2011年7月12日星期二

紅旗飄飄

民企管治,響起警號,連評級機構都加入評分。

穆迪以「紅旗」方式,評核公司管治質素。

紅旗愈多,代表公司管治,愈值得投資者關注。最多拎20面。

首次俾分,穆迪話,最少有61間中資企業,存在管治風險。

穆迪質疑公司管治質素,最有問題,不過西部水泥喺接受我地訪問時話,唔明穆迪嘅評分標準。

睇返穆迪嘅評級標準,當中的確有唔少值得商榷地方。

二十個評分項目中,好似係上市時間少過三年,又或者係頭5大客戶,佔公司收入超過三成,都會被視為「客戶過度集中」,要「俾黑豬」。

又好似藍籌中信泰富,早幾年炒燶澳紙,北京中信派現任董事長常振明做「救火隊」,加上投資新既鐵礦石業務回報需時,結果又中左管理層換班、同業務未有正現金流兩個失分項目,被穆迪視為「有問題」。

除左西部水泥,多間被「遍插紅旗」嘅公司,都出聲明回應。

其中,永暉焦煤話,唔適宜對穆迪呢類第三方報告作評論,但強調,唔代表佢地默認接受報告,對佢地嘅判斷或結論。

禹洲地產直情話穆迪攪錯,澄清佢地喺過去三年,都無換過核數師。

佢地由零九年上市到而家,一直都係由安永做核數師,無變過。

可能因為市場動盪,為免重覆3年前錯誤,評級機構越變越勇,實行清兵心口掛上勇字。

歐洲問題,穆迪、標普有個勇字。

中國地方債務問題,兩間評級機構,亦係勇字當頭。返到美國,就得個講字!!

標普,穆迪之中,行為最出位,莫過於穆迪。十四萬億內地地方債,審計署,人行不滿。依家踩過界,做埋內地民企管治報告!

穆迪推廣透明度,希望俾外界更了解民企,無問題。但將公司插旗,旗越多越有問題,呢種運用權威、對上市公司實施標籤制,唔符合評級機構獨立客觀,對公司、同睇穋迪報告客戶,亦唔公平!!

穆迪最對參考佢地報告既客戶唔公平,亦令客戶帶嚟矛盾。

無錯穆迪話,紅旗報告唔會影響公司正式評級,即係評級還評級,紅旗還紅旗。

但舉個例,穆迪俾一間公司正式信貸評級係A,理論上好正!!!但同時俾呢間公司十二支紅旗,咁作為參考報告做決策既人,信A、定信十二支旗好呢?

俗語話野唔可以亂食,有的遊戲亦唔可以攞嚟玩。

為取悅讀者或者引起投資者注意,證券研究部可以搞啲出位主題報告。但記住,評級機構唔係研究部,兩者身份好大分別!

市場愈多矛盾,從好方面諗,有助判斷自我理性分析。

對被插旗六十二烈士,亦係一樣。如果生得正,企得正,據理力爭,穆迪呢份紅旗報告,公信力有否,外界會有理性判斷!!

沒有留言: