2010年8月17日星期二

Power Lunch

喺中環人都知,而家要喺中環食個似樣既Bussiness lunch,唔預早幾日booking枱,要喺IFC或者港麗中菜廳食飯,幾乎肯定無可能!

恐怕遲啲大家都使咁愁,上任後首項主要政策改動,港交所行政總裁李小加,揀左一個十年嚟都做唔到既「燙手山竽」、延長交易時段!

依家港股十點開市,四點收市,加埋四個鐘交易時間,唔止係區內最短,以全世界最主要既二十個交易所計,香港兩個鐘既Power Lunch時段、係當中最長!

七年前交易所都曾經諮詢過市場,希望延長交易時段、點知遇到空前既反對,結果死腹中!

為左配合內地交易時間、現在的建議是早半個鐘、即係九點半開市,四點收市不以不變,
午飯時間縮短改為12至一。

七年前啲經紀仲可以用延長時段無助增加生意嚟反對,但今時今日我地同祖國既合作又競爭,你一來遲人地半個鐘開市,人地下晝開市你就放食飯,咁點同內地競爭?

望下今年成交額,雖然內地股市係全球表現最差,但人地平均每日成交,仲可以有一千五十億,比香港足足跑贏七成,點可以唔發力追!??

原來而家唔少交易所都無午飯時間,歐美幾乎都欠奉,亞洲就得中國、香港同日本有。

如果一旦落實,香港交易時間比上海多個半鐘,但比日本,同新加坡構思嘅交易時間短。

不過一旦縮短食晏時間,影響都有唔少層面既人,因為經紀之外,其他配套好似係結算、銀行、交易所同監管機構,大家個「胃」都要適應新既生理時鐘!

彈性食飯事少,中環一帶食肆影響先大!

IFC間全城最貴既米芝蓮三星法國餐廳,已經要叫救命,因為食三道菜既法國大餐,就最少要個半鐘,你話第日點趕得切!

反而蘭桂芳之父盛智文就話影響唔大,因為就算點趕,人都係要食晏,最多就係食少幾個Drink,唔好搞到自己醉晒!

不過單係延長時段,唔足以救到生意。而家全世界都興講「高頻交易」,經濟學人就計過,以每宗交易指令執行時間計,香港要九「毫秒」,比全球最快既納斯達克既零點177「毫秒」,人家快我地五十倍!

唔止,而家落後我地既新加坡同巴西,已經引入「高頻交易」,包括喺交易所附近安置呢啲好似足球場咁大既高速電腦同Server,新加坡目標係要成為全球最快交易所,一個指令可以喺百萬分之90秒內完成!

人家就不斷求變,但我地就為左保著交易所壟斷地位,就抗拒引入新交易平台,似乎單係延長時段都唔足夠!

都唔使諗得咁長遠,好似蘭大師話「齋」,大不了咪食快餐或者麥當奴,係時候認真諗下開番檔快餐版的Moneycafe!

1 則留言:

匿名 說...

我覺得整一個好似 CNBC's Power Lunch類似嘅節目會幾好, 但要好小心因為如果悶得嚌, 好似新嘅 The Strategy Session 同近一年嘅 Power Lunch 喺美國收視都幾差, 但無論如何都值得喺lunch time加節目, 首先格離對手喺嗰段時間冇, 二來你地曰間嘅節目實在唔太夠緊籌, 試下遲D改節目Opening嘅時候, 改埋d opening music, 全部用曬財經即時睇嗰個已經會好好多, 聽起來節奏會明快D. (好似新聞台嗰邊) 其實都係時候改啦, 你地周未嗰D節目一年改一次, 何況D日日都睇嘅節目.. 四五年都唔多覺有改..