2009年2月3日星期二

種票?

星期三就係電盈股東會,不過一大團疑雲都係懸而未決。

電訊盈科中午就發左一個澄清聲明,不過反而令人有更多疑問。

聲明否認「種票」嘅質疑 ,話據佢地所知,無出現不當股分轉讓,佢地聽日如期開股東會,表決私有化。

不過最令人費解,係電盈話會翻查一個月前股東名冊,如果發現有問題,會再公布。

股東聽日都進行,而家先話會花時間調查,係咪太遲?

停牌一日半復牌,電盈一度升交百分之9,去到四個二,成交額近9億,係兩年幾最多,一百萬股或以上大額成交就有43宗。

面對連日有關涉嫌種票指控,電盈話,無股東曾經進行任何不當嘅股分轉讓。

但佢地會翻查股東名冊,睇番舊年12月,至今年一月嘅記錄,一旦發現不當股分轉讓,會另外公布。

DAVID WEBB話翻查股東名冊工作,應該由證監會做,而唔係經電盈。

有關電盈其中一個涉嫌種票指控,係前身盈科保險嘅「富通保險」,突然同一時間,以佢地名義,持有大量一手股分嘅小股東,電盈只係話,佢地同富通並無股權關係。

當然明眼人都知發生咩事,只是不知道為何有人會如斯愚蠢?

按規定私有化要通過,要7成半或以上授權「股分」贊成、同時要有5成或以上出席股東人數支持,反對票唔可以超過一成。

都係里昂證券「有種」,佢地認為,種票正係要確保,先符合五成出席股東投票贊成呢個要求。

佢地批評,電盈喺未確定有無不當股分轉讓情況下,實在無理由堅持如期開股東會,係莽顧香港聲譽,莫視企業管治。

有企業財務界人士話,由於電盈未完成翻查股東名冊,如果遲下真係查出有問題,就算股東通過私有化,證監當局亦有理據推翻結果。

92年,華置私有愛美高,雖然獲股東通過,就試過證監會質疑,結果被推翻。
/////////////////////////////////////
其實睇電盈今日咁升法,可唔可以話私有化係「十拿九穩」?

雖然今日多大手成交,股價又升得多,不過差價仍然好大,以電盈收市四個一毫七,同四個半私有化出價相比、差距有成百分之八,比起同樣係私有化嘅邵氏,差距只係有百分之二。

只可以話,係反映私有化成功機會增加,不過仲係有唔明朗,唔怪得里昂話,就算股東會通過,都仲有可能被法院推翻,到時受損就唔只電盈一間公司。

1 則留言:

匿名 說...

说一句: 电盈确实害人不浅! 我替他们的小股东不直. 一个人最重要的是个人的声誉,不是钱财. 可能一身铜臭重来没有想过這个问题.