香港站. 停

有感於今年人民幣業務發展一日千里，但普遍市民對真正人民幣業務帶來的商機仍然不甚了解，我們今個星期製作了五集「人民幣. 香港站」，由人民幣在港存款及結構產品、結算業務安排的商機、以至小QFII及港元日後的存廢作出討論，希望引起更多人注意!

豈料這個香港站才剛動車，又已經要被「叫停」!

金管局昨夜突然通知銀行，開展只有數月的人民幣貿易結算額爆滿。

多間銀行都向我們表示，今次事出突然，亦唔明點解喺商討增加額度期間，要突然叫停。

連最大銀行之一恆生一姐都話，唔明點解結算額度，突然爆滿!

由於人行唔肯增加額度，金管局已經啟動掉期協議，俾唔夠人民幣資金銀行向金管局拆入。

其實事件背景是始於今年七月、人行，同金管局擴大清算協議之後，本港人民幣業務出現高速增長。

存款大增之餘，多間銀行推介後，用人民幣貿易結算更大幅增加。

好像金管局在九月仍表示中銀香港貿易結算額度只係用左一半，但十月就全數爆滿?

一個月用左四十億，除左反映需求大，有經濟師唔排除仲同炒賣升值有關。

本港目前提供人民幣離岸現貨報價，匯價一直較內地高，較早前同內地差距更高達超過一千點子。

這顯示香港成單邊炒人民幣升值市場，令內地有介心。

值得留意係，原本話到本港發債嘅財政一直未落實，而小QFII回流機制，亦未啟動。

其實有理由相信，近幾個月本港情況令內地覺得過左火，當局可能放慢本港人民幣業務發展。

對於今次事件，不少銀行坦言當局對事件透明度不足，有銀行甚至怨言根本不知貿易結算有額度限制。

我們認為，金管局需要就今次事件負上責任!

還記得陳總上星期說過、要誠信，唔閃閃縮縮，唔講得，就企硬，寧願唔講!

貿易結算額爆燈，由於人行唔加額，先被逼啟動掉期協議安排，咁大件事，銀行界話，離譜，有無搞錯。

咁重要、咁影響銀行大事，金管局寧願閂埋門，隱形發言，試問點唔會繼續引嚟無限揣測!!??

金管局第二錯，係八十億限額，因為原來好多銀行唔知。二嚟，八十億對我同你好多，但貿易結算，數目其實不大。

金管局一方面多次話，貿易結算反應好，但對八十億呢個可能好快乾塘限額又無及早警示。

錯估形勢，就係第二宗罪!

好明顯，今次事件係有人心紅，以為咩都得，點知百花齊放程度遠超預期。之前有無提下銀行呢? 又有無同人行摸底呢?

第三宗罪，當然係無做好管理預期。國有國策，今日可能一，聽日可以二。直通車一役已經係例子，無學好教訓，七月嚟，一面倒高調吹谷，結果全民皆人仔!

銀行界話，人行今次明顯係急剎車，未來兩個月係關鍵，但要有心理準備，咩人民幣報價，小QFII，可能無想象中咁快實現!

之前高追左2388的投資者，我讚成你操上IFC!
//////////////////////////
製作完這個「人民幣. 香港站」後，古素蘭亦離開了我們的團隊，展開她事業生涯另一挑戰!

Yoko, Take care, all the best!