2011年5月14日星期六

網絡盛宴

與美國今天經濟「半紅不黑」相比,矽谷就像天堂一般。

獵頭公司四處尋找CEO人選,薪酬已超越華爾街,並同HOLLYWOOD睇齊。

租金飊升、著名品牌食肆全數落戶。

這全賴一些科網併購,令企業估值水漲船高,好像FACEBOOK未上市,估值已逾760億美元,甚至超越波音及福特這些巨企。

最新另一例子,是微軟以85億美元收購Skype,成為左科技界一件大事,亦係Steve Ballmer 喺蓋茨09年離開主席職位之後、最進取既一次收購。

唔少外界都揣測,巴爾默好希望可以透過收購Skype,可以令微軟喺smartphone市場,追番上蘋果同Google。

難怪佢咁心急,因為喺上一個季度,微軟唔單止市值、連盈利都首次跑輸比蘋果,又點會唔令Ballmer 唔著急!

85億美元當然睇來唔少,不過即使交易以全現金方式完成,都唔會令微軟現金儲備減少幾多。

截至3月底,微軟擁有現金一共有502億美元!

經營左八年,Skype既優勢係提供語音、視頻如Sharing服務,表面係利補足微軟Windows Phone作業系統既短處。

05年10月,eBay斥資26億美元收購Skype,當時已被市場認為係天價。eBay後來放棄對Skype業務整合,09年將70%股權賣給私人公司SilverLake,售價20億美元。

到今日按微軟85億美元成交價計,eBay小賺,SilverLake就係大賺三倍,而且收購價亦遠高於之前市場對Skype IPO估值既定價,因為係相當於EBITDA既32倍!

如果由企業角度分析,更大意義在於收購Skype有助微軟喺廣泛睇好既移動互聯網市場、恢復活力。

之前,微軟被譏諷好似係上世紀末既IBM翻版,全因Smartphone同 Tablet既興起,令Skype比以前更有價值,唔單止成為桌面電腦一部分,更係移動設備中必裝。

而作為大趨勢,未來電信運營商點配合亦係關鍵,相信佢地更有可能、要徹底轉向網絡電話服務,Wi-Fi同3G網絡既視頻通話將更常見,並開始喺企業層面被廣泛應用。

仲有一個賣點、係Skype擁有六億活躍用戶,舊年增幅超過兩成,正係Social Networking一大賣點,呢個都係微軟一直想打入既重點市場!

大家目前關心、到底微軟係咪可以翻身?

如果喺搶得灘頭後、微軟可以搶攻,係仍然有機會同蘋果以及Google三足鼎立,但如果仲係死氣沉沉,創新乏力既話,當然難免走上摩托羅拉同諾基亞既梟雄末路。

今次交易,亦都引起一個更大既Topic,就係科網係咪再次有泡沬?

呢個都係今期經濟學人封面專題,其實泡沬係咪形成,只係睇下呢間公司股價表現都知!

人人網上星期上市,第一日係威係勢、一度急升過七成,不過到左上個星期,股價唔單止大跌,仲穿埋招股價水平,金融時報形容、係中國既網絡股盛宴、已經散席!

呢間曾經被稱為中國「臉書」既人人網,其實上市前最後一刻、已經響起過唔少警號、例如更改用戶人數、又撤換左CFO,不過市場只係選擇視而不見。

經濟學人話,泡沬最容易爆破,就係呢類公司由私人轉到上市,取得高估值同時,投資者大部分都唔知道公司既業務,以及內地既政治風險,一旦佢地開始面對內地加強審查、或者有任何財務醜聞,都可能引發大規模拋售。

不過經濟學人都引用名言,就係當泡沬爆破之後、大家先會發現原來自己係喺於泡沬中。情況一如2000年佢地過早提出警告,證明「非理性亢奮」、根本唔可能由理性分析準確預測到。

沒有留言: