風水佬

里昂每年都會整色整水做個風水指數，以一笑置之心態睇下都無妨。

里昂「風水師」話嚟緊牛年，港股走勢會先低後高，喺６至８月恒指有機會再落到０８年嘅低位。

里昂話，牛年最利屬『金』嘅行業，金價有機會突破番一千美元，金礦股相信會受惠，其次係『火』嘅行業，預計油價可以重上140美元，石油同化工行業受惠外，電力、電訊同電腦業都會。

至於房地產行業，就預計喺年底會復甦，但貸款成本上升會影響氣氛。里昂預計，最差嘅行業會係屬『水』嘅航運
、航空、汽車、運輸、飲品同旅遊業。

講咁多行業，散戶最關心都係啲上市公司運勢喎，滙控又點呢﹖

里昂話要睇吓佢嘅掌舵人、主席葛霖嘅運勢啦，佢屬鼠，里昂話喺鼠年確實係一團糟嘅，但到牛年、特別係春天就會慢慢好轉，好戲在後頭咁話，暫時係休養生息嘅好時機。

但有啲企業頭頭喺牛年犯太歲喎，好似屬羊、請緊病假嘅蘋果行政總裁喬布斯，同電視廣播嘅邵逸夫。里昂話唔駛太擔心嘅，只要努力工作就得啦。

長和系主席李嘉誠都犯太歲，里昂話佢牛年有投資機會㗎，只要唔好隨便發表意見，克制脾氣就得。唔知今年長和系，係咪由０８年係咁賣嘢，轉番買番嘢呢﹖

咁成為美國人最大期望嘅新任總統奧巴馬，又係咪可以帶嚟改變呀﹖

里昂話佢雖然屬牛犯太歲，但只要努力工作、保持樂觀，就必能將壞變好咁話。

可以搵屬蛇嘅聯儲局主席伯南克幫手呀，話佢今年有貴人喎，財運同事業運都最旺。原來中信泰富主席榮智健都係呢個生肖，唔知係咪又咁好運啦。

我哋國家領導人都唔弱㗎，里昂話主席胡錦濤、總理溫家寶，喺財運方面有值得期待嘅地方，係咪即係振興經濟政策可以有啲憧憬呢﹖

國家行運，香港都唔弱嘅，因為特首曾蔭權係最當旺嘅生肖之一，牛年會無比好運咁話，由其係下半年㖭。

似乎最後呢個，原來先最擦鞋。
//////////////////////////
愈近農曆新年、愈多大行出嚟講牛年預測、之後又有瑞信。

瑞信教你點樣運用收到嘅利是錢，對象當然係股市。

瑞信話，過去３個牛年，股市表現都好參差，唔可以作準，但用另一個統計估算，就係由０１年開始，每逢當年第一個交易日係升嘅話，全年就有得升。

照咁睇，今年都會有好表現。而家股市跌到咁殘，大價股有邊隻好買?

佢地偏偏唔揀大價股、搵嚟八隻小型股、帶挈下散戶賺一筆，仲相信反彈幅度可以達到９成半。不過，行業種類都幾散下。

以澳門股比較多、有兩隻，就係信德同新濠，瑞信話，雖然上次國家副主席習近平訪澳門，冇帶嚟好消息。不過相信呢啲都係時間問題內地始終會放寬自由行限制，有利澳門。

執平貨亦都係瑞信重點之一。中國電力、鷹君，現價嚴重被低估，瑞信話佢地有望翻身。

睇波有時都睇下往績，瑞信認為呢招用喺股票身上一樣得。計往績、工業股龍記、過去十五年都冇蝕錢，對上一次金融危機，盈利增長又比人快，對佢好有信心。至於睇中東方海外又係同樣道理。

咁多中字頭股分，內地前景一樣睇好、雖然09年仍然存有好多風險，不過瑞信指，將會遇到嘅危機，市場有晒心理準備、加上有部分已經反映左，相信09年中國會勉強保到八、並成為區內大贏家。