2011年5月14日星期六

科網打手

美國互聯網界近日四出點火頭,矛頭直指科網泡沬重生,先有微軟購Skype,之後的內地網及FACEBOOK估值亦飽受質疑。

既然如此,一於分兩日談談這股科網熱。

內地網令唔少美國原創人眼紅,近日不斷批評內地網股估值驚人,仲話,納斯達克無論升跌停板,同神秘買賣盤名單,其實全部係內地為主。

而最新一宗質疑,就是阿里巴巴同雅虎糾紛。雅虎死咬唔放,話早於舊年八月,馬雲已經私底下將支付寶轉歸名下,但無通知董事會。令到問題更複雜之餘,更觸發企業管治問題。

事實係、阿里巴巴,同持有佢地四成股權嘅雅虎,一直貌合神離。近日,更由無合作,變為不和,甚至翻檯「打交」。

事緣係,阿里巴巴旗下最值錢資產,係「支付寶」。但阿里巴巴集團內部突然將「支付寶」,轉讓俾比創辦人馬雲。阿里巴巴一直無公開件事,最後要由雅虎,透過向美國證監會披露踢爆。

美國傳媒追問之下,阿里巴巴母公司終於話,將「支付寶」轉移到馬雲控制既公司手中,係要符合內地相關法規。

由於懷疑利益受損,兼且內地發展唔明朗,雅虎股價大跌。

美國投資者不滿、有理,中美戰略經濟期間,中方仲高調話,確保外資在華利益,但言猶在耳,雅虎隨即做左受害人。

雅虎係喺05年入股阿里巴巴,不過近年雙方關係轉趨緊張,阿里巴巴多次想向雅虎回購股分。但對雅虎嚟講,阿里巴巴佔佢地每股十二美金,要賣除非好價。

而且當年,雅虎為打入中國,入股阿里巴巴,讓步太多,多年嚟無話事權,甘願做二奶,已經一早令股東不滿!!

月初先大手買入雅虎股份既一間美國對沖基金GREENLIGHT。對於佢地竟然睇中呢間沿地踏步,遠遠被GOOGLE超前既前搜尋器一哥,原因都是淨係阿里巴巴價值,已經高過曬一隻雅虎!!

部份激進雅虎股東話要訴訟。心水清既人就話,馬雲正正係借支付寶呢件事,逼雅虎妥協,接受佢地回購建議。

雅虎,同阿里巴巴糾紛,除左個人恩怒,更深層次係帶出外資要進入內地互聯網市場,到底要受幾大限制。

支付寶重組,由馬雲全資持有,如果信真正理由係要配合內地發牌,亦即係話,內地互聯網政策,正正係排除外資,連中外合營項目都唔容許。

亦即,GOOGLE當日唔讓步、係正確一步。FACEBOOK亦無需要再幻想,打入中國。

我地講過,內地封閉政策,令內地翻版土炮、勝者為王,估值貴過原創人。可能出於眼紅,或抗議,美國主流媒體已經出現一股「倒土炮網」運動,不斷對內地互聯網收入模式、同估值質疑,率先受影響,係人人網。這說的是後話,下次再講。

至於美國互聯網圈另一火頭,FACEBOOK原來同網絡搜尋器一哥 GOOGLE有關。

事緣係GOOGLE準備推出「SOCIAL CIRCLES﹝社交圈﹞」服務、令到佢同朱克伯格創辦嘅FACEBOOK、响社交網絡市場嘅競爭更加激烈。 

於是,朱克伯格想出絕招,就係搵公關公司。但記著,佢地唔係請人幫手唱好自己,而係假手於人,唱衰競爭對手。

FACEBOOK搵左著名公關公司博雅發佈對GOOGLE不利嘅消息,例如話佢未經用戶同意,就分享個人資料。又要求傳媒調查今次事件。

都未夠,博雅仲聯絡網誌作家「索菲安」,想佢寫篇文章「唱衰」GOOGLE。偏偏FACEBOOK就係咁棋差一著,索菲安不單只拒絕,仲將公關寄嚟嘅電郵公開,令到事件曝光。

被揭發,但FACEBOOK死撐,話搵博雅只係要佢地幫手,做的關注私隱權既公關活動,完全唔係要抹黑對手。

但無論行內,以至美國公關界都話,FACEBOOK今次水洗唔清。有公關公司直頭話,FACEBOOK太低招,反效果太大。

華爾街中人話,FACEBOOK可能太快就太成功,令佢地心胸太窄。而佢地做咁多小動作,其實係為提升形象,為上市鋪路!!

沒有留言: