救唔救？

幾日間，每股變為只係值兩美元。

身為貝爾斯登嘅員工只有感慨。

感慨唔只係認股權大幅縮水，更遺憾係，唔明公司點解搞成咁。

華爾街日報報道，貝爾斯登行政總裁星期二澄清公司無資金問題，當時佢地確實有大約百七億美元資本。

但不利消息始起彼落，引發客戶提走現金，更大鑊係OTC對手全數縮沙，對沖基金又CALL LOAN追收孖展，轉瞬間BEAR STEARNS星期四只係剩番廿億美元現金。

財長保爾森原本仲認為，貝爾斯登賣盤可以拖多幾日。

但改變事件發展，係佢星期六，收到銀行高層電話，對方話好擔心事件會蔓延到其他金融機構，就因為咁，一間八十七年歷史嘅華爾街大行就咁消失。

保爾森之後接受傳媒訪問，仲揚言話貝爾斯登股東比人救左都唔知。

既然摩通入主已成事實，外界仍然有問號諗唔通。

第一，點解就算貝爾斯登股東否決交易？

原來協議仍然容許，摩通有優先權只係買貝爾斯登最值錢嘅總部大樓，呢度計每股都值八美元。

第二係，摩根大通原來有權只係買兩成以下股權，但股數已經足夠佢地阻止交易否決。

對於今次救市，商品大王羅傑斯就批評得體無完膚。

佢嚴厲批評聯儲局主席伯南克新一輪救市方案，認為當局唔需要為個別銀行破產而盲目向市場注資，話咁做只係伯南克幫佢幾個華爾街老友，最終只會摧毀美國經濟。

被問到財長保爾森仍然重申強美元政策，佢更直言覺得好可笑。

無論如何，由股價反映，大贏家一定是摩根大通，但對整體市場又係咪有穩定作用？到底該救還是不救，大家點睇？