錢往何處?

人行之前公布，全國４月分住戶存款，減少４千６百幾億。

呢個數字好明顯，係話俾大家知負利率有幾慘，兼且短期內無解決跡象。

正當香港無晒港紙存款，原來內地都問緊同一個問題，究竟啲錢去晒邊？

買樓？中央係咁調控，大城市又有限購令，想買多幾間嚟收租，都唔係咁易。

買股票？Ａ股創兩年最長跌浪，似乎又唔係。

仲有咩出路？有報紙列出三大可能性，一齊參詳吓。

第一係買商品，理由係金價強勢，今年內幾次創新高，自然吸引富戶注意。

其次可能係買銀行理財產品，勝在有人幫你管，唔駛頭痕。實質流入金額幾多好難統計，不過今年頭四個月，發行嘅產品有５千４百幾款，按年升近一倍三。

最後，暴發戶嘅通病，都係鍾意晒命。最好辦法就係買藝術品，可以保值之餘，同時擺喺屋企當眼地方，又顯示到自己有品味。

唔少嘢㗎。舊年內地嘅藝術品市場，拍賣總額５７３億，佔全球交易額兩成三。今年睇嚟仲會再升，舊年張大千幅「愛痕湖」，成交價１億零８十萬，破盡現代畫嘅成交價紀錄。

幾時再破紀錄？元代王蒙名画《稚川移居圖》，已經起價1.6億，真係指日可待。有內地嘅拍賣行老行尊仲話，過多三、五年，藝術品成交價過億，會成為常態。

不過要炒呢種另類商品，真係好睇時機，因為同炒股票、商品唔同，價錢資訊一啲都唔流通，無圖睇。基本因素亦只有一個，就係班有錢佬多唔多錢駛。

四千億存款去向之迷，係咪真正走曬去藝術品市場，或者經營民間貸款，真係唔知。當然，班內地豪客可能仲係落緊嚟，日駛過百萬緊掃名牌，但聽聞亦有唔少四出套現!!

中環人話，近日見過有拎住堆名畫、古玩、紅酒既中間人四圍兜售。查問之下，賣家係內地，據說部份紅酒仲係超級難搵。

明眼人一睇就知，而家嘅市況係奇貨可居，但竟然要割價套現。莫非......

要更留意內地資金，似乎以後更要留意埋澳門賭彩收入，如果高位回落，趨勢持續，即係話正式散水!