2009年10月6日星期二

A級行長

原本估最快下個月先加息,澳洲儲備銀行突然殺市場一個措手不及。

開會後決定加息四分一厘,官方利率,由3厘嘅記錄低位,加到3厘25,係舊年三月以嚟首次加息。

澳洲央行話,全球經濟開始復蘇,非常低息嘅時期,已經過去,澳洲會逐步減少之前推出嘅刺激經濟措施。

澳洲成為首個G20國家加息,較早前獲Global Finance Magazine評為全球A級央行行長嘅澳洲儲備銀行行長史蒂文斯,自從舊年金融海嘯以嚟,多次快人一步,舊年就係由佢帶頭大幅減息一厘。

舊年雷曼出事後至今年年初,澳洲央行快速減息,令澳洲息口降到三厘嘅記錄低位,之後眼見樓市泡沬愈滾愈大,史蒂文斯多次暗示,低息環境唔會維持太耐。

成為G20首個海嘯後加息國家,史蒂文斯亦被封為最鷹行長之一。澳洲報章頭版報道加息時形容,密月期已過。

財長斯萬更多口講左句,央行突然加息,即係陸續有嚟,澳洲家庭從今以後,生活艱難。

不過市場對今次加息KICK OFF,似乎反應不大,大家真係當退市無料到?

好似金融時報咁講,去年澳洲央行是最快手減息減息國家,而家大家覺得由佢帶頭減息是理所當然。

袋鼠國行出第一步之後,分析界暫時共識係歐美息口短期繼續沿地踏步,最快出年下半年先夠膽郁。相反亞洲區息口年底,就會開始回升。

匯豐就話,南韓,台灣,叫緊糊。

如果睇通脹數據,印尼,印度,菲律賓,越南,通脹數字都係極高,單以通脹呢字睇,上述幾個國家,都係加息高危地區。

區內基金界,早喺兩個月前,買左條加連贏。就係澳洲,搭南韓。次選係印度,搭印尼。

大行之中,除左匯豐外,野村亦買南韓會係第二個加息嘅G20。

有專家話,南韓元目前已經出現央行唔願意見到嘅升勢過急情況,如果加埋息,情況會失控,係左右南韓加息時間主要因素。

如果有留意,喺Global Finance Magazine啱啱選出最佳央行行長中,南韓央行行長「李成太」同台灣央行行長彭淮南亦係同列A級!

同樣係A級仲有全球第一個加息嘅以色列央行行長,八月時將利率由歷史低位0.5厘加息四分一厘,已經警醒了市場,控制通脹的重要性。

更令外界關注,係祖國政策。雖然仲係國慶長假,但內地網亦大篇幅報道澳洲加息情況。令人聯想,內地亦想效法澳洲,提早加息。

要留意係,長假後內地又步入數據高峰期。內地傳媒近日吹風,出口,同物價第四季止跌,加息條件開始形成。

但熟識內地政策內地學者話,人行最先,只會係加存款準備金率。

外界共識依家係,人行出年第一季先會行加息呢步。

原因有幾個,第一係內地有太多加息以外途徑,對抗資產泡沬同通脹問題。更重要係,目前中央政策仍然係適度寬鬆。人行唔可以超越國策,年底嘅全國中央經濟工作會議,會為出年政策定調,到時先至係好戲在後頭。

當然仲有一個原因:周小川只是個C級行長,不是嗎?

2 則留言:

匿名 說...

The evaluation of a Central Banker/Governor is hardly be judged by one or two occassions rather it must be on long term basis. What Greenspan has done in the past now bear on the global economy recently. Same can apply to Mr. Yam. His credibilities and legacies are yet to be tested in years ahead. (1+2)

匿名 說...

Buy on dips for simple reason- dollars will continue to be weak and RMB is on the strong note. What else could be better bet than this. (1+2)