脫軌

上星期王彤世王行長先上moneycafe，當日提到不少親身乖坐內地高鐵、高架公路及天橋的驚險場面，當日還可以笑言不敢多乘高鐵，豈料言猶在耳，高鐵已發生嚴重災難。

兩列動車相撞，唔單止造成嚴重嘅人命傷亡，就連宏觀經濟轉型，都可能脫軌。

新任鐵道部長盛光祖上台無耐、已經表明，高鐵投資總額會減少，英國金融時報話，今次事件肯定進一步拖慢投資計劃，仲影響埋經濟轉型嘅部署。

一心諗住、改以基建推動經濟增長，全速推進，高鐵建設，

計劃喺十二五期間，總共投資３萬５千億，當中一半，都係同高鐵有關。

國產高鐵系統，亦已經衝出海外，幫助中國經濟，轉型至高增長模式。

好似今個月，鐵道部就取得馬來西亞合約，計劃出二百幾部高鐵列車。

南車集團更加同通用電氣簽訂協議，將版圖擴展到美國。

以為可以老翻日本子彈火車可以科技救國，點知，接二連三嘅意外，加上有官員被拖下馬，令到呢個轉型龍頭，一再開倒車。

雪上加霜嘅係，鐵道部缺水。

目前鐵道部負債總額，有近２萬億，比兩年前，急升３倍。

想集資咩？都好難。

上星期，鐵道部公開拍賣一批債券，罕有咁出現流拍。

大行話，鐵道部負債比率極高，發債成本又不斷增加，事件可能引發重組。

撇開短期股分表現不談，鐵道部原本想加強市場化、希望以更具成本效益嘅模式營運，但經過今次事件，如意算盤，應打唔響。

了解內地債市運作，就知道鐵道部係目前唯一以政府名義、發行企業債以及短期融資券既「發行主體」，具備政府信用。

目前仲未到期債券總計有5655億元人民幣，其中鐵路建設債券就超過三千七百億。

近年高鐵高速增長的問題，早已同地方政府融資平台一樣引起關注，作為鐵道部債券最大買家，多間大型銀行持有既債券量已經超過上限，加上今次溫州事故，因此係暫停再購入鐵道部債券。

有債券投資者更喺微博表示，過去只係擔憂鐵道部財務問題，而家連運營都出問題，相信好難再搵債券買家。

當然，由好處想，就是希望阿爺可以好好趁今次機會，郁手收拾呢個一向以官僚見稱的鐵道部，令改革可以真正推行。