體檢


舊年聽到任總話要幫銀行做身體檢查,當時心諗,香港銀行咁健全,任總你玩咩,唔通想轉移視線?

半年來,英國出了間北岩,美國都唔執輸,整左間貝爾斯登。

原來可以咁大鑊,存款保險唔係講下算,真係會有用……

要幫銀行做身體檢查,相信無人熟得過佢。金管局委任了前副總裁「簡達恒」,出任顧問,就維持銀行體系穩定工作作出前瞻性研究。

David Carse在九三至零三年出任金管局副總裁,十年前由畢馬威完成嘅銀行顧問報告,都係由佢負責,佢任內分別完成左取消利率協議,引入存款保障制,以及影響銀行最深遠嘅七成按揭制度。

報告目的係為銀行業進行「身體檢查」,簡達恒話,本港銀行業比5年前佢離開時更穩健,但英國NORTHERN ROCK倒閉事件,就響起左警號,特別係存款保障賠償問題

現時制度下,一旦銀行出事,十萬蚊港幣以下存款會全數獲賠償,但報告認為,唔夠,因為英國已經將百分百賠償上限調高。因此可以考慮將存款保額由十萬增加至二十萬。

本港銀行一向資本充足比率都高於國際水平,原應要符合巴塞爾2應一些問題也沒有。

不過自從爆出多間銀行如中信嘉華、永亨、東亞都持有SIV及CDO等按揭資產後,想深一層,原來又唔係真係咁安全。

在保費(存款收費)不需增加前提下,存款保障增加至二十萬應該儘快落實。不是擔心有銀行真係出事,不過經過次按一疫,大家都明啦。

反而有點意外是簡達恒話,金管局監管職能方面可能都要檢討,特別強調要增加調查權力。

呢個可能是簡達恒多年在港監管銀行的經驗,因為因應目前銀行業條例,金管局只可以用撤消牌照作為處分,即係話除非大大鑊(大都損害本港國際金融中心地位……其實想唔到咩具體情況下先會有咁既情況),否則條例根本就癈。

唔通真係因為滙豐唔見左炳錄音帶,你走去收番佢個牌?

因此報告建議一啲罰則可以「中間落墨」,包括罰款同公開聲明。

聽聞獅子銀行班高層同任總經常不咬弦,互相以「嗰邊Office」做稱呼,如果今次通過修改銀行條例,銀行大班都應幾頭痕。

簡達恒話,到目前為止,睇唔到次按影響到本港銀行體系穩定,但個人認為,相關投資工具入帳嘅會計準則,有改善地方。

簡達恒喺佢任內最後幾年,已經不斷提出銀行嘅財資業務、可能面對市場波動嘅風險。
今日睇嚟,好像任總所講的「字母湯」,甚麼CDO、CDS、MBS、ABS、SIV….銀行應該好明白簡達恒當日為何用心良苦。
//////////////////////////////////////

任志剛讚簡達恒嘅報告既專業,又全面。

梗係啦,人係你請,帳又你付,分報告本來只係針對銀行做體檢,但睇勻不少篇幅都是提出增加金管局權力,好似銀行業,同接受存款諮詢委員會長遠應合併,仲話明不應由財爺Chair,應由金管局總裁做主席。

又話銀行業上訴職能,應由獨立審裁處,取代行政長官會同行政會議執行。

唔使咁出面啩?

留言

匿名說…
任志剛想擴大權力,
自已人工先要同伯南黑睇齊,
同埋外匯基金有幾多「字母湯」, 流0野3A債券
匿名說…
任總都唔 do 啦,關唔關事呀?
pakman說…
I agree with the first anon..


even if they did a full body check, they can't exactly say the Fannie Mae and Freddie Mac bonds in these banks portfolio are spoilt.

But look at their ever increasing yield spread over treasuries.

I dunno. An ill wind blows.

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將