2010年3月17日星期三

鳴金收兵


債券大王格羅斯形容呢次會議毫無驚喜,「悶到令人瞓著」。

不過嘅會後聲明對經濟嘅評估、係比之前明顯樂觀,

提到就業市場,形容係正在「穩定」落嚟,同上次字眼話「勞動市場惡化減弱」,有好大差別。

更積極既字眼係形容商業投資,形容為「顯著改善」。金融時報話,呢兩方面評估、反映聯儲局對經濟前景睇法已經出現重大改變。

同一月嘅會議時一樣,堪薩斯聯儲銀行行長「洪尼格」,繼續投反對票,佢仲提到繼續維持利低息長時間,可能會導致金融市場失衡,並增加長期宏觀經濟同金融穩定嘅風險。

咁到底所謂低息維持一段長時間、實際有幾長?

有聯儲局既委員講過、代表係公開市場委員會三至四次既會議,市場共識係半年時間,因此預計下次四月會議,好大機會會刪除或修改字眼,部署下半年開始加息。

作為去年風雲人物,窮半生精力研究衰退,伯南克局長上半場救市成功、攞滿分,至於下半年要攪退市,佢亦都籌備多時,無理由懷疑佢要及時退市決心!

綜合各大報道,伯局長正搞盡腦汁,點修訂。

佢唔似格老,佢唔喜歡含糊,佢想點,佢預期係點,一定會講清講楚!!

剔除低息一段長時間字眼進入倒數階段。

局方流傳,聯儲局內、正傳閱一本藍皮書,書內載有唔同修定字眼嘅建議版本。

最有可能係將依家低息維持一段長時間,改為「一陣」又或者係將全句刪除,改為貨幣政策會相當包容,意思係: 即使加息,都唔會加好多!!

意見向來獨特既KC認為,洪尼格絕非只代表個人,他正只是聯儲局安排出來放風的棋子,隨著要管理加息預期,局內鷹派聲音會愈來愈響亮。

今次會後聲明,除左關注經濟評估字眼外,WSJ 同紐約時報都集中報道、聯儲局確認今個月底就會結束、購買總值1萬2千5百億美元嘅按揭抵押證券計劃,正式鳴金收兵。

伯局長如期去馬,可喜係繼續反映聯儲局喺民粹主義之下,繼續維持獨立性。三月底係咪終止計劃,其實引嚟唔少爭論。

美國政界話唔好,華爾街日報更加多次高調報道話 ,按揭利率一定升,債王格羅斯甚至講: 萬萬不能。

大有理由轉軑嘅伯南克,維持原判,正好反映退市即將進入新階段。

事實上呢部分既資產,目前佔左聯儲局總值二萬二千億美元資產負帳表既最大部分,由一年前開始加碼,按揭抵押證券既規模就一直無停過,喺二月分更增加左二百幾億美元,幾乎貼近容許購買既上限。

華爾街日報話,收購按揭抵押證券係聯儲局救市措施之中、最成功既一項,結束計劃會令按揭利率上升,巴克萊就估計會推高半厘利息。

有留意伯南克二月分,交俾國會講辭,呢篇可以視為退市攻略。伯局長講得好清楚,要經濟徹底復蘇,再加收緊貨幣政策啟動暢順之後,佢先會賣。

換言之,聯儲局暫時只會傾向任由按揭資產到期,要賣最快可能係下年年中嘅事!!

反而加息方面,有的變數!!

從聯儲局上個月,突然加貼現率嚟睇,伯局長已經掌握到,作為央行,行動要凌架於市場預期之上。分析家相信,貼現率好有可能再加,令兩個利率息差、正式回復到佢退市攻略提及嘅水平。

至於聯邦基金利率。外界不斷揣測,係咪十一月之際,其實忽略咗一點!!

聯儲局依家資產負債表二萬億,伯南克講明,聯邦基金利率已經失去功能。與其估佢幾時加息,倒不如集中睇佢幾時將銀行過剩資金存放喺聯儲局收取嘅儲備金利率調高,因為呢個利率,先係佢提及,最可以影響市場利率指標。

1 則留言:

亞羊 說...

買菜東市下,悠然做晚餐

天暖剪羊毛,安然歎世界


咩... 咩... 咩...