低手

一度齊名，舊年十月齊齊轉型做銀行控股。

摩根士丹利同高盛、第二季業績只可以用天同地嚟形容。對手盈利創出新高，大摩就連續第三個季度虧損，蝕左１億５千９百萬美元。

華爾街日報講過，高盛嘅成功、係建築喺對手嘅痛苦身上。

金融時報話，如果要搵一個唔鐘意冒高風險嘅投行，一定就係摩根士丹利。

單計兩間銀行交易及投資收入，高盛賺多一倍，有破錄嘅１０７億美元，反而大摩就蝕左三億美元。

原因睇風險資產都可以了解到，高盛第二季VAR(Value at Risk)增加至二億四千萬美元，即係銀行評估一日內、最多可以承受虧損，而大摩就反而下跌至一億一千萬美元。

債券收入、即使撇取一次性項目，收入都只係高盛三分之一。

行政總裁默克對呢個部門係最唔滿意，今個星期就撇換左利率、信貸同貨幣交易部門主管。

此消彼長，高盛以11億美元、向政府購回認股權，係首間完全擺脫政府影響力銀行，埋單計數，政府回報有兩成三。

默克想追番同業表現唔係無道理，不過資產市場由低位反彈四、五成之後，先至增加風險投資，反而令市場擔心。

睇番大摩嘅槓桿比率，由第一季嘅十一點二，增加至百分之十三點七，似乎係有所行動，反而同期高盛係調低左槓杆比率七個百分點。

可能唯一令大摩員工滿意嘅、係盈利倒退下，花紅同薪酬都係無手軟，摩根士丹利分左近六十億美元，增長左一成四。

雖然計番每個員工只係「袋」到九萬五千美元，遠比高盛員工分到嘅三十八萬美元少，不過已經係佔左總收入七成二，遠比平均分派四成八比例高。

唔怪得分析員話，作為大摩員工都算係豐收嘅一個季度，但股東就肯定唔係咁諗。