2011年7月4日星期一

預測

愈睇得多股市,資產價格上落多,愈會發現,大多數時候,作為市場升市,跌市嘅理由,其實相當「求其」!

今日嘅利淡消息,明日可以成為超級利好因素。

呢種因素變型概念,內地經常發生。

之前話,經濟數據差,造成跌市。結果,經濟數據真係好差,但善忘既市場,已經變型認定為利好因素。

呢個問題,背後其實正正解釋,投資市場其實係建基於預期。無預期,無幻想,股價唔會郁。無恐慌,驚緊未出現既事情,個市唔會跌。

建立預期,好大程度上,係受制於市場資訊,又或者係分析師預測。預測如果普遍係好,市場期望自然會高。

喺市場行先於一切情況下,由預測,影響市場情緒,再左右市況升跌係目前金市場遊戲規則。最掌握呢種玩法,當然係高盛,商品,油價早排走勢,大家領教過。

當今賣分析為主既投資市場入面,經濟數據,同企業盈利預測,對市場走勢起第一步關鍵。

高盛資產管理主席奧尼爾,之前做左個研究,結論係如果外界經濟預測分析可以準備一些,咁市況亦唔會咁波動。

可惜,奧尼爾仲係高盛首席經濟師時期,你問佢試過幾多次調整經濟增長預測。單係按季預測,一位分析員可能最少三個月內修訂兩次。由於調整太頻密,咁亦帶出經濟數據出到嚟,符合預期,或者勝預期,到底仲有無需值得咁興奮呢!

換一個角度諗,一間公司,經過分析界三番四次調整預測後,出嚟嘅業績先至符合預期,係咪值得睇好呢。當然,市況好時,市場會選擇進一步睇好,但市況差時,企業盈利勝預期,又其實對市況毫無刺激。

例子之一,係金融海嘯時期,其實美國企業零八年第三季,至零九年第一季,盈利勝預期既公司比重,有59-66%左右。但最後,個市咪又要跌!!

有人不禁問,到底經濟同盈利預測,係咪一個自己呃自己嘅遊戲。一個經過不斷修改既預測,就算最後係準確,又算唔算勝之不武呢!!

套用現實情況,外界之前睇淡美國,經濟數據好,公司業績好,預測一早已經連番下調。所以,如果嚟緊數據真係好好,根本唔應該意外。但連預測都唔信,又信咩?!

有人話,信兩樣。就係,憑直覺,然後再細心判斷!!! 最少贏錢會贏得特別高興,輸錢會輸得更心服口服。

摩根大通行政總裁JAMIE DIMON,十本必讀投資書之中,兩本正正由巴菲特師傅撰寫,分別係智慧投資者,同證券分析大法。長線價值投資呢套,依家未必得,但老人家五、六十年前分析股票一套,原來萬變不離其中!!

沒有留言: