2009年1月24日星期六

大政奉還

剛講過日本最大最強企業Sony,最終錄得2600億日圓經營虧損,唔怪得由外國人出任嘅CEO,要恐嚇改變日本企業終生制文化!

不過亦有企業喺面對危機時候,寧願「掉轉頭」,希望搵返自己嘅傳統。

你講緊係喺啱啱喺星期二、接任日本豐田汽車社長嘅「豐田章男」、聽到佢個名、大家都估到七七八八,佢真係豐田創始人豐田喜一郎嘅孫。

「豐田章男」將會喺今年6月接替現任總裁渡邊捷昭,成為自95年以來豐田家族另一個掌門人。

豐田啱啱喺零八年,銷售第一次超越GM,成為全球規模最大、汽車業一哥,不過佢地自己都唔好過、好似全球銷售就減少左百分之四,係十年嚟首次下跌,而單係美國,更大跌一成半。

雖然豐田表面比起美國同業幸運得多,不過佢地都面對七十一年嚟、首次虧損嘅現實,過去一年股價亦大跌左近五成。

金融時報話,日本傳媒以十九世紀嘅「大政奉還」(Taisei Hokan),嚟形容豐田章男回歸,因為就好似喺幕府年代,日本天皇收回政權一樣。

其實豐田汽車而家都成為左、一間國際性跨國企業,市值雖然少左三分之二,但仍然超過一千億美元,比起成國泰國經濟體系仲要大,點解仲要比一個只係持有豐田2%股權家族嘅家族操控?

原來可以追溯歷史,二次大戰結束後,豐田亦試過求助於家族成員以外嘅專業管理人,而家只係將歷史倒轉。

有人亦都話,喺危機之中,企業好多時就會「憶故人」,因此先揀左豐田章男出嚟。

但呢個做法就被金融時報批評,認為呢個係日本企業弱點,就係此終無法擺脫家族影響。

豐田章男自己都似乎明白呢個弱點,因此更家著急去表現自己。喺記者會上,佢就羅列出一大堆汽車市場數據、以及行業「術語」,好似係解釋汽車「替代比率」呢啲名辭。

雖然好似豐田自己咁講,雖然佢嘅出生係無得揀,不過佢都係「紅褲仔」出身,84年加入豐田後,就到生產部門上任,又做過中國業務主管。

豐田章男自己都講,希望日後可以成為一個最接近廠房嘅社長,仲響應奧巴馬口號,要「Change」!

有消息話,佢已經計劃向十九名高層開刀,對呢間傳統企業嚟講,都係一個大動作。

講到尾,似乎面對呢場海嘯,好多傳統價值真係面對好大挑戰。

1 則留言:

匿名 說...

I really admire those who are real enterpreneurs that can lead and turn around ailing corporations around rather than those who raise hands in land auctions or by whatever means to make easy money out from accumulation of properties from small owners which most of them were in fact their hard earning saving for many many years. -SC