2011年2月23日星期三

偉大市民,愚味官員


全港七百萬市民,今日可能係憤怒的一天。

新一年度財政預算案,赤字變巨額盈餘,冇得退稅。

煙稅再加,大家可能都有心理准備。

但汽車首次登記稅亦要加,你就未必估到。

同大家詳細講呢啲措施之前先睇吓政府盤數。原本估計嘅252億赤字,變咗713億盈餘,來回多賺900幾億。

財政儲備就大幅增加800幾億,而家有接近6千億。你覺得政府對「紓民困」「抗通脹」做得夠唔夠呢?

又問,曾俊華計數有幾叻呢?

數,計錯左。

錢,就無派多左。

免電費、差餉,父母子女免稅額,就算再加6000大洋、入落全港打工仔強積金戶口,加加埋埋,都只係得440億。

唔好忘記,呢條數係反映喺下半年預算,今年計錯數嘅千億誤會,政府寧願全部撥番落財政儲備。袋袋平安。

所以本來以為得4830億,結果,累積左近6000億。相當於23個月政府開支。

政府堅持,應付不明朗環境係有需要,預留多個錢應急。

過去財政司司長,無論梁錦松定唐英年都提過,儲備夠十二個月政府開支就得,但睇返政府未來幾年嘅財政儲備,都超過廿個月政府開支。

曾俊華否認政府孤寒,話政府有錢,即係市民有錢。

至於點解唔退稅,政府係擔心刺激通脹,話一日有通脹,都唔會考慮退稅。

佢仲話,今次預算案好進取,但識計數都知,佢寧願將盈餘全數放落儲備!都唔加馬受惠市民!

政府謬誤之一,係驚直接派錢,會刺激消費,令通脹加劇。

經濟學上,只係證明,貨幣供應多,同通脹有直接關係,但從來無講過,市民銀包多錢,會令通脤升溫!!!

舊年六千蚊退稅,變為今年六千蚊注入強積金戶口,佢話受惠嘅人更多。

呢個講法更取巧、跡近欺騙! 如果學佢打矛波,我地用一個打矛波結論,就係要受惠政府優惠,咪即係要即時辭職!

錯誤假設,引發另一謬誤。要解決通脹,武功高強嘅佢話,要提升生產力,香港工人朝九晚七,生產力都唔夠咩???

請問,通脹問題係咩引發?

全球食品價格升,引進多元化進口來貨,解決到咩?

唔退稅,無問題。唔預繳咪得囉!!!

唔向有固定收入人士派糖,無問題,但佢亦都無向真正有需要人士解困!

有留意政府未來幾年預算,財政儲備預測由舊年四千幾億,增加到往後幾年,都有六千幾億。政府部署,好似係不斷增加儲備!!

曾俊華強項,係問極,都係答非所問。中環人揣測,一係阿爺指令,要預留多的錢,應付金融市場突變,甚至乎有人聯想到,同聯匯有關!!

另一個布局係,曾俊華根本睇唔通個局。於是,留定多個錢,一旦經濟有變,或通脹升溫,就推多份小型預算案!!

政府守財,但土地供應就大玩篤數。

話今年供應有三至四萬個,好多!!但條數係要土地儲備表全數獲勾,港鐵,市建局項目全部盡推。如果因為咁達標,出年咪有零供應風險?

預算案結尾引用詩人一句話,就係偉大市民,成就偉大城市。

但有學者私底下話,愚味官員,辜負了偉大市民!!

13 則留言:

superstar racing 說...

Your blog is great你的部落格真好!!If you like, come back and visit mine: http://b2322858.blogspot.com/ Thank you!!Wang Han Pin(王翰彬)From Taichung,Taiwan(台灣)

Lacie 說...

貨幣供應多就會通脹?簡直是小學級別的認識。2008年美國狂印M2,市場反而流動性枯竭,怎樣解釋?

自然商品價格相對工資價格被低估,就會造成通脹。退稅或直接派錢等於變相令工資價格提升,當然會進一步推高通脹。

鬍鬚曾的預算案反應本港政府水準很高,財政政策很高明。MoneyCafe作為中產財經節目,立場當然會與中產看齊。但反對鬍鬚曾也要拿出點有水準的見解來啊。

HKaladdin 說...

致LACIE:
唔識經濟就唔好係度攪攪震 !! 花旗既M2增加又點及我國 !! 1/10都唔及 !!
閣下謂:"自然商品價格相對工資價格被低估","退稅或直接派錢等於變相令工資價格提升", 簡直不知所謂 !!
做政府既走狗都要有d水準,唔該...
MONEY CAFE 喺俾d有水準既觀眾睇既 !!

HKaladdin 說...

LACIE:
係有腦都知香港既通脹,係HKD與USD掛鉤所致。
滙改以來,HKD兌CNY已經貶值咗20%有多,九成本港入口都係來自大陸! 明未!!??

Lacie 說...

哇,批評吓你既blog就咁大反應,又走狗,又冇腦。完全個人攻擊。

“我國"M2增加超過花旗國20%, 而唔係閣下所講既10倍以上。請做好功課先發言。當然相對GDP來講,祖國既印銀紙絕對世界第一。

由於資金可以瞬間在國際間流動,一國既M2並不能決定其流動性,也不能決定係通脹或是通縮。一個區域內既通脹,係由自然商品價格(例如豬肉,土地,融資成本等)與工資價格(例如薪水,分紅,租金收入等)相對估值既不平衡所決定。當自然商品價格估值被低估,市場就會引發通脹。與貨幣供應量無必然關係。

本人唔係話你唔可以批評政府財政政策,而是你批評要有水準,唔好人d講你又講,冇道理既批評。之前預算案取消紅酒稅,你d又話政府高官鍾意嘆紅酒,與普通市民冇關,減少紅酒稅收,幫有錢佬。依家香港成為世界第一紅酒拍賣市場,政府收返鬼佬既利得稅遠超過紅酒苛稅,你d就個個收聲。所以批評前請先做好功課,唔好人云亦云。

HKaladdin 說...

首先聲明,我只是一個日日到訪這個blog的投資者。我可以講,在本港媒體之中,以有線財經台最有分量,其他既行埋一邊!! 我呸 !!
做功課?!我係呢行做咗30年,未識得一位做功課比我多! 我是旦一位mentee既eco都好過閣下!!
美國既M2自2008年開始到QE2到上個月都祇不過由US$7,600 billion 增加到US$8,800 billion (+16%)。 中國同期由43萬億跳到73萬億RMB (+70%) !! 而這個官方數字一直被懷疑是嚴重低估! 真正情況是美國的10倍 !!
http://www.businessinsider.com/the-central-bank-is-causing-inflation-2011-2
講到商品價格,我敢講,無商品被低估!! 相反因為我國需求,被高估的比比皆是,原油是表表者!!
我成日教人做功課!!

Lacie 說...

HKaladdin

既然大陸M2增長是美國的10倍,人民幣升值預期就是美國資金撤退的掩護啊。如果資金回歸美國,唯一可以阻嚇國際資本攻擊本港聯繫匯率的就是今天鬍鬚曾不斷增加既儲備。政府財政預算比聰明錢都醒目,難道不值得市民支持?

Lacie

HKaladdin 說...

Give me a break Lacie,

政府增加儲備跟舒解民困係兩碼子事!! 呢個所謂小政府,根本就係無能,唔曉經濟,唔理草根同中產既疾苦,97以來推出既政策,完全係餿主意,害人不淺。
阻嚇國際大鱷仲有外匯基金,資產達2732億美元。
有這樣子的特區政府,乃港人之"扑"...

HKaladdin

匿名 說...

大家唔駛咁火,講到尾,在位既人唔適合呢份工作。有弱勢政府情況下,就只有弱勢環境比市民。

成日都講預留錢作有需要之用,幾多先夠,有無指標。

有錢都做得咁差,無錢既時候都唔知係咩世界。

匿名 說...

失敗的施政報告.

本人最懷疑注資$6000MPF不會影響通脹的一點,

$6000X全港市民X(10/20/30年)X每年平均回報5%/7%/9%,=$$$???

10/20/30年後累積回報出來既錢唔係更易推高通脹嗎?

曾司長係有遠見定短視??

10年後曾司長可以退休已經唔關佢事, 金融海嘯期間市民面對既壓力佢知幾多?

我們想既事而家係金融海嘯後的一個喘息期, 唔可以退稅/現金注資讓我們減下壓,舒緩一下嗎?


最後想同曾司長講一句話, 堅持係一件好事,但係眾人反對仍堅持就並非好事, 呢D叫死牛一面頸.....


DENNIS

匿名 說...

我覺得呢份財政預算案只係無理過中產囉。
因為無政棍幫我地鬧佢,所以"弱勢"既綜援戶同公屋居民可以"出雙糧"同埋免租,成班交緊稅既中產就食屎囉。

如果曾SIR真係因為怕通脹而唔退稅,咁唔該CUT埋個雙糧。請問,你覺得中產收到錢儲起佢既機會大丫,定係D連儲蓄動機都無(儲太多錢會過唔到資格審查的!)既"弱勢"綜援戶大丫拿?? 唔通佢地既消費就唔計入通脹??

其實咁多位兄弟,你地用財金知智慧黎睇呢份財政預算,會唔會實在太高估財政司司長?? 佢唔係用財金智慧黎SET預算的,反而似係為政治需要服務。中產無政治壓力,咁唔俾佢襟住黎打咩... 想退稅,出咗中產版社民連先先啦..... 唉.....

匿名 說...

我老婆說的好:有人請了我們吃菠蘿包。

$6000的MPF,計算管理費,基金經理的失敗投資,和通脹能數字後,30年後,真希望還能吃上這一口麵包....

我們兩口子都不是什麼財經專家,只知道這些年來參與MPF 這偉大實驗,到頭來不要說抗通脹,能有回報已經要感謝上帝了。我想這$6000,只會是我那照面也打不了一下的基金經理的美點吧!

HKaladdin 說...

唉!! 強積金根本就係一個特區政府最失敗之作。由始至終祇有基金公司受惠,打工仔祇有賠本的份兒。強積金個pool已經有3千6百多億而且每年遞增,代表強積金管理公司每年穩賺三十多億,呢塊肥豬肉愈來愈大... 可憐供款嘅打工仔 !!