2011年7月20日星期三

蘋果專門店

蘋果愈成功,可能睇到中國人愈醜陋!

先睇下幾幅相:



蘋果專門店。

地點係,昆明。

入面裝修,格局,產品,同蘋果專門店一模一樣。

但衰在,蘋果官方資料顯示,佢地只喺上海,同北京有官方專門店。即係話,相中全部係假,估唔到翻版iPhone外,連老翻專門店都搞埋!

要識破,話易唔易,話難唔難。行入去,多數俾佢呃左。根據到過現場嘅顧客話,個個職員著住蘋果T SHIRT,掛著職員牌,但職員牌上通通無名。

到過老翻專門店嘅美國蘋果FANS,五日後舊地重臨,土炮專門店無左。

但唔使失望,因為附近仲有好幾間。你睇下,部份門口仲串錯字。

將STORE,串做STOER,太失禮!!

中國好想有蘋果,又或者老翻大王好想借蘋果賺錢,因為蘋果產品好賣之餘,論當今全球最佳企業,無辦法,別無他選。一定要選蘋果。

論回報,一隻股份不斷創新高,四百美金破埋,作為股東,似乎無任何東西可以批評。唯一嫌棄,可能係一間現金牛公司,點解股東仍然無息收。

如果睇蘋果,滾存現金七百億美金,係好多上市公司十年都儲唔到嘅金額,但稅佢地累積只係俾八十幾億美金。要唔滿意,到美國政府,都未輪到蘋果股東。

的確,一間增長有保證嘅公司,增長就係股價上升嘅保證,現實嘅股票市場有幾多公司既派息高,又有超高增長。

美國政府亦唔好介懷收稅收得少,事關人地大部份盈利,係嚟自海外,特別係我國市場。

作為企業管理,市場學教材,蘋果亦係好例子。佢地係一間只求創新,從來無需要過份擔心市場競爭,市場佔有率被威脅嘅公司,更重要,一間公司生產一百件貨,賣足一百件,完全唔使理存貨過多問題!!

點利用供求關係理論,製造市場需求,講落好易,但要做好似只有蘋果成功做到。

作為全球巨企,蘋果最叻係投資者關係一環做得絕。簡單講,蘋果百分百懂得控制投資者預期,所以只會令你驚喜,唔會令你失望。

呢一點,反映喺蘋果每次做嘅業績預測身上。以對上四季為例,蘋果每次出嚟業績,都比本身預測平均高出一成六。

蘋果一直用「唱低開高」呢一套,所以製造出每次業績都好過預期,亦係令股價保持高位秘。

蘋果最新為截至九月季度定出收入預測,估計有二百五十億美元,代表會倒退12%。如果市場係認真看待,老早就結論話蘋果睇淡前景。

但聰明投資者,一早睇穿蘋果呢一套,華爾街分析員更指,蘋果對業績預測,根本唔使再認真重視。

華爾街稱得上股王,隨著高盛末落,只淨蘋果一隻,今日蘋果繼續憑創意,懂得製造市場,兼管理投資者預期依然稱王。

蘋果為王,造就中國繼續造全球老翻之王,小本經營,搵快錢繼續開多幾間老翻專門店。大企業,無創意,咪繼續樂Phone,樂Pad!

所以喬布斯想加大內地分銷網絡係有逼切,因為愈多人買到真貨,就係最有效打假方法!

沒有留言: