神話沒落

股本回報跌至百分之六。

定息以及商品交易部門收入跌五成三。

願意每日承受風險只有一億美元，係五年最低。

更重要係要裁員。

無人相信呢分業績係來自曾經號稱全球最賺錢既投行高盛。

首席財務官維尼爾話，今次業績係九九年上市以來最差既一分，雖然唔想承認，不過高盛的確係跑輸同業。

盈利咁差，原因係高盛炳棄左投行「高風險、高回報」原則。

高盛上季VAR、即係每日可承受最大風險，急跌左兩成六，降至一億美元，係零六年以來最低水平。

連維尼爾都承認，冒咁低既風險，可能係做左一個好差既決定。

另一個致命傷係睇錯市。

高盛今年來兩度轉軚先唱衰、再唱好商品市場。

原本以為可以「舞高弄低」商品價格，但華爾街日報話，高盛反而因為商品價格過於波動、承受左更大損失，包括炒燶期油同期銀。

面對市場排山倒海既失望情緒，高盛計劃今年年底前裁員１千人，佔現有員工百分之３，今年中以來，多間華爾街大行都先後裁員，好似瑞信同巴克萊都裁減左數百個員工，道富亦公布左裁員八百五十人。

不過單靠裁員似乎救唔到高盛，金融時報話，高盛最大危機唔係一兩次睇錯市，而係投資者普遍開始減少風險投資，呢個可能會徹底改變高盛既營運模式。

華爾街日報就話，投資者可以原諒高盛一次錯失，不過對於比員工既福利雖然減少，仍然維持喺佔收入總數44%，但股本回報就跌至百分之六，就係股東唔可以接受。

一旦新既監管條例進一步打擊高盛既交易部門，咁呢個投行神話既經營模式，可能已經時日無多。