戰略組合拳

新年中央除左送分大禮比我地、喺春節前加存款準脩金率,似乎對美國人仲特別關照,「醒」多封大利是比佢地。

中國喺舊年十二月減持美國國債,減幅仲係十年嚟最大!

截至舊年底,中國持有7554億美元美國國債,減少342億美元,減幅達到百分之四點三,係二千年嚟最大單月減幅,而且中國已經係連續第五個月減持美債,累計減持450億美元。

相反,同期日本就增持115億美元,此消彼長,日本喺零八年九月以嚟,再次榮登呢個美國「最大債主」既銜頭!

值得留意,係中國主要減持左短年期嘅美國債券,但同時未有購入其他較長年期嘅國債,好明顯係我國已經決心唔再單坐美國呢條船!

不過要講取代品又好似言之尚早,特別係歐元區仲係「泥菩薩過江--自身難保」,阿爺揀呢個時候出手,肯定係有特別動機。

又大膽做下三大猜想,呢個時候最敏感既、當然首推係奧巴馬將接見「達賴喇嘛」,外交部已經係多次高調反對有關會面!

不過最新消息係會面情況可能唔會公開,似乎奧巴馬都係想低調進行,咁仲值唔值得中國花「真金白銀」抗議?

如果「達賴猜想」唔成立,仲有無其他合理解釋?

咁睇下第二猜想,就係軍事勢力抬頭,「暸望」周刊引述軍方消息,話國防大學同軍事科學院既軍事人員,提出一套「軍事戰略組合拳」,建議減持美債以懲罰中國向台灣售武。配合番內地最近「從緊」既政治風,好似有啲道理!

經濟學人早前都以巨龍對住奧巴馬做封面,認為西方對住呢條東方巨龍,唔可以過於強硬,特別係奧巴馬近日提出、唔排除會對中國提出貿易制裁,係相當危險一步。

但同時亦唔應該過於軟弱,應該鼓勵中國負番一個「大國」負有責任!

不過最可信可能都係瑞信既解釋,元兇就係背後呢位「元老」,「Volcker Rule」既發起人沃爾克,因為除左中國之外,其他好似係美國證券、長債以至資金淨流入都有放慢趨勢,唔少更比十一月少左一半。

一旦沃老既建議成真,瑞信話分分鐘會引起美元資產既「大逃亡」,到時唔知邊個會化身「亡靈」去搵奧巴馬?

留言

匿名說…
請問先生有沒有留意星加坡樓市?有何看法?本人父母在星有兩單位,一在較好的區,另一在較遠市中心,已持有10-15年,想放售套現.請問你覺得現在是好時候嗎?還是多等一會?謝謝
亞羊說…
那要問問自己及閣下父母??

手持物業目的何在??

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將