2011年4月6日星期三

清明後話

俗語話,有咩,留返拜山先講﹗原來人行加息,都係要留返清明先嚟加。

正確嚟講,應該係大時大節,先嚟做世界。假期加息,市場多啲時間消化,唔會影響個市。

真喎﹗上證指數企穩三千點。

可憐班經濟師.....同埋有返工既同事!

今次加息,唔單止剝左陶冬同高盛棚牙,就連自己人易綱都犧牲埋。十日前先講過,目前利率水平「好舒服」之嘛。

但話時話,又唔算好出奇不意。

中央行政手段壓物價,三月通脹可能再破5,同中央百分之4目標,差天共地。

為面子、為民生,更係打定預防針﹗

打完針之後,大家會問,療程完未呢?

華爾街日報話,高通脹,低利率,老百姓儲蓄會被蠶蝕。

不過,企業同政府喺金融海嘯後,借落一大堆債。最大債主就係中央,做咩要係咁加息先?

第二個理據係,通脹第二季將會見頂。而除左通脹之外,其他數據,都反映經濟增長開始慢落嚟。

再加,真係會頂唔順。

無錯,好似內地中小企借錢,基準貸款利率係6厘,但實際上俾緊十厘,資金成本高,走投無路,唯有停產,炒人,閂廠。

到時,就算經濟唔潛水,失業率都坐火箭。

所以,佢地估,息,會繼續加,甚至會繼續喺假期加息,但密密加,可能性就唔大。

不過,人行政策委員李稻葵,漏夜喺微博留言,話人行加息,係要解決負利率問題,當負利率成為常態,會影響金融穩定。又話,解決負利率問題任務仲未完成。

那嶵豈不是即係仲要加多一厘息???

亦唔需要擔心,加息會引入更多熱錢,因為通脹已經殺到埋身,就連歐央行都放晒風,可能加息,隔離嘅英倫銀行,今次唔跟,下次都要跟。

似乎暗示,加息周期,仲未接近尾聲。

唯一變數係,就係坐喺直升機上嘅伯南克。令中央調整貨幣政策,明顯係有啲滯後同被動。

又唔可以怪晒人﹗歸根究底,都係內地經濟,存在深層次茅盾。

中央信唔過,老百姓唯有死慳死底,自求多福。

政府要振經濟,就猛咁投資。

末日博士魯賓尼最近都專程去大陸打個轉,話自己「深入探討」左內地經濟模式,認為單靠投資推動經濟增長,過多兩年就玩完,到時分分鐘「硬著陸」咁話。

但要真正改革,起碼廿年。

佢獻計,話中國可以再加快人民幣匯率升值,同利率市場化,最緊要,全國加人工﹗不過,問題如果咁容易就解決到,亞爺就唔使次次都靜雞雞拜山先做野﹗

1 則留言:

匿名 說...

moneycafe,
小弟真係唔明白點解你地開市埋位,埋到9:30開市都完全冇理會實際開市狀況,反而overrun, 繼續chit-chat當日嘅topic, 跟位35,36分重走去賣廣告,咁究竟你地開市埋咩位呀? 整個countdown clock都冇用啦啦.. 你對面台"搭正"就成村人直報所有現市市況,清清楚楚,唔該速速改善o下, 因為你地呀Jim哥真係有料過哂嗰d mud大師 mud大師, 可以撬到觀眾..

講開countdown clock, 請你快快移位到台號之下, (即左上角), 真係不太明白點解你地可以完全ignore嗰clock時不時就overlap條藍色alert bar? 重有改足幾年版面, 整極都唔可以改善name card overlap 條藍色alert bar 嘅問題? 我明白你地已經好努力去改, 但你地美術組真係仍需努力, name card係就改咗樣, 但換湯不換藥.. 點解唔嘗試o下其他方法, 將所有info 用同一種output/bar 輸出? 我睇過有網民提及嗰d彈出彈入嘅bar, 你地moneycafe都做到, 點解平時唔得呢? anyways, add oil la!