2011年2月12日星期六

敵動? 我不動!

象徵華爾街嘅紐約交易所,控股權可能拱手相讓。德意志交易所計劃以換股形式,成為紐約泛歐交易所最大股東。

一旦成事,佢地會成為全球最大,但意味紐約未必再係全球最重要嘅金融中心。

話係合併,其實大家都知係紐約交易所被收購。

德國股東日後持有六成控制性股權,合併後新公司會喺荷蘭註冊。

二百幾年歷史,依家可能由德國人話事,象徵股票交易,要進入跨時區交易嘅年代,華爾街嘅一磚一瓦影響力逐步減退。

數字上,合併無論以營業額定盈利計,規模都會係全球最大,每年交易量達到20萬億美元,市值亦會超過港交所。成為全球第一。

全球交易所再出現併購潮,英國金融時報形容,呢個末完末了遊戲,係反映場外交易普及之下,交易所迷失方向。

華爾街一名老經紀更慨嘆,連代表美國繁榮標記嘅交易所都被收購,證明,時而世易,紐約已經唔係大曬。

由新加坡併購澳洲交易所、到德意志收購紐約泛歐。消息指,就連東京、大阪證券交易所都傾緊潛在合併。

面對國際對手日益壯大,港交所競爭力被受質疑。

說句老實話,港交所當然並非天下無敵,亦不能坐而待弊。交易所之間競爭,從來係一個大課題。

但我地要問,係點解忽然出現合併潮?

呢場併購,由新加坡帶起,獅城要向外併購,不難理解。澳洲肯做親家,亦係籠裡雞作反,錯誤開放交易權,結果令澳洲交易所被逼埋場角。

倫敦交易所外併,問題嚟自市場佔有率跌,而且係急跌。

外國傳媒話,就算佢地唔搵多倫多,倫敦亦繼續搵人成親,一旦新加坡收購失敗,倫敦交易所會隨即加入收購。

澳洲交易所突然間變成皇帝女,當然由新加坡收購,澳洲政治上阻力較大,始終澳洲會當英國人,至係真正自家人!

三宗併購,最令人意外,係紐約交易所拱手相讓俾日爾曼民族。美國傳媒亦大做新聞,話代表華爾街時代終結!

美國人玩金融出神入化,華爾街內猶太人,更係成精,肯放棄交易所,當然有佢地理由!

自從幾年前同泛歐合併,紐約交易所繼續敗於黑池,同高頻交易,美股少於三成交投係經交易所進入,市佔率日益下降、今日肯賣,證明聰明嘅佢地,知道大趨勢難改變!

所以我們一早稱呼黑池為交易所殺手,想來就是有這個道理,亦怪不得亞洲區對黑池如斯審慎。

英國金融時報亦點出紐德結盟徵結所在,就係連紐約交易所都自認,佢地以往模式,行唔通。

所謂紐約交易所模式,係純交易所經營概念,只有買賣,無結算功能,一方面未能帶嚟一站式服務,二嚟,更難將場外交易,納入場內。

一切可能太遲,紐約交易所今日行呢一步,正係因為德意志交易所擁有結算功能,靠呢個合併,紐約交易所問題,就可望解決到。

當然代價大左啲。如果諗深一層,紐約依家做,正係炒番香港模式,亦證明香港呢一套行得通。所以係咪要跟人家合併? 港交所講明,係睇機會。

但明眼人都知,除非對象係深圳,或上海,合併才有真正的營運效益,可以減少兩地上市費用,否則敵動我不動。香港最大問題,目前仍然係先強化系統!

沒有留言: