), US$242m(2006), (US$1,392m)(2005),條數2005年係負債13.9億美元,到2007年就變成利潤24.7億美元,相差有38.6億美元,點解會咁?