2010

時間倒數返年初，相信無幾多人可以準確預測到、09年金融市場有咁戲劇性變化。

經濟學人提出，如果三十年代係稱為「大蕭條」，咁2009年就應該稱為「大穩定」年代，就係靠住政府出手刺激經濟，令恐懼變成樂觀。

咁2010年?

華爾街日報提出，美國經濟會有百分之三增長，係兩年來最好，已經足以推動失業率回落至金融海嘯前水平。

其中最好環節會係資本開支，至於樓市銷售雖然有改善，但斷供惡化，過期還款既按揭升至百分之九點六。

退市仍然係最大不明朗，高盛就預測美國救市措施會持續，可以推動上半年經濟增長兩個百分點。

經濟學人就話，二零一零年先至係真正危機既一年，原因係經濟復蘇基礎仍然脆弱，經濟不平衡、資產泡沫，以至主權債務違約風險都被市場忽視。

要真正復蘇，經濟學人提出兩個條件，一個係發達國家要提出真正可行、同具誠信既削減財赤計劃，以減少市場對「主權債務」既風險，同避免長期利率飊升。

另一個就係中國要願意付出代價，下定決心加快人民幣升值，咁先可以應對新興市場資產泡沫問題。

問題係，點解又要中國犧牲?

要數悲觀可以睇下、金融時報專欄LEX既預言，佢地唔係預測2010年，而係估十年後，美股只係會「打過和」，相反日本股市就有本事可以翻身一倍。

而包括中國在內既新興市場，十年後會大跌一半。

你信唔信?