蠢!


年尾例牌有些型型式式選舉,財富雜誌今年就選出21件「蠢事」(dumbest),輕鬆下都幾好笑(抑或笑中有淚)!

首選係美國三大車廠嘅行政總裁,向國會乞求數以百億美元計嘅貸款,不過,佢地用錯「乞兒兜」,「坐」私人飛機到華盛頓,用個「金兜」乞食,結果被國會議員評擊,三位舵手空手而回。

之後又矯枉過正,唔搭飛機、改「揸」10個鐘頭旗下嘅混合燃料汽車,由底特律去華盛頓,搏同情分,得啖笑﹗

第二件令人「O嘴」嘅「蠢事」,係美國保爾森,喺雷曼倒閉後,向國會提出救市方案,最初只有三頁紙,希望獲得七千億美元問題資產拯救計劃嘅全權委任,但就無提出任何具體拯救計劃細節。

國會喺九月尾否決拯救計劃,結果股市面對強勁沽壓,救市計劃被否決後,保爾森嘅計劃書立即由3頁加碼至451頁,令人啼笑皆非。

講到令人O嘴,一定要提吓同奧巴馬爭做美國下任總統嘅「麥凱恩」,佢喺九月15號朝早,雷曼宣布破產後,仍然話美國經濟基調穩健。

呢一著先令唔少美國選民,驚覺佢「智慧」有幾高,最後失落埋總統寶座。

今年財經界嘅「蠢事」,仲包括「彭博資訊」錯誤發表蘋果公司創辦人「喬布斯」嘅訃聞,公布佢嘅死訊。

同樣同蘋果有關,係有八個傻瓜,每人用$999美元,買入一個叫「I am Rich」iPhone軟件,開啟後原來只是一個Screen Saver!

至於美國證券及交易委員會同樣上榜,為咗要令美股止瀉,實施限制金融股沽空,結果弄巧反拙,金融股三星期內蒸發四分一市值。

唔怪得考克斯話呢件係佢任內最後悔做嘅事。

留言

匿名說…
What is LMAO???
匿名說…
LMAO means laugh my ass off

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將