十分鐘

無驚無險、又到四點;
四點之後,處處兇險。

如果今日在交易大堂,於四點之後就會不斷聽到「慘叫」、「歡呼」混集一起,總之好似去左個瘋人院!

有些股分於尾市十分鐘,可以由跌變為急升一成三,仲創新高;又有股分會倒跌一成幾,就連一向穩陣中電,單日都升近一成,創新高之餘、仲是十年最大升幅!

有這個現象是由於收市競價時段出現混亂,期間多隻股分成交,同股價有異動,部分收市價後出現大幅偏差。而競價時段十分鐘成交,更佔左全日總數超過一成六。

10分鐘嘅競價時段成交就多百4億,到855億,即係每秒就有二千三百萬成交。

經紀形容,股分異動,交易混亂。

經典例子係被納入MSCI的蒙古能源,競價時段更由跌轉升,MARK高1成3,最後承埋創新高。

十分鐘嘅競價時段有不尋常成交股分太多,難以盡錄,一度被掛低一成嘅長實,競價時段佔全日成交4成2,中信資源亦超過4成。

看看恆鼎,十分鐘成交佔全日成交五成,即說交易了整整一天四小時,成交也比不上尾市這十分鐘。

經紀話,單係MSCI指數調整,不足以解釋咁多股分同一時異動,不排除有莊家活動,有市場人士擔心,下星期5收市後,恆指成分股改動,情況更混亂。

以往收市價,是以最後一分鐘每十五秒的交易平均價做結算準則,理論上是較易影響股價。

新的競價時段就以最多成交股分作收市價準則,原則上需要更大成本方能影響收市價。

不過競價時段足足有十分鐘,對資本充裕的投資者,就比了足夠時間他們組織買盤進操控股價,反而不參與的投資者,就只能乾看著股價比舞高弄低。

有一件事大家會問,收市競價都做左四日,點解到星期五先出事?

證監會話,正了解今日收市後競價時段嘅情況。

港交所就解釋是今日有批股分因為MSCI指數改動而調整組合,並非有不尋常交易。

過去每年MSCI會改組四次、恆指公司又要做四次檢討,又唔見過去市場會有咁大波動?

咁都叫無唔尋常?

睇多隻中電,根本就唔受組合變動影響,咁講真的有些牽強。

陰謀論睇,就係星期五成交一向淡靜,揀呢個時間做市好易得手!

咁計法,到下星期一開市,mark低左嘅可能會搶高,今日升突左又要回套,恐怕又有一番「殺戮」。

證券經紀業協會就指,如果情況持續,港交所有需要檢討係咪要繼續實施有關機制。

看來交易所要認真檢討這十分鐘的交易安排,否則很容易成為另一倘「細價股」事件翻版。

留言

匿名說…
對呢十分鐘真係有啲意見
之前做收市價, 大戶都要俾錢做
但係依家, 唔只俾時間佢地慢慢計之外
做價仲唔洗前咁多錢
好似2號仔咁講呀, 29/5最後10mins時頭個十幾個牌都熟口熟面

今日睇生果報仲激氣
"港交所發言人表示,收市競價時段出現混亂,主因經紀忘記昨收市後是MSCI指數調整。「港交所5月19日已發通告預報,上星期又與 200多個經紀開會交代。今日(30日)雖然係收市競價系統推出後首次MSCI調整,但佢 係專業人士,唔知我都冇辦法。」"
跟本個個都知,指數調整,唔知既係原來延長交易時間後係會咁亂
延長交易時間原意係要穏定價格,但係依家佢意義已經變咗質
匿名說…
其實,到而家都唔明"競價時段"係點運作。原本佢應該點樣穩定收市價? 而家又點解會失效,仲反而變成可以容許大戶以更少代價做收市價?? 到底個機制點架???

至於港交所講既廢話,唉! 我唔可以話佢地蠢,反而應該諗番轉頭,到底有邊次港交所改例(or 改玩法),到頭來都係方便咗大戶做野? 呢方面到底係利益輸送定係腦閉塞,看官自行判斷囉!
大傻說…
過往收市價是最後一分鐘內每十五秒的五個價位的中位數,理論上大戶可以在最後一分鐘內狂掛買盤推高股價,引入收市競價機制後,收市價是正常交易時段後十分鐘內成交最多股份的價格,收市競價機制是星期一才開始,實行了只有五天時間,是好是壞還有待時間去驗證。
匿名說…
多謝大傻!

咁我想問,係咪所有人都可以係呢個"競價時段"進行買賣? 如果唔係,咁乜野條件既人可以? 理論上,如果個個都可以參與,以一人之力難以對抗所有玩某隻股票既人,的確可以防止"mark"價。

如果只係少數"有實力"既人仕先可以參與,咁只需要一個電話,一餐下午茶,就足夠各"實力派"分餅仔"矣...而當日所見,會唔會係d banker 用咗五分鐘傾電話,再用5分鐘黎落盤係期指世界? 當然可能係陰謀論,就多睇幾次期指結算,看看結果如何。

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將