數據不數據

呢個星期全球金融市場、都係關注內地經濟同貨幣政策變化。

人行就喺星期三加息，當大家焦點逐步轉移星期六公布既通脹數據，人行行長周小川就選擇呢個時候話比大家聽，呢個數據唔再重要!???

揀左喺周末公布通脹數據前加息，事隔兩日，周小川就話，通脹唔係唯一嘅貨幣政策目標。

喺清華大學論壇上，周小川提到，喺經濟由中央規劃轉型期間，係可容忍一定程度既通脹水平，又指喺控制通脹既問題上，貨幣政策係需要時間觀察效果。

市場一般估計六月既通脹率、會達到百分之六點三，創近三年新高。

但周小川話，六月數據被推高，原因係「翹尾因素」，

周小川話，中國貨幣政策有四個目標，包括低通脹、經濟增長、較高就業率、以及國際收支大體平衡，通脹唔係唯一嘅目標。

罕有喺公開場合講到貨幣政策工具，周小川話，內地一向係結合使用數量型工具，即係存款準備金率，以及運用加息呢類價格型工具進行調控。

佢話一般情況下兩個政策工具作用係相同既，不過有時收唔到預期既效果，可能係同「負利率」有關。

因此有時候使用數量型工具，會比價格型工具理想。

當中最值得注意，係話需要時間觀察貨幣政策成效，係咪即係代表今次加息後，會有好一後時間都唔會再調整利率?

同樣令人奇怪係，周小川首次提到貨幣政策四大目標，除左大家聽慣既「抗通脹保增長」之外，仲提及「相對較高既就業」，似乎都代表左下半年貨幣政策真係有變!

雖然今次發言係喺清華大學、係屬於一次學術性發言，不過貨幣政策呢個咁敏感議題，周行長罕有咁作出咁解釋，怕且都係有微言大義。

以此推斷，難道真係可以七翻身?