2010年8月27日星期五

貪污之都

呢個星期見到既幕幕片段,都可以話觸動全港市民既心,我地為死難者哀悼之餘,亦希望傷者可以盡快康復。

對於菲律賓警方同政府既處事手法,連日嚟本地都提出左唔少質疑同批評,經濟學人仲形容係菲律賓最「羞恥」既一日。

但有一個更深層次問題都值得分析下:
就係一個質素咁低劣既政府,點解經濟同股市都可以有咁凌厲既增長?

如果睇菲律賓股市,由零八年十月低位計,反彈幅度超過一倍,就算單睇今年,累積既升幅都有兩成,係全球表現最好既市場之一,更係連續六個季度上升,分析估計今年內好大機會會創出新高。

同樣令人費解係GDP表現。當地第二季出乎意外反彈左百分之七點九,係三年嚟最大升幅,同時亦推動左披索今年升值百分之二,主要係政府開支同消費抵銷左農產業萎縮既影響。

諷刺既係、市場對菲律賓市場有咁大信心,就係源於呢個唔肯聽特首電話、態度又輕挑既菲律賓總統「阿奎諾」三世身上。

佢六月上任以嚟,打正旗號話要打擊逃稅同貪污,當時市場都幾Buy呢套。

股市由六月開始升左半成。但點知呢個總統其身不正,唔單止輕視左今次港人挾持危機,仲冷淡對待我地特首,直至中方高調要求介入,態度先一百八十度轉變,事隔兩日就嚟下半旗「致哀」,但就令人好覺係「猫哭老鼠」!

經濟學人話,今次挾持人質事件,對阿奎諾三世銳意推廣旅遊業,係做成致命打擊,因為佢原來打算吸納國內同胞到國內旅遊,而家,哼!

但今次慘在、政府大幅削減開支,全國十二萬名警察既無資源又無人工加,幾乎全國上下都知自己既警察靠唔著,個個都要靠貪污去幫補。

結果所謂特種部隊就算到左現場都唔肯出手,慘令我地港人遭遇毒手!

舊年由柏林一個機構做既貪污指數調查顯示,菲律賓既排名由131再跌至139位,遠差過泰國既84同印尼既111位,貪污之都當之無愧!

睇下接任馬尼拉警察首長嘅警官,只係做咗一日就被撤換,原來當地傳媒揭發,同十幾年前,涉及綁架同殺害三個販毒香港人有關。

你話一個咁既質素國家,熱錢都膽敢流入,係咪本死無大害??!

1 則留言:

ANGIE 說...

今時今日,仲有咩投資係「理性」嘅呢? 抑或根本從來呢個世界都係咁運作,只係我入世未深,所以唔覺?
I really wonder if the kind of "Rational" concepts deeply rooted in my mind is still applicable today!