股票戰爭

主權債務前景未明、新興市場又擔心硬著陸，更驚係環球經濟雙底衰退，利率期貨已經顯示澳洲同歐洲央行下半年有減息機會。

投資前景未明，今年以來對沖基金都減持風險資產，

大戶如索羅斯旗下既量子基金，大部分資產更換成現金。

總值２５５億美元既量子基金、今年以來回報倒退左百分之六，負責人安德遜、喺今年六月中，決定大手減持風險資產，現金比重更增至七成半。

而整個投資經濟趨勢既「宏觀」對沖基金行業，面對今年回報亦少左2.25%，令整個行業持有現金比重，由五月既百分之六，跳升至一成八，係一年來最高水平。

而行業既「低風險」資產、淨比重亦由五月既一成半，顯注增加至兩成六。

歐美債務問題，亦令全球最大對沖基金公司BRIDGEWATER關注，佢地話全球新一輪危機由債務引發愈嚟愈明顯，相信債務問題會先觸發貨幣，同債券大幅下跌，唔排除全球最快經濟明年崩漬。

講到好似靠嚇，呢批著名基金因為睇唔通後市而忍手，不過亦有著名既操盤人決定自立門戶。

前摩根士丹利亞太區固定收益部門主管劉嘉凌，就夥拍內地信達資產管理成立一個絕對回報對沖基金，最快八月就會進行投資，初期管理既資金達一億美元。

曾經主理亞洲最賺錢部門，劉嘉凌管理既基金，主要係投資喺證券、信貸、外匯同商品市場，投資者主要係以亞太區既金融機構為主。

同樣係星盤操盤員，今年四月由前高盛坐盤交易部主管施家文負責既對沖基金，由於管理既資產達到二十億美元既目標，已經決定暫停唔再接收新客。

好淡似乎反有所好，不過正如Pimco董事經理埃爾阿利安形容，依家股市正處於戰爭中，相對較健全，同業績好嘅企業利好因素，同全球宏觀經濟不明朗嘅利淡因素，正在大決戰。

同仲堅持明天會更好、仍然相信歐債，美債，甚至內地唔會出事嘅一派天真，加幻想、繼續叫人入市嘅意見相比，埃爾阿利安嚟得老實，佢話，佢真係唔知後市點，只係知離唔開繼續波動!