2010年12月31日星期五

2011

回顧2010年,投資市場無論係股市、匯市、商品以至債市,全部都係有進帳,係五年嚟首次!

大贏家肯定係商品市場,反映十九種商品價格既CRB指數,下半年急升左兩成七、成功扭轉左上半年跌勢,全年累積升左一成半。

其次係股市,MSCI環球指數累積有一成三升幅,一度重上三百三十點水平,啱啱重上番08年九月雷曼倒閉前既水平。

至於美債同美元指數,亦分別錄得5.7同2.1%升幅,叫做仲可以反映環球經濟改善,令各類資產受惠。

至於環球股市中歐美市場喺推行量化寬鬆下、普遍有唔錯升幅,科技股受追捧,好似係APPL累積升左一點五倍,令納斯達克指數跑贏大市。

歐洲雖然爆出債務危機,但德國股市仍然維持到一成六升幅,不過「歐豬五國」中既西班牙同希臘,仍然係表現最差既市場。

亞洲方面,「金磚四國」中既俄羅斯同印度,表現出色,分別有兩成三同一成七升幅,但內地股市就「反高潮」跌左14%,係區內表現最差市場。

至於受熱錢流入既新興市場好似係印尼同菲律賓,累積有三、四成升幅,指數都係創出新高。

溫故知新,咁明年焦點又會係咩?

Fortune為投資者揀出2011年主題,就係聯儲局唔敢講、但你我每日都感受既:

通脹

數字上可能未見到通脹壓力,不商品大王羅傑斯都諷刺、聯儲局既通脹數據係一個騙局。

所以財富話跟羅傑斯買嘢,都無咩走雞,必買既係商品期貨,其次可以跟埋高盛,佢地商品交易員首選係今年落後大市既期油,認為可以抗通脹,預測後年可以升至110美元水平。

如果真係咁驚通脹,財富仲有一個建議,就係買抗通脹債券TIPS。

由於有太大需求,5年期TIPS首次出現負回報、即係話投資者確信未來通脹肯定重臨,寧願而家忍受負息率。

要再進取,可以造淡、索性買一隻一面Long商品,同時又沽空 股市既熊市基金,今年雖然跌左一成三、不過過去平均每年回報有百分之四。

又或者考慮買同VIX指數掛勾既ETF,今年雖則跌過六成半,但趁低吸納可能係一個機會。

但Barron's就話唔使對股市前景太悲觀,話今年升左一成一既美股,高處未算高,不過唯一憂慮、係散戶既牛市信心指數,係升至今年四月以嚟最高。

同樣睇好美股係CNBC MAD MONEY主持Jim Cramer,估道指明年會見 13,365點,即係有一成六升幅,叫人買經濟周期股分,好似係Caterpriller、波音、美鋁、甚至美銀喎!

不過講到底、資產市場表現都係同經濟掛勾。金融時報主筆「馬丁.沃夫」就為環球經濟把脈,佢估計主要經濟體系可以有百分之二至三增長,相反市場今年睇好既新興市場好似係印度同中國、由於經濟結構有內在矛盾,好難帶動全球復蘇。

佢又相信歐債危機可以穩定落嚟,預言歐元不死。

至於我地今年歲末Special請來三位嘉賓,石Sir推薦係:美息勿近,人仔可親!

綜觀今年人仔尾市發力,都可以升到超過3%,希望明年更好啦!

羅家聰建議就係通脹必定回歸,儲糧就最實際!

至於施老闆嘛: Real Estate,仲要係地緊要過個建築!

明白明白,地價永存!

沒有留言: