2008年12月12日星期五

撥亂反正?


美國參議院否決拯救汽車業方案,觸發金融市場再出現一次像十月時的波動。

共和黨參議院領袖「麥康奈爾」聯同共和黨議員,反對民主黨同白宮聯手制定嘅拯救方案,認為呢個140億美元嘅拯救計劃,根本係派費納稅人金錢!

結果喺共和黨反對下,參議院最終只有52票贊成,距離法定嘅60票最低要求,仲差8票,議案最終被否決,結果釀成環球股市、匯市、債市、商品市場大災難。

有唔少評論都指,「麥康奈爾」同共和黨都需要負上責任。

其實公道啲睇,麥康奈爾唔係無理由,佢批評政府今次拯救計劃只係救「自己友」,今日要求納稅人承擔開支、不過車廠就唔能夠就未來嘅改革作出任何承諾。

參議員嘅分歧主要係,喺汽車工人削減薪酬福利方面,未能取得折衷方案。國會方面,希望工會喺零九年就薪酬福利開始讓步,不過工會方面,就想喺2011年先會喺薪酬作出讓步。

可以咁講,自己間公司都已經搞成咁,工會都係唔肯讓步,其實都係相當自私,唔通真係諗著「一鍋熟」!

參議院方面「今年內」,都唔會再討論汽車業拯救方案,可能真係好似民主黨參議院領袖「里德」講得咁感性,話一切已經完結,所有人將面對一個最差嘅聖誕!

好啦,咁下一步會點走?

華爾街日報報道,GM已經聘請負責處理雷曼,同ENRON破產嘅兩大法律顧問,研究申請破產嘅細節。

由於國會要出年先至復會,通用汽車可能因為資金不足,申請破產保護。

不過呢個未必係壞事。01年諾貝爾經濟學獎得主Joseph Stiglitz就喺金融時報撰文,形容三大車廠申請破產保護,先可以「撥亂反正」!

佢形容以一百五十億美元緊急貸款、去協助汽車業係「莽想」,因為目前估計要注入嘅資金要高達一千二百億美元。

以美國嘅「CHAPTER 11」破產保護法例,已經足夠保障公司可以繼續運作,生產汽車。

作為股東同債券持有人,佢地無錯會係「一無所有」,不過呢個正係投資者要為自己行為負責。

Stiglitz認為,唯有咁樣,美國嘅汽車業先可以「輕身」重新上路。

金融時報亦都贊成,將車廠破產嘅傷害,遠比搵個「汽車沙皇」嚟得少,似乎呢一場陣痛,大家都係要咬緊牙關!

3 則留言:

大傻 說...

奧巴馬唔會俾三間車廠倒閉掛?讓它們破產,可能會重蹈雷曼覆轍,多幾百萬人失業,佢地供緊啲樓有幾多會斷供?用果D樓按抵押嘅CDO、MBS會跌幾多?參考三間車廠債務嘅CDS有幾多會爆煲?車廠縱然是百般不是,現在還是最好讓它們活下去,150億唔肯使,將來可能要用多幾千億先擺得平,美國現在境況艱難,條數好難咩喎。

Victor 說...

呢三間野...佢俾到個發展計劃先得架,俾到幾錢佢周轉,點知佢地繼續做垃圾車出黎,又唔諗方法點樣同工會傾下d pension可以點樣調整到一個大家都接受 o既程度,以GM計,到時既俾Toyota拋離銷量,又整多鋪財困,到時睇你仲有無面去Capitol Hill去乞錢!

大傻 說...

車子設計追不上競爭者,平均時薪比同行高了一截,退休金開支龐大,種種問題都不容易解決,要看管理層和工人是否有決心要繼續經營他們引以為傲的製車工業,我相信華府即使貸出款項,也會向他們提出嚴格的改善要求,且看車廠和工會如何回應。說不定這次危機是改變車廠長久積弱的契機。