樓市二、三事

兩日前、運輸及房屋局局長鄭汝樺至話，「家家有層樓」唔係政府政策。

呢篇長文可說是近年特區政府最清晰的房屋政策。

可憐的鄭局長，文章出街唔夠兩日，就被老細全面推翻，成為了爛頭卒!

特首話，明白市民憂慮置業難，但係咪要改變樓市政策，包括復建居屋、要有共識，所以會用五個月時間諮詢，留待十月施政報告至公布。

似乎政府有心先「買時間」，再看清楚未來五個月形勢變化，再決定下一步。

難怪既，仲有兩年時間，你想佢點?
////////////////////////////
我們一個月前開始規劃，希望可以針對現行發展商的賣樓手法欠缺監管，作一個較詳細報道。

不過在我們構思以至約政府訪問期間，居然比政府搶先推出九招十二式規範賣樓，結果令部分Story難以繼續發展下去。

但政府所有規管，仍然是靠地產建設商會約束地產商自律，不過市民對地產建設商會嘅運作，知道嘅唔多。

我地問商會點樣監管地產商、以前有冇試過有產商違反指引，以至商會嘅章程同會員資格，過咗接近一個月，全部都未有答案。

商會無網頁，打電話去問，只係話現時有七百幾個會員，但咩人有資格做會員、就唔方便透露。

成立了四十五年，這個自我規管的組織，影響著二百多萬個置業家庭，但完全是以一個私人俱樂部模式運作，會長是由84年到而家，一直連任董事會會長嘅何鴻燊。

佢舊年因病休養，但商會無交代有冇人代任。至於副會長之中的信和大股東黃廷方、同希慎主席利定昌過咗身，商會亦無交代有無成員替任。

為了追查地產建設商會背景，我們試圖由公司註冊、監管組織、以至法定機構等範圍查下去。

結果要找到「社團條例」，先知全港最大孖沙，統統都只係以一個「社團」身分註冊。

由於社團要向警務處註冊，我地又用左半個月、嘗試向警察牌照課，攞商會嘅註冊資料、結果亦都失敗。

最有趣係警察牌照科，對於我地申請要求看公開資料，居然答:「我地仲考慮緊點回覆，至於要考慮啲咩，就係要而家我地要考慮既嘢!」

夠晒玄，死未?!!!
//////////////////////////////////
繼九招12式及市建局後，第3式由地產代理監管局發功。

什麼要講明自己係代表發展商定買家、合理陳述、唔容許提供貸款、以至唔准追車通通都唔係重點。

重點係新規例係代理又未經發展商同意，唔可以向買家發放銷售資料同收訂金，亦唔可以攞走買家嘅身分證同代為碌咭。

要知道，發展商比1-2%佣金代理，不是一個少數目，點解要花咁多錢比佢地?

幫手搵買家? 新樓盤如果有水位，買家自自然然會入市，使咩代理出手。

實情代理最大功能，係幫發展商「散貨」。

代理用一些講啲唔講啲手法、只係比一、兩個單位你揀、又或收起你張身分證同卡，迫到你唔買唔得。呢啲賣樓手法，事實與「層壓式推銷」無疑，基本上分別只係呃你幾萬蚊、同幾百萬之間。

不是嗎，串同代理，只向買家披露極少數資訊。又施展精神折磨，務求令買家在不清醒情況下置業。

如果地監局真係落實呢啲措施，發展商應該唔會再比佣代理，相信好快又會回復抽籤安排。